[沪语版][胡适散文]新生活

《新生活》

作者：胡适

改编：麦小姐

朗读：唐厂长

[上海话改编]

大家好，今朝唐厂长想脱大家分享个是一篇叫做《新生活》个文章，是胡适先生为《新生活》杂志个第一期所写个。原载于1919年8月24号个《新青年》，署名适之。后来又收录进了《胡适文存》。

到底哪能个生活再可以叫做“新生活”呢？

我想来想去，只有一句言话。“新生活”就是有意思个生活。

㑚听了，肯定会问，葛末有意思个生活又是哪能样子个呢？

让我讲一两桩现实里常庄碰着个事体当例子，㑚就会得懂我个意思了。

比方讲，前天侬呒没事体做，无聊得勿得了，跑到街浪向寻了爿小饭店，开始一家头吃老酒。先末吃了四两老白干，勿煞念，又添了四两，还勿煞念，再加了四两。乃末吃得来阿五阿六，脱张阿二吵了场相骂，吵了蛮凶个，恨勿得差点打起来。后来小李子来劝，总算是拿㑚两家头拉开了。但侬心里向仍旧觉着老呴个，干脆继续吃老酒，又干了四两，终于趴脱了。亏得小李子人好，搀侬回转去。昨日早浪向，侬一觉睏醒，酒末也醒了。㑚阿嫂拿前头一日个事体讲拨侬听，侬一听，懊憦煞了，自家怪自家，为啥昨日要吃介许多老酒呢？实在是忒神智无知了！

侬要紧到张阿二屋里去搭伊赔礼道歉，侪是自家勿好，请张兄多多包涵。正辣辣讲个辰光，小李子来了，王麻子也来了，伊拉三缺一，要侬来凑凑台脚。乃末侬坐下来打了十二圈，输到“两袖清风”，歇搁。回去以后，㑚阿嫂怪侬勿应该赌铜钿啊，侬也懊憦煞，自家怪自家，为啥要脱伊拉打牌呢？实在是忒稀里糊涂了。

朋友们，像搿能样子个生活，就叫做“糊涂生活”，就是呒没意思个生活。侬做了某桩事体，回过头来想想，“我为啥要做搿桩事体呢？”结果，自家也回答勿出。

朋友们，但凡侬自家都讲勿出为啥要做个事体，肯定是呒没意思个。

反过来讲，但凡侬讲得出为啥要去做个事体，板定是有意思个。

生活里向个“为啥”，就是生活个意思。

人脱众牲个分别，就辣辣搿个“为啥”高头。侬到动物园里去看看两只白熊，一日到夜漫无目的个荡来荡去，搿个就是呒没意思个生活。我伲既然做了人，就覅去学众牲过埃排日脚。伊拉只晓得瞎混，勿会得懂得自家为啥要搿能。作为一个人啊，做任何事体，侪应该要讲得清爽“为啥”。

我为啥要做搿个？为啥勿做埃个？侬答得出，再可以算是一个人辣辣过日脚。

我伲希望中国人侪能够过搿种有意思个新生活。其实要做到，并勿是老困难个事体，只要侬时时刻刻多问问自家为啥要搿能做，为啥勿埃能做，就可以一点一点个朝新生活靠近了。

朋友们，千万覅觉着“为啥”搿只问题是老便当回答个。侬试试看，从今朝开始，做每一桩事体，就问自家一句“为啥”----为啥勿拿辫子剪脱？为啥勿拿姑娘们个小脚放脱？为啥老阿姐们个面孔高头要搨介许多脂粉？为啥出殡送葬要寻介许多叫花子？为啥讨新娘子也要寻介许多叫花子？为啥骂人要骂到伊个爷娘？为啥搿个？为啥埃个？----侬只要试了做做看，一两日下来，侬就会觉着搿三个字个趣味脱仔功用，真是无穷无尽啊。

朋友们，辣此地，我伲毕恭毕敬个想请大家一道来试试搿种有意思个新生活。

（原文：载于1919年8月24日《新青年》第署名适之，后收入《胡适文存》）