广播专辑 弄堂茄山胡255 上海个“南京路”

上海个“南京路” 
 
郭善根 
 

　　老早仔个“十里洋场”南京路解放后获得新生，被誉为“中华商业第一街”，名气老响个。伊东起外滩，西至静安寺。为庆祝新中国成立五十周年，1999年将其中个一段河南路至西藏路段开辟为“南京路步行街”后，南京路个名气更加“乓乓响”了。除了搿条“正宗”南京路外，上海还有好几条的的刮刮个“南京路”呢——

　　正宗南京路南面五条横马路，搭仔伊平行个马路叫“金陵路”。有道是“六朝金粉地，金陵帝王州”，“金陵”正是南京个别称。因此金陵路的的确确也是一条“南京路”。有一段辰光，上海有意拿南京路上个中华老字号名店辣金陵路开分店，想拿金陵路打造成第二条南京路，不过因为人气个缘故，呒没成功。

　　从外滩沿南京路西行，大约摸20路电车8站路个地方，有条与南京西路丁字相交个马路叫“江宁路”。“江宁”也是南京个古称，南京现在简称“宁”就是由伊而来个。江宁路也是勿折勿扣个“南京路”。不过搿个名称带眼屈辱，因为鸦片战争后中国历史上第一个勿平等条约——《中英南京条约》正是辣拉搿辰光个江宁签订个。

　　从南京乘火车来上海，出“上海站”到南广场，辣拉南面勿远个马路叫“秣陵路”，而“秣陵”也是南京历史上个一个名称，老早辣拉秦始皇统一六国分天下为郡县个辰光，现在个南京就是秣陵县。所以秣陵路也是“南京路”。

　　南京，搿个堂堂个六朝古都还有一个古名字：建业。建业是三国辰光东吴个首都，而辣拉上海浦东新区金桥地区也可以寻到搿条“南京路”——建业路。