[沪语版][小说]胭脂扣（三）

[小说]胭脂扣（三）
作者：李碧华（香港）
改编：麦小姐
朗读：麦小姐、唐厂长


 [上海话改编]


    怪了，我脱如花竟然像朋友一样茄起山河来了，我也呒没先头搿能吓了，取而代之个是好奇。我问伊：“侬要寻个十二少，到底是哪能样子一个人啊？”
（如花）：“伊啊——伊是南北行三间中药海味铺个少爷。眉清目秀，斯文体贴……”
（永定）：“所以，㑚两家头是一见钟情咾？”
    伊对我一笑，眉眼里向侪是风情。
（如花）：“侬假使答应帮我，我自然全部讲拨侬听。”
    女人就是搿能，侬退一步，伊进一步；等侬兴趣来了，乃末挨着伊搭架子嘞。
（永定）：“侬勿会害我[口伐]？”
（如花）：“我为啥要害侬呢？”
（永定）：“侬哪能会拣中我个呢？”
（如花）：“侬已经晓得介许多了，勿拣侬拣啥人啊？”
    看起来，伊是缠我缠到底嘞！唉，我也蛮罪过个，一面之缘而已，就甩勿脱了。再想想埃个叫十二少个男人，呵呵，也是真生活啊！
（永定）：“我答应帮侬，就肯定会全力以赴。不过言话讲辣前头，毕竟我能力有限，假使寻勿着人，侬要保证呒没其他反反复复个事体个噢！”
（如花）：“勿会寻勿着个。刚刚算命先生勿是讲了嘛，伊辣辣阳间，搿几日就会得有消息了。”
    看伊搿能天真又搿能固执，甚至比一般个烧香婆拜菩萨更加诚心诚意，信仰个力量是无法估量个，望伊能够求仁得仁。我晓得自家勿方便再多讲啥，就调了只话题问伊：“伊叫十二少，伊屋里啥真个有介许多兄弟姐妹啊？”
（如花）：“伊辣屋里只排行老二。不过，当时个塘西花客，为了表示自家身出名门，屋里融洽和睦，侪欢喜辣别名前头加一个‘十’字，以显得家族兴旺。十二少，伊本姓陈。”
（永定）：“伊叫陈啥？”
（如花）：“伊叫陈振邦。”


    噢～就是搿位“振邦”，辣五十年前个石塘咀倚红楼，深得一位颠倒众生个名妓个爱慕，真心相许，生死相缠。搿男人叫末叫“振邦”，葛末，伊振过啥个邦呢？呵呵，不过就是个欢喜吃花酒个富二代嘛！如花为伊搿能痴情，我倒觉着有眼勿大值得。
（如花）：“我老小个辰光就到了花寨，一开始是卖唱个清倌人，后来有位客人出大价钿竞得了我个初夜。我运道勿错，用了呒没几年就还清爽了债头，帮自家赎了身。正因为勿愁吃用，所以一般性客人发个帖子，我是勿高兴接个。”
    我专心致志个听伊讲，搿能个情节，通常只会出现辣电影里。
（如花）：“有一日夜里，七少请客，邀我去陪。七少出手向来大方，伊曾经是我个‘毛巾相好’——”
（永定）：“啥个叫‘毛巾相好’啊？”
（如花）：“老早大人家个公子出来白相，面子侪是靠钞票卖得来个。阿拉收到花帖去酒楼陪客人应酬个辰光，会带一块喷了花露水个彩色毛巾，再用搿块专用毛巾帮对方敷面揩手，以此来脱一般性外头个白颜色小毛巾作区分。其实，不过是男人们想出划出别苗头个手段而已。”
    原来是搿意思啊！有钞票人真会白相，也真是无聊，竟然会用几块小小个香水毛巾来扎台型，显身价。搿几块毛巾，想必也是老价钿唻！风月场有风月场个规矩，巧立名目，算来算去侪是账。有人觉着搿就是明劗[亻寵]头，但有人就是吃搿套花功排场，本来就是各取所需是事体。如花生得漂亮，又知情识趣，顶关键个还有大户老板们个捧场，所以，伊是有资本骄傲个。
（如花）：“我就是辣搿日夜里认得十二少个。唉，我也讲勿清爽到底是良缘呢还是孽缘，反正，埃日我坐下来之后，伊个眼睛就呒没从我身浪向离开过。大家讲讲笑笑，我也对伊动了心。按照规矩，我是应该搭搭架子个，只好坐一歇歇，就要寻借口转场子了。”
（永定）：“但侬搿日就一直坐下去了？”
（如花）：“呒没，我还是走了。不过结束快我又来了一埭。散席之后，我请七少去倚红楼再坐脱一歇，欱欱茶，吃吃点心，茄茄山河。十二少呒没一道来。我豁领子拨伊。三日天以后，伊就来倚红楼寻我了……”


    如花畅想着伊春风得意个往昔，搿辰光，电车开到了石塘咀。差一眼就乘过站了，我要紧领伊下车，搿趟，我让如花跑辣前头，省了驾驶员因为看勿到而拿伊关辣车子浪向。
    夜已经深了，石塘咀冷冷清清，面目全非。如花立辣路口，左右为难。伊要到阿里去寻属于伊个“老地方”呢？时隔五十年，此情可待成追忆，只是当时已惘然。
（永定）：“此地就是石塘咀了。”
（如花）：“搿搭真个是石塘咀？我哪一眼也勿认得了呢？水坑呢？大寨呢？欢得、咏乐呢？还有，富丽堂皇个金陵酒家脱广州酒家呢？……连陶园打八音个锣鼓声也听勿见了——石塘咀变成搿样子，葛十二少要哪能跟我碰头呢？”


    唉，辰光脱地方侪错了位，如花一记头受勿了搿能大个打击，进退两难，又急又怕，终于屏勿牢落下了眼泪。不过讲到底，伊回到此地并勿是为了怀旧，让伊最放勿下个，还是伊个“振邦”。
    如花问我伊要哪能办？弄了像我有一堆经验可以参考一样。我当然呒没经验，也呒没让时光倒流个本事，覅讲五十年了，就是一分钟、一秒钟，我都呒没本事帮伊穿越回去。唉，时间是最铁石心肠、铁面无私个。面对现实，我跟伊，啥人也勿比啥人坚强。
    另外还有一只让我纠结个问题，就是——我要哪能安置伊呢？既然答应帮伊忙，总勿见得就搿能拿伊掼辣马路浪向[口伐]。我想了想，问如花要勿要去我屋里休息一夜，等天亮了再一道想办法。
（永定）：“侬…覅误会啊……”
    如花浅浅一笑，对我点了点头。
    我呒没想着伊会答应了介爽快，因为一般个女人听到搿能个邀请，多少会推辞一下：啥个勿便当啦，啥个难为情啦，啥个男女有别啦，啥个萍水相逢啦……哪怕搿种推辞不过是假客气，意思意思总归也是要个。但我忘记脱了，如花勿是一般个女人，辣伊成为艳鬼之前就是一位艳女，见过个市面比我多得多，所以以上搿些顾虑，其实是我个尴尬。
    我并呒没看勿起伊个意思。
    不过，我勿得勿老老实实承认，当如花答应去我屋里，之后个半分钟里向，我满脑子侪是伊半夜里来敲我房门个画面。呵呵呵，我真是《聊斋》看多了，埃个有艳福半夜幽会狐仙艳鬼个人是蒲松龄，哪能会是我袁永定呢？


    阿拉一道朝我屋里个方向走。半路经过金陵阁，此地老早是金陵戏院，拆脱之后造了居民楼。门口有间游戏机房，边头还有一爿老式照相馆。照相馆个橱窗里摆了一张集体照，是1958年拍个，照片脱我同龄。虽然我跟如花侪属狗，但伊比我大了整整四迊，四十八年啊，可能是交关人个一辈子了。假使如花一直活到今朝，应该是一个七十几岁个阿婆了，老眼昏花，皮皱肉松；假使伊轮回转世，算算差勿多也有四十几岁了，勿尴勿尬，勿上勿下。而伊现在花容月貌个立辣我边头，侪是因为伊个执念未了，一生一世哪能够，伊要个是永生永世。所以，哪怕搿男人已经重新投胎做人，伊还是寻得来了。


（如花）：“先生，有桩事体我忘记脱问了。我去侬屋里…便当[口伐]？侬太太跟小人……？”
    结婚？呵呵。我谈朋友也谈勿连牵，结婚…天晓得要等到阿里天了！
（永定）：“我还呒没结婚。侬也覅喊我啥‘先生’了，听上去勿大习惯，我叫袁永定。”
（如花）：“噢～永定少。”
（永定）：“如花小姐，谢谢侬介拨我面子。不过，现在已经呒没人称呼人家啥少啥少了，侬还是喊我永定[口伐]。”
（如花）：“永定，真是只好名字啊，叫起来，有一种地老天荒个感觉，像一座桥、一块碑、一只墓，就是勿大像是人个名字。”
（永定）：“呵呵呵，谢谢侬覅再数下去嘞，反正我早晏点会变成功一座桥、一块碑、一个墓个。阿拉到了，我就住辣搿幢房子里。”


    一边上楼，我一边脱如花介绍周围个环境，还迭为拣了点有生活气息个情况来告诉伊。我住辣四楼，一梯两户，对天门住个，是我阿姐跟姐夫。阿拉个房型结构侪差勿多。房子勿到四十个平方，每只号头，伊拉一人要还两千多块贷款。假使勿出啥个大事体，将来我结婚以后，也会一直住辣此地。辣香港，大多数普通老百姓，一辈子最大个志向侪是买房子讨娘子，太太平平个小日脚一直过到自家老百年。就好比我阿姐，伊是做老师个，伊老公就是坐辣伊对过个同事。伊拉日日对面对讨论工作讨论学生子，一错就是十年。有勿有爱情，我勿晓得，反正后来伊拉自然而然个结婚了。
    四楼到了，进门。我请如花坐下来，然后我也坐了下来。两家头侬看看我，我看看侬，一下子勿晓得哪能回到之前个话题了。
    如花姿态优雅个侧过身体隑辣沙发浪向，我观察下来，可能是职业习惯，伊勿大会正眼平视，永远是用眼梢来表情达意，即使对方是一个像我搿能个木块头男人。
    唉，两家头就搿能干坐也蛮尴尬个。我去汏了点苹果橙子，切好，摆辣碟子里向，招待伊吃。我晓得伊勿好吃热个物事，所以迭为拣了冰过个水果，常怕伊觉着勿够“冷”。
    如花领情，开始“吃”苹果。过了一歇，伊“吃”好了。我一看，苹果还辣辣碟子里，一只角也呒没少。
（如花）：“有趟十二少来我房间吃茶谈心，下头人送上来一盘水果，苹果咾，橙子咾啥，我一看就喊伊拉统统端下去了。我骂跑堂个阿姨拎勿清，十二少是啥人啊？伊拉送搿点蹩脚货上来，勿是成心坍我台吗？过了一歇，下头人就端来了妃子笑脱美国荸萄。”


    一个女人要收买男人个心，覅忒便当噢，只要稍为肯动动脑筋，再加点演技，啥男人[湯/手]得牢啊？
    呵呵，我看看搿一台子个“蹩脚货”，觉着有眼难为情。不过我再想想，我何必讨好伊呢？我又勿可能追求伊个。再讲，搿种女人是最难弄个，伊看勿上侬倒还呒没啥，顶多是单相思；假使伊吃煞侬爱啥侬，侬就覅想离开伊嘞。侬投胎转世，伊阴魂不散；就算侬变成功只苍蝇，我相信伊也照样有办法变成捕蝇草来搭侬。
    爱，有辰光就是一张网。
    咦～听伊讲了介许多，有只关键个问题一直呒没提到过。葛末，伊到底为啥搿能大排落场个来寻搿个男人呢？难道是为了报仇？搿段关系，从头到尾巴会勿会只是伊个一厢情愿呢？
    不过，搿到底是人家个隐私，讲就讲了，勿讲就算了，我还呒没介寿头八牵。假使如花碰着个是我阿姐，葛就两样了。我阿姐顶欢喜管闲事，板定会拉牢如花问长问短个。虽然女老师自家呒没啥丰富个感情经验，我估计伊大概就谈过姐夫搿能一个男朋友，从同事到老公，从对天门到床横头，风平浪静个佮一辈子。


    不过，搿女人啊，但凡已婚个，总看勿起单身个，哪怕侬嫁了再委屈，哪怕人家单身个过了有多潇洒，一百样勿管，就是从心里看勿起。只因为伊有了一个专属个男人，自我感觉一记头膨胀起来，只要看到单身同胞，就滥用同情心。
    我姐夫也是一样。三十几岁个人了，辣学堂里当教导主任。搿能芝麻大小个官，再加一个顶普通勿过个家主婆，就足够伊心满意足个过下半辈子了。有常时，伊也会辣我面前秀优越。
    我屋里个窗口正对过埃爿饭店，店外挂起了花牌，用彩灯点缀过个，显得邪气华丽缤纷。花牌高头写了“陈李联姻”个字样，看来今朝有人家包场办酒水。陈跟李，侪是顶顶大众化个姓，今朝伊拉是主角。
    人生个高潮，有辰光就是虚张声势。
    如花立辣窗边看闹猛，我只好陪伊一道看，脱伊隔开一扇窗，勿敢靠伊忒近。我对伊讲：“搿是结婚个花牌。㑚埃歇辰光办喜事，也有搿种花牌[口伐]？”
（如花）：“我呒没嫁过人，所以勿大懂。但我曾经也有过一块花牌。十二少对我一往情深，搿是阿拉顶开心个日脚。伊懂浪漫，脱一般个客人勿一样。有一趟，伊送拨我一块鲜花扎个花牌，高头是一副对联：‘如梦如幻月，若即若离花。’”