广播专辑 弄堂茄山胡707 橄榄鲍鱼瘦肉汤

橄榄鲍鱼瘦肉汤


文并图/沈一珠


 读书机会多了，就有了交关同学。


 从小辰光，一道穿开裆裤个小朋友，到职场短期培训，只勿过相处一两个礼拜个陌生人。


 要好起来好像呒啥道理；三观不合，老死不相往来也呒啥稀奇。想想呀，人与人之间，一段长一段短嗰，侪是缘分，强求勿得。


 讲吃之前先来段过门，言归正传，迭趟是檀香橄榄。


 大学期间有一个福建来个同学阿衡，介许多年数过去了，一到新鲜橄榄上市个辰光，伊总归会帮我寄一袋过来。


 橄榄不算是啥贵重物事，吃价嗰，是朋友个心意。


 谢谢侬，阿衡。


 一粒粒檀香橄榄勿大，可以汏清爽，直接摆辣嘴巴里，空口嚼嚼，一开始会觉着有点涩嘴巴。勿过，细细嚼到后来，香甜气味，绵绵勿断。也可以泡茶，绿茶里摆两粒，本来稍微单薄一眼个茶汤，会得丰厚交关。


 橄榄多勿过呀，有辰光我也会翻仔花头吃：试过摆点陈皮、盐、红糖一道，开水煮透，甜津津，是另外一种味道。沥沥干，吹吹风，密封辣罐头里，写字辰光，嘴巴里含一粒，回甘无穷。


 搿几天碰着寒潮，孵空调辰光多了，人整天觉着干呼呼。


 抓一把橄榄，配三五只小鲍，炖一镬子“橄榄鲍鱼瘦肉汤”，是大冷天里一碗清清爽爽个鲜汤。


 材料：瘦肉半斤；青橄榄10颗左右；小鲍鱼5只左右；葱、姜、盐各少许。


 做法：先拿青橄榄汏好，用刀背拍拍松；葱打结、姜切片；瘦肉、小鲍鱼汏清爽，水里汆一汆；所有材料摆进镬子里，清水适量，大火烧开，调小火炖一个钟头左右，吃之前用盐合好咸淡就可以了。