第26期法律（卫藏方言）

 འཛད་སྤྱོད་པའི་ཁེ་ཕན་སྲུང་སྐྱོང་བཅའ་ཁྲིམས་སྤྱི་བཤད།

      བཅའ་ཁྲིམས་འདི་ནི་འཛད་སྤྱོད་པའི་ཁྲིམས་མཐུན་ཁེ་དབང་སྲུང་སྐྱོང་དང་། སྤྱི་ཚོགས་དཔལ་འབྱོར་གྱི་སྒྲིག་ལམ་སྲུང་སྐྱོང་། སྤྱི་ཚོགས་རིང་ལུགས་ཀྱི་ཁྲོམ་རའི་དཔལ་འབྱོར་སྐྱོན་བྲལ་ངང་འཕེལ་རྒྱས་ཡོང་བར་སྐུལ་འདེད་གཏོང་རྒྱུ་བཅས་ཀྱི་ཆེད་དུ་གཏན་ལ་ཕབ་ཅིང་། འཛད་སྤྱོད་པས་རང་གི་འཚོ་བའི་དགོས་མཁོར་བརྟེན་ནས་ཚོང་རྫས་ཉོ་བའམ་བཀོལ་སྤྱོད་བྱེད་པ་དང་། ཡང་ན་ཞབས་ཞུ་དང་ལེན་བྱེད་པའི་སྐབས་སུ། དེའི་ཁེ་དབང་ལ་བཅའ་ཁྲིམས་འདིའི་སྲུང་སྐྱོབ་ཐོབ་པ་དང་། བཅའ་ཁྲིམས་འདིའི་ནང་ལ་གཏན་འཁེལ་བྱས་མེད་པ་དག་ལ་འབྲེལ་ཡོད་བཅའ་ཁྲིམས་དང་ཁྲིམས་སྲོལ་གཞན་དག་གི་སྲུང་སྐྱོབ་ཐོབ་པ་ཡིན་ལ། ཚོང་གཉེར་བྱེད་མཁན་གྱིས་འཛད་སྤྱོད་པར་རང་ཉིད་ཀྱིས་ཐོན་སྐྱེད་དང་ཕྱིར་འཚོང་བྱེད་པའི་ཚོང་ཟོག་འདོན་སྤྲོད་བྱེད་པའམ་ཡང་ན་ཞབས་ཞུ་འདོན་སྤྲོད་བྱེད་པའི་སྐབས་སུ། བཅའ་ཁྲིམས་འདི་བརྩི་སྲུང་བྱ་དགོས་པ་དང་། བཅའ་ཁྲིམས་འདིའི་ནང་ལ་གཏན་འཁེལ་བྱས་མེད་པ་རྣམས་འབྲེལ་ཡོད་བཅའ་ཁྲིམས་དང་ཁྲིམས་སྲོལ་གཞན་དག་ལ་བརྩི་སྲུང་བྱ་དགོས།

     ཚོང་གཉེར་བྱེད་མཁན་དང་འཛད་སྤྱོད་པས་ཉོ་ཚོང་བྱེད་སྐབས། ངེས་པར་དུ་འདྲ་མཉམ་དང་དྲང་གཞག  གཞུང་དྲང་ཡིད་རྟོན་རུང་བ་བཅས་ཀྱི་རྩ་དོན་རྒྱུན་འཁྱོངས་བྱ་དགོས་ཤིང་། འཛད་སྤྱོད་པའི་ཁྲིམས་མཐུན་ཁེ་དབང་སྲུང་སྐྱོང་བྱ་རྒྱུ་ནི་སྤྱི་ཚོགས་ཡོངས་ཀྱི་ཐུན་མོང་གི་འགན་འཁྲི་ཡིན་ཏེ། རྒྱལ་ཁབ་ཀྱི་རྩ་འཛུགས་དང་མི་སྒེར་སུ་འདྲ་ཞིག་གིས་ཀྱང་འཛད་སྤྱོད་པའི་ཁྲིམས་མཐུན་ཁེ་དབང་ལ་གནོད་འཚེ་གཏོང་བའི་བྱ་སྤྱོད་ལ་སྤྱི་ཚོགས་ཀྱིས་ལྟ་སྐུལ་བྱེད་པར་སྐུལ་ལྕག་དང་རྒྱབ་སྐྱོར་བྱེད་དགོས་པ་མ་ཟད། སྨྱན་སྦྱོར་ལས་རིགས་ཁག་ནས་ཀྱང་འཛད་སྤྱོད་པའི་ཁྲིམས་མཐུན་ཁེ་དབང་སྲུང་སྐྱོང་བྱེད་པའི་འབྲེལ་ཡོད་ལས་དོན་གྱི་དྲིལ་བསྒྲགས་ཡག་པོ་བྱ་དགོས་པ་དང་། འཛད་སྤྱོད་པའི་ཁྲིམས་མཐུན་ཁེ་དབང་ལ་གནོད་འཚེ་གཏོང་བའི་བྱ་སྤྱོད་ལ་གླེང་ཕྱོགས་ནས་ལྟ་སྐུལ་བྱ་དགོས།

གཉིས།

འཛད་སྤྱོད་པའི་ཁེ་ཕན་སྲུང་སྐྱོང་བཅའ་ཁྲིམས་ལ་ནང་དོན་གཙོ་བོ་ཁ་ཤས་ཡོད་པ་གཤམ་གསལ།

     འཛད་སྤྱོད་པའི་དབང་ཆ་སྟེ། འཛད་སྤྱོད་པས་ཚོང་རྫས་ཉོ་བའམ་བཀོལ་སྤྱོད་བྱེད་པ་དང་། ཡང་ན་ཞབས་ཞུ་དང་ལེན་བྱེད་པའི་སྐབས་སུ། མི་ལུས་དང་རྒྱུ་ནོར་བདེ་འཇགས་ལ་གནོད་འཚེ་མི་ཕོག་པ་བྱེད་པའི་དབང་ཆ་ཡོད་ལ། འཛད་སྤྱོད་པར་ཁེ་གཉེར་བྱེད་མཁན་གྱིས་འདོན་སྤྲོད་བྱས་པའི་ཚོང་རྫས་དང་ཞབས་ཞུ་དེ་མི་ལུས་བདེ་འཇགས་ཀྱི་བླང་བྱ་དང་མཐུན་དགོས་པའི་རེ་བ་འདོན་པའི་དབང་ཆ་ཡོད།

     གཞན་ཡང་འཛད་སྤྱོད་པར་གཤམ་གསལ་གྱི་དབང་གཞན་དག་ཡོད་པ་སྟེ། འཛད་སྤྱོད་པར་ཚོང་རྫས་སམ། ཡང་ན་ཞབས་ཞུ་རང་བདག་ངང་གདམ་གསེས་བྱ་རྒྱུའི་དབང་ཆ་ཡོད་པ་དང་། འཛད་སྤྱོད་པར་དྲང་གཞག་གི་ཉོ་ཚོང་ལོངས་སྤྱོད་བྱ་རྒྱུའི་དབང་ཆ་ཡོད་པ། འཛད་སྤྱོད་པར་ཚོང་རྫས་ཉོ་བའམ་བཀོལ་སྤྱོད་བྱེད་པ་དང་། ཡང་ན་ཞབས་ཞུ་དང་ལེན་བྱེད་པའི་སྐབས་སུ། མི་ལུས་དང་རྒྱུ་ནོར་ལ་གནོད་གྱོང་ཕོག་ཚེ། ཁྲིམས་ལྟར་སྐྱིན་ཚབ་ཐོབ་པའི་དབང་ཆ་ཡོད་པ། འཛད་སྤྱོད་པར་ཁྲིམས་ལྟར་རང་ཉིད་ཀྱི་ཁྲིམས་མཐུན་ཁེ་དབང་སྲུང་སྐྱོབ་བྱེད་པའི་སྤྱི་ཚོགས་རྩ་འཛུགས་འཛུགས་པའི་དབང་ཆ་ཡོད་པ། འཛད་སྤྱོད་པར་འབྲེལ་ཡོད་འཛད་སྤྱོད་དང་འཛད་སྤྱོད་པའི་ཁྲིམས་མཐུན་ཁེ་དབང་སྲུང་སྐྱོང་ཐད་ཀྱི་ཤེས་བྱ་ཐོབ་པའི་དབང་ཆ་ཡོད་པ། འཛད་སྤྱོད་པས་ཚོང་རྫས་ཉོ་བའམ་བཀོལ་སྤྱོད་བྱེད་པ་དང་། ཡང་ན་ཞབས་ཞུ་དང་ལེན་བྱེད་སྐབས། མི་སྒེར་གྱི་ལ་རྒྱ་དང་མི་རིགས་ཀྱི་སྲོལ་རྒྱུན་གོམས་སྲོལ་ལ་བརྩི་འཇོག་ཐོབ་པའི་དབང་ཆ་ཡོད་པ། རང་ཉིད་ཀྱི་ཆ་འཕྲིན་ལ་ཁྲིམས་ལྟར་སྲུང་སྐྱོང་བྱེད་པའི་དབང་ཆ་ཡོད་པ། འཛད་སྤྱོད་པར་ཚོང་རྫས་དང་ཞབས་ཞུ། དེ་བཞིན་འཛད་སྤྱོད་པའི་ཁེ་དབང་སྲུང་སྐྱོང་བྱེད་པའི་ལས་དོན་ལ་ལྟ་སྐུལ་དང་དོ་དམ་བྱེད་པའི་དབང་ཆ་ཡོད།

      ཚོང་གཉེར་བྱེད་མཁན་གྱི་འོས་འགན་ཏེ། ཚོང་གཉེར་བྱེད་མཁན་གྱིས་འཛད་སྤྱོད་པར་ཚོང་རྫས་དང་ཞབས་ཞུ་འདོན་སྤྲོད་བྱེད་སྐབས། བཅའ་ཁྲིམས་འདི་དང་འབྲེལ་ཡོད་བཅའ་ཁྲིམས་དང་ཁྲིམས་སྲོལ་གཞན་དག་ནང་གཏན་འཁེལ་བྱས་ཡོད་པའི་འོས་འགན་ལག་བསྟར་བྱ་དགོས་ལ། ཚོང་གཉེར་བྱེད་མཁན་དང་འཛད་སྤྱོད་པའི་བར་ལ་ཁ་ཆད་བཞག་ཡོད་ན། ཁ་ཆད་ལྟར་འོས་འགན་ལག་བསྟར་བྱ་དགོས་མོད། འོན་ཀྱང་ཕྱོགས་གཉིས་ཀའི་ཁ་ཆད་དེ་བཅའ་ཁྲིམས་དང་ཁྲིམས་སྲོལ་གྱི་གཏན་འབེབས་དང་འགལ་མི་ཆོག ཚོང་གཉེར་བྱེད་མཁན་གྱིས་འཛད་སྤྱོད་པར་ཚོང་རྫས་དང་ཞབས་ཞུ་འདོན་སྤྲོད་བྱེད་སྐབས། སྤྱི་ཚོགས་ཀྱི་སྤྱི་པའི་སྤྱོད་བཟང་བརྩི་སྲུང་དང་གཞུང་དྲང་གིས་ཚོང་གཉེར་བྱས་ཏེ་འཛད་སྤྱོད་པའི་ཁྲིམས་མཐུན་ཁེ་དབང་འགན་སྲུང་བྱ་དགོས་པ་ལས། དྲང་གཞག་དང་ལུགས་མཐུན་མ་ཡིན་པའི་ཉོ་ཚོང་ཆ་རྐྱེན་འདོན་མི་ཆོག་ལ། བཙན་ཤེད་ཀྱི་ཉོ་ཚོང་ཡང་བྱེད་མི་ཆོག ཚོང་གཉེར་བྱེད་མཁན་གྱིས་ངེས་པར་དུ་འཛད་སྤྱོད་པས་བཏོན་པའི་ཚོང་རྫས་དང་ཞབས་ཞུའི་ཐད་ཀྱི་བསམ་འཆར་ལ་ཉན་པ་དང་། འཛད་སྤྱོད་པའི་ལྟ་སྐུལ་དང་ལེན་བྱ་དགོས།

      ཚོང་གཉེར་བྱེད་མཁན་གྱིས་འཛད་སྤྱོད་པར་བརྙས་བཅོས་དང་ངན་སྨྲས་བྱེད་མི་ཆོག་པ་དང་། འཛད་སྤྱོད་པར་ལུས་བཤེར་དང་དེས་ཁྱེར་བའི་དངོས་པོར་སྔོག་བཤེར་བྱེད་མི་ཆོག་ལ། འཛད་སྤྱོད་པའི་མི་ལུས་རང་དབང་ལ་གནོད་འཚེ་བཏང་མི་ཆོག     ཚོང་གཉེར་བྱེད་མཁན་གྱིས་འཛད་སྤྱོད་པའི་མི་སྒེར་གྱི་ཆ་འཕྲིན་འཚོལ་སྡུད་དང་བཀོལ་སྤྱོད་བྱ་དགོས་ན། ངེས་པར་དུ་ཁྲིམས་མཐུན་དང་ལུགས་མཐུན། ཡང་དག་བཅས་ཀྱི་རྩ་དོན་དང་མཐུན་དགོས་ལ། ཆ་འཕྲིན་འཚོལ་སྡུད་དང་བཀོལ་སྤྱོད་བྱེད་པའི་དམིགས་ཡུལ་དང་ཐབས་ལམ། ཁྱབ་ཁོངས་སོགས་གསལ་པོར་བཤད་དགོས་པར་མ་ཟད། འཛད་སྤྱོད་པའི་ཡིད་མཐུན་ཐོབ་དགོས། ཚོང་གཉེར་བྱེད་མཁན་གྱིས་མི་སྒེར་གྱི་ཆ་འཕྲིན་འཚོ་སྡུད་དང་བཀོལ་སྤྱོད་བྱེད་སྟངས་གསལ་བསྒྲགས་བྱ་དགོས་པ་ལས། བཅའ་ཁྲིམས་དང་ཁྲིམས་སྲོལ་གྱི་གཏན་འབེབས་དང་ཡང་ན་ཕྱོགས་གཉིས་ཀྱི་ཁ་ཆད་ལས་འགལ་ཏེ་ཆ་འཕྲིན་འཚོལ་སྡུད་དང་བཀོལ་སྤྱོད་བྱེད་མི་ཆོག 

     ཚོང་གཉེར་བྱེད་མཁན་དང་དེའི་ལས་བྱེད་མི་སྣས་མི་སྒེར་གྱི་ཆ་འཕྲིན་འཚོལ་སྡུད་དང་བཀོལ་སྤྱོད་བྱས་རྗེས་ངེས་པར་དུ་གསང་དགོས་པ་ལས་ཕྱི་རུ་བསྒྲགས་མི་ཆོག  བཙོང་བའམ་ཡང་ན་ཁྲིམས་འགལ་ངང་མི་གཞན་ལ་འདོན་སྤྲོད་བྱེད་མི་ཆོག ཚོང་གཉེར་བྱེད་མཁན་གྱིས་ལག་རྩལ་གྱི་ཐབས་ལམ་དང་ཡང་ན་དགོས་ངེས་ཀྱི་ཐབས་ལམ་གཞན་དག་སྤྱད་དེ། ཆ་འཕྲིན་བདེ་འཇགས་ཡོང་བར་འགན་སྲུང་བྱ་དགོས་པ་དང་། འཛད་སྤྱོད་པའི་སྒེར་གྱི་ཆ་འཕྲིན་ཕྱི་རུ་ཤོར་བའམ་བོར་བརླག་མི་འབྱུང་བ་འགན་ལེན་བྱ་དགོས། གལ་ཏེ་ཆ་འཕྲིན་ཕྱི་རུ་ཤོར་བའམ་ཡང་ན་བོར་བརླག་སོང་བ་ཡིན་ན་ངེས་པར་དུ་ཁ་གསབ་བྱ་ཐབས་སྤྱོད་དགོས་ལ། ཚོང་གཉེར་བྱེད་མཁན་གྱིས་འཛད་སྤྱོད་པའི་མོས་མཐུན་མ་ཐོབ་པ་དང་འཛད་སྤྱོད་པའི་བསམ་འཆར་སྡུད་ལེན་མི་བྱེད་པ། ཡང་ན་འཛད་སྤྱོད་པས་མོས་མཐུན་མེད་ཚུལ་གསལ་པོ་བཤད་ཟིན་རྗེས། དེའི་ཆ་འཕྲིན་ཚོང་ལས་རང་བཞིན་ཐད་བཀོལ་སྤྱོད་བྱེད་མི་ཆོག

     རྒྱལ་ཁབ་ཀྱིས་འཛད་སྤྱོད་པའི་ཁྲིམས་མཐུན་ཁེ་དབང་སྲུང་སྐྱོང་བྱེད་པ་སྟེ། རྒྱལ་ཁབ་ཀྱིས་འཛད་སྤྱོད་པའི་ཁེ་དབང་དང་འབྲེལ་བའི་བཅའ་ཁྲིམས་དང་ཁྲིམས་སྲོལ། སྒྲིག་སྲོལ། བཙན་ཤེད་རང་བཞིན་གྱི་ཚད་གཞི་བཅས་བཟོ་བའི་སྐབས། འཛད་སྤྱོད་པ་དང་འཛད་སྤྱོད་པའི་མཐུན་ཚོགས་སོགས་རྩ་འཛུགས་ཀྱི་བསམ་འཆར་ལ་ཉན་དགོས་ལ། རིམ་པ་སོ་སོའི་མི་དམངས་སྲིད་གཞུང་གིས་འགོ་ཁྲིད་ལ་ཤུགས་སྣོན་བརྒྱབ་སྟེ། འབྲེལ་ཡོད་སྲིད་འཛིན་ལས་ཁུངས་ཀྱིས་འཛད་སྤྱོད་པའི་ཁྲིམས་མཐུན་ཁེ་དབང་སྲུང་སྐྱོང་བྱེད་པའི་ལས་ཀ་ཡག་པོ་སྒྲུབ་དགོས་པ་དང་། འཛད་སྤྱོད་པའི་ཁྲིམས་མཐུན་ཁེ་དབང་སྲུང་སྐྱོང་བྱེད་པའི་འགན་འཁྲི་དངོས་འབེབས་བྱེད་པར་རྩ་འཛུགས་དང་མཐུན་སྦྱོར། སྐུལ་འདེད་བཅས་བྱ་དགོས། རིམ་པ་སོ་སོའི་མི་དམངས་སྲིད་གཞུང་གིས་ལྟ་སྐུལ་དོ་དམ་ལ་ཤུགས་སྣོན་བརྒྱབ་སྟེ། འཛད་སྤྱོད་པའི་མི་ལུས་དང་རྒྱུ་ནོར་བདེ་འཇགས་ལ་གནོད་འཚེ་གཏོང་བའི་བྱ་སྤྱོད་སྔོན་འགོག་དང་།འཛད་སྤྱོད་པའི་མི་ལུས་དང་རྒྱུ་ནོར་བདེ་འཇགས་ལ་གནོད་འཚེ་གཏོང་བའི་བྱ་སྤྱོད་དུས་ཐོག་ལ་བཀག་འགོག་བྱ་དགོས།  འབྲེལ་ཡོད་རྒྱལ་ཁབ་ལས་ཁུངས་ཀྱིས་ངེས་པར་དུ་བཅའ་ཁྲིམས་དང་ཁྲིམས་སྲོལ་གྱི་གཏན་འབེབས་ལྟར། ཚོང་གཉེར་བྱེད་མཁན་གྱིས་ཚོང་རྫས་སམ་ཞབས་ཞུ་འདོན་སྤྲོད་བྱེད་སྐབས་འཛད་སྤྱོད་པའི་ཁྲིམས་མཐུན་ཁེ་དབང་ལ་གནོད་འཚེ་གཏོང་བའི་ཁྲིམས་འགལ་ཉེས་བསགས་བྱ་སྤྱོད་ལ་ཆད་པ་གཅོད་དགོས་ཤིང་། མི་དམངས་ཁྲིམས་ཁང་གིས་བྱ་ཐབས་སྤྱད་དེ། འཛད་སྤྱོད་པས་ཞུ་གཏུག་བྱེད་པར་སྟབས་བདེ་བསྐྲུན་དགོས་པ་དང་། 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་དམངས་དོན་ཞུ་གཏུག་བཅའ་ཁྲིམས་》ཀྱི་ཞུ་གཏུག་ཆ་རྐྱེན་དང་མཐུན་པའི་ཁེ་དབང་རྩོད་གཞི་ངེས་པར་དུ་བདག་སྤྲོད་དང་དུས་ཐོག་ལ་འདྲི་གཅོད་བྱ་དགོས།

      འཛད་སྤྱོད་པའི་རྩ་འཛུགས་ཏེ། འཛད་སྤྱོད་པའི་མཐུན་ཚོགས་དང་འཛད་སྤྱོད་པའི་རྩ་འཛུགས་གཞན་དག་ནི་ཁྲིམས་ལྟར་བཙུགས་པའི་ཚོང་རྫས་སམ་ཞབས་ཞུ་ལ་སྤྱི་ཚོགས་ཀྱི་ལྟ་སྐུལ་བྱེད་པ་དང་འཛད་སྤྱོད་པའི་ཁྲིམས་མཐུན་ཁེ་དབང་སྲུང་སྐྱོང་བྱེད་པའི་སྤྱི་ཚོགས་ཀྱི་རྩ་འཛུགས་ཤིག་ཡིན་ཕྱིར། འཛད་སྤྱོད་པའི་མཐུན་ཚོགས་ཀྱིས་ངེས་པར་དུ་འཛད་སྤྱོད་པའི་ཁྲིམས་མཐུན་ཁེ་དབང་སྲུང་སྐྱོང་བྱེད་པའི་འགན་འཁྲི་ནན་ཏན་ངང་འཁུར་དགོས་པ་དང་། འཛད་སྤྱོད་པའི་བསམ་འཆར་དང་གྲོས་གཞིར་ཉན་ནས་སྤྱི་ཚོགས་ཀྱི་ལྟ་སྐུལ་དང་ལེན་བྱ་དགོས།  ཁྲིམས་ལྟར་གྲུབ་ཟིན་པའི་འཛད་སྤྱོད་པའི་རྩ་འཛུགས་གཞན་དག་གིས་བཅའ་ཁྲིམས་ཁྲིམས་སྲོལ་དང་དེའི་སྒྲིག་ཁྲིམས་ཀྱི་གཏན་འབེབས་ལྟར།  འཛད་སྤྱོད་པའི་ཁྲིམས་མཐུན་ཁེ་དབང་སྲུང་སྐྱོང་བྱེད་པའི་ལས་དོན་སྒྲུབ་དགོས། འཛད་སྤྱོད་པའི་རྩ་འཛུགས་དེ་ཚོང་རྫས་བདག་གཉེར་བྱེད་པ་དང་ཁེ་ཕན་ལྡན་པའི་ཞབས་ཞུའི་ནང་ཞུགས་མི་ཆོག གྲོན་དངུལ་ལྡན་པའམ་ཡང་ན་ཁེ་ཕན་ལྡན་པའི་ཐབས་ལམ་གཞན་དག་སྤྱད་དེ་འཛད་སྤྱོད་པར་ཚོང་རྫས་སམ་ཞབས་ཞུ་མཚམས་སྦྱོར་བྱ་མི་ཆོག

     རྩོད་གླེང་ཐག་གཅོད་བྱ་ཐབས་ཏེ། འཛད་སྤྱོད་པས་ཚོང་རྫས་ཉོ་བའམ་ཡང་ན་བཀོལ་སྤྱོད་བྱེད་པའི་སྐབས།  དེའི་ཁྲིམས་མཐུན་ཁེ་དབང་ལ་གནོད་འཚེ་ཕོག་ན། ཕྱིར་འཚོང་བྱེད་མཁན་ལ་སྐྱིན་ཚབ་འཇལ་དགོས་པའི་རེ་འདུན་བཏོན་ཆོག་པ་དང་། ཕྱིར་འཚོང་བྱེད་མཁན་གྱིས་སྐྱིན་ཚབ་འཇལ་རྗེས། ཐོན་སྐྱེད་བྱེད་མཁན་གྱི་འགན་འཁྲི་ཡིན་པའམ་ཡང་ན་ཕྱིར་འཚོང་བྱེད་མཁན་གཞན་དག་གི་འགན་འཁྲི་གང་ཡིན་པ་བརྡ་འདེད་བྱེད་ཆོག་པར་མ་ཟད།མཐར་ཁོ་ཚོའི་འགན་འཁྲི་ཡིན་པར་ཐག་ཆོད་ཚེ། ཁོ་ཚོར་སྐྱིན་ཚབ་འཇལ་དགོས་པའི་རེ་བ་བཏོན་ཆོག  གལ་ཏེ་མི་གཞན་གྱི་ཚོང་གཉེར་ཆོག་མཐུས་དཔང་ཡིག་སྤྱད་དེ་ཁྲིམས་འགལ་ངང་ཚོང་གཉེར་གྱིས་ཚོང་རྫས་སམ་ཞབས་ཞུ་འདོན་སྤྲོད་བྱས་ཏེ། འཛད་སྤྱོད་པའི་ཁྲིམས་མཐུན་ཁེ་དབང་ལ་གནོད་འཚེ་བཟོས་ན།  འཛད་སྤྱོད་པས་དེ་ལ་སྐྱིན་ཚབ་འཇལ་དགོས་པའི་རེ་བ་བཏོན་ཆོག་ལ། ཆོག་མཐུས་དཔང་ཡིག་གི་བདག་པོར་སྐྱིན་ཚབ་འཇལ་དགོས་པའི་རེ་བ་བཏོན་ན་ཡང་འགྲིག  གལ་ཏེ་འཛད་སྤྱོད་པས་འབྲེལ་ཡོད་སྲིད་འཛིན་སྡེ་ཁག་ལ་གཏུག་བཤེར་བྱས་ན། སྡེ་ཁག་དེས་གཏུག་བཤེར་ཡི་གེ་འབྱོར་བའི་ཉིན་དེ་ནས་བཟུང་ཉིན་བདུན་གྱི་ནང་ཐག་གཅོད་བྱ་དགོས་པར་མ་ཟད། འཛད་སྤྱོད་པར་ཤེས་སུ་འཇུག་དགོས།

     འཛད་སྤྱོད་པ་མང་པོ་ཞིག་གིས་ཁྲིམས་མཐུན་ཁེ་དབང་ལ་གནོད་འཚེ་བཏང་བའི་བྱ་སྤྱོད་ཐད། ཀྲུང་གོའི་འཛད་སྤྱོད་པའི་མཐུན་ཚོགས་དང་གཞན་ད་དུང་ཞིང་ཆེན་དང་རང་སྐྱོང་ལྗོངས། ཐད་གཏོགས་གྲོང་ཁྱེར་བཅས་ཀྱིས་བཙུགས་པའི་འཛད་སྤྱོད་པའི་མཐུན་ཚོགས་ཀྱིས་མི་དམངས་ཁྲིམས་ཁང་ལ་གཏུག་བཤེར་བྱེད་ཆོག

དྲ་གྲོགས་ལྷན་རྒྱས་ཐེངས་རྗེས་མར་སླར་ཡང་མཇལ།