广播专辑 弄堂茄山胡675 聪明人要会“开软档”

聪明人要会“开软档”


文/钱红春


 就辣辣前两天，从来勿缺席早锻炼个老陈呒没来，一打听，原来是伊为一眼眼小事体，对老婆发脾气，老婆一气之下住到儿子屋里去了。伊也是“硬碰硬”不肯低头，一家头辣屋里生闷气，做啥个事体侪呒没心向，早锻炼就更加勿会来了。


 搿天，我喊了几个“拳友”一道去伊屋里，一番劝解，伊终于“开软档”，答应向老婆道歉，去接伊回来。


“开软档”，辣上海闲话里就是“让一步、退一步”个意思。双方意见勿统一，一方主动让步，让矛盾平息或得到缓解，勿至于闹到勿可收拾个地步。


 其实，大家辣生活当中碰着个大多数是小事体，无关大是大非，假使双方侪勿肯“开软档”，最后往往会闹得勿可开交。有邻里之间侪勿肯“吃亏”而吵相骂，打相打，闹得两败俱伤嗰；有夫妻之间互勿相让，吵得鸡飞狗跳，甚至分道扬镳嗰；也有同事朋友一语勿合，反目成仇，从此勿相往来嗰。


 有点人认为“开软档”是胆小软弱；是失败投降。其实恰恰相反，会得“开软档”，是为人处世个宽容；是营造和谐个技巧；是搏击人生个谋略。要晓得，人一生出来就处于各种各样个矛盾当中，假使勿会“开软档”，凡事勿管三七廿一，钻牛角尖，明明自家犯了错，还“死要面子”硬撑，到


 头来勿仅勿能解决问题，自家“活受罪”，也会伤害到别人。搿能看来，会勿会“开软档”是一桩蛮要紧个事体。为了自身平安，为了家庭和睦，阿拉侪应当学会“开软档”。


 或许有人觉着“开软档”有点“坍台”，呒没面子，其实搿是一种曲解。会得“开软档”，是对矛盾发展准确而理智个把握；是让事实或实践来判断是非个耐心和坚持。辣勿涉及大是大非个问题浪“开软档”，既是对自家个保护和负责，也是对对方个宽容和尊重，实在是做人应当具备个文明素质和美德。


 事实浪，“开软档”并勿是一桩难事，关键是要提高自身修养，增强自家控制情绪个能力，碰到事体勿要急于下结论，勿妨先换位思考，多从对方个立场考虑。我觉着，作为老人，作为长辈，凡事要想得开，呒没必要斤斤计较，处处掂量。古人有句闲话:“忍一时，风平浪静；退一步，海阔天空。”辣辣合适个辰光“开软档”是一种智慧。


 现在老陈又来早锻炼了，大家对伊能够“开软档”使老两口能重归于好跷起大拇指。