短篇小说（ꎭꂵ“ꁱꀋꐭ”ꊿꋋꂷ）

背景音乐：S.E.N.S(神思者)--《TRUE LOVE》

ꎭꂵ“ꁱꀋꐭ”ꊿꋋꂷ /ꃅꇫ·ꄇꐂ

      ꏬꇁꄜꈌꄓꇁꌠꎭꂵꆿꐂꆹꑓꂡꆈꏍꏐ，ꅳꁖꎵꑳꀕ，ꆧꁨꇁꄵꃙ，ꑭꆹꎸꄿꌡ，ꋌꊇꅉꃅꎦꁠꆧꈌꀋꉖ，ꑳ꒜ꇤꈌꀋꄀ。ꋍꑍꈌꌦꑓꆜꃅꅫꃀꌱꃀꒊꈧꀋꋻ，ꋌꇗꄃ，ꃄꈌꄐꃅꁱꀋꐭ，ꑠꐛꅹꊿꌌꎭꂵꁱꀋꐭꂓꄉ。
     ꁱꀋꐭꌋꆀꋍꊨꏦꀊꌱꀉꎓꅪꎔꃭꇤꏂꂶꌠꑋꐰꇑꐮꇴꈌꁈꐮꄮꄷꄉ，ꄻꐮꄹꐛꎻꂿꄷꀄꊭꃅꇯꆐꀉꄉꀉꂿꌌꃮꏸꀖꃮꆜꉜꄉꀐ。ꀊꌱꀉꎓꊰꏁꈓꄹꈎꆏ，ꀉꄉꀉꂿꑋꎦꆹꀋꂄꏦ，ꃮꆹꀋꋆꏦꊭꄎꄉꀊꌱꀉꎓꑮꂿꄷꇬꆏ。ꁱꀋꐭꇫꉬꀋꅲꄷꀋꁧꀉꄉꀉꂿꏭ:“ꇩꏤꏦꃤꏤꄉꇬ，ꌕꋊꈋꈐꐮꃝꀋꉆꄷ，ꌠꇖꀳꇬꑌ‘ꈾꊂꀱꈾꏿꀯꃶꅳꈎꅐ，ꐩꊂꀱꐩꏿꀉꇙꂴꊨꅐ�’ꄷ。ꉡꆹꈍꃅꑌꀉꌱꎓꀋꒃ”ꄷ。ꅇꂷꋋꈨꀕꇬꆏꀉꄉꃃꌌꇵꊫꋏ，ꀋꀉꂿꐒꌌꑓꁴꊰ。ꋌꉬꑴꇬꁱꀋꐭꋍꉌꂵꋌꀵ，ꋍꉪꏡꋌꐥ，ꑍꈓꊂꆏꁱꀋꐭꌋꆀꀒꋤ꒜ꂷꋍꑊꐮꉂꐮꅉꄷꄉꑮꑟꇈꑲꋦꇤꄂꀐ。
     ꁱꀋꐭꀋꃋꍇꌠꊌꄹꉖ，ꀉꂿꋀꏯ:“ꀉꒉꍇꌠꀋꃋꍈꐛꑌꑽꀋꐥ”ꄸ。ꃅꑍꋚꀋꍈ，ꃅꉖꒉꀋꄐꉜꇁꂾꆏꀋꃋꍇꌠꃘꈓꀐ。ꁱꀋꐭꑮ꒜ꆹꄡꇗꀃ꒜ꌤꈥꅍꇫꎍꇬꎷ，ꁡꇤꇬꊿꋍꈨ:“ꁱꀋꐭꎲꆅꊌꅀꑞꉬꀋꐚ”ꄷꉉꌠꑌꐥ，ꄚꄉꀉꄉꂶꌠꋰꀋꄐꃅ:“ꀒꋤ꒜ꌊꇨꑵꉥ，ꉠꂽꈬꌺꇬꀋꍅꅀ”ꄷ。ꀉꂿꂶꌠꑌ:“ꀒꋤ꒜ꋋꏢꀋꉬꆎꃢꈜꀋꋌꅀ”ꄷ。ꋍꑍꆏꀉꄉꂶꌠꇬꏭ:“ꆿꐂꀋ，ꀒꋤꌺꀋꁨꊰ，ꉌꈲꌺꀋꁨꊰ，ꀋꉬꀐꇬꅽꀒꋤ꒜ꋋꂷꇤꇫꎭꅀ”ꄷ。ꁱꀋꐭꆏꋍꀉꄉꏭ:“ꉠꑮꃀꀋꅑ，ꉡꑌꆅꀋꐥ，ꉪꏤꐮꇖꄉꐥꍂꃅꀋꃋꋋꍈꀉꄂꉘꂿꄷꐛꅹ”ꄷ。ꅇꂷꋋꇬꈨꇬꆏꀉꂿꂶꌠ，ꀂꆿꐂꌦꌠꌗꀐꄷꇇꁮꇤꍠꄹꏪꌊꁡꇑꁡꇤꏮꐺ。ꀉꄉꆏ:“ꀉꁌꑠꀋꍔ，ꀋꁧꑠꀋꍔ，ꑓꉜꏿꄉꊿꈔꏂ，ꊾꐴꍠꌠꉥꇇꉈꋊ”ꄷ。ꋋꉈꆏꀉꄉꀉꂿꇬꀋꀠ，ꃺꃶꀁꑳꇬꀋꅲ，ꂛꊨꃺꑌꇬꀋꐊ。ꋌꉬꑴꇬ，ꉬꈎꃘꈓꊂꆏꎭꂵꌣꈚꌠꅔꅐꇁꀐ，ꀊꄶꀉꑳꀃ꒜ꇬꋍꂷꄌ，ꇱꄓꇬꋍꂷꀵ，ꐧꌧꇬꋍꂷꎑꈧꌠ，ꎲꄐꀋꄚꃅꁱꀋꐭꏤꅍꀃꑍꆏꋂꉛ，ꃆꏂꑍꆏꋐꉛꃅꐺ。ꁱꀋꐭꏤꌕꂾꆹꋀꊇꋍꐚꋠꌠꋍꏤꌔꐚꋠ，ꋍꈓꋍ꒿ꃅꌣꈚꇁꀐ，ꈜꀕꇈꃮꉘꍣꂷꀞꄉꊂꆏꋍꈓꌠꎆꃀꉬꄙꃪꎖꂷꅑꋍꃪꀋꎪꃅꊌꇬꎷ。ꑠꐛꅹ，ꊿꉉꌒꇴꃅꇬꏭ:“ꃮꇅꀠ”ꄷ。
      ꆈꌠꇐꀳꇬ:“ꆀꄿꆏꆀꃅ，ꉷꄿꆏꑲꋉ”ꄷ。ꁱꀋꐭꆹꆀꀋꃅꀕꑲꋉꂯ，ꁡꇤꇬꊿꈧꌠꈍꃅꉉꌠꑌꐥ，ꋍꈨꆏꁱꀋꐭꑮ꒜ꀊꏀꒃꏭꄐꅀꄷ，ꉈꑴꑲꋉꇣꄉꌠꆹꌺꇖꐥꐨꌆꌠ，ꋍꌺꏢꇯꀋꁨꑷꂿꋉꌊꑞꃅꂯꄷꏈꌠꑌꐥ。ꁱꀋꐭꄰꑷꂿꆹꇣꋲꐯꇣꋲꃅꋉꄉꂷ，ꑲꐆꀉꎴ，ꑲꁱꀊꐯ，ꀃꈈꀉꑌ，ꌍꑓꀉꑌ。ꋀꌐꊂꋍꑍꃅꄜꆏꇂꀠꇬ:“ꈀꄸꑌꇤꄉꎭꂵꁱꀋꐭꏤꑲꃹꅉꈩꇁ！ꈀꄸꑌꇤꄉꎭꂵꁱꀋꐭꏤꑲꃹꅉꈩꇁ……”ꄷꇴꇈ。ꊿꏓꇁꋍꏤꑳꂾꅞꇬꆏ，ꂴꆽꁦꋠꑍꂷꌩꀻꁬꌌꁱꀋꐭꏤꀃꈈꁭꇬꄀ，ꌩꀻꇬꁱꂷꆏ“ꎭꂷꆿꐂꐭꌶꅉ”ꄷ。ꋍꇅꌺꐛꇬꆏꁧꋠꂶꌠꒉꇁꌊꄚꊿꈬꇬꄉ:“ꎭꂵꆿꐂꌶꅉꀃꑍꆏꂓꀻꄀꀐ，ꉪꈀꄸꑌꎭꂵꆿꐂꑆꊋꎺꄉꏣꀋꑌꃅꀉꑳꏃꁱꂷꌷꇁꅊꇈ”ꄷ。ꅇꂷꋋꈨꀕꇬꆏꊿꄚꐥꈧꌠꉬꇮꎭꂵꁱꀋꐭꃅꇏꇷꈌꀧꉛꌐꄉ，ꑠꃅꇫꊂꍗ:ꃰꊿꉌꂵꑋꄟꐯꀋꌡ，ꋍꐑꉪꌠꐥ，ꋍꆹꉪꌠꐥ，ꋍꍂꉪꌠꐥꎭꂵꁱꀋꐭꄰꑠꆹꋍꐑꋍꆹꀋꉪꃅꋍꍂꉪ。ꌺꐥꌹꌕꏠ，ꋍꂷꊯꑻꁌꌠꐥ，ꊯꑻꋍꂷꀋꁌꌠꐥꎭꂵꁱꀋꐭꑠꆹꋍꂷꊯꑻꁌꀋꋌꌠꉬꑴꄷ。