广播专辑 弄堂茄山胡612 与时俱进谈吃饭

与时俱进谈吃饭


文/裴天蓉


 上海人亲朋相聚，侪会讲阿拉到啥地方去吃饭好口伐？结果到了饭店里侪是点菜，最后上一道点心，一般是勿会吃米饭嗰。


 记得阿拉小辰光，屋里侪不上饭店嗰。爷娘烧了一点好吃个小菜，马上饭就盛上来了，好像小菜就是专门为了配米饭嗰。记得埃歇辰光，白天只要屋里有人，大家侪勿大关门嗰，方便邻居之间串门，吃饭辰光还可以去看看别人家有眼啥个小菜。我有一趟放学回来，房门钥匙呒没带，爷娘呒没下班，邻居就叫我到伊拉屋里吃饭，我吃了二碗饭，小菜是邻居姆妈捡到我饭碗里嗰。


 小辰光楼浪邻居经济条件比较好，规矩也大，小菜上桌了，饭呒没上桌，大人小人侪是不动筷嗰。等饭上桌了，一家之长讲可以吃了，侪先吃一口饭，再吃菜。


 四五十年过去了，现在已经不讲要吃饱，而是要吃好，更加要讲究营养合理。想吃点好嗰，又怕麻烦勿想烧，就去饭店点几只菜。就是辣自家屋里烧菜吃饭，饭也是吃得不多嗰，蛮多人家侪是先吃汤，再吃菜，最后吃一点饭。


2020年比较特别，一开始就因为新冠疫情个影响，大家响应号召孵辣屋里勿出门，更加勿敢像往年一样聚辣一道吃饭了。一场疫情改变了交关人个习惯，过去觉得一家门坐辣一道吃饭，筷子搛来搛去合情合理，是亲情个表现。现在一家门一道吃饭，也要用公筷，感觉用公筷更加有亲情，是对大家个身体健康负责。


 虽然还是经常能听到国内某地又发现零星病例个新闻，但大家侪对国家个防疫能力有信心，只要平常注意“戴口罩、勤洗手”，生活基本浪已经恢复到原来个样子。又到年底，各种社交活动多起来了，亲朋好友相约到饭店里吃吃喝喝也是难免。当然，变化也是有一眼嗰。现在到饭店里，服务员往往会辣每个人面前放二双筷子，大家用个辰光也是邪气自觉。


 吃饭是口头语，也是亲朋好友维系发展亲情、友情个途径，不管是自家吃饭还是人家叫吃饭，侪是老开心个一桩事体。