牛娘剧《打碗记》_凤儿群组唱

牛娘剧《打碗记》
演唱：凤儿快乐唱歌群组唱
录制：昱江

场次：
第一场 分家
第二场 惊变
第三场 逐母
第四场 得救
第五场 打碗

演员表：
二叔公……陈老十
小寒……旭日
大年……亮点哥 
孙如意……芳婵
王秀芬……东成西就
陈母……夏影清风
白玲……凤儿



第一场 分家

********（响锣）


（外景，陈二叔上）
二叔（白榄）：
我姓陈，排第二，人人喊我作二叔，
家穷冇片瓦，住间破茅屋，
五十出头还是红花仔，冇有亲骨肉，
大佬生有两个仔，唯我是碌掘头木
大哥早去世，冇得享仔福，
大嫂虽然做了阿婆，但系家庭一向冇和睦，
侄妇孙如意，张嘴似爆卜！
老婆管老公，管得贴贴又服服
晚侄陈小寒，书得几年读，
道理高过天，满肚臭局宿
娶妻王秀芬，为人确贤淑
真系善男娶得霸家妇，淑女嫁比横纹木
家庭争吵常揾我，平时冇人叫我食碗粥
今朝佢俩又来揾，叫我到佢屋
唔知做乜嘢，问佢讲碌唔讲碌
待我到佢家去，睇睇事情直或曲，直或曲！
（下场）

********（响锣）


（外景，陈小寒手拿一瓶三花酒上）
小寒唱：
在街买斤靓三花，为因今日要分家
请我二叔做老大，先用好酒打下巴
大嫂虽然嘴头利，有二叔帮我冇怕她
叫判旧屋分比我，又判我作养阿妈
旧屋虽旧是大杉木，新屋松木似犁耙
娘亲虽老能凑妹，又能织布兼纺纱
煮吃喂猪喂鸡鸭，老婆耕种好抓拿
但愿天遂我心愿，不费舌剑共利牙
抓定主意系咁样，两脚如飞快步跨
（下场）

********（响锣）


（家堂景，孙如意捧酒菜上）
如意唱：
今日炒制不一般，脆口花生排骨酸
白切阉鸡炖鸭母，滑肉猪肝各一盘
烧鱼烧肉兼炸扣，金针木耳样样全
今日分家请老大，等候二叔早登门
白：大年，出来先啦！
（大年抱婴儿上在外）
大年唱：
内厅闻得贤妻叫，为夫抱儿把步移 （入）
白：贤妻叫我出来有何吩咐啊？
如意唱：
今日分屋分家私，一切有我作主持
争争吵吵你莫管，抱儿去荡诈冇知
一切听我来吩咐，我冇叫你莫到哋
白：记住啵！抱孩儿出去行下啦！
大年白：是！（无奈出门）
如意唱：如意配夫陈大年，善良老实听妻言
大年唱：只唸娶妻得妻使，冇知管得铁咁坚
如意唱：大声喊来细声应，经经合得我心田
大年唱：鸬鹚吃鱼哽在颈，有如哑巴吃黄莲
如意唱：乖乖抱儿出门去，等我整哋鸡蛋煎 （入场）
大年唱：恶妻难治自古话，只好抱儿出外边 （下场）
（小寒拿瓶三花酒上外）
小寒唱：快步如飞转回家，望睇大嫂搞乜鬼花
（入门见桌上摆好酒菜，如意上，二人见面各怀鬼胎）
小寒白：大嫂……
如意白：二叔……（各另场）
小寒白：我心想自己出钱买斤靓三花打下二叔下巴，谁知大嫂在屋里煎煎炒炒，煮得咁多菜，唔得！等我用冷言冷语烧下佢正得！（转回）
唱：
大嫂手段不寻常，煮出菜味十里香
和尚听闻流口水，观音亦想尝一尝
新学裁缝真佩服，打铁要算老手强
大嫂怕要教教我，等我学熟拉风箱
如意唱：
二叔休要谬夸奖，冷撑热炒好平常
玉液琼酱慢中醉，嫩饭蒸出酒力强
你讲边个吃老笋，腌酸总是要嫩姜
（二人各另场）
小寒唱：大嫂只嘴确紧张，啱啱下棋佢来将
白：真系偷吃不如佢老狗！
如意白：我作办菜佢买酒。
小寒白：唔知佢心怀乜主意？
如意白：如意心中早有计谋。
小寒白：察言观色再试下，
如意白：绝对不会上佢钩！
小寒白：好彩新花食老蛤，
如意白：叔公不到我不开口！
（二人不理，二叔上入门）
二人白：啊！二叔到来请坐！
（二人同捧凳扶二叔坐，急又转身各斟一杯茶递上）
二人唱：二叔咁早到我家，先饮一杯甜香茶
同白：二叔请饮茶！
（二叔接过两杯茶，另场）
二叔白：奇怪了！平时我路过佢门口，佢都冇会叫我入屋吃碗粥，今日我一入屋，二人争做抽凳斟茶，到底为乜啊？
唱：双手接过茶两盅，两盅颜色一样同
不知边杯应先饮，点得同时落喉咙
小寒白：先饮我呢杯！
如意白：先饮我呢杯。
（二人争，二叔有主意了，将两杯倒做一起，一饮而尽）
二叔唱：两杯香茶我领落，嫂侄的确情义浓
小寒唱：二叔饮了甜香茶，又来饮下我出钱买的靓三花
如意唱：台上肉菜是我煮，试睇味道好或差
（小寒怒视孙，孙轻蔑冷笑）
二叔唱：做乜事情咁大把，莫非晚侄添白花
小寒唱：二叔坐落慢慢饮，饮饱然后讲其他
二叔白：哎，咁我大嫂，大年侄，同埋晚侄妇呢？叫埋佢地一起来吃啊？
如意白：佢地在里面又开一桌，叔公，来，吃个件扣肉！
小寒白：二叔，这三花酒好香，来，饮！
（二人争夹菜斟酒，各另场）
小寒唱：火烧磨房实冇对，为乜讲话咁合雷
如意唱：自古人小识猫意，佢个心儿我识推
小寒唱：我嘴不如佢嘴利，最怕二叔会帮佢
如意唱：只求二叔作公证，画眉装梭冇使媒
（二叔醉步离坐，二人扶）
二叔唱：今朝早餐未曾食，好酒落肚见头晕
你家究竟有何事，不妨讲过二叔闻
小寒白：二叔！（凑近）只因今日我地兄弟分家，想请二叔帮下我……
二叔白：啊！（惊）分家？分家嘛？（酒醒了一半，后悔）
（白榄）早知冇吃好地地，吃开正愿死
佢地个老大实难做，顺得哥情失嫂意
冇有一个愿蚀底，一个贪心一个嘴利
想飞又冇翼，冇条地裂钻得入地
既然入了笼，硬着头皮试一试，试一试！（转回）
白：好啦！既然你地话要分家，咁就叫我大嫂，同埋大年侄，晚侄妇一起到来商量商量，点样分法正好。
二人白：又唔系争跤，又唔系打架，双方都我有在此，又有二叔作主，咁就得咯！
二叔白：亦有道理。咁都要叫你娘亲出来，问下佢老人家意见点样先！
二人白：有请娘亲（家娘）。
（陈母上，小寒如意扶坐）
二叔白：大嫂啊！大侄妇同晚侄今朝一早到我屋揾我，话讲要分家，我想问下你老人家有冇意见啊？
陈母白：唉！二叔，自古道：
唱：兄弟同居冇过世，佢地要分那就分
点样分法冇意见，总要和气分得匀
二叔到来作公证，点分要问两方人
白：二叔啊，既然佢地话要分，你就做老大主持下就得咯！我要入去喂喂猪鸡先。
（陈母下，小寒如意暗喜）
二叔白：你地都听到了！我大嫂讲，兄弟同居冇过世，分家冇所谓，总要和和气气就得咯！咁你地讲下点样分法比较好呢？
小寒白：二叔，我讲先！
唱：小侄公平心冇私，分家我愿蚀底哋
村头新屋让大嫂，我住旧屋养母慈
家私杂物冇先领，照我睇来是合宜
二叔白：啱啱啱！（另场）哎呀！自古话人不可貌相，水不可斗量，睡梦都唸冇到我个只晚侄，平时腰骨夹算盘，今日突然冇同了啵，又冇要新屋，又愿养老母，家私杂物又冇先领，真系难得个孝仔啰！我以为咁个老大难做，照咁睇来冇难啵！好，等我又问睇大侄妇先！（转回）大侄妇，你个意见又点样啊？
如意白：我嘛！叔公你听住！
唱：我心好比樘榔树，二叔只心亦冇偏
新起大屋让比我，感谢二叔好心田
新屋你住母你养，只怕人家会传言
我亦想住老旧屋，亦想养母尽孝贤
二叔白：啊！你亦想住旧屋，亦想养老母？哎呀，真系好咯！两个都有咁孝道，我大嫂真系老来得福咯！好啦！咁你地就听我判来！
唱：互敬互爱皆同样，双方都是好主张
侄妇就领细叔意，新屋总比旧屋强
白：侄妇你讲系唔系啊？
如意唱：叔公为乜冇想想，古人传落道理长
长仔不离旧屋宅，颠倒旧规人传扬
我住旧屋是定了，长仔点能冇养娘
（叉腰怒眼，二叔见状另场）
二叔白：哎呀！点呅转眼就冇同调了。住旧屋，养老母，都系啱啊！又使乜讲住旧屋住定了？长仔不离旧居，亦有道理，又使乜叉腰怒嘴眼凸凸？唉！
唱：刚才宽容又笑脸，的生眨眼大冇同
（想想，转对小寒）
白：晚侄啊，你大嫂讲得都几有道理，长仔不离旧居，咁你就住新屋啦！至于养老母个话呢……
小寒（打断）哎呀二叔啊！
唱：二叔咁判实冇通，唔中冇知小侄穷
二叔白：我知！就是见你难哋，所以判新屋比你，等你日后冇使唸起屋，单单聚钱娶新妇就得咯！
小寒白：二叔！（指屋顶）
唱：旧屋尽是一色杉，条条杉木大楼栋
我妻不日要分娩，冇人凑妹点作工
万望二叔判比我，莫比小侄落了空
二叔白：咁啊……这个……
如意白：唸得咁好死！就准你擂成水我都要！
（二叔惊，另场）
二叔唱：实是冇预有个洒水，唸怕双方心都公
白：鬼会知到咩？
唱：争住旧屋为杉木，冇要新屋白蚁松
争养老母为凑妹，又兼作得屋里工
白：我大嫂现在作得就冇所谓，到以后……
唱：以后老了冇作得，后果设想难形容
此事不得不考虑，眉头一皱计在胸 （转回）
白：好啦！你地又唔使争，听我判来！
唱：大家讲理一篇篇，算来侄妇理最坚
旧屋就判大年得，
小寒白：好啦！二叔！
唱：至于养母要论过先
如意白：多谢叔公判得公道！
二叔白：唔使谢！屋呢就系咁判咯！至于养老母，大年小寒都系佢个仔，边个养都是应份个。咁我就问睇你地，到底边个养？
二人白：我养，我养，我养！（二人争）
二叔白：哎！唔使争，既然大家都有咁孝心，争做来养，我睇就众养啦！
二人白：众养？点样众法？
二叔白：双方都养，既然你地又争做养，那就轮做养啦！
二人白：轮做养，我养先，我养先！（二人又争）
二叔白：都话冇使争咯！听我讲先，自古话人从阄（球）下愿，拈阄（拈球）做！边个拈得长个就先养，一个养只月。等我装好阄（球）先！（装好）嗯！装好啦！
二人白：我拈先！
二叔白：慢住先！我讲清楚先，今日系三十，明日系初一，边个拈得长个明日就开始先养。小寒你就拈先啦！
（二人先后拈阄，小寒得短，如意得长，小寒垂头丧气）
二叔白：好啦！拈球又系大侄妇得，个铺冇得讲啦！至于家私杂物，二一添作五，一个一半，冇得争啦！好，等我入去分好做两份，用红纸贴好，大吉大利，各做各世界！等阵你地就入来领啊！（下场）
（小寒伤心，如意幸灾乐祸）
如意唱：冇会打牌有牌开，冇识穿线有钱来
狐狸想斗老猎手，老天报应是应该
白：二叔！入去搬你个东西扯啦！哈哈……（得意下）
小寒唱：真是吊颈兼扯脚，阉猪割耳两头伤
老鼠钻入风箱肚，两头受气暗凄凉
赚得蚀斤三花酒，二叔冇同我主张
白：我呸！（下场）

********（响锣）


第二场 惊变


（十八年后，大年家，如意上）
如意唱：分家已有十八年，孩儿长大在身边
七岁开蒙入学馆，从师入学习书篇
轮养家婆日又近，叫夫接母转门前
白：大年，出来先！
（大年上）
大年白：贤妻叫我出来有何吩咐？
如意白：又到月底咯！上个月你老母织亚机蚊帐布未曾织完，使我日思夜想，你快哋去接佢转来啦！
大年白：哎呀，贤妻啊！今日系廿八，还差两日未曾到期，到时候再接啦！
如意白：到到到乜嘢期？（怒）
边个月我冇系提前几日去接啊？养得多一日就帮做得多一日，识冇？快去！
大年白：哦，我去，我去。
（大年无奈下场）
如意唱：新弹棉花鬼咁松，如意嫁得好罗公
冇使佢吃喝夫草，叫佢乜西着顺从
等我煮碗粥米菜，等候家娘转家中 （下场）

********（响锣）


（小寒家，陈小寒手拿药包，无精打采地外上）
小寒唱：
八字跌落尿缸肚，小寒条命真湿衰
只唸养母帮得我，冇知日日执药回
娘亲年老生眼病，门外药渣一大堆
偷鸡冇得蚀把米，冇够执药医返佢
白：唉！想我兄弟分家，不觉已经过了十几个年头，今月初一只唸接娘亲过来，谁知三日未够，佢就染上眼病，日夜哎呦哎呦咁叫，冇帮得我做工唔足算，仲累我使咁多钱，害得我好苦啊！（入门）秀芬，出来先啦！
（王秀芬上）
秀芬白：夫郎回来了！
小寒白：嗯！（没好气）
秀芬唱：夫郎执药转回家，等我入屋去煲茶
（拿药欲下）
小寒白：且慢！
唱：
娘亲眼病实难医，老了不似后生时
刚才先生对我讲，冇盲亦会生湿厘
我已想得好办法，万望贤妻你遵依
秀芬白：夫郎有何办法？
小寒唱：将佢抬去大佬屋，等佢料理出钱医
秀芬（惊）哎呀！夫郎啊！
唱：夫你莫非吃草大，难道冇系你亲娘
小寒唱：自小我是吃米大，冇系吃草马牛羊
佢是你夫亲生母，点讲冇系我亲娘
秀芬唱：既是亲娘应该养，请医调治尽心肠
养儿待老应谨记，点能当作路头香
小寒唱：妇道人家识乜西，出壳鸡儿你莫啼
出嫁从夫你识冇，冇准同我论高低
旧屋火砖大杉木，冇唸几多蚀底齐
快揾竹杠扎好椅，听话就是好贤妻
秀芬白：夫啊！
唱：作事应该往后想，岂能夺理来称强
猪笼笼公孙照样，日后你我变老姜
孩儿亦同你咁样，你唸凄凉冇凄凉
老个冇好带坏样，后代日子万年长
一代一代传下去，祖孙世代臭名扬
为妻所言若有理，悬崖勒马快收缰
小寒白：讲罗会？点呅冇讲了！我画只耳鬼地墙根听你讲！讲咧！ （气愤地坐）
（秀芬一旁落泪，大年上入）
秀芬白：哦！大哥到来请坐！
小寒白：大哥啊！坐啦！
（大年见状，不解）
大年唱：
二弟有何为难事，为乜苦脸又愁眉
聋佬打倾望弟讲，讲比大哥我得知
小寒唱：
口吃菠萝闷在肚，针刺灯草痛在心
娘亲年老生眼病，痛如刀割泪淋淋
借钱医了廿几日，冇见好转反加深
夫妻二人无计出，故此堂前苦思寻
大年白：啊！娘亲几时得病，点解你又冇讲我知啊？
小寒白：讲你知？哼！
唱：讲比你知有乜用，最衰轮到我养娘
大年唱：
娘亲我亦有一份，理应服侍尽心肠
兄弟同心来养母，弟你何说此言章
小寒白：秀芬！拧药入去煲，唔使在此听大佬发口疯！
秀芬白：知道！（取药下）
小寒唱：
大哥不要讲这些，细佬讲话是明披
你是一棵墙头草，大风一吹心就邪
讲尽孝道都是假，兄弟面前莫的掩遮
大哥娶得好大嫂，真是点火亦难咩
好似老鼠见猫乸，好似蛤公撞着蛇
大嫂等住你盆尿，担去田垌或菜车
大年白：唉！二弟，莫要取笑你大哥了！自古话
唱：
娶得恶妻实难治，养着恶马实难骑
蒙正去担镬盖卖，几多暗气人冇知
等我得空讲你听，要你在心痛到皮
今日为兄接娘转，去请先生执药医
小寒白：秀芬出来！（秀芬上）
秀芬白：夫郎何事吩咐？
小寒白：娘亲吃了药未曾？
秀芬白：吃开了！
小寒白：咁你扶佢出来，大哥话要接佢返去啵！
秀芬（惊）啊！大哥啊！
唱：
家娘年老病交关，要行半步亦艰难
都是留在个哋好，免找大嫂佢麻烦
二是日期未曾到，三怕外人会闲谈
你队请医执药转，我作服侍啱冇啱
小寒白：啱啱啱！你识乜嘢？
唱：
咁样做法实冇通，你空大哥冇得空
我去边哋妻莫管，大哥是罗波管罗公
大哥你讲系冇系，你我夫妻冇相同
大年唱：
二弟不要讲咁多，不应讽刺你大哥
我带娘亲转我屋，快叫出来莫啰嗦
小寒白：系真嘅？
大年白：真个！
（小寒不敢相信）
小寒唱：
六十公公买眼镜，怕你真真又冇真
豆腐屑牙揾话讲，空心花生想骗人
啱先我妻点样讲，唔中耳聋听冇闻
白：我妻都话咯，娘亲感冒发烧，头又晕，眼又痛点呅行得去啊？你如果识得娘亲你亦有份个话，背娘亲转你屋，就算是有孝心！
大年白：好！等我入去背娘亲返去！ （入内下场）
秀芬白：夫郎，大嫂佢……
小寒白：早乜嘢？日头都快中顶了，仲早？我连朝都未食，快入去炒菜等我食朝！
秀芬白：这……（犹豫不决）
小寒白：快去！
（秀芬拗不过，无奈下场）
小寒唱：
灯草大风吹去了，使我只心的生轻。
吊颈扯脚唸实死，冇知来个大救星
盲眼老母有人要，唸返大佬发神经
大哥接娘转到屋，大嫂骂到佢定形
白：自古话，骗鬼上茅船，冇理佢咁多，入去饮两杯先啦！嘻嘻…… （下场）

********（响锣）


（大年家，大年扶陈母上）
大年白：娘亲，慢慢行啊，那，到家了，抽高脚入门！
（扶入，向内喊）贤妻啊，你叫我去接娘亲返来，我已经接返来啦！
如意（内）那你就同佢入来啦！
大年白：娘亲，咁我先扶你入房休息下先吧。（扶陈母下）
（如意上，看看不见人）
如意白：哎，点解又唔见人嘅？
大年！大年！
大年（内）我在里面！
（如意入内，气愤拉大年上）
如意唱：
上屋教仔下屋精，教得人精你神经
有病之人你要领，冇识先报我一声
几十年来冇病过，病亲九死冇一生
睇你个条冇星秤，气我怒火往上升
真是使人使着鬼，真想剥皮把你蒸
（气愤地坐下椅上）
大年白：贤妻！
（欲讨好，如意一掌打上）
如意唱：
脱裤落塘去挖藕，又见可怜又见嬲
枉你今年四十岁，比人捉弄作肾头
大年白：贤妻！
唱：
不是为夫我蠢笨，贤妻息怒听我陈
你我都是吃米大，你我是人她是人
十月怀胎三年哺乳，假假都是我娘亲
况且是你叫我去接，点能只怪你夫君
如意白：咦！反来教训我添！你真是一个孝仔咯！
（怒冲冲下拿只破碗上）
白：按月轮养，我冇反悔，呢只碗，你拧去比佢使，打烂就冇饭开！
（把破碗塞给大年气愤地下）
大年（捧着破碗，伤心地）
唱：
见此碗啊似火煎，昔日事情现眼前
一家只有这旧碗，挨家乞食几流连
白：娘亲啊……
唱：
你养孩儿几辛苦，娶得媳妇几心偏
总是你儿冇中用，几多害苦你老年 （无奈下场）

********（响锣）


第三场 逐母


（大年家，如意欢喜地上）
如意笑：嘻嘻……（白榄）
真欢喜，真欢喜，如意生得好儿子，
陈进我儿十八岁，佢在浔州作教师
白家富户千金姐，相亲相爱结罗丝
漂亮媳妇我见过，聪明又伶俐
明日我儿带佢转，酒席要办得象样哋，象样哋！
白：大年出来先啦！
（大年无精打采地上，如意见状不悦）
如意唱：
望见个只死衰鬼，成日好似着鬼迷
像足三年冇得吃，背脊又沟头又低
明日孩儿带媳妇转，你冇欢喜准乜西
大年（勉强装笑）嘻嘻，我欢喜，我好欢喜……
如意唱：
你应趁圩去备办，买鸭买肉兼捉鸡
我讲菜式你记住，注意算数免吃亏
大年白：哦，贤妻，那要买哋乜嘢你就讲吧！
如意（榄）：捉四只鸡，四只鸭，买十斤半肥瘦猪肉，再买一斤北海虾，白切鸡，放哋熟芝麻，剩下下水滚丝瓜，猪肉拌粉用油炸，再捉只洋鸭炖冬瓜，肉丝虾米炒酸菜，顺便买二斤靓三花，酒席要像样，唔得比丢架，你快去备办，我要把新房打扫下，打扫下！
（入内下场，大年屈指记，转身已不见人，叹气）
大年白：唉！欲想管妻不敢，心想孝母不能，悔恨当初，顾及影响，不愿将家丑外传，妻子虐待婆婆，我一再忍让，染上了妻管严，真是苦坏了我娘亲啊！ （无奈出门下）

********（响锣）


（孙如意腰酸痛累地上）
如意唱：今朝忙了大半天，腰酸背痛周身牵
坐落堂前细细想，还差边样冇到边
（坐下饮茶，忽然想起，一惊，放下杯，跳起来）
白：哎呀！
唱：还有一只老不死，感冒发烧在里边
白：如果唔将这个绊脚石搬走，新媳妇入门见到唔知几丢架？大年！出来！
（大年上，见如意，讨好地）
大年白：贤妻，你叫买嘅东西我已经全部买回来了，尿缸尿我也担了去淋菜，贤妻还有乜嘢吩咐？
如意白：月底啦，你亚只老母应要到你细佬屋去住了！你快点灯连夜将佢送去！
大年白：贤妻啊！还差两日仲未曾到期，明日又系孩儿成亲之日，不若等娘亲饮了喜酒慢送去……
如意白：饮乜嘢喜酒？我呸！你真是一个孝仔咯！真系唔识丢架！快去！
大年白：贤妻，现在黑夜麻麻，娘亲又感冒发烧头又晕，又点呅去得啰？
如意白：这个……（想想）咁你去斩两条竹返来，扎好里面亚只烂藤椅，两老抬做佢去！
大年白：啊！（惊）抬做去啊？哎呀，贤妻啊，人家睇见我地两老抬老母去，几丢架！
如意白：你真是一个糊涂虫咯！若果人家问到，就讲是两老抬老母去睇病咪得咯！
大年白……这……（实不忍心）
如意白：快哋去罗会！
大年白：是是！（无奈下场）
如意唱：
女中豪杰计谋够，谁敢睇小我女流
三九廿九算得准，急难临头心冇忧
车到山前必有路，人到急时有计谋
趁早入房去休息，免至睡到出日头 （下场）

********（响锣）


（小寒家门前）
大年（内白）贤妻啊，已经到了二弟屋咯，丢掉个只烂藤椅吧！
如意白：好啦，冇要啦！
（大年与如意扶双目失明的陈母背包袱上）
大年白：娘亲啊，已到二弟门前，等我……
（话未说完，如意急拉大年下场）
陈母白：大年，大年……
（不闻回应，摸索到门前）
白：阿二，阿二哎……
（王秀芬闻声上开门出）
秀芬白：啊，系婆婆！快入屋先啦！（扶陈母入屋坐下）
（此时小寒上见状，不悦）
小寒白：我仲以为系边个添，喂，老母啊，日期未到啵，乜你咁早就到我度做乜嘢？陈进结婚你都冇饮喜酒啊？
陈母白：唉！（悲凉地）阿二，系你大哥大嫂抬做我来个！ （小寒惊）
小寒白：啊！抬做来个？
（出门看看，人影不见，怒）
小寒唱：
大哥大嫂真吊腰，分明是把小寒欺
娶媳妇冇请我去饮，娘亲冇比吃餐朝
日期未到抬来比我，唔知佢唸边一条
斩开边颈死冇服，你唸你嚣我仲嚣
白：秀芬，快去斩两条竹返来，扎好里面那只烂藤椅，照样将这老嘢抬返比佢！
秀芬唱：
夫君不用气咁伤，此事慢慢再商量
佢队冇养侬队养，和气吃水心亦凉
小寒白：我呸！唸得咁好死啊？老母做得个时候就争做养，现在冇做得了，就想推我比我，我阿二冇咁笨，我一定要抬返比佢！
陈母白：唉！阿二，你冇养就算，我冇使你抬，我自己去！
小寒白：啊！冇使抬？你自己去？你真系好得死个，请吧！
（陈母摸索着踉跄出门）
秀芬白：夫君你……（实在不忍心，追出门）婆婆……
陈母白：二嫂！你要吸取教训，从严教子啊！
秀芬（含泪点头）
（陈母艰难地摸索下场）
秀芬白：婆婆……
小寒白：秀芬，立即返来！
（秀芬无奈入门，哭下）
小寒白：你冇养想抬比我养，揾我阿二个笨，咪唸得咁好死啊！呸！ （下场）

********（响锣）


第四场 得救


（外景，陈母手柱木棍当柺杖提包袱艰难地摸索上）
陈母唱：
人怕老来冇人养，草怕冬来霜雪飘
养仔不孝失管教，媳妇不贤命中招
有仔有孙冇屋入，大海茫茫冇条桥
崩边香炉冇人要，山猪无斗鹿无寮
大地无路比我走，唯有黄泉路一条
彭祖八百终是死，魂游四海乐逍遥
白：年老无用，不若葬身于鱼腹安眠啊！
（下场）

********（响锣）


（外景，王秀芬边喊边上）
秀芬白：婆婆！婆婆……
唱：
水出有源木有根，人生边个冇娘亲
我夫不忠又不孝，娘亲当做外头人
好言相劝夫冇听，反而咒骂我终身
做人儿媳心不忍，后门出走外方奔
白：婆婆……
（下场）

********（响锣）


（外景，陈二叔摇头上）
二叔唱：
今日侄孙结秦晋，新婚喜式冇人同
侄妇做事真得意，仔细想来实冇通
争跤分家就揾我，喜酒冇请二叔公
家婆抬去细叔屋，喜酒冇比饮一盅
白：世上又有谁见过，又有边个听闻讲过？
唱：
自古至今冇见过，竟有咁个蛮头虫
看来还有好戏睇，四处行下听听风
（下场）

********（响锣）


（外景，白玲扶陈母上，捧石头让陈母坐下）
白玲白：老婆婆啊！望见你年过古稀，双目失明，为何要自寻短见呢？
陈母白：多谢姑娘救命之恩！
唱：
你来问我我先问你，你是谁家好女儿
为乜咁啱来到此，打救老身咁及时
白玲唱：
我是浔州白氏女，名字安来叫白玲
为因天公来作合，陈进与我系赤绳
陈母白：啊！陈进？陈进……
白玲唱：
今日完婚随夫转，同乐欢度鱼水情
婆婆跳水我救起，为因何事讲分明
陈母白：白玲……姑娘……
（双手颤抖地抚摸白玲）
唱：
我孤苦零丁无依靠，枉唱七十古稀歌
人老冇死冇中用，含辛茹苦受折磨
人生反正死一次，故将贱命付江河
今天是你大喜日，冇使你服侍盲眼婆
祝你夫妻百年好，敬老尊贤幸福多
白：白玲姑娘，东边老榕树这间，便是陈进个家，你……你快团圆去吧！
白玲白：老婆婆！（关切地）请你同到我家，待我夫陈进回来，我叫佢送你回家，老婆婆，你家在哪里啊？
陈母白：家……家……家？？（悲凉地）我没有亲人，我没有家！各行各路，各算各数，我不能误你佳期，你去吧！
（踉跄摸索欲下）
白玲白：婆婆！你欲往何处啊？
（此时秀芬急上，见陈母）
秀芬白：婆婆！ （扑）
（二人抱头痛哭，白玲另场）
白玲唱：
洞庭水深冇见底，眼前婆婆是个谜
佢话无家无亲眷，照我睇来有问题
望见二人悲切切，冇是亲人是乜西
等我问问这大婶，事情定会明白齐 （对秀芬）
请问大婶我开声，你俩悲切为何情
是否是你亲婆母，望你对我讲分明
秀芬唱：老人正是我家婆，姑娘你问做什么
白玲白：啊！系你家婆？可是……因何佢要自寻短见啊？
秀芬白：啊！（惊）自寻短见！哎呀！婆婆啊……（扑跪）
（此时二叔上一角偷听）
陈母白：白玲姑娘啊！（悲）
唱：
本来不应把你瞒，因你未入陈家门
怕你知情心痛苦，婆媳见面泪涓涓
如今只好照实讲，陈进正是我亲孙
白玲白：啊！（惊）奶奶啊！（扑向陈母）奶奶！你要自寻短见，到底是谁对不起你老人家啊？
陈母白：白玲，家丑不可外扬，既然是自家人，我就只好照实而讲了！
唱：
自古人心隔肚皮，好丑日久自然知
为因大媳孙如意，人面兽心假慈悲
今日孙儿成婚日，忧我羞辱佢面皮
逼儿扎只烂藤椅，我唸是抬我去揾人医
两老抬我出门去，抬到阿二佢门楣
二嫂开门迎接我，阿二闻声往外披
声声话我好得死，又话轮养未到期
要抬我转大年屋，我怕苦惹出大是非
自动出门外方走，越思越想越伤悲
眼泪流干心唸尽，故此跳水归阴司
白玲白：奶奶……
秀芬白：婆婆……
陈母白：我一生一世，劳碌奔波，总只望有仔有孙，安享晚年，谁料到？（从包袱里取出一只破碗）我一日三餐都是用这只碗，饱是一碗，饿也是一碗，如果此碗打烂，我就粥饭断餐啊……（泣不成声）
（白玲直听得杏眼圆睁）
（二叔急上前抢过破碗）
二叔白：嫂嫂！这个破碗，系一个害人嘅碗，我要将它打烂！ （欲打，白玲急拦）
白玲白：且慢！（取过碗）此碗现在还不能打烂！
二叔白：点解？咁个碗冇打烂收来做乜嘢？
白玲白：我要用佢！
（白玲与二叔耳语）
二叔白：好！我先走！（急下）
白玲白：奶奶，我地回去再作道理！ （扶陈母众下）

********（响锣）


第五场 打碗


（外景，二叔欢喜地上）
二叔（榄）：
真欢喜，笑哈哈，不是陈二我自夸
刚才见到侄孙媳，眉清目秀似朵花
孙媳的确有计马，五体投地拜服她
次次系我做老大，个次甘心做使下
奉命先到小寒屋，然后再到大年家
今日做跑腿，目的为着搞好大嫂屋企呢盘散沙！
（圆场，到小寒家门前）
白：咦！点解关起门嘅？
（敲门）喂！开门啦！
（小寒睡眼朦胧上打呵欠）
小寒白：边个啊？（开门出）啊！系二叔，请入屋。（同入）
二叔唱：
冇人有你咁得意，吃饱三餐唸睡肥
你哥你嫂冇同你，吃饱唸计铲地皮
人家做事有头尾，抬作娘亲到你哋
你冇接待唔足算，恶语激娘把家离
关起门来质聋耳，你娘跳水诈冇知
若是断气冇得救，定要捉你打官司
小寒白：乜话？二叔！我娘亲真系跳水死了啊？
二叔白：那冇是！你大哥大嫂都揾人四处打捞，你就睡得咁舒服。
小寒白：啊！哎呀娘亲啊！
（假哭下场）
二叔唱：马屎原来皮前光，一脚踢开尽是糠
白：我一讲佢娘亲跳水死了，佢就假意嚎啕大哭，这正是：
唱：
生人冇敬哭死鬼，络骨围车摆大方
急时走去抱佛脚，猫哭老鼠几在行
冇知唸佢几好仔，知者骂佢冇天装
白：好啦！
唱：骗得猎狗出山去，又赶狐狸走出荒
白：好啦，已经骗得小寒这只猎狗山，再赶孙如意这只狐狸出先！
（下场）

********（响锣）


（大年家，孙如意上）
如意唱：
今日我见心欢喜，为何的的跳眼眉
中午冇见儿媳转，为因何事转咁迟
（二叔上，入门）
如意白：啊！系叔公咁早到来，坐啦！（斟茶）请叔公饮茶！
二叔唱：
篾白围车种灯草，侄妇的确是好心
入屋抽凳比我坐，顺手又把香茶斟
可惜叔公冇空饮，要找大年把娘寻
如意唱：
原来是我家娘事，我唸是乜大问题
婆婆轮到细叔养，是你在场定例规
今朝细叔来接去，你来揾我做乜西
二叔唱：
侄妇讲话真爽脆，养育家婆是轮回
可惜冇在小寒屋，佢在大江听水推
死了棺材冇比只，怕要比抓元宝灰
如意白：啊！（惊）我家娘死咗啊？哎呀，家娘啊！呜呜呜……（假哭）
（大年上）
大年白：贤妻你哭乜嘢？
（如意假装哭得更加大声）
大年白：二叔，我贤妻做乜啼哭啊？
二叔白：你娘亲跳水死开咯！
大年白：啊！（大惊）哎呀！娘亲啊……（悲）
二叔白：哭有乜嘢用？要睇就去睇睇，唔睇我就卷卷佢张烂席，拧张锄头在沙滩挖个坑埋了就算通事！（下场）
大年白：娘亲啊……
（伤心欲下，如意一手拉住）
如意白：去边度？
大年白：我去睇下娘亲！
如意白：睇睇乜嘢鬼！
唱：
世间冇你咁蠢猪，冇抓主意听人愚
你娘交过比你弟，生死应该去揾佢
白：去，揾你细佬比人！
（拉大年下场）

********（响锣）


（外景，如意拉大年上）
如意白：冇见细叔，立即返屋！
大年白：贤妻，我地到江边去睇睇吧！
如意白：睇乜嘢鬼？
大年白：细佬都去睇咯，我地冇去怕……
如意白：怕乜嘢？哼！
唱：佢若敢把我来揾，我要反将佢一军
孩儿媳妇未回转，及早回家就是真
白：快转屋！ （同下）

********（响锣）


（大年家，白玲从屋内上）
白玲唱：
白玲我是女红莲，双亲膝下十八年
男大当婚女当嫁，合巹交杯在今天
双脚未入陈家府，人传目睹不堪言
家娘虐待老奶奶，二叔拒母在外边
家庭一向冇和睦，年老奶奶几可怜
咁样事情点忍让，令我心碎似火煎
要将家娘来教育，忠贞节烈敬老贤
一切计划安排好，等候家娘转堂前 （坐下）
（如意，大年悲情上门外）
如意唱：
夫君放心转回归，你做烧水我劏鸡
不然儿媳转到屋，几多体面都丢齐
你娘跳水为你弟，冇关夫来冇关妻 （见大年哭相）
白：到屋啦，仲哭乜嘢？抹干眼泪，笑笑，咁就差唔多，快入去烧水！
（二人入门，见白玲）
如意白：啊！媳妇你返咗来啦？啱先我同你家爹到码头接你冇见，冇知你返咗来了！那陈进呢？陈进！（两边喊）陈进……媳妇啊！点解陈进冇同你一起返来啊？唉！真系对唔住咯，使你寂寞咯！
白玲（佯装怒）哼！
唱：
你儿陈进实不应，对我半点冇感情
我不在家佢放荡，对待奴奴冷清清
今后要将佢严管，冇准揽脚出门庭
大年（闻言惊呆了）
如意白：啊！系要管个，系要管个！
大年（另场）唉！真是大门开得着向，新妇又同家婆样！
唱：
眼前半斤对八两，辣椒咁啱配老姜
曹操大军压吴境，睇来我家像战场
悔恨当初我冇管，几多苦坏我亲娘
心想娶个贤媳妇，谁知又是两头枪
以后日子点样过，女人作恶男人凄凉
（此时小寒上，入门）
小寒白：啊！大佬！你两公婆仲在屋咁好倾啵！老母跳水死开了你知冇？
大年（悲）娘亲……
如意（故作惊）：乜话？家娘跳水死开了啊？
小寒唱：
我娘跳水皆为你，质聋狗耳诈冇知
若有三长和两短，我要捉你打官司
如意白：我呸！
唱：
讲话冇摸你喉灵，你骂大嫂应冇应
娘在你屋你揾我，你有道理当众评
我冇揾你算第一，老虎头上揾虱叮
小寒唱：
唸人冇知你是鬼，可惜身上有红泥
分明你家来人客，花言巧语来掩筛
轮养日期未曾到，抬来比我准乜西
我娘跳水若沉死，安葬费用要你包齐
如意唱：
两仔之娘两仔养，归世同葬道理长
为何要我来包起，唔中冇系你亲娘
唔使唸得咁好死，你想冇使蚀支香
（白玲见此情景，另场）
白玲白：听家娘所言，看来事情一点不假，时机已到！
（下场与秀芬扶陈母上）
陈母白：你地唔使争咁多啦，我耳都聋齐了！
小寒白：啊！娘亲冇死到啊？
如意白：啊！家娘冇死到啊？
白玲唱：
你地不要闹喳喳，有如唐朝抄薛家
边个养老尽孝道，边个对老心偏差
边个提前接娘养，边个憎厌赶走她
你队一个一个讲，奶奶讲系就是真
如意唱：
轮到我养那个月，提前几日把娘迎
家娘你讲系冇系，隔离邻舍可证明
小寒白：唔中就是你啊，我也是一样啊！
陈母唱：
当初未曾盲眼睛，争做提前把我迎
养我凑孙作保姆，屋里工夫冇时停
后来眼盲又多病，吃饭冇人叫半声
今天孙儿成婚日，夫妻抬我出门庭
小寒白：娘亲，唸唸都要识啦！呢种人，乜嘢手段冇做得出啊？（对如意幸灾乐祸）
陈母唱：小寒畜牲冇留我，蛮言恶语骂冇停
如意白：家娘啊，冇使唸都要识啦，呢种人，乜嘢说话冇骂得出口！ （反唇相讥）
陈母唱：唸返条命冇中用，为此跳水归阴灵
小寒唱：
娘亲点能怪得我，日期未到定冇留 （合情合理）
娘亲大佬亦有份，不应捉我作肾头
陈母唱：
近日发寒又发热，一卧不起病在床
要茶要水冇人理，冇只人影入过房
拍完桌子骂板凳，声声骂我是假装
小寒白：近日唔系我养，冇关阿二事啊！系大佬！
大年唱：
娘亲受罪皆为我，悔恨当初冇管妻
忍让佢踩我头顶，宠得经经恶到齐
不再忍让跟她斗，使出流传夫权威
（大年磨拳擦掌，陈母制止）
陈母唱：
家庭事情莫闹大，我不再来讲其他
过去事情当冇有，我愿永离你队家
白：好吧，我走！
（挣扎起身欲走，大年秀芬白玲同劝扶其坐下）
如意白：扯咪扯咯，吓乜谁啊？
大年（怒）：你你你……
如意白：我乜嘢？唔中你敢打我啊？
（故意侧过头，大年举手欲打又不敢）
小寒白：哈哈！正衰仔！
（激将，大年气呼呼）
大年白：我衰仔？我冇衰！我冇衰，你睇住！
（大年大打如意一记耳光，如意倒地撒泼哭介）
如意（槛）：丈夫打，婆婆骂，新娶媳妇望笑话，以后日子点样过，呜呜呜……
小寒（幸灾乐祸地）
唱：
为了节约一餐饭，着返老公打一身
皇天的确开慧眼，报应世间黑心人 哈哈……
（如意恼羞成怒，冷不丁打小寒一记耳光，小寒连转几圈）
小寒白：啊！你敢打我！
（欲上前拼过，白玲拦住）
白玲唱：
家娘二叔太不应，小事惹成大事情
自小奶奶养你大，为儿待老是该应
小寒（不服）：细子人儿练做老大，你识乜嘢？（对母）娘亲啊，你讲啦，如果咁多年唔系得我地两兄弟养你个话，你哪能活得到今天啊！
陈母（气极）畜牲！
（用柺杖一棍打在小寒脚）
小寒白：哎呦……
如意白：哈哈！细叔，这正是
唱：报应世间黑心人
陈母唱：
骂声畜牲吃坏米，激我肝肠痛万千
大旱之年你爹归世，茅屋火烧化灰烟
那年大年刚两岁，逆子你啱生出天
饥寒交迫难活命，背你拉佢出外边
落村乞食养你俩，江心种藕几流连
火烧芭蕉心不死，总望死灰得复燃
白：总指望有朝一日
唱：孩儿长大成大器，年老白发得心欢
白：真是想不到
唱：养仔不孝家争吵，亲娘不要赶出门
捧着昔日乞儿碗，盲眼乞食求儿孙
（取出破碗，陈二上夺过碗）
二叔白：呢只碗，喂狗狗都唔食，居然有人拧比家婆使，呢只碗是只害人嘅碗，待我将你打烂！（将碗打烂于地下）
（白玲与秀芬拾起碎片）
白玲白：家娘啊！
唱：
破碗虽旧是传家宝，经过三代人眼睛
应该千秋传万代，孙世塞世得分明
白：家娘啊！
唱：
你有宝碗敬奶奶，儿媳照样来继承
今日宝碗被打烂，叫我日后点奉承
如意（接过碎片，感悟介）
二叔白：哎呀！都怪我，将这宝碗打烂，累你冇得用来孝敬你家娘！
秀芬白：夫啊！
唱：
宝碗打烂见心伤，越思越想越凄凉
猪笼笼公孙照样，将来你我变老姜
孩儿长大你我老，点得此碗敬爹娘
（小寒接过碎片，沉思感悟）
如意唱：
猪儿吃笋猪母引，鸡乸行先鸡儿跟
媳妇照同我咁做，必定我会受苦辛
小寒唱：
担担方知牛着力，养子方知父母功
厅屋门端轮替坐，最怕日后儿孙学阿公
二人白：唉，细叔（大嫂）错齐了！
如意唱：猪望不见猪背脊
小寒唱：狗望不见狗面枵
如意唱：全凭佢地来提醒
小寒唱：大家都是一煲羞
如意唱：应该悬崖来勒马
小寒唱：娘亲面前快叩头
（二人跪落陈母跟前）
二人白：娘亲（家娘）啊！我错了！以后一定改过！
二叔白：大嫂啊，千祈唔使听佢俩个话，冇信得个！
二人白：二叔，我地系真心改过，重新做人，你信我啦！
二叔白：狗改得冇吃屎？乜嘢话你冇识讲，鬼会信你咩！
二人白：二叔！我地系真心改过咖，你冇信，唔中要我地死咗咩！
二叔唱：知错改过理当应，观众面前快讲清
二人白：各位父老乡亲，兄弟姐妹，像我地以前咁做系不对的！我们下决心痛改前非，重新做人，好好服侍我娘亲（家娘）但愿你地家庭和睦，妻贤子孝，夫唱妇随，敬老尊贤。
二叔白：如果大家都这样，
众合白：那就幸福长万年！
（从造型）


剧终