《雙仙拜月亭》 (下集)何非凡、吳君麗、麥炳榮、梁醒波、陳好逑 附曲詞

蔣世龍/卞雙卿——何非凡

王瑞蘭——吳君麗

王   鎮——梁醒波

蔣瑞蓮——陳好逑

秦興福——麥炳榮

王鎮：【花】誠恐瑞蘭藕斷尚絲連，又怕嗰窮鬼書生再纏我個心肝椗，（白：都唔係吶，等我寫封信俾佢，話我個女慘受摧殘，含羞自盡，一者可以熄咗佢嘅癡心，二來佢怕我追究，咁就一定唔會對人宣揚此事，著喇，）【花】忍心拆散鴛鴦侶，無非為著保家聲。

人：（白：蔣公子，王大人有封信俾你啊）

世隆：（白：唔該，唔該！蘭兄，王大人一定回心轉意，而家俾瑞蘭嫁我頂喇，愛女瑞蘭，本非水性，無瑕白碧痛失童貞，無面見人，服毒斃命，催花野蝶，罪大非輕，瑞蘭。）

福興：（白：你保重至好啊，我倆個都有性命之虞，蘭弟，為避免王大人追究你，假意修下書函，因為瑞蘭死咗，你就投江自殺，為避免佢追究）

世隆：（白：係啵，等我立即寫信）

瑞蘭：【花回遊】輕盈拜月妝樓下啊，太羞家哭悶對檀香架，雪月風花，三年盡化煙霞，欲哭聲垂啞，淚向閨閣飄灑，招魂慕風雅一片心拜月華，【花】三年夜夜暗焚香，可以孤魂不到琴臺下。

瑞蓮：（白：妹啊，我聽到嗮喇，原來有一段傷心恨事，好，等我話俾亞媽聽）

瑞蘭：（白：家姐，你千祈唔好啊，我呢段傷心嘅往事，除咗亞爹同六兒知道之外，就冇人知嘅喇，而且我應承過亞爹，再唔講俾人知添，如果你——）

瑞蓮：（白：你想我唔講都得，但係你拜新月悼舊情，嗰個人係姓乜嘢嚇，講俾我聽啦）

瑞蘭：【乙反木魚】癡郎姓蔣人瀟灑

瑞蓮：（白：咁佢係邊度氏啊？）

瑞蘭：佢生在蕪湖傍水家

瑞蓮：（白：嚇，佢叫咩名啊？）

瑞蘭：字號世隆真風雅

瑞蓮：（白：咁——佢咩年紀㗎）

瑞蘭：才登雙十好年華

瑞蓮：（白：咁你喺邊度認識佢嘅呢？）

瑞蘭：適值烽煙臨江夏

瑞蓮：（白：你同佢係情人還是夫婦？）

瑞蘭：東廂一夕曾化合歡花

瑞蓮：（白：咁佢而家呢？）

瑞蘭：佢跨鳳不成卻把黃鶴駕

瑞蓮：（白：佢點死㗎？）

瑞蘭：抱石投江葬水衙

瑞蓮：【哭相思】

瑞蘭：【花下句】你憐我傷心猶未哭，姐你緣何雙淚落如蔴，滄桑未敢問前因，莫非你，莫非你是我檀郎妻妾也。

瑞蓮：（白：我唔係你檀郎妻妾，我係你檀郎嘅嫡親妹嚟嘅）

瑞蘭：（白：我唔信，你呃我，我記得三年前歸家之時，你曾經對我話姓楊，并非姓蔣）

瑞蓮：（白：唉！落拓之花，幸得過主投身，豈敢辱沒先人姓氏，不過母愛慈祥，至有代我遮瞞本姓）【花】一雙姐妹原姑嫂，兩朵凋零劫后花，欲伸離恨怕宣揚。

瑞蘭：（白：姐姐，你講俾我聽啦，唔怕嘅呢）【花】若是我瑞蘭泄漏，定當遭天雷打

瑞蓮：（白：我同你都係斷腸姑嫂喇）

瑞蘭：（白：你聲聲都話我哋斷腸姑嫂，我嗰個就話死咗啫，唔通你嗰個都死埋啊？）

瑞蓮：（白：佢或者未曾死，但係今生今世都相信唔會見到佢面嘅喇）

瑞蘭：（白：咁你嗰個姓乜嘢，叫做咩句啊？）

瑞蓮：（白：佢姓秦叫做興福）

瑞蘭：（白：秦興福，咁佢未曾死㗎）

瑞蓮：（白：你點知啊？）

瑞蘭：（白：佢同你亞哥，係唔係年兄呢？）

瑞蓮：（白：係啊，係啊）

瑞蘭：（白：咁就真係未死，）

瑞蓮：（白：你點知道呢？你講俾我聽啦）

瑞蘭：（白：我記得當年走難嘅時候，你亞哥仲帶我去佢屋企住添。）

瑞蓮：（白：係啊，係就好啦！不過，未死都等如死一樣，【花】我哋幽閨此后同孀守，決不重婚嫁別家。

眾：（白：狀元遊街狀元遊街）

東候：（白：相爺，今科呢一對狀元落在卞家一雙兄弟手中，若果相爺一對千金能許配呢一對狀元，可算天衣無縫。）

王鎮：（白：哈哈哈~老臣早有此意）

東候：（白：相爺，唔啱等我同你執柯）

王鎮：（白：好極！好極！固所愿也，不敢請矣）【三腳凳】今日瓊樓看狀元，正欲將女嫁，因到邊關去巡視，正想返京華，未知倆才郎是否風流兼瀟灑。

東候：貌如潘安相，宋玉好風華，【花】不久就到街前，可證所言無虛假。

瑞蘭：（口古：亞爹，叫我哋姊妹出嚟，有何教導）

王鎮：（口古：瑞蘭，瑞蓮，我知道你倆個都好孝順，今日呢啲都係兒女事，夫人你代我講啦）

夫人：（口古：相公，你係一家之主，你講啦，瑞蓮呢，我就冇反對瑞蘭都係你講好，因為素來佢都係聽你嘅說話）

王鎮：（口古：好啦，咁我就對瑞蘭講啦，瑞蘭啊，古語雲，男大當婚，女大當嫁，亞爹就想將你許配一舍上好人家。）

瑞蘭：（白：亞爹，只有天知，地知，你知，我知，我為盡孝經已忍疼回家唔到三年后，你又向我重提婚嫁。）

王鎮：（口古：瑞蘭，以往嘅事係你錯啊還是亞爹錯啊？但係今日嘅事，係你做主啊定係亞爹做主，亞爹一生人最痛疼就係你，唔通你忍心見到個蒼蒼白發想得個闐子之都冇揸拿，係唔係？）

瑞蘭：（白：爹爹，爹爹）

夫人：（口古：相公，瑞蘭仲係年輕，你應該教下佢，勸嚇佢，你唔應該在人前將佢唾罵）

瑞蓮：（口古：係囉，本來唔關我事，不過，我唔曉講都講句，骨肉親情千斤重，做女又邊個愿意一旦離家。）

王鎮：（口古：係！瑞蓮講得啱，瑞蘭，起身，而家談喜事，大家應該歡歡喜喜至啱）【木魚】常言女大不中留，遲早終需嫁，我就係替你招贅東床真聲價，一榜文魁傲才華，就係金榜狀元郎卞雙卿，玉樹臨風人瀟灑，（白：瑞蘭，不過你未見過佢咋，如果一經見過佢面，亞爹話唔俾你嫁你都唔肯啊）

瑞蘭：（白：亞爹）【快點】既然羞且恨咬銀牙，爹爹莫說荒唐話，鏡破何堪玉再瑕。【滾花】人前顧不了驚和怕。（白：爹爹，你今日居高相位，掌握朝綱，何必偏偏要做不仁不義、忘道、忘理之事）

夫人：（白：瑞蘭，你應承亞爹啦）

瑞蘭：（白：亞爹，二十年來父女情，何必因為婚嫁而咁不留余地，好啦，如果你準我在于歸之夕，到玄妙觀附薦俾蔣氏亡靈嘅，咁我就唯有聽你嘅設話喺啦）

王鎮：（白：瑞蓮，你雙點，好趁手）

瑞蓮：（口古：我應承你啦，不過亞妹附薦亡靈，與我同關疼癢，想話陪埋佢去，形影不離姐妹花）

王鎮：（白：好啦，得喇，瑞蘭，起身啦，有冇扽親啊？早啲講啦，如果要附薦嘅話早啲去啦，不過千金小姐，拋頭露面唔好睇嘅，瑞蓮陪你去啦，唔好傷心啦，唔好喊，夫人，等我過府，睇下東候爺同我哋做媒呢件事點至得㗎）

夫人：（白：你哋大早應承亞爹，就彧使激得佢咁嬲啦，有冇親下，梗係嚇親嘅喇，等阿媽煲啲參茶，同你壓下驚啦）

瑞蓮：（白：亞妹，我估唔到你為一點愚孝，就會應承亞爹，我問你玄妙附薦之日，你對我亞哥嘅亡靈，你有何感想呢？）

瑞蘭：【花】傷心附薦亡靈日，處有旋風捲落花。

瑞蘭：【紅燭淚】思郎苦痛憑心香，奉在陰森靈閣上，深深下拜來顧星光，一朝恩徒惹千尋浪，痛哭夫君卻被我牽累，抱石葬三江，心恨那蒼天弄人，情愛絕望，斷絕了今生緣，待來生再酬郎，偷望雙星掛遠方，再燃龍鳳燭，再婚泉臺上。

世隆：【小曲】一炷哭，簪花情劫蔡中郎，誓約難忘，夢短情長，一炷哭，離魂倩女為郎殤，病折蘭芳，芳塚埋香，虔誠奉上伏維尚饗。

瑞蘭：（白：法師話拜月亭有神跡出現，點解唔不見蔣郎，你出現見嚇我）

世隆：（白：頭先喺大雄寶殿，嗰法師對我講叫我誠心附薦，呢個拜月亭就有奇跡出現，點解總唔見瑞蘭魂魄嚟出來見見我）

瑞蘭：（白：企喺拜月亭之人，咁似我蔣郎夫，莫不時我蔣郎夫，今晚靈魂出現，蔣郎……）

世隆：（白；瑞蘭，）（互叫介）【和番】借燈偷照望，望愛妻不似霧里藏，挑燈挑燈照玉人，照影燈花不變方向，

瑞蘭：待我挑燈看，看君得意狀，儷影雙雙翻飛翻飛作浪，休痛哭祭水鄉，（白：蔣郞夫，又話你投江而死）

世隆：（白：瑞蘭妻，又話你服毒身亡）

瑞蘭：（白：我雖然痛不欲生，但係未至服毒而死，一定係亞爹爹不仁，佢妄傳死訊）

世隆：（白：乜你服毒係假嘅，我投江亦係假㗎）

瑞蘭：（白：假嘅，點解啊？）

世隆：（白：我講俾你聽啊，因為）被逼自殺皆虛罔，不致葬身殉惡浪，未應一旦落泉壤，變咗雙卿考試點翰，劫后姓氏香，中得狀元郎。

瑞蘭：（白：乜話，今科狀元係你中嘅，咁就好囉）天捉弄情侶，真歪妄，嘆聲冤孽賬，險誤我一世，爹爹強令強令再度嫁才郎，愿仰藥情殉砒霜葬。

世隆：念約誓，未遊柳巷，更未將龍鳳配稀罕，負了負了負了招贅嘅宰相。

瑞蘭：帶淚拜君不再婚，今生都未致燒錯香，（白：蔣郎夫，難得你為我都唔肯娶王丞相女，不過你和丞相女係邊個啊？）

世隆：（白：王丞相個女，唔知）

瑞蘭：（白：王丞相就係當年為父不仁嘅老尚書，丞相女，就係你朝思暮想嘅瑞蘭。）

世隆：（口古：唔係啩，你有冇氹我歡喜，當年我同你喺鎮陽縣定情個一夕，你話你亞爹一女，而家但有兩個女嘅啵，佢話好比二喬并嫁，一個配孫策，一個配周郎。）

瑞蘭：（口古：蔣郎，我無端端多咗一個家姐，佢就梗係兩個女啦！你又知唔知首我家姐係邊個，就係你令妹囉）

世隆：（白：嚇，我個妹，佢點會係你度㗎？）

瑞蘭：（白：因為走難嘅時候，我怒媽咗佢做乾女，所以話天緣巧合，有時真係出乎人意想。）

世隆：（口古：真係估唔道，我舊時妻變丞相女，親生妹變咗送嫁姨娘）

婢女：（白：小姐，老爺親自帶埋花轎嚟接你啊，快啲出去啦）

瑞蘭：（白：咁你行埋一邊先，蔣郎，你都受得我亞爹氣多，不如等我教你……）

世隆：（白：好啊）

法師：（白：相爺，真係招呼唔到）

王鎮：（白：法師，不必客氣，）

法師：（白：請便，請便）

婢女：（白：拜見老爺）

王鎮：（白：小姐呢？）

婢女：（白：小姐佢就嚟緊啦）

王鎮：（白：瑞蘭，花轎已經嚟咗喇，快啲上轎啦）

世隆：（白：拜見相爺）

王鎮：（白：你……係 ……你唔係個寒酸秀才，到底你係人定係鬼啊？）

世隆：（白：梗係人啦，係鬼邊有咁猛啊）

王鎮：（白：係，如果係鬼就唔會喺度啦，一定係海龍王見你咸酸得滯，打發你翻轉頭，喂，今日喺我個女出閣，嫁新科狀元，你知唔知？）

世隆：（白：我知啊）

王鎮：（白：知就唔好冤住佢做咩啊，我話你個膽，仲大過個只過河飛象，人嚟，趕）

世隆：（口古：咪住，王相國，你都幾交帶啵，）

王鎮：（白：咩交帶？）

世隆：（白：親自送女上轎仲做埋趕新郎）

王鎮：（口古：瑞蘭，開嚟！原來你托詞附薦為名，原來約咗佢再圖茍合，蔣世隆，若果你再藐視三臺，怕只怕你難捱棒杖。）

瑞蘭：（白：亞爹）

世隆：（口古：王丞相，布衣郎，焉敢犯丞相女，我本無心插柳，無奈你強贅東床。）

王鎮：（口古：強贅東床，丞相女，就嚟冇人要，要留翻嚟勉強你喺啦）【木魚】怒吼一聲如雷響，儒生口舌太窮酸，你莫作癡心想，難把天鵝再度甞，（白：哼！你想丞相女得）除非紅日從西上，除非日上中天見月光，除非六月有飛霜降，除非生鹽變白糖

世隆：【花】你無情一語能忍受，無非留言一線好商量，係咁你何苦三番二次下絲鞭

王鎮：（白：乜你估我個女嚟嫁你啊，我俾個女嚟嫁新科狀元卞雙卿。）

世隆：【花】雙卿即係世隆，兩人同一樣。

王鎮：（白：胡說）【快】言詞怪誕太輕狂，（白：藐視三臺送官究辦）

夫人：（白：老爺）

卞氏：（白：乖仔，你快啲換過吉服成親啦）

王鎮：（白：瑞蓮，今日係你出嫁嘅好日子，點解拖住個亞福嚟啊）

興福：（白：王丞相，此福，即是彼福，我亦即是新科狀元卞興福）

王鎮：（白：乜你係新科狀元）

興福：（白：好話喇相爺，細佬，你哋附薦嘅時候，我經已相會，我嘅未婚妻，都可算吉人天相）

世隆：（白：好啦，妹啊，你而家得番個如意郎君，你而家安樂嗮啦）

王鎮：（白：我都唔知你哋講乜，聽到我一頭霧水）

夫人：（白：老爺，你唔知啦，等我講你知啦！蔣世隆即係卞雙卿，秦興福即係卞興福，瑞蓮即係世隆胞妹，我哋親上加親，喜上加喜）

卞氏：（白：快啲去換服去拜堂）

世隆：（白：興福，你使乜咁心急，丞相女，你慌冇人要咩，佢唔會將我哋勉強嘅）

瑞蘭：（白：梗係啦，你想娶丞相女除非……）

世隆：（白：除非生鹽變白糖）

王鎮：（白：好女婿，狀元郎，你唔使咁戲弄我，我頭先嗰番說話，無非係恭維你嘅，不過你誤解咗之嘛！）【木魚】我自認老眼昏花，紅日從西上，我話你當頭鴻運，好似日掛中天配月光，我話蘭女受苦含酸，仲慘過六月飛霜降，今日你甘來苦盡，豈不是生鹽變白糖。（白：唔好講咁多喇，算外父唔該，算你唔著）

世隆：【花】再向大人重拜叩，泰山禮重愧難當。

眾：【煞板】到今時，釵圓鏡全，韻事傳揚。