雪梨粤语频道：听《陈扬——无从怀念的广州》有感

大家好，我係雪梨。最近听咗陈sir（陈扬，曾主持<新闻日日睇>，是深受广州街坊喜爱的媒体人）嘅人物访谈节目《无从怀念的广州》有好大感触。

广州喺哩几十年之间变化巨大，喺节目入面，佢被问到边一样变化畀佢感觉最强烈，佢话“变大咗”，仲要係大到都搞唔清而家广州究竟有几个区！连佢一个喺广州生活咗六十几年嘅老广都噉讲，作为后生嘅我瞬间觉得有同感嘅原来唔係净係得我一个！

以前嘅广州（六、七十年代时）得老四区：东山、越秀、海珠、荔湾。后来加咗白云、天河、芳村同黄埔变成八区。读小学嘅时候老八区合并，再加埋番禺区嗰啲，再后来又新增花都从化（要知道花都从化这些以前是市级行政区来的）……我都搞唔清係几时改嘅，而家有几个区都冇放喺心度，就係觉得广州一直喺度扩大扩大再扩大，好似唔会停落嚟噉。

陈sir仲讲到佢每次去珠江新城都荡失路。虽然我冇咁夸张（因为每次去都是那一两个地方），但係哩个“新城”的确令好多老广觉得陌生。谂起之前有个外地男仔，听到我话天河同白云（区）好远，平时冇咩事都唔会去嘅时候，好难以置信噉讲：“噉都算远吖！？点解你哋啲本地人都觉得天河白云好远，我见好多都係噉嘅。”（到现在依然能记得他当时复杂的表情和眼神）

净係见到而家广州嘅人可能唔会理解。广州越嚟越大，越嚟越多人，骑楼变高楼，巷仔变马路，变到好陌生变到自己都怀疑係咪生活喺记忆中嘅“广州”。但係无论广州变成点，正如陈sir话斋，哩个都係大家一齐生活嘅地方，广州嘅未来需要哩度每个人一齐去创造。