广播专辑 弄堂茄山胡498 食新吃藕戴茉莉

食新吃藕戴茉莉   

　　文 / 阿娟

　　今朝农历小暑，是农历廿四节气里向个第十一个节气。小暑啥意思呢？暑表示热，小暑就是小热，也就是还呒没到最热个辰光。老早子到了小暑，上海民间有勿少习俗，譬如：“食新”就是吃新米，用新收割个稻谷碾成米，做成饭，供祀祖先后一家人一道品尝。另外，还有“小暑吃藕”个讲法。至于吃法，可以小火炖烂以后加蜂蜜做成“蜜汁藕”；可以切薄片，用开水焯一焯，加醋冷拌；还可以拿藕当配料，炖排骨、炒虾仁、做藕肉丸、藕饺、藕粉糕。

　　除脱吃新米和藕，江苏和上海等地还有“戴花”个习俗。卖花人会拿连蒂茉莉花用细铁丝扎成花球或花带，放辣篮头里沿街叫卖，交关妇女侪会买来戴，茉莉花个淡淡清香让人心情愉快，消去勿少暑热带来个烦闷。