广播专辑 经典上海闲话155 “拿拨伊”里有讲究

“拿拨伊”里有讲究  
  
　　文 / 赵韩德
　　商店营业员拿货物给顾客，上海闲话叫“拿拨伊”。现实当中，“拿拨伊”个动作各式各样，整个过程也只是眼睛一眨，似乎呒没啥好讲，其实老有讲究嗰。有人拿出货品朝台面浪一“顿”，就像一把小榔头轻敲一记，意思是“喏，侬个物事已经摆辣搿搭了，快点自己来拿”；有人随手一推，货品从台面浪滑过来，客人要迅速接牢，假使动作勿够利落，伊还会朝侬白白眼睛，意思是“介简单个动作也做得手忙脚乱，真是笨手笨脚”。卖大饼卖馒头嗰，有辰光会装好袋，朝台子浪一抛，好像伊拉个生意忙得勿得了。我常常迅速接牢，生怕耽误伊拉做生意。


　　其实，从迭个“拿拨伊”个动作、方式、轻重，可以看出经营者是否尊重客人。老早辰光，伲镇浪有爿食品店叫“泰和祥”，里向个老派店员，“拿拨伊”个动作侪是经过培训嗰。勿管顾客是买盐买糖，还是买敲扁橄榄什锦糖，店员侪会用包装纸仔细包成三角包，买得多个辰光就拿几只三角包叠辣一道，用细绳扎好，然后右手拎绳，左手托底，交到顾客手里。最后还要客客气气讲一声“走好”。


　　当然，现在辣搿方面做得道地个商店也是勿少嗰，特别是卖易碎物品或贵重物品个商店里，店员决勿会直接拿货物放到顾客手里，一般侪是放到台子浪，放稳以后再示意顾客自己去拿，搿能一来，就可以避免双方递接失误导致物品跌落损坏。所以侬去搿种店里买物事，动作也要轻一点，慢一点，心急勿得。