《今夜，穿过淮海路》丨诵读者：金丽萍

今夜，穿过淮海路

来源：新民晚报

作者：马尚龙

改写：周红缨

每个人个记忆里向侪有一条属于自家个淮海路，每个人侪以自家个姿态搭仔心境穿过淮海路。

今朝夜里，我穿过淮海路，所有个元素，加上夜个晦明相间，突然之间，“穿过”两个字立体起来。是侬穿过了淮海路，也是淮海路商圈、人潮穿过了侬。行走勒夜里个淮海路，有得迷离个灯火相伴，搭浪漫夜色共舞，又何尝勿是淮海路商圈搭仔人潮个联袂填词呢？

作为“一眼淮海路”摄影大赛个特邀评委，我勒热情个读者发得来个照片当中，看到了伊拉个“一眼”里，有潮流搭仔经典个汇聚，有得优秀历史文化建筑个今与昔。现在，生活个节奏越来越快，脚步越来越匆忙，反倒是更加需要勒两个行程之间有个小小个停息，葛末。到淮海路来走走看看，倒是勿错个选择。

交关照片拍个是淮海路浪个商店，20世纪90年代，淮海路搭仔以淮海路为主轴个周边马路发生了邪气大个变化。无论是马路个气质，还是商店个调性，甚至于楼宇个变革搭仔市民个喜好，侪不可同日而语。但是，今朝个淮海路搭仔昨日个淮海路，侪是我伲欢喜并且钟情个淮海路，是我伲个情感寄托。

还有交关人拍摄了以淮海中路为主轴个周边区域，包括长乐路、复兴中路、重庆南路、瑞金路、茂名路、陕西南路等，此地有得上海最密集个老式公寓。迭些公寓最初个居住者，大多数是医生、教师、演员、职员。伊拉个个人修养搭仔对时尚个追求曾经领一时之风气。伊拉个气质搭仔腔调一度成为上海人追随个时尚，同时，也造就了淮海路个独特品位搭仔风格，一种属于上海个“摩登”。

我从出生到46岁，一直住勒光明村旁边个淮海中路584弄，所以，我搭交关老邻居一样，对淮海路个感情是长年累月“酝酿”出来个。虽然迭趟摄影大赛以“一眼淮海路”为题，但是，我始终觉着，只是看“一眼”是根本勿够个。看过了，还要细细个品读一下，甚至要追问一下，为啥淮海路个品位搭仔风格迭能介个独特？是啥个造就了伊？是啥个催发了伊蓬勃个生命力？带仔每个人对伊个独家记忆，请侬再来看一眼淮海路伐。

淮海路，相见永不晚。