启迪心田沪语 末代区长（上）

末代区长陈华生 上
作者：王建运
沪语改写、讲述：知足常乐
审核指导：丁迪蒙
编辑：王乙其

旧上海国民党政权最后一任市长赵祖康个故事，老上海差勿多人人侪晓得个，伊从临近上海解放出逃台湾个陈良手浪接任代理市长，辰光只有三日天，就是1949年5月23日到同年个5月27日。不过交关人侪勿晓得，当年勒上海东北角个杨浦区，同样也有迭能个事体。当时国民党杨浦个正副区长先后逃往台湾，伊拉拣了一个刚刚从大学门踏进社会个年轻人，叫伊代理杨浦区长，搿个年轻人就是陈华生。

回忆顶多是大学
我勒政协看到陈华生先生个辰光，伊将近七十岁了，长得矮矮小小，面孔宽大，头发稀松，蛮像一位中央领导人个。因受到历史问题牵连，葛咾伊长期一个人勒外地农场生活，呒没结过婚。十一届三中全会后，平反落实政策回到上海。先开始伊作为民革成员经常参加政协学习，后首来看伊单身一个人，身体健康，故所以统战部安排伊到政协秘书处协助做眼文案工作，每日天工作半日，拿眼津贴贴补生活费用。
现在个杨浦区，勒当时是分为榆林、杨树浦两个区个，历来是上海居住人口稠密地区，也是上海产业工人顶集中个区域。据1947年国民党市政府个统计，杨树浦区内有市民56855户，其中成年男性151308人、成年女性126089人，合计总人口达27.7万余人。我从历史文献中考证，1895年上海总人口29万多眼，搿能算来，伊歇辰光个杨树浦区的人口数差勿多抵得上一百多年前上海市个总人口数了。

陈先生讲一口南京近郊闲话，伊毕业于西南联大。搿是1937年由北京大学、清华大学、南开大学等高校，勒抗日开始后内迁到长沙个一所综合性大学。由于连连遭受日本人个轰炸，1938年2月大学西迁昆明，改称西南联合大学。陈华生抗战辰光读书，跟牢学堂勒后方辗转迁徙，吃过勿少苦头，伊勒搭我伲相处个日脚里向，讲得顶多个就是西南联大勒云南、贵州以及四川重庆办学上课个回忆，包括当时任教个几个著名教授专家个趣闻轶事。我曾经听伊讲西南联大一位教授叫傅斯年，勒昆明为躲避当时日军个轰炸，寻人勒楼前挖了一只大土坑，上头盖木板当防空洞用。住勒楼浪个国学大师陈寅恪看见后，专门作过一副带有讥讽个对联“见机而作，入土为安”，拨大家嘲为苦中有乐趣个事体。陈先生还讲，当年影响伊拉上课个，勿只是炮弹个袭击，还有西南多雨个气候，由于教室个屋顶是用铁皮做个，所以每趟落雨，雨点打勒房顶浪叮叮咚咚个声音，搅得学生根本呒没办法听课，经济系教授陈岱孙只好停下讲课，勒黑板浪写了四个大字“停课赏雨”，搿记头，学生仔侪忍俊不禁。由于当时经费紧张，最后连教室、学生宿舍屋顶上个铁皮也拨撬下来卖脱了，全部换做稻草替代，结果一落雨教室漏得更加结棍，学生只好撑仔伞上课，成为抗战大后方个一大奇闻。