第29期生活常识（安多方言）

དེ་རིང་གི་འཚོ་བའི་རྒྱུན་ཤེས་ལེ་ཚན་ནང་སློབ་འགོ་མ་ཚུགས་གོང་ཕ་མ་དང་ཕྲུ་གུས་བསྒྲུབ་དགོས་པའི་བྱ་བ་བཅུ་དང་བྱིས་པ་འཚར་ལོངས་བྱུང་བའི་གོ་རིམ་ཁྲོད་ཀྱི་ཡིད་འཇོག་བྱ་དགོས་པ་ཁག་ཅིག་ཞུ་གི་ཡིན།

              སློབ་འགོ་མ་ཚུགས་གོང་ཕ་མ་དང་ཕྲུ་གུས་བསྒྲུབ་དགོས་པའི་བྱ་བ་བཅུ།

དང་པོ། 

ཕྲུ་གུ་དང་མཉམ་དུ་གུང་གསེང་གི་འཚོ་བར་ཕྱིར་དྲན་བྱས་ནས། གྲུབ་འབྲས་དང་ཚོར་སྣང་གླེང་དུ་འཇུག་དགོས།

       ཁྱིམ་བདག་དང་ཕྲུ་གུས་གུང་གསེང་གི་འཚོ་བར་ཕྱིར་དྲན་བྱས་ནས། གུང་གསེང་གི་འཆར་གཞི་གང་ཞིག་བསྒྲུབ་ཐུབ་པ་དང་། གང་ཞིག་བསྒྲུབ་ཐུབ་མེད་པར་བརྟག་དཔྱད་བྱེད་དགོས།

      མཉམ་དུ་དཔེ་ཀློག་དང་ཡུལ་སྐོར། ངལ་གསོ། རོལ་རྩེད་སོགས་ཐད་ཐོབ་པའི་གྲུབ་འབྲས་དང་ལྷག་བསྡད་པའི་གནོང་འགྱོད་ཀྱི་ཆ་སོགས་སྤེལ་རེས་བྱེད་པ་དང་། དུས་ཐོག་ཏུ་ཕྱོགས་བསྡོམས་བྱེད་པ། ཡང་ན་རྒྱུ་མཚན་དབྱེ་ཞིབ་བྱེད་པ་བཅས་བྱས་ན། གྲུབ་འབྲས་མི་ཉུང་བ་ཞིག་ཐོབ་རྒྱུར་གདོན་མི་ཟ། དུས་ཐོག་ལ་ཕྱོགས་བསྡོམས་བྱ་རྒྱུ་དེ་ཡང་སློབ་སྦྱོང་གི་བྱ་ཐབས་གལ་ཆེན་ཞིག་ཡིན།

གཉིས་པ། 

རྒྱུན་ལྡན་གྱི་གནས་སུ་ལོག་ཏུ་འཇུག་དགོས།

     གུང་གསེང་སྐབས་ཀྱི་བྱིས་པ་རྣམས་སེམས་ཁམས་རྒྱུན་ལྡན་ཡིན་མོད། འོན་ཀྱང་སློབ་འགོ་ཚུགས་རྗེས་སེམས་སློབ་ཁང་ལ་མི་གནས་པའི་སྣང་ཚུལ་ཐོན་གྱི་ཡོད་པས། སྣང་ཚུལ་དེ་རིགས་ལ་འགྱུར་ལྡོག་གཏོང་བར་དུས་ཡུན་ངེས་ཅན་ཞིག་དགོས་ཀྱི་ཡོད། སྣང་ཚུལ་དེའི་ཐད་ཁྱིམ་བདག་ཚོས་བྲེལ་འཚུབ་ཆེ་བའི་དྲན་སྐུལ་བྱེད་མི་རུང་བ་མ་ཟད། བྱེད་སྒོ་ཆེན་པོ་བཀོད་སྒྲིག་བྱེད་མི་རུང་བར། ཕྲུ་གུའི་སེམས་ཁམས་རིམ་བཞིན་རྒྱུན་ལྡན་ལ་འགྱུར་དུ་འཇུག་དགོས།

གསུམ་པ།

ལས་འགན་ལེགས་གྲུབ་བྱས་ཚུལ་ལ་བརྟག་བཤེར་བྱེད་དགོས།

     ཕྲུ་གུ་མང་པོ་ཞིག་གིས་འཆར་ཅན་གྱི་ལས་ཀ་མང་པོ་ཞིག་སློབ་འགོ་དངོས་སུ་མ་ཚུགས་བར་ནར་འགྱངས་བྱེད་ཀྱི་ཡོད། དེར་བརྟེན་ཁྱིམ་བདག་ཚོས་ཕྲུ་གུ་ཚོ་དང་མཉམ་དུ། སློབ་འགོ་ཚུགས་པའི་ཐོག་མའི་དུས་ཚོད་འཆར་འགོད་ཡག་པོ་བྱས་ཏེ། སྒྲུབ་མ་ཐུབ་པའི་བྱ་བ་དག་དུས་ཐོག་ཏུ་ཁ་གསབ་བྱེད་པ་དང་། སྤུས་ཚད་མཐོ་བའི་སྒོ་ནས་ལས་ཀ་ལེགས་གྲུབ་བྱེད་དུ་འཇུག་དགོས།

བཞི་པ།

ཕྲུ་གུར་ཆོས་ཉིད་ལྡན་པའི་འཚོ་བར་རོལ་རྒྱུར་ཁྲིད་སྟོན་བྱེད་དགོས།

     ཕྲུ་གུ་མང་པོ་ཞིག་གུང་གསེང་རིང་ཕྱི་ཉལ་ཕྱི་ལངས་སོགས་ཀྱི་གོམས་གཤིས་ངན་པ་འཇགས་སྲིད་པས། གལ་ཏེ་སྔ་སྣུར་དུ་བཅོས་སྒྲིག་མ་བྱས་ཚེ། སློབ་འགོ་ཚུགས་སྐབས་རྟག་དུ་བློ་རྩེ་གཅིག་སྒྲིམ་བྱེད་མི་ཐུབ་པ་དང་། སེམས་ཁམས་མི་བདེ་བའི་རྣམ་པ་ཐོན་ནས། ཕྲུ་གུའི་སློབ་སྦྱོང་ལ་ཤུགས་རྐྱེན་ངན་པ་ཐེབས་རྒྱུ་རེད།

     ཁྱིམ་བདག་རྣམས་ཀྱིས། ཕྲུ་གུ་དང་མཉམ་དུ་དུས་ཚོད་དེའི་ནང་། ངལ་གསོ་རྒྱག་རྒྱུའི་དུས་ཚོད་རེའུ་མིག་བཟོས་ཏེ། རྣམ་རྒྱུན་སློབ་གྲྭར་འགྲོ་བའི་དུས་ཚོད་ལྟར་མལ་ལས་ལངས་པ་དང་། སློབ་སྦྱོང་། ལུས་སྦྱོང་། གཉིད་ཉལ་རྒྱུ་སོགས་ཕྲུ་གུའི་འཚོ་བ་ཆོས་ཉིད་ལྡན་པ་ཞིག་ཏུ་བཀོད་སྒྲིག་བྱས་ཏེ། སླེབས་ལ་ཁད་ཀྱི་སློབ་སྦྱོང་དང་འཚོ་བར་སྔ་ཙམ་གོམས་ཐུབ་པ་བྱེད་དགོས།

ལྔ་པ། 

ཕྲུ་གུ་དང་མཉམ་དུ་སློབ་སྦྱོང་གི་དམིགས་འབེན་དང་སློབ་སྦྱོང་གི་འཆར་གཞི་བཟོ་དགོས།

      སློབ་དུས་གསར་པར་དང་རྣམ་པ་གསར་པ་ཡོང་བ་བྱེད་པ། ཁྱིམ་བདག་དང་ཕྲུ་གུ་ཚོས་འབྱུང་འགྱུར་ལ་རྒྱང་ལྟ་བྱས་ནས། སྔ་ཙམ་ནས་འཆར་འགོད་དང་འཆར་གཞི་བཟོ་དགོས། དེ་ཡང་དཔེར་ན། སློབ་དུས་རྗེས་མར་སློབ་ཚན་གང་ཞིག་གི་སྦྱངས་འབྲས་མཐོ་རུ་གཏོང་རྒྱུ་དང་། སློབ་དུས་གསར་པར་དམིགས་བསལ་གྱི་ཤེས་བྱ་ཞིག་སྦྱོང་རྒྱུ་སོགས་ལྟ་བུ་རེད། སློབ་སྦྱོང་གི་འཆར་གཞི་བཟོ་བ་དང་དམིགས་འབེན་འཛུགས་རྒྱུ་དེས། ཕྲུ་གུར་ཁ་ཕྱོགས་གསལ་སྟོན་ཐུབ་རྒྱུ་དང་མུན་འཐོམས་ཀྱི་ཚོར་བ་མེད་པ་བཟོ་ཐུབ་པས་མ་ཚད། ད་དུང་རྣམ་པ་དེ་བས་ལེགས་པའི་སྒོ་ནས་སློབ་སྦྱོང་ལ་རོལ་རྒྱུར་ཡང་ཕན་ཐོགས་ཡོད།

དྲུག་པ། 

སྔ་ཙམ་ནས་དགེ་རྒན་དང་སློབ་གྲོགས་ལ་འབྲེལ་བ་བྱ་རྒྱུར་སྐུལ་མ་གཏོང་དགོས།

     གུང་གསེང་སྐབས་ཡུན་རིང་ཁ་བྲལ་རྗེས། སློབ་གྲོགས་བར་དོན་དག་ཁག་ཅིག་ལ་འགྱུར་བ་འགྲོ་སྲིད། སྔ་ཙམ་ནས་སློབ་གྲོགས་དང་དགེ་རྒན་ལ་འབྲེལ་བ་བྱས་ནས། ཕན་ཚུན་བར་མཐོང་ཐོས་དང་དོན་དག་གསར་པ་མཉམ་རོལ་བྱེད་དུ་འཇུག་དགོས། ཕན་ཚུན་སེམས་ཁུར་དང་། ཕན་ཚུན་དྲན་པ། སློབ་དུས་གསར་པའི་རེ་སྒུག་བརྗོད་པ་བཅས་བྱས་ཚེ། སློབ་གྲོགས་བར་དང་དགེ་སློབ་བར་གྱི་བརྩེ་བ་ཟབ་ཏུ་གཏོང་ཐུབ་པ་མ་ཟད། ད་དུང་ཕྲུ་གུའི་མི་གཞན་དང་འབྲེལ་འདྲིས་བྱེད་པའི་ནུས་པ་ཡང་གསོ་སྐྱོང་བྱ་རྒྱུར་ཕན་ཐོགས་ཡོད།

བདུན་པ།

ཕྲུ་གུ་ཁྲིད་ནས་དཔེ་མཛོད་ཁང་དུ་འགྲོ་བ་དང་། དགོས་ངེས་ཀྱི་དཔེ་དེབ་ཉོ་དགོས།

      སློབ་འགོ་མ་ཚུགས་གོང་། དུས་ཚོད་རང་ཉིད་ནས་བཀོལ་སྤྱོད་བྱེད་ཆོག ཁྱིམ་བདག་རྣམས་ཀྱིས་སློབ་དུས་གསར་པའི་འཆར་གཞི་དང་ཟུང་འབྲེལ་བྱས་ཏེ། ཕྲུ་གུ་དང་འགྲོགས་ནས་དཔེ་མཛོད་ཁང་དང་དཔེ་ཁང་སོགས་སུ་ཕྲུ་གུས་དགའ་པོ་བྱེད་པའི་དཔེ་ཆ་དང་དཔྱད་གཞིའི་དཔེ་དེབ་ལྟ་ཀློག་དང་ཉོ་སྒྲུབ་བྱེད་ཆོག དེ་ལྟར་བྱས་ཚེ་བྱིས་པའི་དཔེ་ཀློག་གི་སྤྲོ་བ་སྐྱེད་སྲིང་པ་དང་། སློབ་དུས་གསར་པར་གྲ་སྒྲིག་འོས་འཚམ་ཐུབ་ཀྱི་ཡོད།

བརྒྱད་པ། 

ཕྲུ་གུས་བསྐྱར་སྦྱོང་དང་སྔོན་སྦྱོང་བྱེད་པར་ཁྲིད་སྟོན་འོས་འཚམ་བྱེད་དགོས།

       ཕྲུ་གུས་ཕལ་ཆེར་སློབ་དུས་གོང་མའི་ཤེས་བྱ་དག་བརྗེད་སྲིད་པས། མཚམས་དེར་སློབ་དུས་གསར་པའི་སློབ་གཞིར་སྔ་སྣུར་དུ་བལྟ་ཀློག་དང་སྔོན་སྦྱོང་འོས་འཚམ་བྱས་ཚེ། ཤེས་བྱ་སྦྲེལ་མཐུད་ཐུབ་རྒྱུར་ཕན་ཐོགས་ཡོད།

       འོན་ཀྱང་ཁྱིམ་བདག་ལ་དྲན་སྐུལ་བྱེད་དགོས་པ་ཞིག་ནི། ཕྲུ་གུས་སྔ་སྣུར་དུ་སྔོན་སྦྱོང་འོས་འཚམ་བྱེད་དགོས་པ་ལས། སྔ་སྣུར་དུ་ཤེས་བྱ་གསར་པ་སློབ་མི་རུང་། དེ་ལྟར་བྱས་ཚེ་ཕྲུ་གུས་དངོས་སུ་སློབ་སྦྱོང་བྱེད་སྐབས་ཚོར་སྣང་གསར་པ་དང་དགའ་སྣང་མེད་པར་འགྱུར་སྲིད།

དགུ་པ། 

ཕྲུ་གུའི་སེམས་ཁམས་རྟོགས་དགོས།

      དམིགས་བསལ་གྱི་ཉམས་མྱོང་དང་མྱོང་ཚོར་ཁ་ཤས་ཀྱི་དབང་གིས། ཕྲུ་གུ་ཁ་ཤས་ཀྱིས་སློབ་གྲྭར་འགྲོ་རྒྱུ་དེ་སེམས་ཁྲལ་དང་ཐ་ན་“འཇིགས་སྣང་”སྐྱེ་བྱེད་ཀྱི་བྱ་བ་ཞིག་ཏུ་ངོས་འཛིན་བྱེད་ཀྱི་ཡོད་པས། ཁྱིམ་བདག་ཚོས་འབྲེལ་གཏུག་དང་ཁྲིད་སྟོན་གྱི་ལས་དོན་ཁག་ཡག་པོ་བསྒྲུབ་ནས། ཕྲུ་གུའི་བསམ་ཚུལ་དེ་དག་ལ་གོ་བ་ལེན་པ་དང་བསམ་ཚུལ་དེ་འདྲ་ཐོན་པའི་རྒྱུ་རྐྱེན་ལ་དབྱེ་ཞིབ་བྱས་ཏེ། དམིགས་སའི་རང་བཞིན་ལྡན་པའི་སྒོ་ནས་སྐུལ་ལྕག་དང་རྒྱབ་སྐྱོར་བྱེད་དགོས།

        གལ་ཏེ་གནས་ཚུལ་ཚབས་ཆེ་ན། སེམས་ཁམས་རིགས་གཅིག་མཁས་ཅན་སོགས་ཆེད་ལས་ཀྱི་སྟོབས་ཤུགས་ལ་བརྟེན་དགོས་ཀྱི་ཡོད། ཕྲུ་གུར་དྲང་ཕྱོགས་ཀྱི་སེམས་ཁམས་ནུས་པ་མཁོ་འདོན་བྱས་ནས། ཕྲུ་གུས་ཡར་རྒྱས་བརྩོན་ལེན་གྱི་བསམ་པ་འཁྱེར་ནས་སློབ་དུས་གསར་པར་བསུ་བ་ཞུ་རུ་འཇུག་དགོས།

བཅུ་པ།

སློབ་གྲྭ་དང་འབྲེལ་གཏུག་བྱས་ནས། སློབ་གྲྭས་སློབ་དུས་གསར་པའི་གྲ་སྒྲིག་ལས་དོན་སྤེལ་རྒྱུར་རམ་འདེགས་ཞུ་དགོས།

      སློབ་གྲྭ་ཁ་ཤས་ཀྱིས་སློབ་འགོ་དངོས་སུ་མ་ཚུགས་གོང་། སློབ་མའི་གཟུགས་པོར་བརྟག་དཔྱད་དང་། སེམས་ཁམས་བརྟག་དཔྱད། ཁྱིམ་བདག་ཚོགས་འདུ་སོགས་ཀྱི་ལས་དོན་སྤེལ་གྱི་ཡོད་པས། ཁྱིམ་བདག་ཚོས་དེ་དག་ནང་ཞུགས་ནས་རམ་འདེགས་བྱེད་དགོས་ཀྱི་ཡོད། ཞིབ་འཇུག་བྱས་པ་ལས་མངོན་པར་གཞིགས་ན། ཁྱིམ་ཚང་དང་སློབ་གྲྭས་མཉམ་ལས་ཡག་པོ་བྱས་ན། ཕྲུ་གུའི་སློབ་སྦྱོང་དང་སེམས་ཁམས་འཕེལ་རྒྱས་ལ་དགེ་མཚན་ལྡན་པའི་ཤུགས་རྐྱེན་ཐེབས་ཀྱི་ཡོད།

      དེར་བརྟེན་ཁྱིམ་བདག་གིས་སློབ་གྲྭ་དང་དགེ་རྒན་ལ་རམ་འདེགས་ཧུར་ཐག་ཞུ་བ་དང་། སློབ་གྲྭའི་སློབ་གསོའི་ནང་ཧུར་ཐག་ཞུགས་ཏེ། ཁྱིམ་ཚང་དང་སློབ་གྲྭས་མཉམ་དུ་ཕྲུ་གུ་འཚར་ལོངས་དང་འཕེལ་རྒྱས་ཡོང་རྒྱུར་འབད་བརྩོན་བྱེད་དགོས།

བྱིས་པ་འཚར་ལོངས་བྱུང་བའི་གོ་རིམ་ཁྲོད་ཀྱི་ཡིད་འཇོག་བྱ་དགོས་པ་ཁག་ཅིག

      ཕྲུ་གུའི་མིག་ནང་ན་ཕ་མ་གཉིས་ནི་ལད་མོ་དང་སློབ་སྦྱོང་བྱེད་སའི་མིག་དཔེ་ཡིན།གལ་ཏེ་མི་དར་མ་རྣམས་ཀྱིས་བྱེད་སྟངས་མ་འགྲིག་པའམ་ཡང་ན་སློབ་གསོ་བྱེད་སྟངས་ཡག་པོ་མ་བྱུང་ན་ཕྲུ་གུའི་རིན་ཐང་ལྟ་བ་ལ་ཤུགས་རྐྱེན་ཐེབས་ཀྱི་ཡོད་པ་དང་།    ཚབས་ཆེ་བའི་རིགས་ཀྱིས་མི་ཚེ་གཅིག་ལ་ཤུགས་རྐྱེན་ཐེབས་སྲིད་ཀྱི་ཡོད།

༡ཁྱིམ་བདག་གིས་བྱིས་པའི་དོན་དག་ཡོད་ཚད་ཐག་གཅོད་མི་རུང་།

    བྱིས་པ་ལོ་ན་ཆུང་བས་ཁྱིམ་བདག་གི་སེམས་སུ་བྱིས་པས་ཧ་ཉིད་མི་གོ་བར་སེམས་ནས་བྱིས་པའི་ཚབ་བྱས་ཏེ་དོན་དག་ཚང་མ་ཐག་གཅོད་ཀྱི་ཡོད།   འདི་ལྟར་བྱས་ན་དོན་དངོས་ཐོག་ཕན་གྱི་མེད།    བཙན་གྱིས་བྱིས་པའི་དོན་དག་ཐག་གཅོད་པ་དང་བྱིས་པའི་བསམ་ཚུལ་བསྡུ་ལེན་མ་བྱས་ན་རིམ་བཞིན་བྱིས་པའི་མི་ཚེའི་རིན་ཐང་ལྟ་བའི་ཕྱོགས་ལ་མཇུག་འབྲས་ངན་པ་འབྱུང་གི་ཡོད།

      འཚོ་བའི་ཁྲོད་དུ་ང་ཚོར་དོན་དག་སྣ་མིན་སྣ་ཚོགས་བྱུང་གི་ཡོད་པས་ཁོང་ཁྲོ་དང་སྐྲག་སྣང་།   འཚུབ་ཆ་ལངས་པའི་སེམས་ཁམས་ཤིག་གྲུབ་ཡོད་ཅིང་།     ཁོར་ཡུག་དེ་ལྟ་བུ་ཞིག་གི་ནང་དུ་བྱིས་པ་ཚོར་ཡང་སེམས་ཁམས་དེ་དག་གྲུབ་ནས་མི་དར་མའི་འཚོ་བའི་ཀུན་སྤྱོད་ཐད་ཀྱི་ཤུགས་རྐྱེན་གང་རུང་ལ་བརྟེན་ནས།    བྱིས་པ་ཚོ་ནི་སྒེར་སེམས་ཆེ་བ་དང་།   གཞན་ལ་སེམས་ཁུར་དང་དོ་ཁུར་བྱེད་མི་ཤེས་པ།   བྱམས་སེམས་མེད་པ་ཞིག་ཏུ་འགྱུར་བཞིན་ཡོད།

༢བྱིས་པར་བྱ་དངོས་གསར་བར་འབྲེལ་འདྲིས་བྱེད་དུ་མི་འཇུག་པ།

       བྱིས་པ་འཚར་ལོངས་བྱུང་བའི་གོ་རིམ་ཁྲོད།   ཉེན་ཁའི་གནས་ཀྱང་མེད་པ་ཞིག་གཏན་ནས་མིན།   ཁྱིམ་བདག་མང་ཆེ་བས་བྱིས་པར་ཉེན་ཁ་འཕྲད་པར་སེམས་ཁུར་བྱེད་པ་ལས།   ཉེན་ཁའི་རིགས་ལ་ཅི་ལྟར་གཞོལ་བ་དང་ཉེན་ཁའི་རིགས་ཅི་ལྟར་ཐག་གཅོད་པའི་ཤེས་བྱ་ཁྲིད་སྟོན་བྱེད་ཀྱི་མེད་ལ་གསལ་བཤད་ཡག་པོ་ཞིག་ཀྱང་བྱེད་ཀྱི་མེད།    དྲང་པོར་བཤད་ན་ཉེན་ཁ་ཙམ་ཡང་མ་བརྒྱུད་པར་ཅི་ལྟར་ནར་སོན་དགོས།   ཁྱིམ་བདག་གིས་བྱིས་པ་ལ་ཡང་དག་པའི་སྒོ་ནས་ཉེན་ཁའི་འདུ་ཤེས་དེ་ཤེས་སུ་འཇུག་དགོས་པ་དང་དེ་ལྟར་བྱས་ན་གང་ལེགས་ཀྱིས་འཚར་ལོངས་བྱུང་བར་ཕན་པ་ཡོད།

༣མི་དར་མ་ཚོས་བྱིས་པར་རྫུན་བཤད་མི་རུང་།

       སྐབས་རེ་བྱིས་པར་རྫུན་རེ་བཤད་པ་ནི་རང་དགར་བཤད་པ་ཞིག་མ་ཡིན་ཀྱང་།   རང་དགར་བཤད་རུང་མ་བཤད་རུང་དོན་དངོས་དང་མི་མཐུན་པ་ཡིན་ན་རྫུན་དུ་གྱུར་ཡོད།    དེའི་རྐྱེན་གྱིས་གང་འདོད་དུ་རྫུན་བཤད་མི་རུང་།    རྫུན་བཤད་རྒྱུ་གོམས་ལོབས་སུ་སོང་ན་བདེན་རྫུན་གྱི་དབྱེ་བ་འབྱེད་དཀའ་ལ་ལོག་ལམ་དུ་ཞུགས་ཉེན་ཆེ།

༤ཐོག་མར་ཁྱིམ་བདག་གིས་སྒྲིག་ལམ་བརྩི་སྲུང་བྱེད་རྒྱུ་ཤིན་ཏུ་གལ་ཆེ།

     དགེ་རྒན་གྱི་ཡང་དག་པའི་སློབ་གསོའི་འོག   བྱིས་པ་ཚོས་ཅི་ནུས་ཀྱིས་ཁྲིམས་སྲོལ་དང་སྒྲིག་ལམ་བརྩི་སྲུང་བྱེད་ཀྱི་ཡོད།   ཡིན་ན་ཡང་མི་དར་མ་ཚོས་དེ་དག་ལག་ལེན་བཟང་བོ་བྱེད་ཐུབ་ཀྱི་མེད།     དཔེར་ན་རྒྱ་ལམ་འགྲོལ་དུས་གློག་གི་གསལ་བརྡ་ལ་བལྟས་ནས་ཕར་འགྲོ་དགོས་ཀྱང་མི་དར་མ་རྣམས་ཀྱིས་བདེ་འཇགས་ལ་མི་བལྟར་བར་གང་འདོད་དུ་འགྲོ་བ་ལྟར།   མི་དར་མ་རྣམས་ཀྱིས་ཐོག་མར་སྒྲིག་ལམ་མ་བརྩིས་ན་རིམ་བཞིན་གོམས་གཤིས་ངན་པ་དེ་དག་གིས་བྱིས་པ་རྣམས་ལ་མཇུག་འབྲས་ངན་པ་བཟོ་གི་ཡོད།

     ཁྱིམ་བདག་དང་བྱིས་པ་མཉམ་དུ་སྤྱི་གླིང་དུ་སོང་ནས་རྩེད་མོ་རྩེས་དུས་བྱིས་པ་རྣམས་ནི་མཚར་སྣང་ཆེ་བས་མེ་ཏོག་དང་རྩྭ་ལྡུམ་བཏོག་པར་དགའ་ཞིང་།    ཁྱིམ་བདག་རེ་འགས་བྱིས་པ་ལ་བསྟོད་བསྔགས་བྱེད་ཀྱང་སྲིད།   ཡིན་ན་ཡང་ས་ན་གད་སྙིགས་ཡོད་དུས་བྱིས་པ་ཚོས་གད་སྙིགས་དེ་བཏུས་ནས་ཁོར་ཡུག་གཙང་མ་བཟོ་དུས་ཁྱིམ་དུས་དེ་ནི་གཙང་མ་མིན་པ་དང་བཙོག་པོ་ཡིན་ཚུལ་བརྗོད་ནས་བཀག་འགོག་བྱེད་པས།   རིམ་བཞིན་སྤྱི་པའི་ཁོར་ཡུག་ཏུ་བྱིས་པའི་ལུས་ལ་གོམས་གཤིས་ངན་པ་ལོབས་ཏུ་བཅུག་ཡོད།

༥བྱིས་པའི་བསམ་གཞིགས་ནུས་པ་རྒྱ་བསྐྱེད་པའི་གནད་དོན།

     འཕྲུལ་ཆས་རང་བཞིན་གྱི་སློབ་སྦྱོང་བྱེད་སྟངས་ཀྱིས་བྱིས་པའི་བསམ་གཞིགས་ནུས་པ་རྒྱ་བསྐྱེད་པར་ལྡོག་ཕྱོགས་ཀྱི་ནུས་པ་ཐོན་གྱི་ཡོད།   གསར་གཏོད་རང་བཞིན་མེད་ན་བསམ་གཞིགས་ཀྱི་ནུས་པ་རྒྱ་བསྐྱེད་པར་ཕན་པ་ཐོན་གྱི་མེད།    བྱིས་པས་ཁྱིམ་བདག་ལ་ཁྱིམ་བདག་གི་ཆུ་ཚད་ལས་བརྒལ་བའི་དྲི་བ་ཞིག་འདྲི་དུས།    ཁྱིམ་བདག་མང་ཆེ་ཤོས་ཀྱིས་སེམས་རྣལ་ལ་མི་ཕབ་པར་གང་འདོད་ཀྱི་ལན་བཏབ་པ་དང་།  ཡང་ན་བྱིས་པ་རང་ཉིད་འཚར་ལོངས་བྱུང་ན་ཤེས་རྟོགས་བྱུང་ངེས་རེད་ཅེས་ལན་འདེབས་པར་བྱེད།    བསམ་གཞིགས་ནུས་པ་རྒྱ་བསྐྱེད་པར་རོགས་རམ་མ་བྱས་ན་རིམ་བཞིན་བྱིས་པ་ཚོ་ནི་བསམ་གཞིགས་བྱེད་པར་མི་དགའ་ཞིང་།   འདྲི་ཚིག་འདྲི་རྒྱུ་མི་དགའ་བ།    དོན་དག་ལ་ཁ་ཡ་མི་བྱེད་པའི་མི་ཞིག་ཏུ་འགྱུར་བཞིན་ཡོད།

༦བཟང་ངན་བསྡུར་རྒྱུ་མང་དྲགས་ན་བྱིས་པའི་བརྩི་མཐོང་ཇེ་ཞན་དུ་འགྲོ།

     ཁྱིམ་བདག་ལ་ལས་རྒྱུན་དུ་རང་གི་བྱིས་པའི་ངན་ཕྱོགས་དེ་དང་གཞན་གྱི་བྱིས་པའི་བཟང་ཆ་གཉིས་བསྡུར་བ་བྱེད་ཀྱི་ཡོད།   དུས་ཡུན་རིང་པོ་སོང་ན་བྱིས་པས་རང་ཉིད་ལ་ཡིད་ཆེས་མི་བྱེད་པ་དང་།   སེམས་ཤུགས་བརྟན་པོ་མིན་པ།   གཞན་ལ་ཕྲག་དོག་བྱེད་སླ་བའི་སེམས་ཁམས་ཤིག་གྲུབ་བཞིན་ཡོད།     ཁྱིམ་བདག་རང་ལ་ཕམ་ཁ་བྱུང་དུས་སྤྱི་ཚོགས་ཀྱི་ཕྱོགས་མང་པོ་འདྲ་མཉམ་དང་དྲང་བདེན་མིན་པའི་གཏམ་གང་རུང་བརྗོད་ན་བྱིས་པའི་སེམས་ཁམས་ལ་ཡང་དེ་བསྟུན་གྱི་ཤུགས་རྐྱེན་ཐེབས་ཀྱི་ཡོད།

      འཚོ་བའི་གོ་རིམ་ཁྲོད།  ང་ཚོར་དོན་དག་བཟང་ངན་ཅི་རིགས་འཕྲད་ཀྱི་ཡོད།    སློབ་གསོ་ཡང་ཆུང་དུས་ནས་དམིགས་སུ་འཛིན་དགོས་པ་ཞིག་ཡིན་པས།   ཁྱིམ་བདག་གི་ཕྱོགས་ནས་ཅི་ནུས་ཀྱིས་བྱིས་པར་ཡ་རབས་དང་དྲང་བདེན།   དྲོད་འཇམ།  དཔལ་ཡོན་ལྡན་པའི་ཁོར་ཡུག་བཟང་བོ་ཞིག་བསྐྲུན་དགོས།    ཡང་དག་པའི་སློབ་གསོ་དང་ཐབས་ལམ་ལ་བརྟེན་པ་ཡིན་ན་བྱིས་པའི་རིན་ཐང་ལྟ་བ་དང་མི་ཚེའི་ལྟ་བ་སོགས་ཇེ་བཟང་ཇེ་རྒྱས་སུ་སོང་ནས།   རང་གཞན་ཀུན་ལ་ཕན་ཐོགས་ཐུབ།     གང་ལྟར་ན་ཡང་ཐོག་མར་ཁྱིམ་བདག་རང་ཉིད་ནས་འགོ་བརྩམས་ཏེ་རང་དཔེ་གཞན་སྟོན་བྱེད་པ་གལ་ཆེ་ཞིང་།   ཁྱིམ་བདག་ཅིག་ཡིན་པའི་འགན་འཁྲི་དེ་ནི་དང་ལེན་དང་ལག་ལེན་བྱེད་རྒྱུ་ཤིན་ཏུ་གལ་ཆེ་བ་ཞིག་རེད། །

དྲ་གྲོགས་ལྷན་རྒྱས་ཐེངས་རྗེས་མར་སླར་ཡང་མཇལ།