谭义存 俞荣康-恋爱风波

甲：谁知道上海这个地方 ，爱情已经把我久久遗忘。当年我在公园村里村里，到如今我剩下光棍一条，啊，啊，啊。

乙：侬老是哭做啥了，表演独脚戏啊。

甲：哭算小意思。

乙：哪能啦？

甲：我自杀也自杀了交关趟数了。

乙：自杀？

甲：我第一趟准备跳黄浦江自杀。

乙：跳了�？

甲：没跳。

乙：为啥？

甲：迭个江水忒冷了，我有胃病个，万一跳下去我个胃痛起来哪能办。

乙：自杀还考虑胃病。

甲：后来我决定上吊自杀。

乙：吊了�？

甲：没吊。

乙：为啥？

甲：上吊形象忒难看了，万一公安局来拍照片，我拿迭张照片寻对象寻勿着。

乙：自杀还考虑寻对象。

甲：还是想去吃安眠药顶保险了。

乙：搿倒有道理。

甲：麻烦侬去买一百片安眠药。

乙：可以。

甲：如果侬一道死个话买两百片。

乙：为啥我要一道死？

甲：侬迭个一百片我请客。

乙：自杀还要请客了，打啥个朋，我问侬为啥要自杀。

甲：勿瞒侬讲我失恋了。

乙：失恋。

甲：侬讲失恋痛苦勿痛苦？

乙：痛苦。

甲：难过勿难过？

乙：难过。

甲：受得了受勿不了？

乙：受勿了。

甲：侬失恋失过几趟了？

乙：六趟。打啥个朋，我阿里搭失过恋。

甲：侬没失恋脱我没共同语言，让我去死�，啊。

乙：诶，诶，诶，我问侬，侬谈了几趟恋爱？

甲：我谈了六趟，吹了八个。

乙：哪能谈六趟吹八个。

甲：有两个谈也没谈就吹脱了。

乙：啥道理？

甲：伊拉讲我腰身忒粗。

乙：侬有多少腰身？

甲：一共只有四十八寸啊。

乙：四十八寸还勿粗。

甲：搿没办法，迭个是自然灾害。

乙：后来哪能样？

甲：后来我舅舅帮我介绍了一个对象。

乙：叫啥个名字？

甲：叫梅家静。

乙：美，美加净是牙膏个名字。

甲：勿是牙膏美加净。

乙：搿哪能个美加净了。

甲：伊姓梅花个梅，家庭个家，安安静静个静，连起来梅家静。

乙：哦，是迭个梅家静。见面了�？

甲：见面了。

乙：哪能了？

甲：三分钟勿见就吹了。

乙：哪能会吹个？

甲：伊讲我老子忒多。

乙：侬有几个老子？

甲：一共只有八个。

乙：哪能有介许多老子？

甲：伊讲我讲闲话个辰光用老子用了忒多。

乙：侬难能脱伊讲个？

甲：挨天我脱伊约会迟到了，向伊赔礼道歉。

乙：是应该个。

甲：出毛病了。

乙：哪能了？

甲：我对伊讲，梅家静。

乙：诶。

甲：侬是啥人？

乙：我是美家静。

甲：我看侬勿像美家静。

乙：像啥？

甲：白骨精。

乙：对个，侬讲了一眼也勿错，我是白领骨干精英。

甲：实在对勿起，侬第一次脱老子约会，老子就迟到了。

乙：老子出来了。

甲：其实迭勿能怪老子，老子今朝一早出去帮侬买瓜子，买了瓜子，老子轧车子，老子轧了六部车子，老子没有轧上车子，等到老子轧上车子，老子赶到此地，老子就迟到了，所以迭个绝对勿能怪老子。

乙：介许多老子啊。

甲：侬勿欢喜听老子没关系，老子下趟绝对勿讲老子，老子再讲老子，老子就勿是老子。

乙：侬迭个语言忒疯了。

甲：应该哪能讲？

乙：侬脱女朋友初次见面，勿能连名带姓个叫人家。

甲：哪能讲啊？

乙：应该辣姓名前面加个小字，比如梅家静前面加个小字，小梅。

甲：小梅。如果姓王呢？

乙：小王。

甲：李呢？

乙：小李。

甲：偷呢？

乙：小偷，没个。进一步以后就可意叫家静。

甲：家静。

乙：家静再进一步，就把人家名字最后一个字重复两遍，静静。

甲：静静。

乙：如果对方是李小萍，那就叫人家萍萍。

甲：萍萍。

乙：如果对方是王丽光，那就叫人家光光。

甲：光光。

乙：如果对方是张亚旷，那就叫人家旷旷。

甲：旷旷。静静，萍萍，光光，旷旷。

乙：侬辣敲家什。

甲：侬自己教我个。

乙：总而言之，侬个文学素养忒差。应该多看书。

甲：我看了。

乙：看了啥？

甲：《喜羊羊与灰太狼》、《熊出没》、《新大头儿和小头爸爸》，忒好看了。

乙：啥人叫侬看迭眼书。

甲：看啥？

乙：侬应该看眼文学著作。

甲：文学著作我也看了。

乙：看啥了？

甲：我看了法国文学家孔老二。

乙：打啥个朋，孔老二哪能是法国个文学家，是中国人。

甲：伊过去是中国人，后来插队落户插到法国去了。

乙：侬又要打棚了。那侬讲讲看侬看了孔老二啥个作品？

甲：我看孔老二个《女人》。

乙：《女人》？

甲：《女人》。

乙：侬讲讲清爽。

甲：我讲了蛮清爽了，《女人》

乙：孔老二写个是《论语》。

甲：《论语》，《语伦》，《女人》，差差勿多个。迭个吹了以后，我阿姨又帮我介绍了一个对象。

乙：叫啥个名字。

甲：阿庆嫂。

乙：还刁德一呢？

甲：勿是《沙家浜》里个阿庆嫂，伊为能老直爽个，人家畀伊个美称叫阿庆嫂。

乙：见面了？

甲：见面了，我一看见伊就亲亲热热叫了一声嫂嫂。

乙：还有外婆了，嫂嫂。

甲：侬自己教我个。

乙：侬又忘记了，侬应该拿人家姓字前面加一个小字。

甲：后来我改过来了。

乙：改过来了。

甲：小阿。

乙：还小鸡呢。

甲：亲爱个小阿，我实在忒爱侬了，我一看到侬我个心就跳了结棍，我现在一分钟跳了三百八十六跳。

乙：变心动过速，当心一脚去。

甲：勿会个，啊，亲爱个小阿，侬是我个灵魂，我是侬个生命，侬是我个希望，我是侬个馄饨。

乙：阿里搭有馄饨啊？

甲：伊最欢喜吃馄饨了。

乙：好好好，随便侬了。

甲：小阿，我一分钟也离勿开侬，侬是我夏天个雪糕，冬天个棉袄，揩面个肥皂，刷牙个牙膏，侬是我饥饿中个面包，黑暗中个灯泡。

乙：哪能有迭种比喻啊。

甲：小阿听了老开心个。

乙：哪能？

甲：伊笑嘻嘻个叫了我一声。

乙：叫什么？

甲：神经病。

乙：侬是有眼神经病。

甲：走了。

乙：走了，我看侬还是文学水平忒差。应该多看看电影。

甲：电影我也看了。

乙：看了啥物事？

甲：我看了《少林寺》 。

乙：为什么看《少林寺》？

甲：找勿到对象早晚当和尚，我先去体验体验生活。

乙：哪能好看迭种电影啊，应该多看看爱情片子。

甲：爱情片我也看了。

乙：看什么？

甲：《嫁不出去的姑娘》 ，我一口气看了四十八遍。

乙：为啥介许多？

甲：伊拉嫁勿出去统统嫁给我。

乙：侬迭个人啊。

甲：后来我舅妈又帮我介绍了一个对象。

乙：叫啥个名字？

甲：奴隶。

乙：侬是约瑟夫。

甲：我勿是约瑟夫。

乙：是啥？

甲：我是油豆腐。

乙：还油豆腐。

甲：我一见伊就唱，（巴基斯坦语言）唱电影《人世间》插曲，啊奴隶奴隶。

乙：豆腐，油豆腐。

甲：我爱你，我爱你。

乙：我不爱你，不爱你。

甲：奴隶，确。

乙：侬嘴巴浪个胡子弄得我手拉浪老痒个。

甲：我一见奴隶勿就对伊讲了。

乙：讲啥个物事？

甲：亲爱个奴隶，侬是史无前例个美丽，轰轰烈烈个漂亮，啊呀，侬实在忒漂亮了，我恐怕配伍上侬，侬好比天浪飞个凤凰，我好比地浪爬个蚂蟥，侬好比漂亮个神仙鱼，我好比墨黑个乌贼鱼，侬实在忒美丽了，侬比我妈妈还美丽。

乙：侬打棚了。

甲：侬只要嫁畀我要啥有啥，要钞票有钞票，要房子有房子，要晓得我是个部长。

乙：啥个部？

甲：小卖部。

乙：小卖部人家还要侬啊。

甲：就是呀，伊听我讲好了转身就走。

乙：走了。

甲：啊呀，快点来呀快点来。

乙：还快点来，人家老早就走了。

甲：来了。

乙：来了？

甲：我儿子来了。

乙：侬没结婚啥地方来个儿子？

甲：我讲个是我个过去，后来我经过了学习文化，端正了恋爱观点，我脱伊结婚了。儿子也老大了，侬看伊放学了。小嘛小儿郎 ，背着那书包上学堂，不怕太阳晒，也不怕那风雨，只怕先生骂我懒那，没有学问喽无脸见爹娘.爸爸。

乙：诶。

甲：抱抱我。

乙：我哪能抱得动啊。