81.【潮文】嘴贱男友的5大绝招

男人，喺经过千万年嘅进化历程之后，已经成为咗一种适应力极强嘅生物，可以随住环境嘅改变而灵活调节自己。一个男人会做好人，定係衰人，好多时候唔轮到佢自己拣，而係取决于男人最重要嘅环境——女人。

当男人追求女人唔成功嘅时候，佢会得到哩一句评价：“你係一个好人。”

而当男人成功追到女人嘅时候，佢又会得到另一句评价：“你真係一个衰人！”

甚至仲会得到哩句评价：“你真係一个贱人！！”

唉，做男人真係苦。

追你嘅时候万般珍惜，追到之后就松毛松翼。

哩句18字真言，可以话係完全概括咗男人适应力极强嘅哩个特点，特别係喺爱情上面。而一个做好人嘅男人，同一个做咗衰人嘅男人，无论喺言[咸]举止、定係相对[湿]度，都有好大唔同。今期，我地就嚟关注下：一个衰男人嘅特点——嘴贱。

咦？咁好男人呢？唔使关注佢地？

傻啦，做得好人嘅男人，一般都无乜人关心噶啦，佢地惯咗噶啦。你睇，佢宜家咪同佢只左手玩得几开心？

好啦，废话唔讲啦，跟住落嚟，院长为各位总结咗嘴贱男友嘅5大必杀技。

回应篇：

头两招，係嚟自“回应篇”。指嘅係当女人揾男人麻烦，或者准备发男人脾气嘅时候，男人会使用嘅绝技。

1、嘴贱男友第一招：恶人先告状

l 你唔好咁小器啦

女：“BB，我地今个星期六系咪去睇戏啊？”

男：“哎呀，r係星期六咩？我以为星期日添，星期六我约咗班Friend打机啊”

女：“咁噶你，应承咗人又唔算数。”

男：“......你唔好咁小器啦”

女：“我小器？我边有小器啊，明明係你应承咗我噶，你自己又甩底”

男：“哎呀，你唔好咁小器啦，上次你约班姊妹去街唔陪我我都无嬲啦，系咪？我个人就最宽宏大量噶啦，你就唔好咁小器啦！”

女：“你先小器啊，痴线。”

男：“下，咁都嬲啊，唔好咁小器啦你。喂，你走去边啫？”

l 你都唔讲道理嘅

女：“有无搞错啊，我约你12点，你1点先到，边有人要女仔等噶，仲要等咁耐”

男：“我琴晚唔记得教闹钟”

女：“你都唔重视我地嘅约会嘅”

男：“唔係，你讲下道理得唔得”

女：“我....我唔讲道理？好啊，咁你自己迟到有咩道理讲啊”

男：“你知啦，琴晚打机好攰啊嘛，咁咪记得咗教闹钟咯”

女：“咁算係咩道理啊？...自己迟到仲要话我唔讲道理”

男：“唉！你都唔讲道理嘅，我都话咗...”

女：“痴线！”

l “唔使咁认真啊，讲下笑都唔得”

女：“你觉得我靓啲定係佢靓啲啊？”

男：“诶，使乜讲，佢靓好多！”

女：“哼！”

男：“喂，唔使咁认真啊嘛，我讲笑啫”

女：“唔好笑咯”

男：“讲下笑都唔得？唔係啊嘛，唔好咁小器啦，喂，你又走去边啊？”

以上三句：“你唔好咁小器啦”、“你都唔讲道理嘅”、“我讲下笑啫”，都系第一招“恶人先告状”嘅最常用句式。当中嘅逻辑就係用一句说话歪曲事实，继而快速转守为攻。係唔少男人每日都袋喺裤袋，随时攞出嚟对付女朋友嘅快攻绝技。

2、嘴贱男友第二招：九唔搭八/生安白造

哩招係“恶人先告状”嘅进阶版，比起用歪曲事实，哩一招嘅境界更高，因为秘技就在于无视事实。无论女朋友即将发脾气嘅内容係乜都好，男人都可以用哩一招完美化解，毫无漏洞，绝对唔会俾女朋友揾到位入。

l 你冷静啲先，OK？

女：“头先有个女仔微信打俾你喔，都咁夜啦，边个女仔会咁夜微信你呢？”

男：“你冷静啲先。”

女：“我边度有唔冷静啊，我心平气和咁问你係边个打俾你啫？”

男：“BB你冷静啲，relax，你咁唔冷静我好难同你沟通噶”

女：“你咁讲啫係当我发癫啦？”

男：“嗱，你睇下你，又乱霖嘢啦，几咁唔冷静。你睇下我，我好冷静噶，我地理性沟通啊嘛，你relax啲，OK？”

女：“痴孖筋！”

l 饮多啲水啊，燥啊你个人。

女：“琴晚我打俾你你做乜唔听电话”

男：“下？”

女：“我话啊，琴晚你做乜唔听我电话啊”

男：“.....”

女：“喂，你有无听我讲嘢噶”

男：“嚟，BB，饮杯水先”

女：“饮咩水啫，我成日都饮噶啦，喂你答咗我先”

男：“一定要多啲饮水啊。燥啊你个人”

女：“见到你我就最燥啦”

男：“嗱，你睇下你，又干又燥，嚟，饮水，饮多啲。”

女：“...癫嘅你都”

l 哇超臭啊...

女：“我同你讲过好多次噶啦，你点解次次都唔听嘅啫，次次都係咁，你究竟几时先肯改...”

男：“哇.....超臭啊”

女：“你讲咩啊.....”

男：“系咪你放屁啊？好臭啊”

女：“放咩屁啊，我宜家话紧你啊”

男：“讲嘢你咪讲咯，放咩屁啫，超臭”

女：“你咪扯开话题喔，我...”

男：“哇唔掂，超臭啊....哇...”

女：“啊!!!!!......痴线噶！”

犀利，犀利。屈女朋友唔冷静，屈佢饮得唔够多水，仲屈埋佢放屁......能够使出哩一招“九唔搭八/生安白造”嘅男朋友，都可以算係男人当中嘅男人，人中之龙。除咗面皮要够厚之外，个样一定係沟死女或者超有钱果啲，唔係咁嘅嘢点讲得出口啊。

讲完嚟自“回应篇”嘅头两招，跟住嚟到“进击篇”，都有两招。男朋友有时唔单止识得嘴贱回击，仲会嘴贱出击，跟住落嚟，就为你地介绍以下嘅招式。

3、嘴贱男友第三招：我有我自由，理X你感受

男：“今晚食咩啊”

女：“我唔想食嘢”

男：“点解啊？”

女：“心情唔係好...食唔落”

男：“哦....心情唔好食唔落....咁我约班兄弟队啤睇波噜，夜啲倾啦，bye！”

女：“......正白痴”

女：“我唔理啊，总之以后你咩都要同我报告”

男：“哦...”

女：“你做咩都要话比我知先做”

男：“我...我想及女啊”

女：“......正扑街”

女：“哇，好靓啊”

男：“咦？你中意啊？”

女：“係啊，哩条裙我睇中咗啦，好中意啊，BB...”

男：“咁你钟意就睇耐啲啦，翻屋企无得睇噶啦，哈。”

女：“......正贱人”

原谅我这一生不羁放纵，爱自由。对住哩一种野马般嘅自由斗士，女朋友係永远都得唔到，佢地期望值当中嘅回应，而且只能够眼白白咁睇住自己条仔係度笑骑骑唔知有乜咁好笑，但个心就暗暗落泪，质问自己究竟有乜动力驱使自己同哩个白痴仔拍拖，係爱啊，定係责任啊？係盲啊，顶你个肺。

4、嘴贱男友第四招：失惊无神放冷箭

有时呢，男仔都钟意制造一啲生活小惊喜俾女朋友，只不过粗心大意嘅男人呢，总係漏咗喜，得个惊。唉，每个女孩子曾经都係小公主，直到膝盖中了一箭。

女：“我地公司Amy有咗BB之后，身材走晒样...唉，以后我有BB都唔知会唔会咁”

男：“你就唔使担心哩啲啦”

女：“下，真系噶？”

男：“你宜家已经走晒样了。”

女：“......”

女：“喂，BB，你做紧咩啊”

男：“食紧饭啊”

女：“食咩啊”

男：“食你啊”

女：“啫係咩啊”

男：“猪扒啊...哈哈”

女：“......”

女：“你会唔会嬲我成日化妆化好耐噶？”

男：“唔会啊，难得可以静下”

女：“......”

各位女士，其实你地唔好怪你条仔会讲啲咁贱格嘅说话，其实佢地係无心嘅，真噶，除咗有心之外嘅，都系无心噶。“失惊无神放冷箭”以及“我有我自由，理X你感受”哩两招，各有千秋，而且杀伤力都不容小觑（ceoi3读:趣）。其特点都係嘴贱男友主动出击，攻其不备，杀女友一个措手不及口哑哑，从而达至不战而胜嘅至高境界。

纵然，无论系前两招嘅回应篇，还是后两招嘅进击篇，虽然係嘴贱男友修炼法当中已经係上盛绝技，但其实，仲有一招从天而降嘅掌法。可以瞬间打沉女友嘅哩招，方为嘴贱男友超必杀技。无错啦，就係最后嘅第五招——笑你啲啡唇（Fashion）。

5、嘴贱男友第五招：笑你啲啡唇（Fashion）：

女：“BB我今日靓唔靓啊”

男：“哈哈哈哈，Woh Woh，旺财，旺财我地玩抛接球咯，旺财”

女：“咩旺财啊！哩个係颈圈嚟噶，唔係狗带啊”

男：“哈哈哈哈哈哈哈”

女：“哩啲叫啡唇啊，你识条铁咩，啊~~~~~~”

女：“BB我今日靓唔靓啊”

男：“哈哈哈哈，亏佬裤？”

女：“咩亏佬裤啊，哩条高腰牛仔裤嚟噶！”

男：“哈哈哈哈，咁咪同亏佬裤一样？哈哈哈”

女：“哩啲叫啡唇啊，你识条铁咩，啊~~~~~~”

女：“BB我今日靓唔靓啊”

男：“哇，我头先见到个阿婆，同你条裙一模一样噶”

女：“去死啦你，我啲碎花唔同噶”

男：“哈哈哈哈哈，阿婆裙”

女：“哩啲叫啡唇啊，你识条铁咩，啊~~~~~~”

女：“BB我今日靓唔靓啊”

男：“哇，你啲指甲咩事啊”

女：“琴日做嘅美甲啊，靓唔靓啊”

男：“哎呀，得了灰指甲，一个传染俩”

女：“哩啲叫啡唇啊，扑街啦你！啊~~~~~~”

啡唇哩家嘢，男人真係识条铁咩...女人嘅啡唇，就係女人嘅自尊。无知嘅男友嘲笑女友嘅啡唇，就係践踏紧佢嘅自尊。我作为一个男人，係认同佢地笑点嘅同时，又感到无比羞愧...羞愧点解人地可以对住真人笑，我对住只左手笑。Anyway，总之都係果句：追你嘅时候万般珍惜，追到之后就松毛松翼。

哩一期节目，讲出咗嘴贱男友嘅5大招式，展示出贱格男朋友嘅贱格真面目。各位女士，我知道你地係心酸嘅同时又好感动，终于有人明白你地嘅苦啦。係...係，唔好鼓掌住。如果真係咁，你地就仲未真正明白你地自己嘅男朋友啦。

你以为佢嘴贱係因为唔够爱你？错啦。

男朋友嘅每一次嘴贱，恰恰係爱你的表现。

两个人拍拖，梗係希望多啲恩爱，少啲矛盾。但点样先可以做到少啲矛盾？作为一个嘴贱男友，其实就深谙当中之道。

根据《孙子兵法》第三篇《谋攻》，“不战而屈人之兵”，意思係唔使通过战斗交锋，就令对方丧失战斗意志。严格嚟讲，孙子係一个“反战者”，所以佢认为喺战场上，最佳嘅胜利就係不战而胜，甚至不会损害自己或者对方嘅一兵一卒。哩一位和平主义嘅战略家，根本就同恋爱中嘅嘴贱男友一摸一样。

佢地唔希望同女朋友哎交，所以当佢地预感到跟住落嚟女朋友会发作...发脾气...都唔啱，总之就大家都有唔啱有啲嬲嬲猪啦嘅时候，就用以上提到嘅嘴贱绝招，一招就提早结束哩场未开始嘅战斗。“不战而屈人之兵”，重点係个“屈”字。佢唔想同你嘈，因为，佢係爱你啊。真噶，佢真係爱你啊。佢真係唔系突然犯贱贪过瘾/贪好玩/表面无心嘅其实最钟意挑战女朋友底线又扮晒懒有道理咁啊，唔係啊，你宜家明白未啊？

除非係。

完。