广播专辑 弄堂茄山胡241 刘太后为啥勿愿做“宋朝武则天”？

刘太后为啥勿愿做“宋朝武则天”？  
 
吴兴人  
 
　　刘后是宋朝第一位摄政个太后。伊是宋真宗个皇后，宋仁宗个母亲。1029年，宋仁宗已经20岁了，做皇帝已6年，但六十多岁个刘太后依然垂帘听政，事无巨细，大到国家军政大事，小到皇家家庭小事，都要搿位老太太讲了算。

　　葛末，迭搭要交代一下刘太后个出身和来历。伊个小名叫刘娥，小辰光是个川妹子，长得俏丽动人，又能说会道。父亲打仗死了，姆妈带伊回了娘家。外婆勒伊13岁辰光，拿伊嫁拨一个银匠，名字叫丘美。为了谋生，两家头离开成都到首都开封府打工，刘娥成为一个标准个“外来妹”，生活交关困难。伊勿得勿跑到马路上打拨郎鼓、跳跳舞，当个勿领证个街头艺人，赚点外快。当时，开封个城管对马路设摊管理比较宽松，呒没人来限制刘娥个表演，但引起一个人个注意。迭个人就是襄王爷个听差，名字叫张素。

　　刘娥个老公名字里有个美字，丘美听上去像“臭美”，人个卖相实在勿敢恭维，搭刘娥一点勿配。不过丘美头子活络，善于巴结权势人物，搭张素十分有数。襄王爷是啥人？就是后来个大宋第三位皇帝赵恒——宋真宗。襄王爷听说川妹子漂亮，暗示手下人多留心，弄一个来白相相。张素一拍脑袋，说我勒街上见过一个川妹子刘娥，是个绝色成都妹子，今年只有15岁，面孔雪白，一捏能掐得出水来，但张素就怕丘美勿肯脱手。搭丘美一谈，答应拨伊一千两银子，要伊拿老婆让出来，勿料丘美听了交关爽气，一拍大腿对张素讲：“一桩天大个好事体从天浪落下来，老婆要做贵妃娘娘哉！请侬告诉襄王爷：刘娥勿是我老婆。我搭伊呒没爱情可以谈，伊是成都来个亲表妹。心甘情愿进王府伺候，明朝就好进宫来。”于是，一千两银子，成交！

　　刘娥第二日就打扮得漂漂亮亮进了王府，襄王爷一看，欢喜得勿得了，刘娥成为襄王爷个“小三”，两个人好得如胶似漆，日日夜夜混勒一道。不过，事体很快穿绷，拨襄王爷个老爸宋太宗晓得，伊气得拿儿子臭骂一顿，还将刘娥赶出了王府。想勿到迭个襄王爷重感情，拿出大把银子，叫张素悄悄将刘娥送到一个小宾馆里安顿好，并安排伊拉两人频频幽会。公元997年，宋太宗死了，赵恒即位，成了宋真宗。伊立马拿地下情人接进宫来，封为四品美人。刘娥虽然半老，风韵不止一眼眼。伊入宫之后，能为皇上排忧解难，出主意时引经据典，条分缕析，成为真宗个贤内助。再过5年，刘娥升为德妃，搿年12月24日，44岁个刘娥结束了长达近30年个“小三”生涯，被尊为大宋章献皇后。

　　刘后虽然出身贫贱，但伊自知根底浅，利用勒外面时间，恶补文化，通读各种文史典籍，还学习琴棋书画。历史学家常拿伊搭汉代吕后、唐代武后相提并论，不过史书称伊“有吕、武之才，无吕、武之恶”。赵祯接位11年，刘后襄助真宗近10年。真宗勒病重时期，真正施行皇权个，就是迭个刘皇后。

　　刘娥虽然勿愿还政于仁宗，却呒没想过自己做皇帝。太监程琳拍伊马屁，送伊一张《武后临朝图》，希望伊能做宋朝个武则天。刘太后看后，拿搿张图掼勒地上，叹了一口气说：“刘娥本是当街卖艺女，当上皇后是天意。我勿能对勿起先辈，也勿想做武则天第二。程琳送来马屁勿能吃，我勿能听搿种馊主意。”刘太后幕后听政一直到1033年去世，宋仁宗24岁才正式亲政。