广播专辑 弄堂茄山胡624 自家动手做糟货

自家动手做糟货  
  
　　文 / 杨保飞
　　到了大热天，胃口难免勿大好，也勿高兴开油锅炒菜，什锦糟钵头里个糟货就是邪气勿错个选择，鲜美爽口，勿油勿黏，下饭啜粥，大快朵颐。勿过，对我来讲，好吃个糟货还是要自家做。


　　到超市买一瓶老字号个香糟卤，到菜场买半斤大头活虾，半斤毛豆，两支茭白，一只半斤头个素鸡。回到屋里，先拿活虾剪去虾须虾脚，汏清爽放辣开水里汆熟，再捞出来晾一晾。毛豆剪脱两头个尖角，茭白剥脱外皮，侪汏清爽，素鸡竖个一剖两爿，统统用开水烧透烧熟，捞出来，冷脱以后，茭白切滚刀块，素鸡切成宽约一厘米个薄片。需要注意个是，搿眼食材统统侪要冷透，才可以放进钵头里，勿急。


　　寻一只合适大小个钵头，一定要有盖头。至于钵头材料，除脱金属，陶器、瓷器、玻璃、塑料容器侪可以。拿冷透个虾、毛豆、茭白块、素鸡片，统统放进钵头里，倒进香糟卤，一定要浸没食材，盖好盖头，放进冰箱冷藏室，浸泡5小时以上就可以吃了。浸泡辰光越长，味道越浓，可以根据自家个喜好来决定浸泡辰光个长短。


　　吃个辰光，一定要用清爽个干筷子伸进钵头里搛糟货，每次吃多少就搛多少，已经搛出来吃勿光也勿可以再倒回钵头里，要发霉嗰。搛好后应该拿糟钵头盖好盖头马上放回冰箱里冷藏。


　　质量好个香糟卤可以浸泡食材两趟，第一趟个糟货吃光以后再泡一趟呒没问题，就是味道稍微淡一眼，只要多泡一眼辰光，味道仍旧可以渗透到糟货里去，侬勿妨试试看。


　　噢，对了，上海垃圾分类条例开始实施了，厾垃圾弄错脱了，有可能要罚钞票嗰，像毛豆壳、虾壳侪是湿垃圾，勿要搞错脱哦。