广播专辑 弄堂茄山胡710 挂辣信箱浪个钥匙

挂辣信箱浪个钥匙
钱红春
　　老朋友难得碰头总有讲勿光个闲话。老张搿天讲个一桩事体，大家侪跷起大拇指讲伊“上路”。


　　老张住辣一幢高层住宅个底楼。去年夏天一个礼拜六早浪，伊开信箱拿报纸个辰光，发觉楼浪有家人家个信箱门浪挂仔一串钥匙，信箱里已经一眼呒啥啥，估计是拿好报纸或其他邮件以后，忘记脱拔钥匙了。伊看看周围呒没人，正想拔出钥匙送上门，但刚刚伸出去个手又缩了回来，心里想，搿家人家个事体还是少管管。


　　原来，老张买房子个辰光，就是看中底楼有院子，平常好种种草，养养花。勿晓得搬进去以后，院子里常常有纸屑飘下来。搿点纸屑落到地浪也就算了，扫起来也便当，偏偏有勿少落到花盆里，枝叶浪，角角头，要一眼眼拈出来。向小区物业反映，物业管理人员查仔几趟也查勿出是啥人家厾个。后来物业虽然贴出告示，提醒楼浪人家勿要乱厾物事，但情况并呒没好转。有一趟伊打扫院子个辰光，发觉纸屑当中有只扯碎脱个信壳，拼接起来一看，是五楼一家人家嗰，就上楼交涉。原来五楼搿对小夫妻有个三岁男小囡，有辰光欢喜捺纸头扯碎脱朝下头厾，看到纸屑辣辣半空中飘上飘下，觉着蛮好白相。本来搿个也勿是啥大事体，以后当心点也就算了，啥人晓得小囡个娘当面呒没讲啥，辣辣背后头浪里浪声。讲伊斤斤计较，一眼碰勿起；又讲伊小题大做，搿点点小事体还要寻上门来。闲话传到伊耳朵里，心里有点齁，想起搿桩事体就想一走了之。但转眼想想，搿串钥匙要是落到坏人手里，麻烦就勿是一眼眼了，勿仅搿家人家要遭殃，整个楼里也勿会太平。最后伊想，人家发觉钥匙勿见脱，一定会得来寻，伊就索性坐辣辣大楼门口个台阶浪，一边看报纸；一边守牢搿串钥匙，一旦有人进出，伊就抬起头来看看钥匙是不是还辣辣，防止拨其他人捺走。


　　大约莫过去半个多钟头，只看见小区居委会个刘阿姨急急忙忙走过来，看到伊就问：“侬哪能啦，嘎晏还勿去锻炼。”伊就捺事体个原委讲拨刘阿姨听，刘阿姨松仔一口气讲：“我就是为搿桩事体来嗰。”刘阿姨又讲，五楼搿家人家刚刚来过电话，让伊赶紧过来看看钥匙是勿是还辣辣。原来，搿家人家小囡个爷爷住辣昆山乡下头，搿天是六十岁生日，一家三口一早浪就开车去参加寿宴。为打发路浪向个辰光，小囡个娘就顺便开信箱捺出昨日个夜报。因为怕晏辣路浪向要拥堵，所以急出乌拉，忘记拔下信箱浪个钥匙。等到发觉，车子已经辣辣高速公路浪，勿好临时调头，就打手机拨拉小区居委会个刘阿姨。刘阿姨对老张讲：“亏得侬守辣海，要是钥匙勿见脱了，就算勿出事体，搿串钥匙配配也是蛮麻烦嗰。”


　　过脱几天，老张早锻炼个辰光带仔几只寿桃分拨大家。原来昨日夜快点，五楼小夫妻回到屋里，一家人刚刚放好行李，就一道上门感谢，还送拨老张一盒寿桃。


　　从此以后，老张个院子里再也呒没天浪落下来个纸屑，两家人碰着也会问长问短，讲脱一歇闲话。