南音《玉葵寶扇之大鬧梅知府 》 區君祥 附曲詞

區君祥

言賀好，各位富加豪，

賀喜齊齊運數加高，

現時開唱《大鬧梅知府》，

碧容預備去探監牢，

長嘆一聲尊稱一句大嫂，

嫂啊我傷心含恨，妳惡為奴奴，

我欲想共君談句肺腑，

願向禪房隱姓做一個尼姑，

個大嫂就開言，姑娘勸導，

姑娘你有事，阿嫂一定幫扶，

好啦！等我共妳出廳堂逢母一告，

不過妳千祈唔好話， 去探妳未婚夫，

妳話共我往廟堂參拜佛母，

咁佢定然從順賜妳登途，

個陣小姐歡心忙躦步，

嬌逢親母亞嫂會家姑，

二嬌襝衽向老夫人來奉告，

我哋欲想上廟參神，請問妳願賜去無，

阿夫人話去拜佛就當然係好，

不過千祈要緊記顧住身份為高，

男女就分清要把面子顧，

行藏更要謹慎免失體模，

個陣姑嫂領遵回繡戶，

素妝打扮得一個青襯藍時一個白襯烏，

綠緞弓鞋如此淡掃，

丹釵頭上插不用粉脂塗，

大家約定在橫門施出路，

吩咐丫環去叫定轎夫

一路擡到知府衙門個度，

一直入到大堂就坐轎

不顧佢低高，

驚動嗰班衙差究竟唔知乜嘢事故，

見住梅香跟尾嘅點解乜柬帖全無，

啟開轎簾二嬌躦步，

（衙差白：嘩！好靚啵）

的確係沉魚落雁真係仲賽過仙姑，

咁我問聲幾位大姐啊，大姐啊妳因何到，

不若請你哋幾位入去差房共盞古勞，

（衙差白：賞下面啦！）

嗰個侍婢答言，哎吔！啋過妳只鹹衰鬼，衰鬼正式濕佬，

鬼就入妳個差房，妳咪想得咁高，

須知男女授受不親從古道，

乜妳言三語四係度亂翕咁胡塗，

有個衙差忍住笑，佢仲裝成嬲怒，

罵聲妳只潑辣丫頭可謂嘴利過刀，

點知驚動橫廳裏面嗰位梅知府，

佢當時就喝問，外邊做乜咁勞嘈，

連忙穿起錦袍帶返嗰件烏紗帽，

忙步出堂前，看過是誰個吵鬧喧騷

騷擾爺爺午睡真真係可惡

嬲到瞪眉突眼，仲翹起把胡須，

用手指住碧容兩姑嫂，

乜妳見官都唔跪，可謂禮教全無，

妳咁大膽闖入嚟，究竟你係誰家婦，

此乃公堂重地，不容妳絮絮叨叨，

個林氏忍不住開聲話奴偏要到，

妳快啲睜開對狗眼細看真下奴奴

(知府白：識妳老鼠呀)，

吏部天官就係奴祖父，

(知府白：妳拋我呀)

我父為閣老現在京都，我家母係皇姨，

我亞叔係太保，我哋長兄為御史，伯父係傳盧，

我哋三兄按察，大抵妳都知名號，佢今年滿任往江蘇，

我哋二兄正直現在將朝護，當今太子都係佢門徒，

奴就係四小姐，瓊嬋係我嘅名號

佈政倫郎係我丈夫，呢位係我哋姑娘，

如今向妳嚟向你來告訴，

我哋今天到來欲想探監牢，

不料你濫用官威，卻令人可怒

太守黃前咪仲你個地位好高，

我睇妳芝麻綠豆咁大粒梅知府，

妳認真係可惡，仲想將奴來欺負係嘛

莫非要奴拆屋避妳呢只無爪擒蟧。

個梅知府聽罷，驚到嗰啲冷汗掂標，

乜佢咁多人馬在當朝，

連忙跪下，把夫人叫(知府白：夫人呀)，

請恕下官冒撞，開罪了多嬌，

我自知有過罪名不少，

還望你汪量海涵把我恕饒。

嗰兩個丫環大姐開言笑，

問聲你個狗官，問你知死未，

係你自把禍招，激嬲我哋小姐共夫人，

呢回你就唔得了

你闖下彌天大禍，你嘅死罪難饒

瓊嬋垂幕將言表

不準賤環鬥膽係處嘴刁刁，

話罷又再將梅爺知府叫，

快打掃凈個監房，解下蕭公子嘅鎖鐐，

係囉遵命一聲，忙把那差人召，

吩咐四圍都要掃凈仲要把香燒，

差役打掃已完回來叫

梅知府引路步入監房，

隱約又聽得苦條條

又只見蕭生瘦線如鶴鳥

確令碧容睇見實覺心焦

姑嫂低聲來一叫

碧容又叫，君擔高嚟望把奴瞧