第25期新闻（安多方言）

ལོ་སྟོད་ཀྱི་ཞི་ཅིན་ཕིང་གི་ཕྱི་འབྲེལ་མཛད་སྒོ་ཕྱིར་དྲན།

      ད་ལོའི་ལོ་སྟོད་དུ་རང་རྒྱལ་གྱིས་སྔ་རྗེས་སུ་ཚོགས་ར་གཙོ་བོའི་ཕྱི་འབྲེལ་བྱེད་སྒོ་ཐེངས་གསུམ་སྤེལ་བ་རེད། སྐབས་གཉིས་པའི་རྒྱུད་གཅིག་ལམ་གཅིག་རྒྱལ་སྤྱིའི་མཉམ་ལས་མཐོ་རིམ་གླེང་སྟེགས་དང་། སྤྱི་ལོ་2019ལོའི་ཀྲུང་གོ་པེ་ཅིང་འཛམ་གླིང་སྐྱེད་ཚལ་སྒྱུ་རྩལ་འགྲེམ་ཚོགས། དེ་བཞིན་ཨ་ཤི་ཡའི་ཤེས་དཔལ་གླེང་མོལ་ཚོགས་ཆེན་བཅས་ཀྱི་འགོ་ཚུགས་མཛད་སྒོའི་ཐོག ཀྲུའུ་ཞི་ཞི་ཅིན་ཕིང་གི་གསུང་བཤད་གལ་ཆེན་གནང་ནས། འཛམ་གླིང་ལ་ཆ་ཕྱོགས་མང་པོའི་ཐད་ཀྱི་ཀྲུང་གོའི་ཇུས་གཞི་གསལ་བཤད་ཀྱིས། མིའི་རིགས་ཀྱི་ལས་དབང་གཅིག་མཐུན་མ་ལག་སྐྲུན་ཆེད་ཀྲུང་གོའི་བློ་གྲོས་དང་ཀྲུང་གོའི་སྟོབས་ཤུགས་ལེགས་སྐྱེས་སུ་ཕུལ་ཡོད་པ་རེད།

      སྐབས་གཉིས་པའི་རྒྱུད་གཅིག་ལམ་གཅིག་གི་རྒྱལ་སྤྱིའི་མཉམ་ལས་མཐོ་རིམ་གླེང་སྟེགས་ཐོག ཕྱི་རྒྱལ་གྱི་འགོ་ཁྲིད་39ཚུད་པའི་རྒྱལ་ཁབ་150དང་རྒྱལ་སྤྱིའི་སྒྲིག་འཛུགས་92ནས་ཕེབས་པའི་ཕྱི་རྒྱལ་གྱི་སྐུ་མགྲོན་6000ལྷག་ཙམ་སྐབས་དེའི་གླེང་སྟེགས་ལ་ཞུགས་ཡོད།          གླེང་སྟེགས་ཐོག་ཞི་ཅིན་ཕིང་གིས། འཛམ་གླིང་གོང་དུ་འཕེལ་བ་དང་། དུས་རབས་ཡར་རྒྱས་སུ་འགྲོ་བཞིན་ཡོད། བཟོ་ལས་གསར་བརྗེ་གསར་པའི་རླབས་རྒྱུན་ཁྲོད་གོ་སྐབས་དང་འགྲན་རྩོད་ཀྱིས་ཁེངས་ཡོད། དེང་གི་འཛམ་གླིང་འགྲོ་སྟངས་ནི་རྒྱུག་ཆུའི་ལྡོག་ཕྱོགས་སུ་གྲུ་གཏོང་བ་དང་འདྲ་སྟེ། མདུན་དུ་བསྐྱོད་མ་ཐུབ་ན་ཕྱིར་ལྡོག་རྒྱུ་ལས་མེད། རྒྱལ་ཁབ་ཁག་གི་འགོ་ཁྲིད་ཡིན་པའི་ཆ་ནས། ང་ཚོར་མདུན་དུ་བསྐྱོད་པའི་བདམ་ག་ལས་ཕྱིར་ལྡོག་པའི་རྒྱུ་མཚན་མེད། རླུང་འཚུབ་དྲག་ཆར་གྱི་མདུན་བསུས་ནས་ཕྱིན་ན། མི་དམངས་ཀྱི་མངགས་བཅོལ་ལྕི་མོར་ངོ་གནོང་མི་དགོས་པར་འགྱུར་རྒྱུ་དང་། ང་ཚོའི་མི་དམངས་རྣམས་བདེ་སྐྱིད་ལྡན་པའི་འཚོ་བར་རོལ་ཐུབ་རྒྱུ་རེད། འཛམ་གླིང་གི་ལོ་བརྒྱའི་ནང་འབྱུང་བར་དཀའ་བའི་འགྱུར་ལྡོག་ཆེན་མོའི་མདུན་དུ། ང་ཚོ་ཚང་མ་འོས་འགན་ལ་ངོ་གནོང་མི་དགོས་པ་དང་། དུས་རབས་ལ་ངོ་གནོང་མི་དགོས་པར་འགྱུར་བར་རེ་སྨོན་ཞུ་བཞིན་ཡོད་ཅེས་གསུངས་ཡོད།

        གླེང་སྟེགས་ཐོག་ཞི་ཅིན་ཕིང་གིས། ཀྲུང་གོས་སྒོ་དབྱེ་རྒྱ་བསྐྱེད་བྱེད་པའི་བྱ་ཐབས་ནི། ཀྲུང་གོའི་བསྒྱུར་བཅོས་གོང་འཕེལ་གྱི་དགོས་མཁོ་དངོས་ལ་གཞིགས་ནས་བྱས་པའི་རང་བདག་གི་བདམ་ག་ཞིག་རེད། ང་ཚོས་ཀྱང་འཛམ་གླིང་རྒྱལ་ཁབ་ཁག་ནས་མ་འཇོག་ཁོར་ཡུག་ཡག་པོ་གཏོད་རྒྱུ་དང་། ཀྲུང་གོའི་ཁེ་ལས་དང་། ཕྱིར་སྡོད་སློབ་མ། རིག་གནས་པ་བཅས་ལ་འདྲ་མཉམ་གྱི་ལྟ་སྟངས་འཛིན་རྒྱུ་དང་། ཁོ་ཚོས་རྒྱུན་གཏན་གྱི་རྒྱལ་སྤྱིའི་སྤེལ་རེས་མཉམ་ལས་གྱི་བྱེད་སྒོ་སྤེལ་རྒྱུར་འདྲ་མཉམ་མཛའ་མཐུན་གྱི་ཁོར་ཡུག་ཅིག་གཏོད་རྒྱུའི་རེ་བ་བྱེད་ཀྱི་ཡོད་ཅེས་དང་། ཞི་ཅིན་ཕིང་གིས། མཛེས་སྡུག་ལྡན་པའི་ཁྱིམ་གཞིས་བསྐྲུན་རྒྱུ་ནི་མིའི་རིགས་ཐུན་མོང་གི་ཕུགས་འདུན་ཡིན། སྐྱེ་ཁམས་ཁོར་ཡུག་གི་འགྲན་རྩོད་ལ་ཁ་གཏད་གཅོག་སྐབས། མིའི་རིགས་དར་ན་མཉམ་དར་དང་གུད་ན་མཉམ་གུད་ཀྱི་ལས་དབང་གཅིག་མཐུན་མ་ལག་ཡིན་པ་ལས། རྒྱལ་ཁབ་གང་འདྲ་ཞིག་གིས་ཀྱང་ཐབས་མཁས་རང་སྲུང་བྱེད་མི་ཐུབ། ལག་གདང་སྦྲེལ་ནས་མཉམ་ལས་བྱ་རྒྱུ་གཙོ་དོན་དུ་བཟུང་ན། ང་ཚོས་གཞི་ནས་གནམ་གཤིས་འགྱུར་ལྡོག་དང་། རྒྱ་མཚོའི་སྦགས་བཙོག སྐྱེ་ཁམས་སྲུང་སྐྱོབ་སོགས་གོ་ལའི་རང་བཞིན་གྱི་ཁོར་ཡུག་གནད་དོན་ལ་ཁ་གཏད་ནུས་ལྡན་གཅོག་ཐུབ་ལ། མཉམ་འབྲེལ་རྒྱལ་ཚོགས་ཀྱི་སྤྱི་ལོ་2030ལོའི་རྒྱུན་མཐུད་གོང་འཕེལ་དམིགས་འབེན་ཡང་མངོན་འགྱུར་ཡོང་ཐུབ། དཔུང་པ་མཉམ་གཤིབ་བྱ་རྒྱུ་གཙོ་དོན་དུ་བཟུང་ན། གཞི་ནས་འབྱུང་འཕྲོད་གོང་འཕེལ་འདུ་ཤེས་མི་སེམས་ལ་བརྟན་པོར་ཟུག་ཐུབ་ལ། གོ་ལའི་སྐྱེ་ཁམས་ཤེས་དཔལ་ལམ་བུའི་ཐོག་ཐག་ཇེ་རིང་དུ་སྐྱོད་ཐུབ་ཅེས་གསུངས་ཡོད། གླེང་སྟེགས་སྐབས། ཀྲུའུ་ཞི་ཞི་ཅིན་ཕིང་གིས་ད་དུང་རྒྱལ་ཁབ་ཁག་གི་དབུ་ཁྲིད་བར་ཕྱོགས་གཉིས་མཇལ་འཕྲད་གནང་བ་དང་། ཉིན་གཅིག་ནང་མཇལ་འཕྲད་ཐེངས་14གནང་ནས་ཀྲུའུ་ཞི་ཞི་ཅིན་ཕིང་གི་མཛད་བྲེལ་ཆེ་ཤོས་ཀྱི་ཉིན་མོའི་ཟིན་ཐོ་བཏོད་ཡོད།    

        སྤྱི་ཟླ་5པའི་ཚེས་15ཉིན། ཨ་ཤི་ཡའི་ཤེས་དཔལ་གླེང་མོལ་ཚོགས་ཆེན་པེ་ཅིང་དུ་འགོ་ཚུགས་ཡོད། ཨ་ཤི་ཡའི་རྒྱལ་ཁབ་47དང་ས་ཁོངས་ཕྱིའི་རྒྱལ་ཁབ་གཞན་གྱི་སྲིད་གཞུང་དཔོན་རིགས་དང་ཁྱབ་ཁོངས་ཁག་གི་འཐུས་མི་བཅས་ཁྱོན་མི་2000ལྷག་ཚོགས་ཆེན་གྱི་འབྲེལ་ཡོད་བྱེད་སྒོའི་ནང་ཞུགས་ཡོད། ཚོགས་ཆེན་ཐོག་ཕྱོགས་ཁག་གི་ཐུན་མོང་ངོས་འཛིན་གཅིག་སྡུད་བྱས་པའི་རྨང་གཞིའི་ཐོག གྲོས་ཚོགས་ཀྱི་ཐུན་མོང་ཡིག་ཆ་ཁྱབ་བསྒྲགས་བྱས་ཏེ། ཤེས་དཔལ་དང་། སྤེལ་རེས། ཕན་ཚུན་དཔྱད་གཞིར་འཛིན་རེས་བཅས་ཀྱི་དངོས་གཉེར་བྱ་ཐབས་གྲུབ་པ་དང་མཉམ་ལས་གྲུབ་འབྲས་ཁག་གཅིག་ཐོབ་ཡོད། འགོ་ཚུགས་མཛད་སྒོའི་ཐོག་བརྗོད་དོན་གཙོ་བོའི་གཏམ་བཤད་གནང་སྐབས། ཀྲུའུ་ཞི་ཞི་ཅིན་ཕིང་གིས་ཤེས་དཔལ་དང་། སྤེལ་རེས། ཕན་ཚུན་དཔྱད་གཞིར་འཛིན་རེས་བཅས་ལ་ཤུགས་སྣོན་རྒྱག་རྒྱུའི་ཀྲུང་གོའི་འདོད་ཚུལ་བཏོན་གནང་ནས། ཨ་ཤི་ཡ་དང་མིའི་རིགས་ཀྱི་ལས་དབང་གཅིག་མཐུན་མ་ལག་བསྐྲུན་རྒྱུར་ཁ་ཕྱོགས་གསལ་སྟོན་གནང་བ་རེད།

མི་རིགས་སྐད་ཡིག་གི་ཕུལ་བྱུང་ཡིག་སྒྱུར་བརྩམས་ཆོས་འགྲེམས་སྟོན་མཚོ་ནུབ་ཁུལ་ནས་སྤེལ་བ།

   “ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ་འཁོར་70ལོན་པ་དང་། མཚོ་སྔོན་བཅིངས་འགྲོལ་བྱས་ནས་ལོ་འཁོར་70ལོན་པར་རྟེན་འབྲེལ་ཞུ་བའི་མི་རིགས་སྐད་ཡིག་གི་ཕུལ་བྱུང་ཡིག་སྒྱུར་བརྩམས་ཆོས་འགྲེམས་སྟོན”གཏེར་ལེན་ཁ་གྲོང་ཁྱེར་དུ་སྤེལ་བ་རེད།

      འགྲེམས་སྟོན་ཐོག་སོག་རིགས་དང་བོད་རིགས། ཡུ་གུར་རིགས། ཧ་སག་རིགས། ཁྲའོ་ཞན་རིགས། དབྱིས་རིགས། ཀྲོང་རིགས་སོགས་སྐད་རིགས་7གྱི་དཔེ་དེབ་སྣ་ཁ་ཆིག་སྟོང་ཙམ་ཡོད་པ་རེད། ཀྲུང་གོ་མི་རིགས་སྐད་ཡིག་ཡིག་སྒྱུར་ཅུའུ་ཡིས་ལོ་ཙཱ་བྱས་པའི་ཏང་དང་རྒྱལ་ཁབ་ཀྱི་ཚོགས་ཆེན་བཅོ་བརྒྱད་པ་འཚོགས་ཚུན་གྱི་ཚད་ལྡན་ཡིག་ཆ་གལ་ཆེན་དང་བཅའ་ཁྲིམས་ཁྲིམས་སྲོལ་གྱིས་འགྲེམས་སྟོན་ཁྲོད་གནས་བབ་གལ་ཆེན་བཟུང་ཡོད།

      ལྷག་པར་དུ《ཞི་ཅིན་ཕིང་གིས་རྒྱལ་སྲིད་སྐྱོང་ལུགས་སྐོར་གླེང་བ》ཞེས་པའི་བམ་པོ་གཉིས་པའི་སོག་རིགས་དང་བོད་རིགས། ཡུ་གུར་རིགས། ཧ་སག་རིགས། ཁྲའོ་ཞན་བཅས་གྲངས་ཉུང་མི་རིགས་5ཡི་ཡི་གེའི་པར་གཞི་དེ“མི་རིགས་སྐད་ཡིག་ཡིག་སྒྱུར་གྱི་ཆུ་ཚད་མཐོ་ཤོས་མཚོན་ཡོད”ཅེས་པ་དང“གྲངས་ཉུང་མི་རིགས་ཀྱི་སྐད་ཡིག་ཡིག་སྒྱུར་དཔེ་སྐྲུན་གྱི་ལམ་ཚད་རྡོ་རིང་གསར་པ་ཞིག་ཡིན་པའི”ངོས་འཛིན་བྱས་ཡོད།

        འགྲེམས་སྟོན་ཐོག་རྒྱལ་ནང་གི་མི་རིགས་བསྟན་བཅོས་ཡིག་སྒྱུར་གྱི་མཚོན་བྱེད་རང་བཞིན་གྱི་གྲུབ་འབྲས་འགྲེམས་སྟོན་བྱས་ཤིང་། མཚོ་སྔོན་ཞིང་ཆེན་གྱི་རྒན་གྲས་ལོ་ཙཱ་བ་མགོ་ལོག་རྣམ་རྒྱལ་གྱིས་ཡིག་སྒྱུར་བྱས་པའི་《སློབ་ཆེན》དང་། 《བཏང་སྙོམ》《མེང་ཙི》སོགས་ཀྲུང་ཧྭའི་གསུང་རབ་སྲོལ་རྒྱུན་རིག་གནས་བོད་ཡིག་སྒྱུར་རྩོམ་20ཐེངས་འདིའི་སྒྱུར་རྩོམ་འགྲེམས་སྟོན་ཐོག་བཏོན་ཡོད་པ་དེ་དག་གིས་བག་ཆགས་ཆེན་པོ་བཞག་ཡོད་རེད།

པཎ་ཆེན་ཨེར་ཏེ་ནི་ཆོས་ཀྱི་རྒྱལ་པོས་མངའ་རིས་སུ་སྤེལ་བའི་ཆོས་ཕྱོགས་དང་སྤྱི་ཚོགས་ཀྱི་མཛད་སྒོ་ཁག་ཐུགས་གྲ་ལེགས་འགྲིག་བྱུང་བ།

     རྒྱལ་ཡོངས་སྲིད་གྲོས་ཀྱི་རྒྱུན་ཨུ་དང་། ཀྲུང་གོ་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ། ཀྲུང་གོ་ནང་བསྟན་མཐུན་ཚོགས་བོད་ལྗོངས་ཡན་ལག་མཐུན་ཚོགས་ཀྱི་ཚོགས་གཙོ་བཅས་ཡིན་པའི་པཎ་ཆེན་ཨེར་ཏེ་ནི་ཆོས་ཀྱི་རྒྱལ་པོས་མངའ་རིས་སུ་སྤེལ་བའི་ཆོས་ཕྱོགས་དང་སྤྱི་ཚོགས་ཀྱི་མཛད་སྒོ་ཁག་ཐུགས་གྲ་ལེགས་འགྲིག་བྱུང་བ་རེད། ད་ཐེངས་མངའ་རིས་སུ་ཕེབས་པའི་དུས་ཚོད་ནི་ཟླ་7ཚེས་20ཉིན་ནས་ཟླ་8ཚེས་4ཉིན་བར་དུས་ཡུན་ཉིན་16ཡིན་པ་དང་དེ་ནི་པཎ་ཆེན་རིན་པོ་ཆེས་ལོ་ལྔའི་རྗེས་སུ་སླར་ཡང་མངའ་རིས་སུ་ཕེབས་ཐེངས་གཉིས་པ་ཡིན་པ་རེད།

        རྒྱལ་ཁབ་དཔལ་གྱིས་བརྒྱན་ཅིང་སེམས་ཅན་བདེ་ལམ་དུ་འགོད། པཎ་ཆེན་རིན་པོ་ཆེ་སྔ་རྗེས་སུ་སྤུ་ཧྲེང་རྫོང་གི་ཁྲུས་སྒོ་དགོན་དང་འཁོར་ཆགས་དགོན་དང་། རྩྭ་མདའ་རྫོང་གི་མཐོ་ལྡིང་དགོན་དང་གུ་གེ་རྒྱལ་རབས་ཀྱི་རྗེས་ཤུལ། རུ་ཐོག་རྫོང་གི་ལྷུན་གྲུབ་ཆོས་སྡེ་དགོན། སྒར་རྫོང་གི་བཀྲ་ཤིས་སྒང་དགོན་དང་པྲེ་ཏ་པུ་རི་དགོན་སོགས་སུ་གནས་གཟིགས་ཕྱག་མཆོད་དང་སྒར་རྫོང་གུ་རུ་གྱམ་དགོན་དུ་གནས་གཟིགས་དང་འབྲེལ་མ་ཕམ་གཡུ་མཚོ་དང་གངས་རིན་པོ་ཆེར་མཆོད་འབུལ་ཡང་གནང་བ་རེད།

        ཆོས་ཕྱོགས་ཀྱི་མཛད་འཕྲིན་སྤེལ་རིང་། པཎ་ཆེན་རིན་པོ་ཆེས་དད་ལྡན་སེར་སྐྱ་མང་ཚོགས་ཚོར་བཀའ་ཆོས་དང་། དབང་བསྐུར། ཕྱག་དབང་བཅས་གནང་བ་དང་། དད་ལྡན་སེར་སྐྱ་མང་ཚོགས་ཚོར་རྒྱལ་གཅེས་ཁྲིམས་སྲུང་དང་། ཆོས་གཅེས་སྡོམ་སྲུང་བྱ་དགོས་པའི་བཀའ་སློབ་གནང་བ་དང་སྦྲགས། འགྲོ་དྲུག་སེམས་ཅན་ཐམས་ཅད་སྡུག་བསྔལ་གྱི་རྒྱུ་དང་བྲལ་ཞིང་བདེ་བའི་རྒྱུ་དང་ལྡན་པར་འགྱུར་པ་མ་ཟད། རླབས་ཆེན་མེས་རྒྱལ་དར་རྒྱས་གོང་འཕེལ་ཡོང་བའི་ཐུགས་སྨོན་ཡང་ཞུས་གནང་བ་རེད།

     པཎ་ཆེན་རིན་པོ་ཆེས་མངའ་རིས་ས་ཁུལ་དུ་ཆོས་ཕྱོགས་ཀྱི་མཛད་སྒོ་སྤེལ་རིང་། དད་ལྡན་མང་ཚོགས་ཀྱིས་ཕུལ་བའི་མཎྜལ་རྟེན་དོད་ཚང་མ་ས་གནས་ཀྱི་དབུལ་སྐྱོར་བྱ་གཞག་ལ་ཞལ་འདེབས་ཕུལ་གནང་བ་རེད། རང་སྐྱོང་ལྗོངས་ཀྱི་འགོ་ཁྲིད་བསྟན་ཁོ་དང་། ས་ལུང་ཕུན་ལགས། བསོད་ནམས་རིག་འཛིན་བཅས་འབྲེལ་ཡོད་བྱེད་སྒོར་ཞུགས་ཡོད་པ་རེད།

བོད་ཀྱི་རིམ་པ་ཁག་དང་སྡེ་ཚན་ཁག་གིས་བརྗོད་དོན་གཙོ་བོའི་སློབ་གསོ་རྒྱུན་མཐུད་གཏིང་ཟབ་སྤེལ་བ།

     “ཐོག་མའི་བསམ་འདུན་མ་བརྗེད་པར་འགན་འཁྲི་བློ་ལ་བརྟན་པོར་འཆང་བའི”བརྗོད་དོན་གཙོ་བོའི་སློབ་གསོ་སྤེལ་ཚུན། བོད་ལྗོངས་ཀྱི་རིམ་པ་ཁག་དང་སྡེ་ཚན་ཁག་གིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་ལག་བསྟར་ནན་ཏན་བྱས་ཏེ་གནད་དོན་ལ་ལྟ་སྟངས་ཡང་དག་འཛིན་པའི་རང་རྟོགས་དང་གྲི་དངོ་ནང་གཏད་ཀྱི་བློ་སྟོབས་ཀྱི་ཐོག་ནས་དོན་དངོས་དང་ཟུང་འབྲེལ་གྱིས་ཞིབ་བསྡུར་ཡང་ཡང་བྱས་པ་དང་མངོན་གསལ་དོད་པའི་གནད་དོན་ལ་ཆེད་དོན་བཅོས་སྒྲིག་བྱས་པར་ཕན་འབྲས་བཟང་པོ་ཐོན་པ་རེད།

      ཟླ་8ཚེས་2ཉིན། ལྗོངས་ཏང་ཨུད་ཀྱི་རྒྱུན་ཨུ་དྲིལ་བསྒྲགས་པུའི་པུའུ་ཀྲང་སྤེན་པ་བཀྲ་ཤིས་ཀྱིས་ལྗོངས་ཏང་ཨུད་དྲིལ་བསྒྲགས་པུའི“ཐོག་མའི་བསམ་འདུན་མ་བརྗེད་པར་འགན་འཁྲི་བློ་ལ་བརྟན་པོར་འཆང་བའི”བརྗོད་དོན་གཙོ་བོའི་སློབ་གསོའི་བརྟག་ཞིབ་གྲུབ་འབྲས་སྤེལ་རེས་ཚོགས་འདུ་གཙོ་སྐྱོང་གནང་བ་དང་། དྲིལ་བསྒྲགས་པུའི་ལས་དོན་ཚོགས་འདུའི་ཁོངས་མིས་བརྟག་ཞིབ་གྲུབ་འབྲས་ཁག་སོ་སོར་སྤེལ་རེས་བྱས་པ། ལྗོངས་ཏང་ཨུད་ཀྱི་བརྗོད་དོན་གཙོ་བོའི་སློབ་གསོའི་སྐོར་ཞིབ་ཚོགས་ཆུང་ཐེངས་གསུམ་པའི་ཁོངས་མི་ཚོགས་འདུར་ཞུགས་ནས་གནས་ཚུལ་གསན་པ་དང་འབྲེལ་མཛུབ་ཁྲིད་ཀྱང་གནང་བ་རེད།   ཉིན་ཤས་གོང་། ལྗོངས་ཏང་ཨུད་ཀྱི་རྒྱུན་ཨུ་སྲིད་ཁྲིམས་ཨུ་ལྷན་གྱི་ཧྲུའུ་ཅི་ཧོ་ཝུན་ཧའོ་ཡིས་རང་ཉིད་ཀྱིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་དང་སྔོན་ཐོན་དཔེ་མཚོན་བྱས་རྗེས་ལ་སློབ་སྦྱོང་བྱས་པ་དང་། གཞི་རིམ་གྱི་བརྟག་ཞིབ་དང་ཆབ་སྲིད་ལ་བརྟེན་ནས་ཉེན་རྟོག་པ་འཛུགས་སྐྱོང་གི་ལས་ཀའི་མྱོང་ཚོར་ཟབ་མོ་དང་ཟུང་འབྲེལ་དང་རང་ཉིད་ཀྱི་ལས་ཀའི་ཉམས་མྱོང་དང་ཟུང་འབྲེལ་བྱས་ཏེ་ལྗོངས་ཐད་གཏོགས་སྲིད་ཁྲིམས་ལས་ཁུངས་ལ་གསོན་ཉམས་ལྡན་པའི་ཆེད་དོན་ཏང་གི་སློབ་ཚན་ཞིག་ཁྲིད་པ་རེད།

      ཉིན་ཤས་རིང་། གཞིས་རྩེ་གྲོང་ཁྱེར་ཁྲལ་དོན་ཅུས་ཀྱིས་ཐབས་ཇུས་སྔོན་ལ་འདིང་བ་དང་། སློབ་སྦྱོང་སྔོན་ལ་བྱེད་པ། ལས་ཀ་སྔོན་ལ་བྱེད་པ་བཅས་ཀྱིས་བརྗོད་དོན་གཙོ་བོའི་སློབ་གསོ་དང་ཏང་འཛུགས་སྐྱོང་གི་ལས་དོན་གཉིས་ཀར་ཐོག་མཐའ་བར་གསུམ་དུ་དམ་འཛིན་མཐའ་འཁྱོངས་བྱེད་པ་དང་། མཉམ་དུ་བཀོད་སྒྲིག་དང་མཉམ་དུ་སྐུལ་འདེད་གཏོང་བ། སློབ་སྦྱོང་གི་རྣམ་པ་འཁྲུག་པོ་གཏོད་པ་བཅས་བྱས་ཏེ་བརྗོད་དོན་གཙོ་བོའི་སློབ་གསོར་ཕན་འབྲས་བཟང་པོ་ཐོན་པར་སྐུལ་འདེད་བཏང་ཡོད་པ་རེད་། 

མགོ་ལོག་བོད་རིགས་རང་སྐྱོང་ཁུལ་རྨ་ཡུལ་གེ་སར་རིག་གནས་ཡུལ་སྐོར་དུས་སྟོན་སྐབས་བདུན་པ་གཟབ་རྒྱས་ངང་འགོ་བརྩམས།

       ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ་འཁོར་70ལོན་པ་དང་། མཚོ་སྔོན་བཅིངས་འགྲོལ་བྱས་ནས་ལོ་འཁོར་70ལོན་པ། མགོ་ལོག་ཁུལ་བཙུགས་ནས་ལོ་འཁོར་65ལོན་པའི་བཀྲ་ཤིས་དུས་བཟང་དང་བསྟུན་ནས། ཟླ་8པའི་ཚེས་4ཉིན་གྱི་སྔ་དྲོར། མགོ་ལོག་བོད་རིགས་རང་སྐྱོང་ཁུལ་ཏང་ཨུ་དང་ཁུལ་སྲིད་གཞུང་གིས་གཙོ་སྒྲུབ་མཛད་པའི་རྨ་ཡུལ་གེ་སར་རིག་གནས་ཡུལ་སྐོར་དུས་སྟོན་དེ་མགོ་ལོག་བོད་རིགས་རང་སྐྱོང་ཁུལ་རྨ་ཆེན་རྫོང་རྟ་བོ་གྲོང་རྡལ་གྱི་གེ་སར་ལུས་རྩལ་ར་བ་ནས་གཟབ་རྒྱས་ངང་འགོ་བརྩམས། མཚོ་སྔོན་ཞིང་ཆེན་མི་དམངས་སྲིད་གཞུང་གི་ཧྲིན་ཀྲང་གཞོན་པ་དབྱང་ཧྥིན་ཁྲོན་དང་། ཞིང་ཆེན་མི་དམངས་འཐུས་མིའི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཏང་ཙུའུ་ཡི་ཧྲུའུ་ཅི་གཞོན་པའམ་ཀྲུའུ་རིན་གཞོན་པ། གཙང་གསུམ་འབྱུང་ཡུལ་སྐྱེ་ཁམས་སྲུང་སྐྱོབ་ཐེབས་རྩ་ཚོགས་པའི་ཚོགས་གཙོ་སྟག་འབུམ་ཐར་དང་། རྒྱལ་ཁབ་མི་རིགས་ལས་དོན་ཨུ་ཡོན་ལྷན་ཁང་གི་གཞུང་ལས་ཐིན་གྱི་ཀྲུའུ་རིན་ལིས་ཁྲོན་ལིན་དང་ལས་བྱེད་པ་དང་མང་ཚོགས12000ལྷག་དུས་སྟོན་གྱི་མཛད་སྒོར་ཞུགས། ཧྲིན་ཀྲང་གཞོན་པ་དབྱང་ཧྥིན་ཁྲོན་གྱིས་མཛད་སྒོའི་མགོ་རྩོམ་པའི་ཁྱབ་བསྒྲགས་གནང་བ་དང་། མགོ་ལོག་ཁུལ་ཨུའི་ཧྲུའུ་ཅི་ཝུའུ་དབྱིས་ཀྲང་གིས་ཤིས་ཚིག་གསུངས་ཞིང་། ཁུལ་དཔོན་པད་རྒྱལ་བཀྲ་ཤིས་ཀྱིས་མཛད་སྒོར་གཙོ་སྐྱོང་གནང་བ་རེད།

      རྒྱུས་ལོན་པ་ལྟར་ན། རྨ་ཡུལ་གེ་སར་རིག་གནས་ཡུལ་སྐོར་དུས་སྟོན་དེ2002ལོར་ཐོག་མར་སྤེལ་ཞིང་ད་ལྟའི་བར་ཐེངས་དྲུག་གཉེར་ཡོད་ཅིང་། དེ་ནི་མགོ་ལོག་ཁུལ་གྱི་ཤུགས་རྐྱེན་ཆེས་ཆེ་བའི་རིག་གནས་ཡུལ་སྐོར་མཚོན་རྟགས་སུ་གྱུར་ཡོད།

དྲ་གྲོགས་ལྷན་རྒྱས་ཐེངས་རྗེས་མར་སླར་ཡང་མཇལ།