[沪语版][林语堂散文]秋天的况味

《秋天的况味》

作者：林语堂

改编：麦小姐

朗读：唐厂长

[上海话改编]

    秋天个黄昏，我一家头坐辣沙发浪向吃香烟，香烟头位置个白灰下头露出一圈红光，微微熏出热气，让我个情绪也随着搿几缕蓝烟轻幽上升，笃笃定定，自由自在。但一歇歇工夫，搿烟越来越缥缈，慢慢个就消失了，而我个心思，也跟牢伊一道慢慢个沉到了大千世界里去。我讲勿清爽埃歇自家到底是啥个情绪，所以，只想讲讲搿情绪里向混杂个味道。我想划根自来火去拿搿支已经点过三四趟个雪茄再次点旺，可惜，烟头浪向个灰积了忒多，一记头点勿着，我轻轻叫弹了弹，看搿一小段灰静悄悄个落到铜垆高头，搿能静，就像我用毛笔辣纸头浪向写字一样，静得一眼声音也呒没。终于，雪茄拨我又一趟点旺了，一口一口个吞吐，实在是一种享受啊！云山雾罩，香气扑鼻，充满了偎红倚翠温香在抱个浪漫情调。于是，我想到了烟，又从烟联想到了一股热烔烔个气息，再想到缭绕辣房间里个暗淡烟霞，最后，想到了秋天个意境之美。

    搿辰光，我再发觉，阿拉从诗里向读到个秋天并勿是搿能介个，伊通常被描绘成一种萧瑟凄凉个景致，是秋扇，是红叶，是荒山，是野草。不过，秋天确实是还有另外一副表情个，伊勿像春天搿能朝气勃勃，也勿像夏天搿能暑气逼人，更勿像冬天搿能放纵整个世界枯竭凋零。有人用老气横秋来形容一个人腔调死样怪气或者欢喜摆老奎，可见伊并勿懂欣赏秋林个古色磅礴（注：此处朗读者有口误，“礴”沪音同“薄”，不是“勃”）。而对我来讲，一年四季之中，我最偏爱个，倒正是秋天。

    秋天代表了成熟稳重，相对于春个明媚娇艳，夏个浓密茂盛，伊赛过是过来人，也就勿会样样啥侪觉着稀奇了。所以，秋色是属于金黄个，树叶放弃只以碧绿油绿为荣个审美标准，反而添了一份苍劲淡泊个气概。搿就是我所讲个秋天个意境了。或许，我最爱个还勿是晚秋，而只是初秋。搿个辰光，暑热刚刚消退，月正圆，蟹正肥，空气里飘满桂花个香味，秋天也还是温柔个，搿是最最适意个一段日脚，就像我雪茄浪向刚刚烧出来个烟灰，一头旺，一头隐，只留下阵阵被熏熟个体香。

    秋天也像一支锋芒已收个笔，作者超越了对华丽词藻个追求，慢慢提升到了更高一级个层次，凝练坚实，通达深长，所以伊个文章是值得细细品读个。搿就是庄子所讲个“正得秋而万宝成”个真正含义了。懂得人生个人，最享受个就是搿层境界了。比方酒，越是陈年越是醇厚。再比方烟，也有凶淡之分，好个雪茄远胜过香烟，因为伊个味道更加和顺，假使会烧，慢慢个抽完一支，看看一头红色一头灰白，也是回味无穷个。

    大概，凡事古老，纯熟，精炼，有烟火气个物事，侪会让我看得到同样个快乐。比方，听一只熏黑个砂锅辣炉子浪向用慢火炖猪肉个辰光所发出个啯笃啯笃个声调；又比方，一本用了廿年仍旧保养得蛮好个字典，或者是欣赏书法名家恢宏大气个墨宝，搿些侪是我个人生乐趣。

    一个人个一辈子其实也可以分成四个季节，所以啊，年龄对应到了秋天，也呒没啥个可以慌张个，搿再是阿拉最饱满个辰光。好比是一个女人，假使天姿端正生活美满，即使勿再年轻，但伊所散发出来个风韵仍旧是相当有吸引力个，搿种经过岁月沉淀下来个圆润气质，正是十八岁小姑娘身浪向所呒没个。我交关欣赏美国舞蹈家邓肯讲过个一句言话，伊个大致意思是搿能个：“大多数人只会歌颂春天与恋爱，真是呒没道理啊。要晓得秋天个景色，再是更加华美更加雄伟个，而秋天个快乐，则有万倍个雄壮、惊奇脱瑰丽。我真可怜埃些眼界有限个女同胞，使伊拉错过了充满爱意个秋天送拨伊拉个珍贵礼物。”像邓肯搿能个人，再是懂得人生乐趣个人啊！