[沪语版][丰子恺童话故事]文明国

[童话故事]文明国

作者：丰子恺

改编、朗读：麦小姐

 [上海话改编]

小文脱小明到山里向去采花果。小文采了一袋果子，小明采了一篮花。果子交关甜，花也交关香。突然，警报响了。柱头浪向挂起了两只红颜色个球。齐巧搿个辰光，伊拉发现了一只山洞，就豪[忄叜]迓了进去。

只山洞非常深，外加还是曲曲弯弯个。两家头七绕八绕个走了一歇，寻勿着埃条进来个路，乃末兜勿出来了。还好，小文身浪向带了自来火，可以照照路。伊拉继续朝前头跑，肚皮饿了末，吃吃果子；衰瘏了末，闻闻花香。

直到一盒子自来火点光，袋袋里个果子也吃完了，小文脱小明再刚刚走到洞口。不过，搿并勿是伊拉进来个埃只洞口，而是另外一只。

小文小明远远个看见了老多旗子，旗子浪向侪写了一个字母“G”。有交关着长袍个人走过来脱搿两个“外来者”打招呼。原来此地叫做“善山”，是另外一个国家，脱伊拉来个地方是一直勿来去个。善山个山长看到小文小明，来得个欢喜搿两家头个，还邀请伊拉住到伊屋里去。

搿善山个人，真是蛮怪个啦！有一日，山长正辣辣脱小文小明茄山河，突然伊个头痛起来了。伊讲：“快点去查查看，阿拉善山国里肯定有人头浪向受伤了。”一查下来，真个喏，有个小囡辣树边头掼了一跤，只头勿当心撞辣树根浪，正辣辣喊痛。原来，辣搿个国家，只要有一个人觉着痛，大家侪会痛。

又有一趟，山长正辣辣脱小文小明开玩笑，突然伊个背痒起来了。伊讲：“快点去查查看，阿拉善山国里肯定有人拨蚊虫咬了。”一查下来，真个喏，有个小囡睏觉辰光忘记脱化蚊帐，乃末背心头拨两只蚊子叮着了。原来，辣搿个国家，只要有一个人觉着痒，大家侪会痒。

又是一日，山长刚刚吃好夜饭，就觉着肚皮饿了，还是老饿个埃种。伊讲：“快点去查查看，阿拉善山国里肯定有人呒没吃饭。”一查下来，真个喏，有个小囡下山到海边浪向去白相，勿晓得为啥，爬勿上来了，乃末一家头饿了肚皮坐辣海边。原来，辣搿个国家，只要有一个人觉着饿，大家侪会饿。

还有一趟，山长嘴巴干，一大壶茶吃下去，仍旧是干。伊讲：“快点去查查看，阿拉善山国里肯定有人嘴巴干呒没茶吃。”一查下来，真个喏，有个小人因为嘴巴干，想爬到树浪向采果子吃，啥人晓得爬上去以后一只果子也呒没寻着，又爬勿下来，热末热煞快，乃末，就坐辣树浪哭起来了。原来，辣搿个国家，只要有一个人觉着嘴巴干，大家侪会干。

小文小明辣善山蹲了几日天，有眼想回去了。山长讲：“勿急勿急，辣海个埃面搭还有一个国家。我派人划船带㑚过去看看白相相，然后㑚再回去末了。”两家头从船浪向望到埃个国家个旗子，高头是一个字母“T”。船靠了岸，伊拉发现此地个人胸口头侪挂了面镜子，形状像一颗心。搿搭是“真山国”，山长看到搿两家头，也老欢喜个，就邀请伊拉住到伊屋向里去了。

一日，山长辣帮小文小明茄山河个辰光，伊胸口头个镜子里，映出了一只茶杯，意思是伊想吃茶了。原来啊，辣搿个国家，只要心里想到啥，镜子里就会得映出啥，一眼也瞒勿脱人个。比方又有一趟，山长正辣辣脱伊拉讲笑话，讲法讲法，伊个镜子里映出了一碗饭，小文小明晓得山长是肚皮饿了，就请伊吃了饭再继续讲。

伊拉搿搭看看埃搭白相相。辣山外头碰着一个急急忙忙个农民，伊镜子里映出了一只鸭子，噢，原来伊是辣盖寻伊个鸭子啊，乃末，小文小明就相帮伊一道去寻了。鸭子寻到，伊拉继续兜。辣街路浪向又碰着一个急急忙忙个工人，伊镜子里映出了一把斧头，噢，原来伊是辣寻伊个斧头啊，乃末，伊拉也相帮伊一道去寻了。

小文小明到山里向采了苹果回转来，看到一个男小娃儿镜子里映出苹果个样子，乃末伊拉就请伊吃了一只苹果；伊拉又到海边去采花，看到一个小姑娘镜子里映出鲜花个样子，乃末，伊拉也送了一朵花拨伊。

真山个山长拿了两面镜子挂辣小文小明个胸口头，镜子里映出了一间房子。山长晓得，伊拉是想回去了。伊讲：“㑚想回去了是[口伐]，我用降落伞送㑚跑。埃只山洞实在忒难走了。正好今朝有风，搿风叫‘仁风’，祝㑚一路顺风！”

就搿能，小文小明回到了自家个国家，要紧去学堂里拿搿段辰光个经历讲拨所有个同学听。同学们侪老感动个，分头去向周围人宣传。大家听了侪老感动个，动脑筋也造出了埃种衣裳还有镜子。乃末，此地个人脱善山国、真山国个人一样了，大家痛痒相关，互不欺瞒。因为搿个国家是由小文小明改良个，于是就起了个名字，叫“文明国”。从此，敌人勿敢再来侵犯，警报也勿需要再响起来，永远可以安乐太平个过日脚了。

今朝麦小姐脱大家分享个是丰子恺先生写个童话----《文明国》。故事帮阿拉描绘了搿能一个“文明国”----呒没欺骗，呒没隐瞒，人人侪拿人家个感受当做自家个感受。文章寄托了作者浪漫个理想主义情怀。不过老实讲，我觉着，假使单单是一个人或者国家搿能个说话，搿个人或者国家个处境也是蛮危险个；只有所有个国家、所有个人侪搿能，再有可能达到作者所期许个理想境界。当然，辣现实世界里，要实现书里向个“文明国”，是一桩非常非常非常困难个事体。