花花果果和戒指的故事

A：侬好呀，勿好意思噢，阿拉好像啥辰光也一道乘过火车个，侬还记得[口伐]？

B：听侬搿能一讲，我也想起来了，上趟像啥也是搿条线路噢。真难为情，刚刚呒没拿侬认出来。

A：上趟啊…侬真是忒霉了。

B：是个呀，埃趟我真是极也极煞了。谢谢侬介关心我噢。

A：我记得埃趟火车刚刚过了K站，侬就坐到我边头来了。随身拎了只箱子脱一包桔子，侬还请我吃过唻，侬忘记脱了[口伐]？呵呵呵，老实讲，埃歇辰光我就觉着阿拉两家头像老朋友一样了。

B：是[口伐]？埃趟啊，唉～我真是想尽办法唻。

A：我回忆了一下噢，好像埃趟阿拉正辣聊个辰光，辣陌生头有一帮人从旁边个头等车厢冲过来，看上去侪激动了勿得了。里向头还有一位太太，一面脱列车长咬耳朵，一面对牢仔侬点点戳戳。

B：侬记了介清爽啊！是个呀，一帮子人冲进来，连列车长也来了，当时辰光我也觉着老莫名其妙个。问伊啥情况啊？伊讲埃位太太怀疑我偷了伊个戒指，真是碰着赤佬了！

A：不过，侬个反应也是蛮快个，坦坦荡荡个跟伊拉讲：“覅瞎三话四了，是㑚认错脱人了[口伐]？我哪能可能偷伊戒指呢？勿相信个说话，可以搜身。”假使换了我啊，老早就慌了言话也讲勿出来了。

B：噢哟，侬真是忒客气了！

A：我记得列车长只赤佬倒是一眼也勿脱侬客气个，喊伊搜伊就搜了。从上到下全部摸到家，手势熟练得来赛过像辣摸自家一样。好像落脱戒指个女个，伊拉先生也来搜过一遍，嘴巴里向还要叽里咕噜，嘁～弄了像真个一样！不过到结束，伊拉还是呒没搜出来啥物事，还跟侬道歉了，一副戆头戆脑个腔调，我想想就好笑，哈哈哈哈！

B：道歉有啥用啦？侬呒没看到其他人看我个眼神啊，侪勿对唻！弄了我像真个是贼骨头一样，葛我算啥名堂呢？

A：不过言话翻过来讲，我到现在也想勿通，只戒指到底到啥地方去了呢？

 

B：……

A：……

 

B：哈哈哈…好唻好唻，侬覅帮我装野狐禅唻。搿歇点只有阿拉两家头，弄了像真个一样，有劲[口伐]？

A：哈哈哈哈，葛末……是真个咾！

B：侬装戆装出念头来了是[口伐]？哎，朋友啊，侬也勿是吃素个呀，明明看到我迓迓叫拿桔子从窗口头厾出去，人家来问个辰光，倒是一句言话也呒没多。我晓得侬个，肯定是辣心里向记好了地方，预备下车以后再去拾，我呒没讲错[口伐]？当时我就辣想，噢哟，搿记碰着同行了喏。

A：呵呵呵，侬呒没讲错。下车以后我去寻了好几圈，我觉着自家算得动作迅速个唻，结果还是呒没侬快！所以只拾着了五只烂几八糟个桔子。

B：我厾出去个就是五只桔子呀。

A：瞎讲了[口伐]！我拾着个搿五只桔子侪是完整个噢，皮也呒没剥开过，哪能可能囥戒指呢？侬搿人噢，心忒黑唻，到搿歇还肯讲老实言话，明明就是侬抢辣我前头去拿埃只囥了戒指个桔子拾脱了，对[口伐]？

B：哈哈哈哈哈，侬想象力哪介丰富个啦！笑煞我了……当然勿是个咾！

A：咦？葛就怪了。葛末侬为啥要拿桔子厾出去呢？

B：侬想想看，我用了介大个力气再弄到手个物事，就搿能随随便便塞辣桔子里向，万一让经过个人拾得去，葛我勿是买了炮仗拨人家放嘛。

A：既然物事勿辣桔子里向，葛末侬做啥要厾脱呢？

B：侬听我讲，事体是搿能个。埃日呢，我个生活稍为粗糙了点，推扳一眼就刮三了。只男人哇啦哇啦穷喊“有贼骨头啊”，我就急急忙忙个跑了，随便寻了只位子先坐下来，根本呒没辰光考虑下一步要哪能。喏，我勿就齐巧坐到了侬边浪向嘛。坐下来呒没几化辰光，伊拉就冲过来了，还叫来了列车长。勿瞒侬讲，搿记我是蛮慌个，看副腔调，事体可能要弄大了。问题是，物事要想办法囥好呀……

A：所以……？

B：就辣搿辰光，突然拨我想出来一只好办法。也就是刚刚阿拉讲起个厾桔子搿桩事体。我心想，侬看到我厾桔子，总勿可能勿响个[口伐]，肯定要举报我个呀。葛末人家也会觉着我是拿戒指囥辣桔子里向厾出去了，慢点再去拾，搿就说明物事已经勿辣我身浪向了呀。搿能个说话，伊拉哪怕是搜我个身，也顶多就是意思意思了。哎，乃侬清爽了噢。

A：原来是搿能啊。侬本事大个，拿大家骗了团团转。

B：侬还好意思讲唻！侬册那明明看到我拿蛮蛮好好个桔子厾出去，介勿正常个事体，居然一句言话也勿响！弄了倒像脱我连裆个一样！侬叫勿晓得，我心里向是多少极啊！等等侬勿响，等等侬勿响，伊拉都开始搜我身了，侬还是勿响！后来我突然反应过来，侬只赤佬也是个刁民，肯定是准备自家去拾了。辣埃种情况底下，侬算盘子是打了蛮好个呀，我勿就戆脱了嘛！

 

A：呵呵呵……乃搿记侬是蛮尴尬了……慢点慢点，葛末侬到底拿物事囥辣阿里搭啦？列车长恨勿得拿了放大镜来抄侬身，连耳朵洞也横看竖看了，到结果还是啥物事也呒没寻出来。

B：侬哪能介天真个啦。

A：侬覅讲噢，侬只女人是有眼本事个！服帖！好唻好唻，我喊侬一声“前辈”，侬就教练我[口伐]。

B：噢哟，覅喊我喊了介老好[口伐]啦。

A：好好好，葛末喊侬“小姐姐”，乃侬称心了[口伐]？快点讲呀，覅开我大兴噢，我听得出来个。

B：啥人开侬大兴啦？侬搿人，弄弄就要喇叭腔了喏。听好噢，我开始讲了，不过侬听了以后，勿许跟我翻毛腔。实际浪向呢，我拿只戒指迓迓叫囥辣侬别辣腰眼浪向个埃只装烟叶个匣头里了。侬埃歇辰光木知木觉个，一门心思辣想哪能去拾桔子，上上下下好借我囥个地方覅忒多噢！嗯？侬问我几时拿脱个？葛还用得着讲啊，就辣侬想了去拾桔子，急急忙忙过检票口个辰光呀！