广播专辑 弄堂茄山胡315 楼下菜贩

楼下菜贩  
 
包 玲  
 
　　晚上我买好茄子、毛豆准备毛豆炒茄子再加点海鲜酱。不料，有朋友上面，我晓得伊是做菜达人，就请伊一道下厨。伊看了看配菜，讲再加两只青椒会更加好吃。我一听，马上去楼下蔬菜店买。

　　搿爿蔬菜店是一对老夫妻开嗰，门面不大，收捉得比较干净，菜品也比较新鲜，价钿不算贵，下班回家会路过，买菜买水果侪比较便当，所以我经常光顾。

　　一进店门，看见账台电子秤后头坐了一个陌生个小年轻。我曾经听老板两口子聊起过，伊拉有一个儿子辣上海读大学，只是一直呒没看见过。我猜迭位应该就是了。我挑了几只青椒放辣伊面前个电子秤浪，伊回头向着里屋望，并大声问：“青椒几钿？”“五块。”里面有人回答，是老板娘个声音。辣辣伊拉对话个辰光，我看见旁边个桔子好像不错，就又挑了几只，一道放辣电子秤浪。伊又大声问：“桔子几钿？”“也是五块。”我笑了，讲：“看侬坐了搿搭像模像样，原来侪不晓得啊！”伊低头笑，讲：“我刚刚开始学，熟悉了就好了。”“毕业啦？”“嗯。”“寻到工作了口伐？”“嗯，今天下班早，就来帮帮忙，熟悉熟悉，让阿爸休息休息。”“哦，小伙子不错！”

　　老板一家是从安徽来嗰。记得最初认识伊拉个辰光，浦东新区刚刚成立。老板好像脚浪向有点残疾，平时走路一瘸一拐，看起来十分辛苦，所以平常就坐了账台后头，负责算账收钱。老板娘负责收捉店面，招呼顾客，对人邪气热情，每次看到老客户侪会打招呼，假使有人进门就会主动推荐哪些菜新鲜，哪些水果好吃，简直是天生个生意人。除了老板夫妻俩，老板个弟弟也辣店里帮忙。伊平时闲话不多，见人总是笑眯眯点点头。据说，因为老早子家里穷，母亲体弱多病，哥哥又有残疾，所以伊一直呒没结婚，与哥嫂一道来上海开店。伊个任务是每天天不亮就开车去批发市场运菜回来整理、分筐、摆放。上午等单位食堂个订菜电话，然后开车去一个个食堂或餐馆送菜。搿一家人虽然工作比较辛苦，但也其乐融融，小日子过得红红火火。

　　老板娘告诉我，伊拉一家来上海卖了廿几年菜，因为本身就是农民，所以对蔬菜好坏特别在行，生意一直不错，如今老家已经盖起了两座三层楼房，儿子也培养成了大学生。接着，伊又满怀憧憬地讲起了将来个打算：再做几年等儿子结婚伊拉就不做了，打算回乡养老，过上“房前屋后，种菜种树，养鸡养鸭，自给自足”个田园生活。我诚心祝福这善良勤劳个一家能早日过上向往个幸福生活。