6、上海俚语里 “卷”

追求夸张，追求极致，现在叫“卷”是上海俚语的一大特点。例子可以说是比比皆是。

比如，一只面孔老是一本正经，人家已经吃不消，上海人讲起来，叫“一本三正经”。讲人做事不稳当，本来叫“投三投四”，慢慢就变成“投五投六”甚至“投七投八”。要晓得“投”是投胎的“投”，连着投七八趟胎，吃力否啊。同理，“搞五搞六”也变成“搞七搞八”。八还不够大，就“搞七廿三”，比“不管三七二十一”还要大二，心里也开心的。讲人面孔长得难看，叫“难看得十八个画师也画不像。”吓得众人头侪别转去。自己本事比别人大，叫“掼侬三条横马路”。三条横马路蛮远了，地铁一站路呢，三元起板。有人还嫌不煞渴，叫“掼侬十几条横马路”，一记头拿侬踢到城乡结合部。

等人等得急煞快，心是蛮烦的。所以一见面就是：“侬在做啥？我等仔侬半日天了。” 其实也就是一刻钟。夸张成半日也就算了，后来弄弄跑出来一句“我等仔侬半半六十日了！”要死快了，岂止电影已经开场了，电影节也老早结束，要过八月半了。侬月饼带来了否啊？

还有一句早已消失的上海老话，也辣手，叫做“急煞九更天”。五更就鸡叫了呀，九更么，好吃“brunch”了。要么阿拉约在半岛？横竖横大开销了。讲人门槛精，先叫做“迭个人算盘精”。因为老早算账要用算盘。用过算盘的人都晓得，一般算盘只有13档。后来也是觉得不煞渴，就讲“迭个人精得来算盘有得廿六档”，已经翻了一倍。等到我养出来，已经是“迭个人精得来算盘有得九十六档”。算盘博物馆里确实有很长的算盘，但恐怕也没有九十六档。

到最后，这句上海俚语被精简成“门槛精到九十六”。进一家人家的门，要过九十六道门槛？侬当我刘翔啊。弄堂里总归有几个爷叔口才特别好，特别会讲故事讲戏话。介绍起来是这样的：“随便啥故事，到了伊嘴巴里，侪分七十二档，而且档档有高潮。”

今朝运道不好，上海话叫“碰着赤佬”、“碰着鬼”。最后也发展到“今朝不谈了，碰着七十二只大头鬼。” 上海人也有欢喜拍胸脯的朋友，这倒并非北京人的专利。为了显示自家路道粗，上头有人，常常讲“侬放心好唻，没问题。” 后来也发展成“侬放一百个心”，“侬放一百二十个心”，我居然还看到过“侬放一百廿四个心”，啥伊多四颗星也好嗰。

本来是“乱讲一泡”、“乱讲八讲”。“一”哪能来讪，“八”也太少了，于是叫“乱话三千”。

百、千、万，就因此而频频出现在上海俚语里。侬到处七搭八搭，认得人多。上海人嫌鄙七、八不够多，直接叫侬“百搭”。样样会一点，样样都不精，上海人讲“猪头肉三不精”。后来也变“万金油”了。

上海俚语可以通过夸大数字来追求极致，也可以用“一”来追求极致，以一当万。比方讲，“谢谢倷一家门”。