《胭脂巷口故人平之罵玉郎》任劍輝 冼劍麗 附曲詞

唐滌生  撰曲

沈桐軒——任劍輝

宋玉蘭——冼劍麗

桐軒: (唱【昭君怨頭】)

我未語淚飄殘

玉蘭: (白)

桐軒…你…你有乜嘢委屈，你盡地講喇你…

桐軒: (白)

唉，所謂天作孽，猶可為，自作孽，不可活，我…我真係不知從何說起咯…

【禿頭起泣殘紅】

我為誰自我犧牲呢訴玉蘭，

玉蘭: (接唱)

你無顏，

桐軒: (接唱)

我犧牲實太慘，

玉蘭: (接唱)

我仲更慘，

桐軒: (接唱)

我自憐病中作回雁，

你仲可裝扮艷容顏，

玉蘭: (接唱)

盼舊燕歸返，

杏面更添鉛華似耀眼，

焉知你落魄返，

堪哀我自縛繭，

恨怨你貪懶

桐軒: (白)

哎吔…玉蘭…你…你仲打得我落嘅…你睇嚇…你睇嚇地上呢幾啖血…我係為邊個嘔嘅，

玉蘭: (笑白)

哦…原來你話地上呢幾啖血，係你…係你為我而嘔嘅咩…

桐軒: (白)

系，

玉蘭: 【沉花下句】

唉吔吔，

驚心忍見桃花血，

又憐又恨兩為難。

【滾花】

念到六年災難為誰挨，

忍不住口吐鮮紅酬歸雁；

(鑼鼓嘔血搖搖欲墜)

桐軒: (白)

玉蘭…玉蘭…蘭妹…玉蘭…乜你又吐血呀，你千祈要保重至好呀，

玉蘭: (白)

你行開，你唔駛埋嚟理我…

【流水行雲】

我亦還君血，

悔我共君結合情太濫，

父愛經斬斷，

何堪待得你落第還，

你報復亦太慘，

(白)

我仲有乜嘢面目番去見亞爹呢，我仲有乜嘢面目番去見細佬呢，假如我當初唔係栽培你個三分似人七分似鬼嘅乞兒，我今日就唔駛枉流一點嘅心血，受盡呢種殘酷嘅果報，

桐軒: (白)

玉蘭，估唔到連你都會唔諒解我嘅…唉…

玉蘭: (續唱)

當初不解愛孽慘，

今朝方知愛虛幻，

桐軒: (接唱)

哼，試問誰誤我此生，

淚飄飄向誰彈，

我半生疏狂為誰志盡減，

你睇我人半戇半癲半病半癱，

非關我負了相思債，

非關我願懶慢，

情真太狠，

害到我命將殘，

你見我書柬作客走關山，

我自犧牲實可嘆，

為阿嬌，悲夢散，

怎料人情太冷，

人情太冷，

我命喪於早晚，

現今悔重還，

被嬌侮辱情似幻

玉蘭: 【長句二王下句】

羞見你名落孫山，

錯信我無珠肉眼，

我為誰朝夕枉憑欄，

哀我漸改朱顏，

玉容經暗淡，

為誰把恩情斬斷，

甘葬恨海波瀾。

更為情愛犧牲，

離家長挨患難；

桐軒: (白)

蘭妹…

【反線中板下句】

當日你擊掌離家，

約我在歌坊來等候，

贈金郎赴試，候我衣錦還。

我久候不見玉人來，

六郎先到歌坊，

求我挽親情，縫缺憾；

佢說到淚竭聲嘶，

為著重圓骨肉，

求我把功名讓佢，

讓佢把桂枝攀。

若得衣錦還，

再向老父懇求，

准你重續親情，作還巢雁；

更求我浪跡天涯，

偽稱京華赴試，

你可曾見過我留下書函。

【花】

我被佢摯誠感動走天涯，

捨己成人，所以六載渺無魚雁返；

(憤然白)

玉蘭，我為你幾大犧牲呢，究竟我對你唔住，抑或你對我唔住呢，(悲咽介) 我唔該你問嚇個良心啦蘭妹，(泣不成聲介)

玉蘭: (慢的的大受感動悲咽白)

嚇…真嘅桐軒，

桐軒: (白)

我…我幾時有騙過你丫五小姐，

玉蘭: (懷疑憤然白)

我唔信，

【妝台秋思】

豈有桂枝讓教我弟攀，

是真是假實難辦，

桐軒: (接唱)

惜親恩卻為我斬，

願棄功名護幽蘭，

嬌應信，我非虛幻，

當初暗讓你弟把花簪，

玉蘭: (接唱)

莫非你怕羞慚，

故欲掩飾令儂入信，

你居心欺騙我實覺殊遺憾

桐軒:【南音短板面】

唉，阿嬌竟然未信，

堪嗟伸辯難

【南音】

我怨一句天冇眼，

報應耐人參；

說什麼由來果報有循環。

說什麼捨己成人，只博得人齒冷咋；

玉蘭: (接唱)

怎怪得玉蘭疑慮，我為你太犧牲。

你不用怨天尤人，我只怨無慧眼；

桐軒: (接唱)

恨不得嬌前剖腹，證實我不是空談。

恨不得令弟佢榮歸，以證郎肝膽；

玉蘭: (接唱)

你縱把功名相讓，亦可奮鬥一番。

(催快)

六載營商，可獲金百萬；

桐軒: (接唱)

只為床頭金盡，壯士無顏。

玉蘭: (接唱)

是否所贈金資你全花散；

桐軒: (接唱)

可憐失竊在教坊間。

玉蘭: (接唱)

豈有巧合如斯，顯見情虛泛；

桐軒: (接唱)

我何須欺騙知己紅顏。

玉蘭: (接唱)

你名利俱亡，希望終成幻；

桐軒: (吊慢接唱)

我六載挨苦難，

【二王下句】

致有誤人更誤己，

才怨果報兇殘。

玉蘭:【花】

忽聽得喝道鳴鑼，更令我感懷無限；

桐軒: 【花下句】

空有舌燦蓮花難置辯，但願文郎歸里解疑難。