广播专辑 一天一句221 大饼油条豆腐浆

广播专辑 一天一句221 大饼油条豆腐浆

大饼：各位阿弟阿妹，五一小长假，侪出去白相了伐？
油条：我辣嗨嘉里顿(家里蹲)
豆腐浆：噢，嘉里顿？！出国开洋荤了，迭个嘉里顿是啥个国家啊？
油条：是蹲辣嗨屋里勿出去，迭个家里蹲，上海人又叫“孵bhu豆芽。”
豆腐浆：现在叫：“宅男，宅女。”
大饼：油条老弟，侬聪明个选择，外头人多来西，轧也轧煞脱了。粢饭老弟呢？
粢饭：三天假期，我第一天到阿拉阿哥粢饭糕屋里吃茶谈山海经，第二日到阿拉表阿妹米饭饼屋里吃饭，第三日外甥甜酒酿结婚，我去吃喜酒个。
大饼：粢饭口福勿浅，三天侪辣嗨忙了一只嘴巴浪，葛末豆腐浆阿妹呢？
豆腐浆：勿问我到也算了，问问我，真叫一包气！
大家：哪能一桩事体？
豆腐浆：我看到一则旅游广告，讲浙江萧山有一个活动，叫：“金沙戏水萤飞夜，”就是主办方要发飞三万只萤火虫。
粢饭：城里人平常看勿到萤火虫，迭只创意灵个。
油条：攒个呀！诗情画意，浪漫之夜。
豆腐浆：啥个浪漫之夜，是狼狈之夜！我约好了姐妹淡浆，甜浆，咸浆，四个人一部车子，直奔萧山，七转八弯总算寻到活动主办个地方，门票三十元一张，进去一看人山人海，毛估估有万把人，真个是大人看脑袋，小人看屁股。好勿容易等到天暗下来了，叫啥萤火虫一只也呒没看到。
油条：勿是将好要放三万只萤火虫个嘛？
大饼：作兴萤火虫从来呒没看到过迭种人山人海个场面，吓得勿敢飞出来了。
豆腐浆：后来总算有两三只萤火虫飞出来，大家激动啊，万把双眼睛就盯牢迭两三只萤火虫看。
油条：迭几只萤火虫胆子大个，大概是见过世面个。
粢饭：人比虫多啊！
豆腐浆：迭两种萤火虫兜了两只圈子就飞脱了，开了几百公里路程，油费，过路费，门票，吃饭，吃茶，开销勿小，结果就看了迭恁介两三只萤火虫，侬讲触气伐？还呒没阿拉屋里蚊虫多来！
油条：还是阿拉宅辣嗨屋里，看看电视看看书适宜。有句闲话迭恁介讲个，节假日去西湖，看勿见桥头，只看见人；去名胜古迹，看勿见历史，看到个还是人；去动物园，看勿见动物，看到个依旧是人。
粢饭：讲得一眼勿错，动物园里99%个动物侪是人。
豆腐浆：后首来游客纷纷要求退票，旅游策划公司个人吓得了勿敢出来，压末终于出来解释讲是因为天气勿灵光，萤火虫心里挖塞，勿肯飞出来。真个叫哭笑勿得啊！下趟长假，我也勿出去了，向油条阿哥学习，掗（无）了屋里向。
大饼：我认为假期出去白相相是蛮好个，有利身心健康，问题是有眼旅游策划公司搞活动拍脑袋，呒没可操作性，结果开大兴，弄得大家勿开心。