【沪语聊聊】上海人都是吃货

上海人个吃，讲到吃货，上海人门槛勿要忒精噢：鲜肉月饼要吃光明村个，菜馒头要吃绿杨村个，蝴蝶酥要吃国际饭店个，蟹粉汤团要吃王家沙个。买面包喜欢静安面包房个，买蛋糕一定要红宝石告凯司令个。高桥个脆麻花老好吃个，邵万生个苔条饼瞎好吃，杜六房个油爆虾告乳腐肉顶脱了。还有大壶春个生煎馒头，吴江路浪向个炒面（可惜现在拨动迁脱了），老半斋个刀鱼面，四新个小馄饨，富春个小笼，鲜得来个排骨年糕，一想到就想去吃。当然咾还有小邵兴个白劗鸡，老正兴个妙鳝糊，沈家鱼头王个鱼头汤，老上海饭店个腌笃鲜告八宝鸭，是上海人一定吃过。静安宾馆个佛跳墙，听听就适意。雁荡路口个全国土特产店，零拷辣酱还勿错，还有酱菜甜酱瓜大头菜也蛮好 。讲上海好吃个“物事”实在忒多了，现在只好听听、看看，怕三高，怕长膘，只好屏牢！！！