黄永生-RH

（表）一辆画有红十字标记个轿车飞车辣南京路浪，穿过静安寺，经过常德路、铜仁路、西康路、陕西路、江宁路、南汇路、茂名路、泰兴路、石门路、青海路、成都路、黄陂路、新昌路、黄河路、西藏路、六合路、贵州路、广西路、浙江路、福建路、山西路 、河南路、江西路、四川路，转弯来到一家电影院门口，刹车停牢，车子还没停稳，车门打开，从车门里走出两个人。啥人？好人，做啥，捉人。捉啥人？捉好人，好人捉好人啊？

（唱）电话铃声阵阵急，

震敲得人似火焚，

光明医院要献血，

抢救伤员脱险境，

共产党员林建明，

奋勇救火勿顾身，

烈火中不幸受了伤，

危在旦夕伤勿轻，

急需献血救病人，

献血时间是生命。

（表）有个同志问我，侬为啥唱得迭能大惊小怪呢？血库里有搭是血吗。勿，因为迭个人个血型比较特殊，一般个人血型有搭A型、O型、B型、AB型，迭个人勿单单是AB型，而且是RH阴性血。迭种血型人比较少，只占千分之一到千分之两，也就是讲一千人里向只有一个到两个是RH型，外国人比较多，要占百分之十五了，所以搿种血，血库里没办法保存个。凡是RH血型人要输血，只好当场抽当场输，只好炒热炒，勿好做冷盆个。听我说唱有个好处，可以增长知识，懂点科学，而且交关形象化，联系到热炒冷盆。迭门科学就是医疗科学脱食品卫生学。

刚刚血站接到医院电话，马上需要RH血型，抢救垂危病人。血站同志紧张，立时三刻啥地方去寻啊。翻开登记簿，大家目光集中在张国强名字浪。张国强今年廿七十岁，年纪蛮轻，身强力壮，曾经两趟光荣献血，抢过过国际友人。现在迭辆白色轿车飞快开到张国强厂里向，勿晓得今朝张国强齐巧调休呀。

（唱）急先锋碰到慢郎中，

寻找小张扑了空，

司机急得来冷汗冒，

医生急得来掐人中，

警报器阵阵催人心，

车轮滚滚向前冲。

（表）迭辆救护车飞快开到张国强屋里向，张国强娘一看勿吓个，一两救护车来寻自己儿子会有啥好事体，独养儿子推板勿起个。张国强娘今年毛六十岁，年纪勿老，牙齿侪部落光，假牙齿没装，讲闲话侪部漏风。

张母：（白）同志，倷来寻伲国强做啥？

医生：（白）抢救。

张母：（白）阿要紧�？

医生：（白）哪能勿要紧呢？

张母：（白）发生了啥事体了？

医生：（白）生命危险。

（表）啊，已经厥过去了，所以人吓人要吓煞人个，等到事体弄清爽国强娘半条命勿辣生浪。搿么张国强到啥地方去了呢，搭女朋友约会去。今朝张国强搭女朋友第二趟碰头，头一趟约会，搿朋友请人家介绍板是迭能个规律。第一趟介绍人出出场，男女双方碰碰头，看地中个下趟单独约会，介绍人对勿清，请侬单独靠边，稍息。现在迭辆白色救护车根据国强娘提供个线索飞快开到迭爿电影院，来捉张国强迭个好人。血站同志搭电影院商量下来，请放映员打出字幕：张国强有急事请出。勿晓得阿拉中国人同名同姓个人实在多勿过了，外加国强个名字比较大路，等到字幕一打打好，从剧场里跑出来六个张国强。还好了，伊叫张国强，假使叫张阿毛，张阿狗六十个一道出来也讲辣海个。所以做爷娘为子女起名字，一定要动动脑筋，别具一格，否则将来名字一样，闹笑话事体多了。像前一腔上海枪毙脱一个叫黄小弟，脱我爷叔名字一式一样，伲婶婶急得来推板一眼跳迪斯科。张国强跑出剧场门口，一看是迭能个情况，时间就是生命，来勿急到场子关照女朋友，就对剧场服务员讲仔一声。

张国强：同志，请侬关照十一排八座个女同志，我有事体先走了，谢谢侬。

讲完乘了汽车就跑。勿晓得迭个剧场服务员齐巧是黄鱼脑子马大哈，腾一转身，十一排八座，记错之八排十一座。八排十一座，十三座一对男女青年辣谈恋爱，九座浪空辣海。迭个服务员死人勿管，跑上去就对迭个女同志就讲。

服务员：同志，伲个男朋友有事体先走个了。

旁边迭个男个勿要跳起来个，一嘴巴个镇江醋个味道。

男青年：蛮好，侬现在脱我看演出，外头还有男朋友啊。心里吼啊，怨自己今朝坐个位置勿好，十三座，女朋友当我十三点了。

男女之间轧朋友，男个听见女个外头还有花头心里总管吼个，没啥人开心个，阿有啥人开心有个了？

小唐朋友：（白）小唐，听说㑚女朋友外头还有花头啊？

小唐：（白）啊，真个，侬认得个，侬喊伊来我趟我请伊吃蛋炒饭。

要么十三点。现在场子里张国强个女朋友左等右等勿看见自己男朋友来，勿晓得发生啥个事体，再大个事体侬应该关照我一声，心里越想越气，电影没散场就提前离开了剧场。

林媚媚：（唱）气啥人来真气煞，

气得我眉毛往上翘，

头一次约会看电影，

他不辞而别为的啥，

莫非他对我看不上，

就是为何不对我讲，

看来他存心捉弄人，

张国强为人真促掐。

（表）迭个女朋友越想越气，“腾腾腾”跑到介绍人屋里，面孔浮起，，眉头皱起，嘴巴撅起。介绍人问伊为点啥个事体，“咯拉拉”个声音出自牙齿缝里，“哼”。介绍人一只手拿热水瓶塞头，一只手辣倒开水。听见迭个女朋友“哼”，一吓，拿迭只塞头塞到茶杯里。迭个女朋友刚刚气得来眼泪水淌下来，看到塞头塞到茶杯里，咬勿牢笑 出来。迭只面孔就叫落雨出太阳，哭出乌拉笑嘻嘻。

张国强献好血回到屋里向，齐巧碰着伊个娘。

张母：（白）国强，医院里向寻侬做啥？

张国强：（白）医院里寻我去献……

（表）伊一想勿好讲，娘一直反对自己献血，前两趟侪是瞒牢仔献个，所以献字一出口马上调腔花。

张国强：（白）医院里叫我去妗夹夹。

张母：（白）啥物事，医院里叫侬去妗夹夹，刚刚医院里同志侪脱我讲了，侬去献血是�，小浮尸还脱我调腔花。

张国强：（白）姆妈，我生怕弄勿同意。

张母：（白）勿同意，㑚娘思想介推板，前一腔，我去参观一个血站，听过一个介绍呀，一个人身浪有四五CC血了，像一铅铜，抽脱四百CC像舀脱一汤碗，只要吃只蹄髈笃鸡，一日一夜就补转来了，对身体呒有啥妨碍个，外加有利于新代谢陈。

张国强：（白）姆妈，没新代谢陈个，只有新陈代谢。

张母：（白）对啦个，新陈代谢。

张国强：（白）姆妈，现在国家血液供勿应求，医院里向开刀需要血，抢救伤病员也需要血，我伲年纪轻，身体好个人，更应该光荣献血。像日本实行无偿义务献血，碰到啥开心个事体，大学毕业，养小囡，结婚侪去献血，特别女个着男个，侪欢喜找献学个人。

张母：（白）搿为点啥？

张国强：（白）献过血个人三大优点，一，献血个人说明伊身体好。

张母：（白）对啦个，身体勿好个血医院里勿要个。

张国强：（白）第二，肯献血说明伊勇敢大方。

张母：（白）对啦个，胆小鬼勿肯个，小气鬼勿肯个。

张国强：（白）第三，对勿认得个人肯献血，将来对自己老婆勿晓得哪能好了。

张母：（白）小浮尸讲得有趣了。

（表）所以我请台底下没结过婚个男女青年听好，找对象一定要找献过血个人，良心大大的好，假使已经谈恋爱个也要劝对方去献血，实在勿肯，马上脱伊弹开，迭个我也是开玩笑个，真个弹开，将来寻找我我也吃勿消个。

第二日子，张国强买仔水果蛋糕专门到医院里来探望光荣负伤个林建明师傅，跑进医院推开病房一看，“叶”只看见自己个女朋友坐辣林师傅个床旁边，原来迭个女朋友就是林师傅个女儿，巧么也实在巧勿过。迭个女朋友看见张国强心里几化吼啊。昨日看电影半当中溜脱，现在到医院里来寻我。所以用足力气鼻头浪出气，“哼”，张国强一吓呀，连忙打招呼。

张国强：侬好。

林媚媚：怪�，啥人睬侬了。

（表）睏辣病床浪个林师傅厌勿过去了，想想自己女儿哪能介勿讲道理，人家小张昨日献血抢救我生命，今朝买仔水果蛋糕来看我，侬哪能好迭副态度对付人家，侬勿认得，㑚爷认得个，要紧开口。

林建明：（白）小张同志，阿拉女儿媚媚勿讲道理，我呕伊打侬招呼，媚媚，快点呕声小张叔叔。

（表）张国强一听，啥勿事啊，我女朋友就是林师傅个女儿，要死快了，我长仔一辈变爷叔了。

张国强：（白）林师傅，昨日是我勿好，林媚媚。

（唱）昨日情况太突然，

林师傅急等把血输，

时间紧急是生命，

岂能耽搁误了事，

中途退场是我错，

请侬原谅我第一次。

（表）女朋友一听，啥物事，我爸爸个血是伊献个，老实讲，一肚皮气老早没了。

林媚媚：（白）刚刚我态度勿大好，我代表我爸爸谢谢你侬，小张。

张国强：（白）谢谢侬，叔叔勿要喊，喊仔叔叔讨厌个，我喊侬爷阿哥，将来辈分搞勿清爽。

（表）巧么也真巧，千分之一碰着千分之一。

张国强：以后便当了，㑚爷啥辰光要血我随叫随到。老实讲为了㑚爷个身体健康，勿要讲抽点血，就是拆脱我六根肋棚骨我也行一计个。

林媚媚：哪能畀侬想得出来个。

（唱）世浪巧事处处有，

丈人与女婿巧碰头，

RH结良缘，

有情人天长与地久。