第24期新闻（卫藏方言）

《ཞི་ཅིན་ཕིང་གིས་རྒྱལ་སྲིད་སྐྱོང་ལུགས་སྐོར་གླེང་བ》ཞེས་པའི་དེབ་གཉིས་པའི་གྲངས་ཉུང་མི་རིགས་ཀྱི་ཡི་གེའི་པར་གཞི་དཔེ་སྐྲུན་གྱི་བཞུགས་མོལ་ཚོགས་འདུ་པེ་ཅིང་དུ་འཚོགས་པ།

     《ཞི་ཅིན་ཕིང་གིས་རྒྱལ་སྲིད་སྐྱོང་ལུགས་སྐོར་གླེང་བ》ཞེས་པའི་དེབ་གཉིས་པའི་སོག་རིགས་དང་། བོད་རིགས། ཡུ་གུར་རིགས། ཧ་སག་རིགས། ཁོ་ཡའི་རིགས་བཅས་གྲངས་ཉུང་མི་རིགས་ལྔའི་ཡི་གེའི་པར་གཞི་མི་དམངས་དཔེ་སྐྲུན་ཁང་གིས་པར་སྐྲུན་བྱས་པ་རེད། ཚེས་22ཉིན་པེ་ཅིང་དུ་ཀྲུང་དབྱང་དྲིལ་བསྒྲགས་པུའུ་དང་རྒྱལ་ཁབ་མི་རིགས་ལས་དོན་ཨུ་ལྷན་གྱིས་མཉམ་འབྲེལ་ཐོག་དེབ་གཉིས་པའི་གྲངས་ཉུང་མི་རིགས་ཀྱི་ཡི་གེའི་པར་གཞི་དཔེ་སྐྲུན་གྱི་བཞུགས་མོལ་ཚོགས་འདུ་འཚོགས་ཏེ་ཡིག་སྒྱུར་དཔེ་སྐྲུན་གྱི་ཉམས་མྱོང་ཕྱོགས་སྡོམ་དང་སྤེལ་རེས་བྱས་པ་དང་ཆབས་ཅིག་སློབ་སྦྱོང་དྲིལ་བསྒྲགས་ལས་དོན་ལ་ཞིབ་འཇུག་བཀོད་སྒྲིག་ཀྱང་བྱས་ཏེ་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མི་རིགས་ས་ཁུལ་དུ་དོན་འཁྱོལ་བྱ་རྒྱུར་སྔར་བས་སྐུལ་འདེད་བཏང་ཡོད།

        ཚོགས་འདུའི་ཐོག《ཞི་ཅིན་ཕིང་གིས་རྒྱལ་སྲིད་སྐྱོང་ལུགས་སྐོར་གླེང་བ》ཞེས་པའི་དེབ་གཉིས་པའི་གྲངས་ཉུང་མི་རིགས་ཀྱི་ཡི་གེའི་པར་གཞི་པར་སྐྲུན་འགྲེམས་སྤེལ་བྱས་པ་དེས་མི་རིགས་ས་ཁུལ་གྱི་རྒྱ་ཆེའི་ལས་བྱེད་པ་དང་མང་ཚོགས་ཀྱིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་དེ་བས་ཐད་ཀར་དང་། དེ་བས་རྒྱ་ཁྱབ། དེ་བས་གཏིང་ཟབ་བཅས་ཀྱི་སྒོ་ནས་སློབ་སྦྱོང་དང་ལག་བསྟར་བྱ་རྒྱུར་ཕན་པ་ཡོད་ལ། ཏང་ཀྲུང་དབྱང་གི་དགོངས་པ་གསར་ཤོས་གྲངས་ཉུང་མི་རིགས་ཀྱི་མང་ཚོགས་ཁྲོད་དུས་ཐོག་ཏུ་བརྒྱུད་བསྒྲགས་བྱས་ནས་མི་རིགས་ཁག་གི་ལས་བྱེད་པ་དང་མང་ཚོགས་ཀྱིས་ཏང་ཀྲུང་དབྱང་གི་རྒྱལ་སྐྱོང་འདུ་ཤེས་དང་སྲིད་སྐྱོང་མཛད་ཇུས་ལ་ཤེས་རྟོགས་དང་ངོས་འཛིན་བྱེད་ཤུགས་རྒྱུན་ཆད་མེད་པར་ཆེ་རུ་འགྲོ་རྒྱུར་ཕན་པ་ཡོད་ཅེས་བསྟན་ཡོད།

ཞི་ཅིན་ཕིང་གིས་སླར་ཡང་ཨ་རབ་མཉམ་འབྲེལ་ཚོ་དཔོན་རྒྱལ་ཁབ་ཨ་པུ་ཀྲ་པིའི་རྒྱལ་རྒྱུད་འཛིན་མཁན་དང་མཇལ་འཛོམས་གནང་བ།

     རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་སྤྱི་ཚེས་22ཉིན་གྱི་དགོང་མོ་ཏེའོ་ཡུས་ཐའེ་རྒྱལ་མགྲོན་ཁང་དུ་ཀྲུང་གོར་རྒྱལ་དོན་འཚམས་འདྲིར་ཕེབས་པའི་ཨ་རབ་མཉམ་འབྲེལ་ཚོ་དཔོན་རྒྱལ་ཁབ་ཨ་པུ་ཀྲ་པིའི་རྒྱལ་རྒྱུད་འཛིན་མཁན་མུ་ཧན་མུ་ཏེ་དང་སླར་ཡང་མཇལ་འཛོམས་གནང་བ་རེད།

      རྒྱལ་ཁབ་གཉིས་པོའི་གཙོ་བདག་གིས་ཞི་ལྷོད་དང་མཛའ་མཐུན་གྱི་རྣམ་པའི་ཁྲོད་ཕྱོགས་གཉིས་པོའི་འབྲེལ་བ་དང་མཐུན་མོང་ཐོག་དོ་ཁུར་བྱེད་པའི་རྒྱལ་སྤྱི་དང་ས་གནས་ཀྱི་གནད་དོན་ཐད་མུ་མཐུད་དགོངས་འཆར་བརྗེ་རེས་གནང་བ་རེད།

       ཞི་ཅིན་ཕིང་གིས་དེ་རིང་སྔ་དྲོ་ངོས་གཉིས་ནས་ཕན་འབྲས་ཆེ་བ་དང་། ལེགས་གྲུབ་ལྡན་པའི་སྤེལ་རེས་བྱས་ཏེ་མཉམ་ལས་ཀྱི་གྲོས་མཐུན་རྣམ་གྲངས་མང་པོར་དཔང་པོ་བྱས་ཤིང་། གྲངས་འབོར་མང་བ་དང་། ནང་དོན་ཕུན་སུམ་ཚོགས་པ། ཁྱབ་རྒྱ་ཆེ་བ་འདི་འདྲ་ཧ་ཅང་མཐོང་དཀོན་པོ་རེད། དེས་རྒྱལ་ཁབ་གཉིས་པོའི་འབྲེལ་བའི་ནང་དོན་་ཕུན་སུམ་ཚོགས་པ་དང་འཐབ་ཇུས་རང་བཞིན་ཟབ་མོ་ལྡན་པ་མཚོན་གྱི་ཡོད་ཅེས་གསུངས་པ་རེད།

       ཞི་ཅིན་ཕིང་གིས། ཀྲུང་ཧྭ་ཡི་ཤེས་དཔལ་ནི་ལོ་ངོ་5000ལྷག་ཙམ་རྒྱུན་མཐུད་བྱས་ཡོད་པ་དང་། ཕྱི་ཕྱོགས་ཀྱི་ཤེས་དཔལ་དུ་མ་བསྡུ་ལེན་བྱས་ཏེ་ཁོག་ཡངས་དང་གསོག་འཇོག་ཁྲོད་རྒྱུན་མཐུད་འཕེལ་རྒྱས་བྱུང་ཡོད། ཐུན་མོང་ཐོག་རྒྱུད་གཅིག་ལམ་གཅིག་འཛུགས་སྐྲུན་བྱེད་རྒྱུའི་གྲོས་འགོ་ནི་ཀྲུང་ཧྭ་ཡི་རིག་གནས་གནམ་འོག་གཅིག་མཚུངས་ཀྱི་ལྟ་བ་ལས་བྱུང་བ་དང་། དེ་ཡང་རྒྱལ་ཁབ་ཁག་དབར་སྤེལ་རེས་མཉམ་ལས་ལ་སྐུལ་འདེད་གཏོང་རྒྱུར་ཤུགས་སྣོན་རྒྱག་པའི་ཆེད་དུ་ཡིན། ཨ་རབ་མཉམ་འབྲེལ་ཚོ་དཔོན་རྒྱལ་ཁབ་ཀྱིས་ཀྱང་སྒོ་དབྱེ་དང་ཁོག་ཡངས་ཀྱི་སྙིང་སྟོབས་དར་སྤེལ་བཏང་སྟེ་རིགས་མི་གཅིག་པའི་དཔལ་ཡོན་སྤེལ་རེས་དང་ཕན་ཚུན་མིག་ལྟོས་བྱེད་རྒྱུར་ལེགས་སྐྱེས་གལ་ཆེན་ཕུལ་བར་རྒྱལ་སྤྱིའི་སྤྱི་ཚོགས་ཀྱི་བསྔགས་བརྗོད་རྒྱ་ཆེར་ཐོབ་ཡོད། རྒྱལ་ཁབ་གཉིས་པོས་ཐུན་མོང་ཐོག་དཔལ་ཡོན་སྤེལ་རེས་ལ་ཤུགས་སྣོན་རྒྱབ་སྟེ་ཕྱོགས་གཉིས་པོའི་ཁྱོན་ཡོངས་འཐབ་ཇུས་རོགས་ཟླའི་འབྲེལ་བ་ཡུན་བརྟན་ཡོང་འགྱུར་སྐུལ་འདེད་གཏོང་བ་དང་འཛམ་གླིང་ཞི་བདེ་དང་མཐུན་སྦྱོར་གོང་འཕེལ་ཐད་ལེགས་སྐྱེས་གསར་པ་འབུལ་དགོས་ཞེས་ནན་བཤད་གནང་ཡོད་པ་རེད།

      མུ་ཧན་མུ་ཏེས། དེ་རིང་སྔ་དྲོ་སྐུ་ཉིད་དང་གྲོས་མོལ་ཧ་ཅང་ཕུན་སུམ་ཚོགས་པོ་བྱུང་ལ་དོན་སྙིང་ཡང་ཆེན་པོ་བྱུང་། སྐུ་ཉིད་ཀྱིས་ཕྱོགས་གཉིས་པོའི་འབྲེལ་བ་དང་རྒྱ་སྤྱིའི་གནས་བབ་ཐད་འཛིན་པའི་ཡང་དག་གནད་འཕིགས་ཀྱི་གཟིགས་ཚུལ་ལས་ང་རང་ལ་ཕན་ཐོགས་ཆེན་པོ་བྱུང་། ཕྱོགས་གཉིས་པོའི་ཐུན་མོང་གི་འབད་འཐབ་འོག་ཀྲུང་གོ་དང་ཨ་རབ་མཉམ་འབྲེལ་ཚོ་དཔོན་རྒྱལ་ཁབ་དབར་གྱི་མཉམ་ལས་ཀྱི་གྲུབ་འབྲས་ཕུན་སུམ་ཚོགས་པོ་བྱུང་ཡོད། ང་ཚོས་མཐུན་མོང་ཐོག་སྤེལ་རེས་བྱེད་པའི་ཕྱོགས་མང་པོའི་དམ་པ་དོན་གཉེར་གྱི་མཉམ་ལས་གྲོས་མཐུན་ལ་བདེན་དཔང་བྱས་ཏེ་རྒྱལ་ཁབ་གཉིས་པོ་དང་རྒྱལ་ཁབ་གཉིས་པོའི་མི་དམངས་ལ་ཕན་ཁེ་དེ་བས་མང་བ་སྐྲུན་ཐུབ་རྒྱུར་ཡིད་ཆེས་ཡོད། ངས་སྐུ་ཉིད་ནས་བཏོན་གནང་བའི་མིའི་རིགས་ཀྱི་ལས་དབང་ཐུན་མོང་མ་ལག་འཛུགས་རྒྱུའི་རླབས་ཆེན་གྲོས་འགོར་ཡོངས་སུ་མོས་མཐུན་ཡོད། ཨ་རབ་མཉམ་འབྲེལ་ཚོ་དཔོན་རྒྱལ་ཁབ་ཀྱིས་ཕྱོགས་གཉིས་པོའི་འཐབ་ཇུས་མཉམ་ལས་ཀྱི་རོགས་ཟླའི་འབྲེལ་བ་མུ་མཐུད་གཏིང་ཟབ་ཏུ་གཏོང་འདོད་ཡོད་ཅེས་གསུངས་པ་རེད།

པཎ་ཆེན་ཨེར་ཏེ་ནི་ཆོས་ཀྱི་རྒྱལ་པོ་མངའ་རིས་སུ་ཕེབས་ནས་ཆོས་ཕྱོགས་དང་སྤྱི་ཚོགས་ཀྱི་བྱེད་སྒོ་སྤེལ་གནང་བ།

      ཟླ་7ཚེས་20ཉིན། རྒྱལ་ཡོངས་སྲིད་གྲོས་ཀྱི་རྒྱུན་ཨུ་དང་། ཀྲུང་གོ་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ། ཀྲུང་གོ་ནང་བསྟན་མཐུན་ཚོགས་བོད་ལྗོངས་ཡན་ལག་མཐུན་ཚོགས་ཀྱི་ཚོགས་གཙོ་བཅས་ཡིན་པའི་པཎ་ཆེན་ཨེར་ཏེ་ནི་ཆོས་ཀྱི་རྒྱལ་པོ་མངའ་རིས་སུ་ཕེབས་ནས་ཆོས་ཕྱོགས་དང་སྤྱི་ཚོགས་ཀྱི་བྱེད་སྒོ་སྤེལ་གནང་བ་རེད།

       ཚེས་20ཉིན་གྱི་སྔ་དྲོའི་ཆུ་ཚོད་9དང་སྐར་མ་30ཙམ་ལ་པཎ་ཆེན་རིན་པོ་ཆེ་ཞུགས་པའི་གནམ་གྲུ་མངའ་རིས་དགུན་ས་གནམ་ཐང་དུ་ཕེབས་འབྱོར་ཟིན་སྐབས་ཡུལ་དངོས་སུ་ཡོད་པའི་མང་ཚོགས་ཀྱི་འཐུས་མི་བརྒྱ་ཕྲག་གིས་ལག་ཏུ་མཇལ་དར་འཁྱེར་ནས་གཡུག་གཡུག་བྱེད་བཞིན་མངའ་རིས་ཀྱི་སྲོལ་རྒྱུན་རོལ་ཆ་དང་བཀྲ་ཤིས་བདེ་ལེགས་ཞེས་པའི་སྒྲའི་ཁྲོད་སྐུ་ཉིད་མངའ་རིས་སུ་ཕེབས་པར་སྤྲོ་སེམས་འཁོལ་བའི་དགའ་བསུ་ཞུས་ཡོད། མངའ་རིས་ས་ཁུལ་གྱི་འགོ་ཁྲིད་གཙོ་བོས་གནམ་ཐང་དུ་པཎ་ཆེན་རིན་པོ་ཆེར་སྤྲོ་སེམས་འཁོལ་བའི་ཕེབས་བསུ་ཞུས་པ་དང་སྦྲགས། ལུས་ལ་མི་རིགས་ཀྱི་གཟབ་མཆོར་ལེགས་པར་སྤྲས་པའི་ཕོ་གཞོན་མོ་གཞོན་གྱིས་པཎ་ཆེན་རིན་པོ་ཆེར་ཕྱེ་མར་བཀྱག་ཡོད། རླངས་འཁོར་རུ་ཁག་བཞུགས་གནས་སུ་ཕེབས་འབྱོར་ཟིན་སྐབས་ས་གནས་ཀྱི་མི་རིགས་ཁག་གི་མང་ཚོགས་དང་ཆོས་ལུགས་ལས་རིགས་ཀྱི་འཐུས་མིའི་སྤྲོ་སེམས་འཁོལ་བའི་དགའ་བསུ་ཐོབ་ཡོད་པ་རེད།

     པཎ་ཆེན་རིན་པོ་ཆེས་གདན་ས་གཞིས་རྩེ་བཀྲས་ལྷུན་དགོན་དུ་ཆོས་ཕྱོགས་ཀྱི་མཛད་སྒོ་ཁག་སྤེལ་གྲུབ་རྗེས་མངའ་རིས་སུ་ཕེབས་གནང་བ་རེད། ད་ཐེངས་ནི་པཎ་ཆེན་རིན་པོ་ཆེས་ལོ་ལྔའི་རྗེས་སུ་སླར་ཡང་མངའ་རིས་སུ་ཆོས་ཕྱོགས་ཀྱི་མཛད་སྒོ་དང་སྤྱི་ཚོགས་ཀྱི་བྱེད་སྒོ་སྤེལ་ཐེངས་གཉིས་པ་ཡིན་པ་རེད།

      གཞིས་རྩེར་ཞུགས་རིང་། པཎ་ཆེན་རིན་པོ་ཆེས་བཀྲས་ལྷུན་དགོན་པའི་གཙོ་གནད་མཆོད་ཁང་ལ་གནས་གཟིགས་གནང་བ་དང་འབྲེལ། དགོན་སྡེ་དོ་དམ་ཨུ་ལྷན་གྱི་ཁོངས་མི་དང་བླ་མ་སྐྱེས་ཆེན་ལ་མཇལ་ཁ་གནང་བ་མ་ཟད། གྲྭ་དམངས་ཚོར《སྣར་ཐང་བརྒྱ་རྩའི》དབང་ཡང་གནང་བ་རེད།

      གཞིས་རྩེར་པཎ་ཆེན་རིན་པོ་ཆེས་ད་དུང་དགོན་པའི་ཚད་མ་རིག་པའི་མདོ་ཕྱོགས་ཀྱི་ཚད་མ་རྩོད་པ་དང་བཀྲས་ལྷུན་དགོན་གྱི་ལོ་གཅིག་དུས་གཅིག་གི་གོས་སྐུ་འགྲེམས་པ་སོགས་ཆོས་ཕྱོགས་ཀྱི་མཛད་སྒོར་ཞུགས་པ་དང་འབྲེལ་སྨོན་ལམ་འཚོགས་པ་དང་ཕྱག་དབང་ཡང་གནང་བ་རེད། དེའི་རིང་གྲྭ་དམངས་དང་དད་ལྡན་སེར་སྐྱ་མང་ཚོགས་ཀྱིས་ལག་ཏུ་མཇལ་དར་ཁྱེར་ནས་པཎ་ཆེན་རིན་པོ་ཆེའི་བཞུགས་ཁྲིའི་མདུན་དུ་བཅར་ཏེ་རྟེན་དོད་དང་མཇལ་དར་ཕུལ་བ་མ་ཟད། པཎ་ཆེན་རིན་པོ་ཆེའི་ཕྱག་དབང་དང་དེ་བཞིན་སྲུང་མདུད་དང་སྐུ་པར་སོགས་ཀྱང་ཞུས་པ་རེད།

       རང་སྐྱོང་ལྗོངས་ཀྱི་འགོ་ཁྲིད་བསྟན་ཁོ་དང་། ཀྲང་ཡན་ཆིང་། མོང་ཞའོ་ལིན། ས་ལུང་ཕུན་ལགས། བསོད་ནམས་རིག་འཛིན་སོགས་འབྲེལ་ཡོད་བྱེད་སྒོར་ཞུགས་ཡོད་པ་རེད།

《བོད་ལྗོངས་གསར་པ》ཡི་དུས་དེབ་གཉེར་ནས་ལོ་བཅུ་འཁོར་བའི་གྲོས་མོལ་ཚོགས་འདུ་བསྡུས་པ།

     ཟླ་7པའི་ཚེས་22ཉིན།  བོད་རང་སྐྱོང་ལྗོངས་ཏང་ཨུད་སྲིད་ཇུས་ཞིབ་འཇུག་ཁང་དང་བོད་ལྗོངས་གསར་པའི་དུས་དེབ་ཁང་གིས་བོད་ལྗོངས་དུས་དེབ་གཉེར་ནས་ལོ་བཅུ་འཁོར་བའི་གྲོས་མོལ་ཚོགས་འདུ་ལྷ་སར་འཚོགས་པ་རེད། བོད་རང་སྐྱོང་ལྗོངས་ཀྱི་འབྲེལ་ཡོད་སྡེ་ཁག་གི་འགོ་ཁྲིད་དང་ཆེད་མཁས་པ། མཁས་པ། རྩོམ་པ་པོ། ཀློག་པ་པོ་བཅས་གདན་གཅིག་ཏུ་འཛོམས་ནས་མཉམ་དུ་《བོད་ལྗོངས་གསར་པ》ཡི་དུས་དེབ་ཀྱི་འཕེལ་རྒྱས་ལམ་བུར་ཕྱིར་དྲན་བྱས་པ་དང་། 《བོད་ལྗོངས་གསར་པ》ཡི་དུས་དེབ་ཀྱི་མ་འོངས་པའི་འཕེལ་རྒྱས་ལ་ཐབས་ཇུས་གང་ལེགས་བཏོན།

    《བོད་ལྗོངས་གསར་པ》ཡི་དུས་དེབ་ནི་2009ལོར་ཐོག་མར་གསར་དུ་གཉེར་པ་ཡིན་ལ། དེ་ནི་ཀྲུང་གུང་བོད་རང་སྐྱོང་ལྗོངས་ཨུ་ཡོན་ལྷན་ཚོགས་ཀྱིས་གཙོ་སྐྱོང་དང་གཙོ་སྒྲུབ་བྱས་པའི་བོད་ལྗོངས་ཀྱི་ཕྱོགས་བསྡུས་རང་བཞིན་ལྡན་པའི་སྲིད་ཇུས་གཞུང་ལུགས་ཀྱི་དུས་དེབ་ཐོག་མ་ཡིན།  ཏང་གི་གཞུང་ལུགས་དྲིལ་སྒྲོག་དང་། ཏང་གི་སྲིད་ཇུས་རྒྱུན་འཁྱོངས། ཏང་གི་ལས་དོན་མཚོན་པ། མང་ཚོགས་ཀྱི་འཚོ་བ་དང་ཐག་ཉེ་བར་བཅར་བ་བཅས་དམིགས་ཡུལ་གཙོ་བོར་བཟུང་ཡོད།  ལོ་ངོ་བཅུ་ཡི་རིང་ལ། 《བོད་ལྗོངས་གསར་པ》ཡི་དུས་དེབ་ཀྱིས་གཞུང་ལུགས་ཀྱི་དར་ཆ་མཐོན་པོར་བསྒྲེངས་ཏེ།  ཏང་གིས་གཡུལ་ས་འཛུགས་པའི་འདུ་ཤེས་ཀྱིས་ཏང་གི་དུས་དེབ་སྤུས་ལེགས་བསྐྲུན་པ་དང་།  གཞུང་ལུགས་དྲིལ་སྒྲོག་དང་། ལས་དོན་འཕེལ་རྒྱས། དཔུང་སྡེ་འཛུགས་སྐྲུན་སོགས་ཀྱི་ཐད་ལ་དགའ་འོས་པའི་གྲུབ་འབྲས་ལེགས་པོ་ཐོབ་པས། བོད་རང་སྐྱོང་ལྗོངས་ཏང་ཨུའི་བསམ་བློའི་གཞུང་ལུགས་དྲིལ་སྒྲོག་བྱེད་པའི་གཡུལ་ས་དང་ལག་རོགས་གལ་ཆེན་ཞིག་ཏུ་གྱུར་ཡོད་ལ། དེའང་བོད་ལྗོངས་ལ་རྒྱུས་ལོན་བྱེད་པའི་སྒེའུ་ཁུང་གལ་ཆེན་གྱི་གྲས་ཤིག་ཀྱང་ཡིན།

       བོད་རང་སྐྱོང་ལྗོངས་ཀྱི་འབྲེལ་ཡོད་སྡེ་ཁག་གི་འགོ་ཁྲིད་ཀྱིས་གྲོས་མོལ་ཚོགས་འདུའི་སྟེང་སྤྲོ་སེམས་འཁོལ་བའི་ངང་གསུང་བཤད་གནང་བ་དང་།  བོད་ལྗོངས་ཀྱི་གྲོང་ཁྱེར་དང་ས་གནས་བདུན་གྱི་ཨུད་སྲིད་ཞིབ་འཇུག་ཁང་གི་འཐུས་མི་དང་རྩོམ་པ་པོ།  ཀློག་པ་པོ་སོགས་ཀྱིས་རེ་རེ་བཞིན་ཕན་ཚུན་བགྲོ་གླེང་དང་གཏམ་བཤད་གནང་ཡོད།

ཀན་སུའུ་ཀན་ལྷོ་ཁུལ་གྱིས་ས་ཁོངས་ཧྲིལ་པོའི་ཡུལ་སྐོར་ལ་བརྟེན་ནས་མཛེས་སྡུག་ལྡན་པའི་ཁྱིམ་གཞིས་བསྐྲུན་པ།

    ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ་ནི་རྨ་ཆུའི་སྟོད་རྒྱུད་ཀྱི་ཆུ་འགོ་གསོ་ཡུལ་གལ་ཆེན་ཞིག་ཡིན་ལ། རྩྭ་ཐང་ཐོག་གི་ནོར་ལུག་དང་རི་བོའི་ཁྲོད་ཀྱི་གྲོང་ཚོ་ཆུང་ཆུང་སོགས་ཀྱིས་དེ་གའི་རྣམ་པར་བཀྲག་མདངས་རྒྱས་པར་བྱས།    འོན་ཀྱང་ལོ་མང་རིང་གི་སྐྱ་སྤོས་འཚོ་བ་སྐྱེལ་སྟངས་དང་མི་ཕྱུགས་མཉམ་སྡོད་སོགས་ཀྱི་གནད་དོན་གྱིས་གྲོང་ཚོའི་ཁོར་ཡུག་ཟང་ཟིང་དུ་བསྒྱུར་ཡོད། “ཚོན་མདོག་སྣ་དགུའི་ཤམ་བྷ་ལའི”འོད་གུར་ཕུབ་ཡོད་ཀྱང“ལྟོ་གོས་ལ་དོ་སྣང་བྱེད་པ་ལས་རྣམ་པར་དོ་སྣང་མི་བྱེད་བའི”སྲོལ་རྒྱུན་གོམས་གཤིས་ངན་པས་རྩྭ་ཐང་ཐོག་འཚོ་བའི་གད་སྙིགས་འབོར་ཆེན་ཕུང་གསོག་ཐེབས་ཡོད་པས་མཛེས་སྡུག་ལྡན་པའི་རི་ཆུའི་རྣམ་པ་དེ་ཉམས་སུ་བཅུག་ཡོད།

       ཉེ་བའི་ལོ་ཤས་རིང་། ཀན་ལྷོ་ཁུལ་གྱིས་ཐབས་མང་མཉམ་སྤྱོད་ཀྱིས་ནུས་ཤུགས་ཆེན་པོས་ཁོར་ཡུག་གི་མངོན་གསལ་དོད་པའི་གནད་དོན་ཐག་གཅོད་བྱས་པ་དང་། གྲོང་གསེབ་ཀྱི་སྡོད་མལ་ཁོར་ཡུག་བཅོས་སྒྲིག་བྱ་སྤྱོད་སྤེལ་བར་སྐུལ་འདེད་བཏང་བས། “ས་ཁོངས་ཧྲིལ་པོའི་ཡུལ་སྐོར་བྱེད་ཡུལ་ལ་གད་སྙིགས་མེད་པ་”བཟོ་རྒྱུ་དམ་འཛིན་བྱ་གཞིར་རྩིས་ནས། རྒྱལ་ཁབ་ཀྱི་ས་ཁོངས་ཧྲིལ་པོའི་ཡུལ་སྐོར་དཔེ་སྟོན་ཁུལ་འཛུགས་སྐྲུན་བྱེད་པར་སྐུལ་འདེད་བཏང་བས། ཡུལ་སྐོར་ལས་རིགས་འཕེལ་རྒྱས་དང་སྣོད་བཅུད་ཁོར་ཡུག་སྲུང་སྐྱོང་མངོན་འགྱུར་བྱུང་བ་དང་། ལྗང་མདོག་འཕེལ་རྒྱས་ཀྱི་ལམ་བུ་གསར་པ་ཞིག་གཏོད་ཡོད་པས། ཞིང་འབྲོག་མང་ཚོགས་ཀྱིས“རི་ལ་བརྟེན་ནས་ལྟོ་ཟ་བ”ནས“རི་བོ་སྲུང་སྐྱོང་བྱེད་པར”གྱུར་ཡོད་པ་རེད།

དྲ་གྲོགས་ལྷན་རྒྱས་ཐེངས་རྗེས་མར་སླར་ཡང་མཇལ།