广播专辑 弄堂茄山胡700 德大西菜个味道

德大西菜个味道
辛旭光


　　南京路到成都路高架搿段，朝东一百米，是人潽出潽进个人民广场；朝西一百米，就是梅陇镇伊势丹之类个高档消费商圈。离高架东西各一百米个路段倒是勿算特别闹猛，勿过，我还是看到了像德大西菜社搿类能够代表老上海风貌个地方，心里向还是生出交关感慨。


　　记得上世纪80年代个某一天，我和未婚妻到南京西路凤翔服装店，去定做结婚搿日新娘子着个大衣。先到隔壁布店里拣了一块质地厚实个蓝颜色麦尔登呢料作，还是英国进口个口来。裁缝师傅上上下下尺寸量好，笑眯眯个翻开一本服装杂志，拨阿拉参考式样。伊推荐阿拉做埃种肩衬加厚个立领收腰喇叭裙，小姑娘蛮满意个。样子拣好，一算价钿，搿身衣裳个人工费比料作还要贵。定做个流程是蛮考究个，前前后后差勿多要两个号头，当中还来试穿过一趟，等到第三趟再来，阿拉终于拿搿件新衣裳带了回去。回去个路浪经过德大西菜社，介开心个日脚，阿拉决定进去开开洋荤，讲是讲开洋荤，但阿拉两家头只敢点也只会点罗宋汤炸猪排。吃好以后还要了杯咖啡，我埃歇比较洋盘，勿识货帮女同志多叫一份甜品。就搿能，两家头用脱五块多洋钿。


　　时隔三十几年，阿拉两介头齐巧又经过德大，决定故地重游。刚刚坐定，一个服务员就走了过来，搿是一个中年阿姨，只听伊用有点机械个语气问：“罗宋汤、炸猪排？”我心里向有眼勿适意了，经过三十几年，外国也去过了，正宗个西菜也吃过了，勿像从前勿领市面，再加皮夹子里“弹药”充足，当然要点特色菜嗰。


　　我问服务员：“亻那德大是啥个菜系啊？”伊回答我，是德国菜。乃末我就老爽气个点了牛尾汤加德国猪手。对方一听，噢哟，今朝碰着懂经模子了！伊继续问：“小杯咖啡勿加糖？”我反过来问伊：“勿是埃种一口闷个意式浓缩咖啡口伐？”哈哈，搿能两三圈暗号一样个问答下来，大家也算是相互之间搭过脉了。


　　接下去搿位服务员勿管是上菜还是换盆，侪是轻手轻脚，态度也客气交关。德大西菜个味道还是老样子，混合了蔬菜末跟芝士个牛尾汤浓郁鲜美，德国猪手分成三块，配了几片酸黄瓜，咸香馋人。德大西菜社搿块牌子到底还是硬质嗰，国营老字号个名气也勿是呒没道理嗰。


　　德大西菜社搿杯22块个咖啡，勿但是当场烧起来嗰，外加还经过了一百多年来个品质考验，曾经个才子佳人们买伊账，后来个老克拉们买伊账，我相信，现在五十岁朝上、欢喜搿一口个上海人仍旧是买伊账嗰。


　　结好账，阿拉两家头准备离开，辣两楼转弯角子浪向个等位区域看见一套硬木法式沙发。茶几收作得清清爽爽，单人沙发并排轧辣一道，看起来有点私密性，让我记起了玫瑰花个浪漫。时隔三十几年，我仍旧记得德大西菜个味道。所以，我搭太太约好还会再来嗰。