陈卫伯-汤司令的烦恼

某眼姑娘对结婚个要求越来越高，从三十六只脚到现辣个全鸡全鸭。假使结婚请眼亲戚朋友，办几桌全鸡全鸭个酒水。我看问题勿大。迭个全鸡全鸭子代价真大呀，十四寸彩色电视机，四喇叭收录两用机，多功能缝纫机，双杠洗衣机，还要一只进口货个照相机。迭五只机啥代价，大家有数。

我有个青年朋友名字叫小汤，人家侪勿叫伊小汤，叫伊汤司令。为啥呢？小汤今年三十一岁，工资五十七快，连奖金要毛毛叫七十块了。假使讲讨个老婆有五六十块工资，夫妻两家头有一百廿三十块也够了。目前社会浪个办婚事，越办越厉害了，小汤心里明白，现辣办婚事没有几千块洋钿休想休想。搿么啥地方来迭眼钞票呢？只有两个方面，一个是靠爷娘，还有一个靠节约。小汤呢勿情愿靠爷娘。弟兄三家头，伊是老大，爷娘为我操心操到三十一岁了，我还要去靠爷娘，我要靠爷娘，阿二阿三那能办法呢？爷娘一生一世没有出头了，自己节约。厂里吃饭经常迟到，小菜卖光弄只汤吃吃，三分洋钿，经济实惠。经常多吃点汤，所以人家侪叫伊汤司令。

汤司令三十一岁，还没对象。谈过朋友吗，谈是谈过个呀。有介绍人帮伊介绍一个，约好下半日五点半辣了人民公园碰头。到了五点半小汤准时赴约，介绍人领子女方来没啥闲话讲，“侬来了，夜饭吃过了�？”介绍人说，“阿拉刚刚下班就来个，啥地方吃夜饭，马马虎虎随便买点啥物事吃吃拉倒。”小汤想马马虎虎又勿好吃六只油墩子。就辣了人民公园附近一爿有名气个饭店吃饭，三个人一吃十七块八角四分。成功到勿去讲它，过一个星期介绍人来讲了，“小汤，对方考虑下来嫌比侬太长了。”小汤气啊，“侬看见我就晓得我几化长，既然侬嫌比我长，为啥吃脱我十七块八角四分。”

小汤曾经气冲冲地对我讲，“陈师傅，迭个是啥道理，男女双方碰头看电影吃夜饭侪是男同志掏腰包个，赛过乾隆皇帝封辣海个。今后起要有个规定，勿关吃夜饭看电影大家批硬柴。”

后来呢，有人帮小汤介绍一个女朋友，迭个女朋友是辣海牙膏厂工作个，明自己叫金佳美，记到蛮好记个，倒过来就叫美加净。比小汤小四岁，屋里向是个阿四头，小名叫小四。小四脱小汤谈个情投意合，对小汤为人忠厚老实，工作勤勤恳恳，生活简简朴朴。小汤对小四为人人品端正，就是有一个缺点，欢喜赶时髦。最近赶时髦赶出事情来了，啥事体，吃饱仔勿啥事体穿耳朵，穿个血哒哒滴。消毒勿严格发炎，跑到医务室看看，医务室两个医生对伊讲，“侬迭个耳朵嗨起来勿好报销个，要自费个。”被人家讥讽一番之后呀，小四迭眼气没地方出，出辣小汤身浪。小汤受了一肚皮个气讲，“侬是勿好呀，做啥要去穿耳朵呢？自己赶时髦。”小四讲，“侬也勿了解我，勿睬侬了。”“勿睬就勿睬好了。”摒了半个月还是小汤熬勿牢去赔礼道歉了。

第二年，有一天小四脱小汤讲了，“侬个事体我脱爷娘讲过了，阿拉爹爹讲个今天夜里

喊侬去吃夜饭，侬自己仔细点。”“哦。”小汤想主意点啥物事呀，伊勿懂呀。“伊勿懂我到懂呀。”没结婚上门勿叫女婿，叫毛脚。毛脚第一次浪上门空子两只是跑勿浪去个，“小汤勿懂呀，搿么我懂个呀，我哪能会懂个，我也做过毛脚个。”小汤去厂里问两个结过婚个男青年，迭两个毕业毛脚，侪是毛脚学校毕业生，向伊传经了，总而言之要送份厚礼。小汤叫硬硬头皮办了一份厚礼，拎到弄堂里已经胆战心惊了，要丈人丈母看勿中啊，丈人丈母看勿中迭点礼又勿好讨回个。总算丈人丈母看中个，事先厂里了解过个。小汤作风正派，看看人而已，定局定下来了。

定局定下了，小汤又要烦恼了，做啥，要张罗婚事，布置新房，又要马儿好，又要马儿勿吃草，又要好看点，又要便宜点，非要对自己烦恼，又要对人家结婚烦恼。做啥了，国庆节没到，伊估计一下，大概有六队要结婚，侪是伊要好朋友。六张帖子发得来吗，亲爱个听众们，㑚想想看要几花，㑚自己心里明白。总算还好，有三对参加集体婚礼个。小汤一看眼热啊，即隆重又热闹，又省钱又省力。伊脱小四讲，“阿拉还是参加集体婚礼好�，我看啰利啰嗦个事情勿要去办了。”小四讲，“阿拉阿姐办婚事也热闹个，我是参加集体婚礼，我是勿高兴。”搿也是没有办法了。

十月二日，小四个小姐妹结婚，小汤脱伊两个人以未婚夫妻个名义参加了人家个婚礼。小汤一看迭个婚礼呆脱了，酒水办三十桌，每一桌要十二个人，要三百六十个人。新官人，新娘娘门口接迭眼客人都够伊受用了。新官人虽然是一套笔挺个西装，望上去脸上枯黄，形容憔悴，眼神无光，弄个是像卖勿脱个橡皮鱼。心酸呀，啥个道理呀，一个新官人辣结婚之前粉刷房间，水门汀浪铺地板，求爷爷，拜奶奶，做衣裳，买物事，做家具，借汽车，开后门，塞香烟，忙到结婚，人噗呲，侪像孙悟空了外甥。酒席台浪个浪费是吓人啊，有两个吃个醉醺醺个，还要吃，“新官人，今朝脱侬碰一杯。”“啪啦铛”台底下啤酒瓶嘭爆掉。老酒勿够再添，新官人出足仔笑脸，“再添，再添”，硬了头皮添。迭个新官人只好笑，哭个新官人勿大有个。阿里一个新官人辣办喜酒，“谢谢侬勿要吃了，好�，我实辣吃勿消了。”吃的打起来到是听见过个。啊呀，小汤想，“阿里小青年平常辰光用铜钿一角两角等等度量，哪能办起喜事来，迭个十块头像坏脱个自来水龙头，哗哗哗哗向外头抛，赛过袋袋里生十块头。吃好喜酒闹新房，新房里布置个挺括，小四看到新房里一只十四寸个彩色电视机，“看仔黑白看彩色到底两样个，看仔彩色再看黑白到底没劲个。”闹好新房出来，小四脱小汤讲，“小汤，阿拉屋里一只十二寸个黑白我摆勿出个，阿拉去买只彩电。”“小四，小四，侬要买彩电呀，我小汤包钞票统统用光了，办酒水个钞票要等人家送礼送回来呀，还要买彩电呀。”“搿么我贴侬三百块洋钿，阿拉只十二寸个彩电卖脱，原价五百块总归有人要个。侬问侬爷娘去开开口呀？”小汤讲，“买彩电问爷娘开口开个出口�，搿么阿拉再节约点。”“没彩电阿拉结婚，我是没迭只面孔个。”咳，小汤碰到小四也没生路，搿么哪能办法呢，问爷娘开勿出口，唯一个办法只有吃汤。为了侬小四吃汤，叫汤里来水里去。

有一天，小汤辣辣我隔壁弄堂朋友屋里做生活，人家请伊吃之饭，吃了点啤酒，平常从来勿喝酒个，一瓶啤酒下去醉脱了，跑到我屋里醉醺醺个，面孔红彤彤个。“额——额——陈叔叔。”我讲，“侬吃醉了。”“没醉，一点也没醉，心里斜气清爽，我迭个叫好弄啊，工资也勿算小了，我到问侬一个问题，阿是没彩电勿好结婚个，没彩电阿是我老婆要做孤孀个，啥人昂出来个被要彩电。别人家带之帽子，有个是摘帽，有个是平反，我汤司令迭顶帽子看样子要代到漕溪路200号？”我讲，“小汤，侬吃醉了，辣哭吗？”“哭，男子汉大丈夫从来也勿哭个。”“眼泪水都趟出来个，还说勿哭？”“眼泪水，我眼睛里出汗，陈叔叔，再见，我要到厂里去吃汤了。”我讲，“小汤，侬刚刚吃过饭哪能又要吃汤了？”“现辣我吃汤吃出念头来了，三年天勿吃汤要胃气痛。”

小汤一讲完就跑，我看到小汤一跑，浮想联翩，我想啥体要拿婚事办个迭能呢，我今朝辣了电台浪向呼吁：“所以没有结婚个男女青年，㑚假使办婚事参加集体婚礼，㑚打个招呼，我陈卫伯来参加，为大家免费表演独脚戏。