黄永生-八鸡宴

丁家搭赵家一幢房子，两家人家，合用一间灶头间，4.8平方，原来二家人家关系融恰，最近情况勿佳，为啥么，丁家为了吃新鲜个鸡蛋，违反城市勿许养鸡养鸭，鸡勿敢养辣弄堂里养辣炷头间里，拿板拦一拦。断命两只老母鸡养了蛋，总要自我表扬，刮刮刮刮刮、刮蛋，刮刮刮刮刮、刮蛋。哗啦哗啦叫，影响了做夜班个赵家，赵家搭丁家几次提出意见。从此两家人家结成了冤家，丁家搭赵家经常吵相骂，吵架。㑚听听看，迭种勿文明个声音，啥物事，养鸡养鸡，养鸡犯法哦，老实讲，不养鸡，我伲呒没鸡蛋吃，呒没鸡蛋就呒没营养，呒没营养就呒没力气，呒没力气我那能为四化作贡献，老实讲，侬反对我养鸡，也就是反对社会主义，要死快来，帽子加大，反对侬养鸡就是反对社会主义，我看侬讲闲话简实像后门放气我关照侬呀，嘴巴清爽一点呀，要洗洁精汏一大。啥格我讲闲话是后门放气呀，侬这个算啥格闲话呀，啥话啥话，阿拉绍兴闲话。老实讲城市里就是勿许养鸡养鸭应该全部杀脱。杀鸡，你谈也勿要谈，侬敢碰我一根鸡毛，我就拔脱侬两根眉毛。

好个，吵相骂大家拔眉毛来，倒新式个，呀嗨，老实讲你来拔好了，我勿怕格啦，我眉毛每天画上去个，依拔勿脱格啦。横世横来、侬养鸡我也养鸡，侬养雌鸡我养雄鸡。赵家说到做到，第二天到小菜场买来四只雄鸡，耐是灶头间里闹猛呀，丁家几只雌鸡刮刮刮刮刮、刮蛋。赵家个雄鸡喔喔喔……八只鸡一道叫，那听听这种声音（场下乐队，八鸡齐鸣此起彼）。

伏断命一只带眼镜个鸡叫得来特别扎紧，人家勿叫了，伊还要叫。日脚一长，两只雄鸡熬勿牢了，看中仔对面几只雌鸡，对雌鸡产生了感情，鸡也有感情格，一产生感情，要紧豁领子过去，喔喔喔，意思是谈谈看，谈谈看。雌鸡讲勿好谈个，东家是冤家，我那能谈恋爱呢，所以，要紧回头伊，刮刮刮刮刮、刮蛋，刮刮刮刮刮、刮蛋，意思是讲，勿谈勿谈。雄鸡想为啥勿好谈，阿拉自由恋爱，又勿是包办婚姻，一定要谈，耐么雌鸡马上答应，刮刮刮刮刮、刮蛋，问，啥辰光谈，公鸡一听马上约辰光，喔喔喔、三点半、三点半谈恋爱。

雌鸡想雄鸡门槛精咯，三点半东家还没起床来，笃定谈，迭个就叫雌鸡雄鸡喜洋洋，私订终身辣辣后鸡棚。

赵家两只雄鸡叫得丁家吃不落咽不着，心里想想吼呀，嗨……戳掐、戳掐到是戳掐个吗，叫我么勿要养鸡，伊么自己养仔四只雄鸡，断命两只骚雄鸡还看中我伲两只雌鸡，真是鸡胆包天，我关照那赵家，假使㑚哗啦哗啦再叫，我女儿睏觉睏勿好，上班迟到奖金扣脱，要搭侬总算账，谈也不要谈总算账。老实讲，依养鸡，我也养鸡，侬养雌鸡我养雄鸡，天经地义，本来侬养雌鸡，女声独唱，不闹猛，现在加上雄鸡，男女声二重唱，比较仔闹猛勒，嗨嗨……老实讲，侬养鸡我养鸡，你勿养鸡我也勿养鸡，大家横世横来。二家人家，侬吵我骂，你叫我跳，两只鸡笼全部打翻，八只鸡辣人群里钻来钻去、钻来钻去，雌鸡追雄鸡，雄鸡寻雌鸡，真是人吵得结滚，鸡叫得闹猛，哎……

【清晨】日夜吵来夜夜闹喔喔，人吵鸡跳豁虎跳

侬不罢来我不休喔喔，针锋相对调门高

团结两字才忘记光，精神文明脑后抛

挖空心思救兵讨，请女婿来做冲天炮

喔喔喔……

（白）丁家想想气呀，马上喊出女儿，小妹呀，你搭我马上喊㑚个朋友来，喊我咯剃头女婿来，帮我出出场，帮我出这口气呀，下趟赵家到伊拉剃头店里去汏头发，拿迭个女个头发全部剪光，叫伊做尼姑，哎！嗨嗨——自己吵勿过，叫女婿出来啦。下趟到伊拉女婿店里去汏头发，拿我头发全部剃光，叫我当尼姑，哎，侬搭我剃光浪头呀！

（唱）戳刻鬼想出恶计谋，叫出来毛脚女婿小剃头

搭我要剃光浪头，气得我浑身人发抖

（越剧）她有女婿我也有，大家叫女婿来硬出头

她的女婿是小剃头，啊呀，我的女婿摆滩头

下趟丁家来揎鞋子，拿钉子只只敲出头

让伊脚底才戳破，叫伊走起路来吃苦头

小榔头敲小剃头，看看啥人有苗头……

（白）莉莉侬搭我喊那男朋友来，叫我榔头女婿来，丁家一听赵家喊榔头女婿来，心里也慌咯，啥咯，绑头女婿丁家看见过咯，模子结滚个，身高两米勿到一呆呆，浑身肌肉弹出来，练过武术打过拳，身材像日本相扑队，再看自己咯女婿，身高只有一米六十三，身材瘦小像柴片，24根肋棚骨全部露出来，赛过像汏衣裳擦板，两个人辣一道一个像柏油桶，一个像小菜篮，勿多一息，莉莉陪伊拉绑头女婿一道跑过来，喂！等一息侬要帮姆妈出出气，姆妈气得来手脚冰凉人发抖。嘴巴张大闲话也讲不出来，迭家人家勿讲道理，伊好养鸡，阿拉不好养，依拨点苗头拨伊看看，莉莉今朝叫我来，是搭人家吵相骂呀，啊呀么远亲么勿如近邻好，吵得这能样子呒没啥意思咯，邻舍隔壁不要吵相骂，好格，等一息我去劝劝伊。劝劝，劝啥么事啦，侬讲道理，人家不讲道理，侬阿晓得啦。模子加大，胆子加小，那能拨依想得出来个。

两个走进一条弄堂，辣辣转弯暗角落里，看见三个流氓拦住了一个女青年，拉拉扯扯勿笔伊走，郐头女婿一看，叶……勿是别人，就是丁家女儿叫小妹吗。就一个箭步冲上去，你们想做啥，三个小流氓一看，做啥，要捉蟛蜞来，关照你识相点少管闲事。因为社会主义法制我伲人人有责个，啥咯法制黑仔，侬不要以为大模子，弹出眼乌珠、神志胡子、马儿哈子、堂儿皇之，当心吃刀子，叫侬翘辫子。

三个人轰一下子嗡上去，一个抱腰，一个抱脚，一个对准榔头女婿的头嘭一仔敲下去，勿晓得都头女婿学过武术。像霍元甲一样，哎！侧身一拳，啪！一个巴掌，迭个巴掌厉害个，伊勿是武当里个九公神鹰掌，迭个巴掌叫邻头蒲扇掌。榔头女婿人长得大，手臂粗，手特别大，大到那能程度，五只手节头一伸伸出来，像一把蒲扇什介。天热辰光，和女朋友荡马路，从来不行带扇子咯，只要女朋友讲一声，喔唷热来，榔头女婿手掮二掮，风力五级，二只手一道掮，风力十级。有个观众讲来，太夸张来，一点不夸张，一只手五只节头，二只手十只节头，对哦，像生仔六节头我搞不清爽了。榔头女婿啪一个巴掌下去，一个流氓合扑就是一跤，等到䟿起来一摸，喔唷，哪能多一只洋山芋呢。榔头女婿啪朝后一脚，后头流氓格腾腾掼出去几好远来。公共汽车起码要乘半站路啦。还有个流氓想溜脱，榔头女婿，搿搭一把捉牢，走！跟我到公安局去，倷完结，户口勿着杠了。小妹抬头一看，救伊人勿是别人，就是赵家个榔头女婿，心里向感激呀，“谢谢侬呀，要勿是侬，勿晓得哪能办了”。“小妹呀，勿要谢了，辰光勿早了，侬到啥地方去呢？”“到啥地方去，我姆妈叫我去叫男朋友来，有事体要我先来，想不到迭搭碰到三个流氓，要勿是侬我勿晓得要遭啥个罪了。等一息阿拉两家人家吵相骂，侬勿要打我姆妈，侬要打打我哦”。“小妹呀！我这个榔头蒲扇掌，只对坏人作自卫反击，从来勿打好人个伲。邻舍隔壁么要五讲四美，要搞好团结，不要吵相骂”。

“对呀，你这个闲话讲得交关对”。榔头女婿回过头一看，旁边立着一个身材矮小的男青年。“侬是啥人侬？”“我就是剃头女婿，同志哎……㑚两个人刚刚讲的闲话我侪听见了。邻舍隔壁应该以和为贵，不好吵相骂个。不过现在已经吵得这样子了，有啥办法呢？”

“有啥个办法么，我倒有办法，等一歇伲两个人回转去，拿八只鸡全部杀脱，杀脱仔鸡么再做人个的工作，就便当了。”“好！侬这个办法好个”。“好 ，搿么阿拉快点走哦。等一歇去晚了，屋里向打起来，就麻烦了。

（唱）四人冲冲回转门，一路暗暗细思衬，

丁家赵家有矛盾，两个女婿主意定，

待等冰消雪化迷雾散，迎来那文明春风吹，

迎来那文明春风吹。

（白）赵家一看是榔头女婿——气壮如牛。

榔头女婿：侬拿伊拉四只雄鸡掼杀，畀点苗头拨伊拉看看。两个女婿各自回到自己屋里向，一个拿出一把切菜刀，一个拿出一把裁缝剪刀，赵家一看见勿要吓呀，“哎……榔头女婿呀，牙只要鸡头，不要人头杀人要偿命个，女婿呀，侬帮帮忙呀”。“姆妈，侬不要怕，我今朝就叫伊拉尝尝切菜刀是啥个味道”。

丁家也要吓个呀，“你拿裁缝剪刀，剪刀一剪，我要捉进去个，再讲伊模子大，侬打勿过伊个”。“妈妈你不要怕，我今朝不但要放伊拉血，我还要叫伊拉到阎罗王那边去报到”。今朝大家横世横拆鸡棚，二个丈母娘本来火上加油，现在劝相打也来勿及。八只鸡辣人群里钻来钻去，钻来钻去。榔头女婿捉起一只雌鸡，要杀么这只雌鸡心里想想冤枉呀，刮刮刮刮刮、刮刮蛋。

（唱）罪过罪过真罪过，刚刚轧着朋友要命呜呼，

马上要做刀下鬼，公鸡呀，亲爱四眼公鸡呀！

我搭侬到阴间里向，去夫妻做呀……呀！

（白）两个女婿你杀，我剪，侬剪我杀。勿多一息，八只鸡全部光荣牺牲。剃头女婿握牢仔榔头女婿个手，“榔头女婿阿拉俩家头刚刚商量办法真好，这个就叫杀脱鸡救了人”。丁家娘听勿懂杀鸡救人呀，倷救啥人呀，伊拉女儿小妹拿弄堂里个事体一讲。丁家娘既是内疚又是惭愧，“赵家阿嫂，今朝伲小妹辣弄堂里多亏倷榔头女婿，要勿是伊，勿晓得要作啥个孽了，倷本来伲俩家人家关系蛮好，多怪我要养鸡养鸡么，养出矛盾了，倷我要向那好好检讨”。“嗨嗨……丁家阿嫂，我也不好，想出促掐办法。侬养雌鸡，我养雄鸡，以毒攻毒，现在好了，鸡头落地，后顾之忧呒没了”。以后可以不会吵相骂了，榔头女婿要紧讲对格。今朝八只鸡么全部杀忒了。明早就是星期天，伲俩家人家拼起来，团团圆圆，杀杀哺哺，结结滚滚，吃一顿八鸡宴。

（唱）两个女婿人尊重，

文明礼貌记心中记心中。

丈母娘从此笑开颜，

邻里团结乐融融。