王贵与李香香 顾月珍（1949年唱片）

（起腔）我听见此言笑盈盈，（干板）随军出征是本份，勿要为我勿放心。香香虽然年纪轻，家中还有父亲要照应，你应该要想一想，从前辰光做人多少苦，有一顿来无一顿。自从此地要解放，做人真像登拉天堂上。幸亏同志闹革命，闹革命重见了太阳面，闹革命救了许多人，闹革命伲合村多快乐，闹革命你我自由结了婚，闹革命个个有工作做，闹革命人人有田耕，闹革命清算了大地主，闹革命穷人翻了身。还有许许多多苦农民，仍在压迫势力下，日常世久受苦情，恭祝贵哥要努力，侬去冲锋杀敌打敌人，希望敌人全克服，可以解放别村苦农民，更希望侬旗开得胜归家转，（甩腔）要报杀父大仇恨，（落腔）许多血债总算清。

（起腔）侬迪个恶贼勿应该将我抢到此地来，（干板）强逼与我夫妻配。侬以为自家有势力，横行不法所作所为，虽然我是一个贪家女，勿贪荣华勿爱财。威武勿能屈服我，宁死勿愿与侬夫妻配。以前辰光侬将我父亲支差去，千山万水受苦难。可怜我个父亲身亡故，侬就是我杀父宽家仇人对。若要与我夫妻做，但等到铁树会得花来开；若要与我夫妻做，黄河水干人往来；若要与我夫妻做，六月里厢大雪堆成山；若要与我夫妻做，公鸡会得生鸡蛋；若要与我夫妻做，跷脚直手矿来开；若要与我夫妻做，哑子要开评论会；若要与我夫妻做，待等到青天会得塌下来；若要与我夫妻做，但等到死羊阉要变活羊瓣。侬勿要以为伲穷人今生今世无有翻身日，但等我伲红军来，打倒侬剥削大地主，许许多多血债要讨还，拿侬恶贼枪毙脱，拿侬首级挂城关，拿侬尸体抛郊外，（甩腔）拨拉猪来牙狗来衔，（落腔）大快人心多开怀。