南音《玉葵寶扇之碧容探監》區君祥 附曲詞

生舉目，淚灑濕衣

多謝妳哋有心來探我，且聽我說衷詞

妹啊我哋呢段婚姻非兒戲

仲有玉葵寶扇詠題詩

又有聖旨為媒非閑事

因何妳父立亂施為

無故拉我到公堂

確係慘無道理

用嚴刑來逼我，打到我血肉橫飛

將我打成招來定死罪

三天之限就要我命喪陰司

妹妳便快回家歸去另偕婚事

我祝妳夫妻快樂舉案齊眉

祝你舉案齊眉

碧容不禁悲從中起，

滿懷悲忿哭到淚落如珠

可恨我爹爹太過無道理

今天鑄成大錯可嘆莫挽誓詞

永倫又見還有位女士

請問開頭個位是妹你誰？

我話我係弱質深閨女

來探監無伴，多得大嫂佢將我提攜

羞說話淚沾多，樊牢呢位大嫂嬌娥

我今番大難，難逃過

無從去翻案，恐怕係吉少兇多

但可惜我家中尚有高堂坐

忍令蒼蒼白髪，目送我步入黃河

個位大嫂瓊嬋忍不住同情淚落

恨奴無計助你擺脫囚魔

四面鐵壁銅墻難打破

惟望神靈保佑你早脫網羅

個陣碧容更加愁苦楚

飄飄銀淚湧秋波

你喝到力竭聲嘶鶯喉破

滿懷苦痛，痛入心窩

我怨句我嚴親行此禍

我愿隨哥你到地府見閻羅，

我愿去見個閻羅

嗰位林氏又勸言妳哋唔好咁凄楚

雖是夫妻情重都要暫且拋疏

妳睇太陽西墜申時過

妳好祭奠個倌人莫慢囉

碧容吩咐卿彩排列物果

手挽著提壺叫句我哥哥

哥呀薄酒我斟杯望妳領過

望你痛飲三杯，盡把苦悶消磨

生說話，倫一邊

謝你姑嫂情深一片大言

我再勸多嬌，此后唔好把我記念

莫為我凄涼，莫為我掛牽

你便放心回家轉

歸去另偕婚配，結過一段好姻緣

嗰陣碧容又再回聲勸

哥你莫為我心腸會有變遷

他日我便出家把那梵經念

我愿長齋禮佛坐浦團

設一所靈牌將哥你紀念

奴奴早晚侍奉香煙

齋飯般般來奉獻

但愿他年我死后，與君化作并頭蓮

瓊嬋大嫂又開言勸，姑娘啊！

經已黃昏挨晚你睇日落去西邊

妳亦要打點回家轉

因為提籠未帶

今晚月色又唔全

嗰陣碧容陣覺心如麻亂

難捨難離苦萬千

即時對著肝腸斷

四目交投默無言

梅知府又到來開言勸

把夫人共小姐不若你哋請回先

姑爺自有下官來打點

你哋放心回府，我自會周全

古云道救人一命，尤勝行百善

我愿赴湯蹈火，為蕭公子佢鳴冤

二嬌就答言，感謝你情一片

無奈都要一聲珍重別離鸞

知府梅爺親自送到外便

瓊嬋倆姑嫂起轎往前邊

忽見得遠遠有對大燈籠，照得光火現

嚇得卿彩驚狂，又發亂言

係老爺嚟喎，恐防會畀佢撞見

瓊嬋開口話妳咪發狂先

待我先行與佢會面

咁就連忙下轎在街前

果然係倫爺個乘轎離不遠

瓊嬋前去立即見禮當先

叫句老爺呀我哋現在現在回家轉

因為廟堂擠迫阻滯咗歸旋

嗰陣碧容驚到面青唇白成身軟

逼於無奈都要見禮當先

叫句爹爹呀我共亞嫂去參神還愿

點知人多拜佛如今咁夜至拜完

倫爺當陣時黑起口面

好啦！妳便快快脆轉回先

姑嫂一齊一齊回面轉

再講倫爺打道直往知府衙前

妳哋估下倫爺去到又點呢？

《碧容控監》呢卷經已唱完

我賀喜各人身體康健

多招財利，福壽加添

我又祝世界和平無爭戰

天從人所願

大眾快樂無憂，長生享個晚年