广播专辑 弄堂茄山胡459 啤酒蒸蟹

啤酒蒸蟹


邵天骏


 秋风起，蟹脚痒，正是吃蟹个季节，秋天个大闸蟹膏多肉厚，无论是母蟹还是公蟹侪是相当好吃。江南一带有勿少大闸蟹个产地，除脱邪气有名气个阳澄湖大闸蟹，太湖蟹、崇明蟹，搭仔黄浦江上游个蟹等，侪是勿错个选择。前几天趁双休日大家侪有空，就辣屋里办仔一桌蟹宴，热气腾腾个啤酒蒸蟹端上桌，顿时满屋飘香，一股麦酒个甘醇香味让人馋涎欲滴。


 到市场里挑选大闸蟹，其实也交关有讲究。个大、脚硬、肉多、劲足应该是基本个注意点，而越是张牙舞爪就越表明蟹个旺盛生命力搭仔良好体质。要尽量避免挑中半死勿活个大闸蟹，否则口感就要打折扣了。搿趟买到个大闸蟹邪气勿错，用小刷子刷洗干净，有几只汏清爽了还会吐泡泡。


 先用泡沫丰富个啤酒泡大闸蟹十分钟左右，再拿蒸锅放辣灶头浪，一只只扎好个大闸蟹放辣锅子里个盘子浪，倒进刚刚泡大闸蟹个啤酒，盖好锅盖，用大火拿啤酒烧开，再用中火慢蒸。从透明锅盖看进去，刚刚还是青颜色个蟹壳已经变成金黄色，一歇歇工夫就有香味散发出来。


 同一般用清水蒸出来个大闸蟹相比，啤酒蒸蟹个色香味侪有所勿同，勿仅有一种特别个酒香味，吃起来也更加爽口。端上桌个每一只大闸蟹，就像是一件件做工精细个“工艺品”，搿辰光已经是可以好好享用一番了。当然，蘸料也蛮重要，根据自家个口味，辣香醋里添加适量个姜末和红糖，调匀，可以让蟹肉更加鲜美。


 啤酒蒸蟹作为妻子个拿手菜，每年秋末冬初侪会拿出来露一手，勿知勿觉就赢得了亲朋好友个好评。每次辣朋友圈里讲到准备做搿只菜，总归会招来几个“粉丝”，约好辰光，大家一道谈天说地，交流心得，品尝美味。


 虽然啤酒蒸蟹味道邪气好，勿过按照中医个讲法，大闸蟹是一种性寒食物，勿能多吃，所以名为蟹宴，其实还是要有其他荤素菜肴搭配，而好菜好汤就是一种上佳个选择。