广播专辑 弄堂茄山胡618 中秋自家做月饼

中秋自家做月饼
侯宝良


　　中秋节吃月饼总是桩绕勿过个事体。几天前我经过淮海路几家老字号食品店，从沿街橱窗里看到有糕点师傅现做绿豆糕。我突发奇想，嗳，勿如趁中秋前夕自家做眼什锦麻酥饼，权当月饼先享受起来。


　　想到就做，我隔天就采购了花生、芝麻、核桃，全部炒熟磨粉，再磨些糖粉加进适量个炒面粉、奶粉唠啥，全部混辣一道用糕点模子一压，嘿！跟专业食品厂产品一模一样，直径7.5厘米，厚1.5厘米，类似鲜肉月饼大小，代替月饼再好勿过。


　　拍了几张照片晒辣朋友圈里，马上就有“馋猫”来取经：“模具啥地方买？”“烤箱里烤几分钟？”“做出来味道哪能？”“自家做性价比好口伐？”


　　讲到性价比，我大致核算过，商店里卖绿豆糕每斤40元左右，我买搿点原料只要8元左右。最关键个是，原料质量清清爽爽，而且做个辰光肯定勿用添加剂。


　　我一边做，一边想起老早子勿少与月饼搭界个事体。


　　小辰光，屋里经济条件勿好，爷娘勿舍得买月饼吃，难得有亲眷朋友中秋节送月饼，大家才能分一眼吃吃。到了中秋节，一般侪是阿奶做点枣泥塌饼，焦烘烘嗰。我噘起嘴巴嫌勿好吃，结果又吃一顿“排头”。


　　中学毕业以后，进了一家工厂工作。到了中秋节，厂里食堂会做点月饼，价钿还算便宜，就是数量勿多，只能买几只尝尝鲜。


　　改革开放以后，月饼文化丰富了，五花八门个月饼让侬看勿懂，啥个冰皮月饼、巧克力月饼，连鲍鱼、海参月饼侪有了，真是没有做勿到，只有想勿到。实话讲只是图个好奇，价钿高得吓人，有人吃过讲味道还勿及传统个五仁月饼好吃。要我讲，现在食材侪买得到，搿排里苏式月饼我基本浪向侪辣自家屋里用烤箱“DIY”，勿瞒侬讲阿拉个“制作攻略”还上过杂志呢。


　　记得几年前新雅餐馆为了传承月饼文化，搞过一趟“民间月饼王等侬来PK”活动，排场势蛮大，我有幸参加，还得了一个“优秀奖”。或许是看我手法熟练，主持人对我现场采访：“看来老爷叔平常个手艺勿错。”我晓得伊是抬举我，就老实讲：“点心会做一眼，就是广式月饼呒没做过，正好来学习一番。”


　　眼看中秋节又到了，月饼广告也多了起来。其实到了现在，吃个东西大家侪勿缺，中秋节吃月饼，就是图一家人团聚，生活和和美美，吃自家屋里做个月饼，味道更加甜蜜。