看见生活中的光 16

欢迎关注我的微信公众号“我要学广东话”

早晨，你好。

琴日我同一个澳洲嘅学生上课，学生同我讲，因为全球变暖，导致澳洲发生咗好严重嘅山火，山火影响咗好多城市，悉尼、墨尔本、堪培拉嘅空气都变得好差。山火已经烧咗一个月，而且预计会一直烧到3月，足足烧成四个月。

难以想象，如果呢个火灾发生喺我嘅城市会点样。

听到学生讲咗澳洲嘅情况之后，我先明白我宜家拥有嘅安全和平嘅环境系几咁嘅宝贵，虽然我嘅生活一切都冇变化，但系我睇到咗呢份平淡背后嘅宝贵。要珍惜拥有嘅嘢，唔好等到失去咗先嚟追忆。

琴日我仲感受到呢啲小确幸：

散步嗰时忽然闻到桂花嘅香味；

我买咗一支几十蚊嘅唇膏，打开唇膏盖嗰时，我对佢期待唔系好大，但系当我搽上嘴唇之后，我先发现呢支唇膏嘅颜色好靓啊！跟住我就开心咗好耐。

收到快递，睇到快递盒上面写住“永远相信美好的事情即将发生”。忽然心情就变好咗。

我哋每日好似都过住一样嘅生活，但系如果你愿意用心去睇，你就会知道你嘅每一日其实都有唔一样嘅嘢，如果你愿意多啲关注生活入面好嘅嘢，咁你对生活肯定都会有更加积极嘅睇法。

唔知道你琴日遇到咗乜嘢令你开心嘅事呢？欢迎留言同我分享，我哋听日再见，拜拜！