广播专辑 弄堂茄山胡706 格陵兰岛乘“飞巴”

格陵兰岛乘“飞巴”


许德华


 现在外出旅游大多是乘大轮船大飞机，好处是勿但乘坐空间比较宽敞，而且旅途比较平稳适意。勿过，去年到格陵兰岛西海岸个伊卢利萨特(Ilulissat)白相，乘坐小飞机感觉也蛮扎劲嗰。


 辣丹麦哥本哈根机场看到绛红色夹奶白色个螺旋桨小飞机，搭仔平常乘个喷气式飞机一比，实在小模小样，相当迷你。登机梯是木头做嗰，机舱里客满也只有40个人，坐辣机舱里感觉好像是辣大马路浪乘旅行巴士。


 到了伊卢利萨特，从木制登机梯走下来，七八步就到了机场大厅，入境和出境侪辣一个100多平方米个房间里。运送行李个传送带只有一根，长度5米左右。哈，小麻雀里五脏全！


 伊卢利萨特按格陵兰语直译就是“冰山”，是格陵兰岛第三大个定居地，当地人口大约4000人，大多数是原住民因纽特人。搿搭也是最受欢迎个旅游景点，漂亮个伊卢利萨特冰峡湾就辣迭搭，2004年被联合国教科文组织认定为世界自然遗产。


 格陵兰岛个空中航线勿多，只能通往欧洲个冰岛和丹麦两个国家；航空公司也只有两家，分别属于格陵兰岛和冰岛，使用个飞机就是阿拉乘个搿种小飞机。


 每年6月到8月是格林兰岛个旅游旺季。旅游项目有乘游艇看世界自然遗产——伊卢利萨特冰峡湾、乘船看伊蔻冰川、飞行滑翔登陆冰山，还有3条分别用红、黄、蓝标识个徒步路线。


 我挑选个蓝色路线最费辰光，需要4个多钟头。辣迭个地球北端个巅峰，头顶浪是辣蓬蓬个北极太阳，脚下头是松软弹性个草地和硬邦邦个岩石，低头看是广阔冰川大海，抬头望是极地海鸟盘旋……总个来讲，搿趟算是我顶出风头个一趟徒步旅行！


 辣西海岸蹲了几天，虽然看勿见大树，地面浪只有一簇簇片状块状个蕨类植物，但是蓝天、大海、碧波里悠然穿行个鲸鱼，以及岛上人家个悠闲，让我感觉自家好像走进了“桃花源”。


 然后，仍旧从来个搿条航线返回，签证、安检。辣候机房里看到一幅航线图，画得好像上海个地铁路网图，伊卢利萨特城辣图浪居中，周围上下左右侪有勿少用丹麦文和英文标注个机场。看到搿张图，忽然就懂了，辣格林兰岛搿种地广人稀个冰河世界，假使依靠地面车辆去东海岸搭仔其他地方，勿仅费时，而且一路浪侪要同严寒作斗争，所以伊拉个飞机场就好像公交站，出行乘小飞机赛过阿拉出门乘公共汽车。


 一歇歇飞机就起飞了，辣“飞行巴士”浪看极地，好像鲲鹏展翅九万里！