广播专辑 经典上海闲话144 插档、挨着、挨勿着

插档、挨着、挨勿着

阿仁　

　　老底仔个上海人欢喜排队。到处可以看到大家辣排队。小菜场里，肉摊、鱼摊、豆制品摊头、蔬菜摊头前面必定排队排成东一条龙、西一条蛇。马路浪，公交车、电车站头也有排好长队个。各种各样个商店前头、里向也会弄出一条条队伍出来。布店里有便宜好看个料作卖了，阿姨、妈妈们排起队了。服装店里有衣裳裤子打折头了，爷叔、先生们轧起了队伍了。吃食店门口个长队是为了买鸡壳子、鸭脚爪，便宜。烟纸店外面个长龙是为了买生啤、啤酒，因为难得有货。就是到老虎灶去泡开水，也要耐心个排一通队。用现在个讲法，上海人欢喜排队是“被”欢喜个。人多货少，供应勿足，大家只好来排排队。当场排队还是算幸福个。有辰光还需要隔夜、隔两夜三夜去抢位子排队个。我当时为了买一部凤凰牌脚踏车，在西藏路浪个杀牛公司旁边个一家车行前排了两天两夜个队，才算买到了我一生中个第一部脚踏车。此举难忘。

　　上海人排队被锻炼得训练有素。一个盯牢一个，一个贴牢一个。也有狡猾个会趁机插档个。插档，上海闲话。北京人个讲法：“加塞”。插档个常常是面皮厚、心眼小个脚色。一旦穿绷，难免被逐出队伍。也有被冤枉个，要经过前面后面个朋友反复证明之后才可以重回革命个队伍里。因此排队个辰光，常常可以听到搿样子个闲话：“老爷叔，我挨拉侬后面个！”“阿拉弄清爽了，前头三个是三个阿婆，后面两个是戴眼镜个。再后面阿拉就勿管了。大家挨挨紧，省得有人来插档！”挨，轮个意思。查上海话大词典，挨读’a。弄勿懂注音个，找谐音。挨有点像“阿”个发声。小辰光弄堂里小囡一道白相，会吵相骂个就是因为“挨得侬”还是“挨勿侬”。交关上海闲话就辣拉嘴边，但要侬一记头写出来、写得明白，蛮难、蛮促掐个。时下个小上海人还是聪明个，以拼音替代或者找个发音相似个字来替代。别人看得懂就算过了。毕竟吴方言、上海闲话也是一门深奥个学问。

　　排队排到了，挨着了、挨着了。排队买勿成功了，挨勿着、挨勿着了。上海滩浪排队、排长队、排隔夜队个故事消失中。我曾经提议晚报个摄影记者来开一个“今朝何处有排队”个栏目，专门记录当下市面浪个排队新闻。也让大家可以看看市场个热门景象。何时、何处、何人、为何事又排出长龙了。摄影同行个回复很快出来了：“如今已难见排队！”确实，眼下还有啥个物事买勿到呢？我落伍哉。