张冶儿 易方朔-莲花落（大中华唱片）

阿二阿三一道大家街浪去兜，讨着仔铜钿我就好走。阿吓哩个来个哉，来仔一个漂亮大老板，倷看喏，八字眉，丹凤眼，五官正，勿推板，做生意板发财。开洋行，做买办，讨家小，板贤惠，养儿子传后代，倷福寿绵绵享富贵。叨光一只铜板来，嘿，嘿，嘿，倷个铜板忒小哉，无不边，无不眼。四面却脱交交关，随便落里用勿来，也勿好买酒，也无好买饭。常言道一钿勿落虚空地，明中去仔暗中来，请倷掉个大铜板。阿咦，勿掉铜板也勿仅，勿应该，面孔板，眼睛弹，拿个铜钿地浪甩，坍伲大家台。拿勿拿在你，不勿不在倷。本来勿对关，用勿找，穷凶极恶面孔板。看倷个样式勿像做老板，一生一世勿发财。开仔店，板要关，讨老婆，勿贤惠，姘头轧仔交交关，等辣屋里畀火烧，养狗儿子要做小瘪三，搿种啊像猪头三。倷看喏面孔圆兜兜，好像葫芦头，请倷拿伲穷人救，开开金龙手，年纪活到九十九，畀一只铜板倷譬如养一只狗。好小姐倷落里去，发发慈悲倷救救伲。倷看喏，搿种打扮真谢意，前刘海，一截齐，上身着个物华葛，下身还着个直贡呢，搿种打扮真谢意。勿是人家个少奶奶，定是公馆里向一个大小姐，开年搭倷养个雪白滚壮小弟弟。阿咦，勿畀铜板勿要说起，还要说伲叫化身浪有臭气，搿中打扮勿谢意，打扮得来个骚来兮。看见仔来个惹动气，也勿像啥少奶奶，也勿像啥个大小姐。一定是，咸肉庄浪骚娘姨，四马路[1]浪一只老野鸡，今朝讨不着铜钿真触霉头。

[1]四马路：现在个福州路。