回忆回忆911（苏沪古典汉语 文+音）

回忆回忆911

2001年9月份，我刚刚读高中。记得有日早儿头，可能是9月12号，睏昏搭鬼亇跑到教室里，看见有亇同学哪恁拿著份报纸塱讨论啥个，凑上去看看么像美国纽约世界贸易中心啥畀飞机扻得坍脱。乃么正好还有同学进教室么一头跑进来一头叫：“嗨嗨嗨，佷垯【上夜】头新闻【阿曾】看？美国纽约世贸中心畀飞机撞脱啧！”

从此，我伲记牢著911。从此，一只本来陌生亇名词，常迤迤钻到我伲耳朵里乡来——恐怖主义。

虽然讲起来，我伲並未亲身经历，但电视里亇镜头还是相当具有震撼力亇——噢开著民航客机直拔直朝房子里钻进去，两座摩天高楼“共㗢”势嚷坍下来！佷完全可以想象得出，当年飞机里両个乘客亇绝望撘大厦里両个职员亇惊恐。昰种惨绝人寰亇罪恶行径，激起著美国，乃至全世界亇愤怒！毕竟，人是有同理心撘同情心亇，啥人望著自家或者屋里人乘乘飞机嘞噢畀人家劫持著去撞得烂肉粉身？！啥人望著自家或者屋里人蛮好伏著房子里嘞噢飞来横祸炸得一样呒啥啥？！就像杀人偿命一样，人亇本性，一定是报复亇热血直冲头顶，一定要拿策划实施昰种暴行亇绝子孙短寿揿牢！行杀！碎尸万段！

有只镜头一直印象深透——巷巷尽尽亇美国民众聚集著街路上，齐声高喊：“USA！USA！USA！USA！”场面蔚为壮观，颇感怒发冲冠！还记得后晚来亇报纸上，一个身胚结棍透结棍透亇美国特种兵坐著地下打电话，文字说明是“打畀屋里亇阿末一只电话”。还有一张照片是一个飞行员撘娘子俦搿牢定著塱飨面孔嘞——出征前头亇最后一吻。

从此，美国开始著持续到乃亇“反恐作战”。的确，取得著一定成果——打垮著塔利班，行脱著本·拉登。不过，最后发现，一个拉登滚脱啧，千万个拉登爬起来啧，恐怖分子像打不光亇小强一样，实在是难缠透难缠透！当年撘日本人俦打得再艰苦么啧，爽气爽气亇呀，两只蛋一厾么也服帖啧，还倒转来做跟班嘞！但昰个恐怖分子实在是吃佢不定——一歇儿有，一歇儿呒曼，打脱一坒，又冒出一坒，看看像呒曼啧么，背后头竟然还有独狼式袭击，真防不胜防，惊惊吃酸亇！

不过世界第一军事强国亇反恐实践也说明著一点——看来恐怖主义不是靠军事打击可以根除亇。实际上仔细想想就是昰恁桩事体，就像一般性亇暴力犯罪也几千年来朆消灭一样。因为人，本质上就是一种滑稽亇动物，为著争夺利益样样事体全做得出来亇，当利益矛盾不可调和亇辰光就会诉诸暴力，等真亇打得额角破碎、骷榔头敲开著么又像加二肉麻得“喔唷，全爷娘养亇，也是一条命，咋嘞大家要打得昰恁？”但真打罢著歇著呒不几许辰光是【老早】已经好著伤疤忘记痛，又要开始缲拳捋臂准备上手啧呀！昰个就是人。无非只是掌握国家机器亇群体可以使用国家机器采取大规模亇暴力手段，呒得国家机器亇群体只好自家偷掩匿畔弄眼小规模亇暴力活动行佷难过。乃么佷话哪恁算恐怖主义？听说讲定义多得巷巷尽尽。但不管哪恁定义，对于我伲最普通亇人来讲，可能听见恐怖主义就想着暴力，而最基本亇愿望就是覅用暴力来解决问题——小到生活中亇人际纠纷，大到族群间亇国际争端。

但可惜，百人百性。茫茫人海之中总贯是有人热衷于使用暴力解决问题亇，而当佢觉着自家不足以与对手亇武力相抗衡亇辰光，或者觉着对方缺乏自卫能力亇利益相关者同样应该打击亇辰光，必然会针对平民实施攻击——而昰种做法，塱和平时期必然会引起公愤。但仔细去想，战争时期亇类似事件绝对是有过之而无不及。二战时期交战双方全对敌方亇城市进行著大规模亇轰炸，炸杀亇平民难以计数！与之相比，911简直不值一提。但啥人去追究？横发动战争亇族群最后已经兵败亡国，而带有正义性亇胜利方会认为昰个是为早日胜利应该采取亇必要行动，特别是阿末两只原子弹，死脱多万平民，的确逼得日本迅速投降，双方全好少死无数人。乃佷哪恁话嗫？

一个国家亇军队来源、军事装备，的确就是来自于后方亇人口撘工业生产，本来就是一个国家亇利益共同体。就像两个人打相打，打上来亇是拳头，但指挥亇是骷榔头，送拳亇是肩胛头，支撑亇是脚馒头，乃么佷阿是真亇只是拳头拼拳头而不会去敲佢还有両只头？从斗争实际来讲，我想佷总不会得觉着拳头拼拳头有几许明智嚷？昰个作兴也是各种层面亇利益斗争全不可避免亇波及到平民亇一个重要因素。

美国撘佢亇对头俦到底有哪恁亇恩恩怨怨，我伲局外人未必真正了解。但不管哪恁，像911昰恁亇事体，包括针对城市亇狂轰滥炸，大家全不想发生著自家头上。

哪恁既满足各方亇利益诉求，又不至于使用暴力手段，作兴是人类社会永远追逐亇目标。

疁·浏河长江

2018年9月12号  礼拜三

戊戌年  八月初三

嘉定建县800周年

苏沪古典汉语（两市全境汉语语音古今对应关系规整，局地古汉语平仄、舒促、清浊、尖团格局完整保留）

嘉定菊园老茶坊《嘉定闲话》栏目

嘉定古建与民俗文化研究会 · 陈夏青嘉定语言研究工作室   出品

汉藏语系·汉语言·吴方言·太湖片·苏沪嘉小片·

太仓方言大区·嘉定方言区·华亭方言点

（声韵调标准）

乡音就像亲爷娘。习得通语，不必抛弃乡音。