《宋江怒殺閻婆惜》新馬師曾 鄭幗寶 附曲詞

宋江——新馬師曾

閻婆惜——鄭幗寶

婆惜：（小羅相思）（婆惜搽脂粉上唱【天上人間】）情絲紛紛，情絲紛紛，儂心真擝爭，等我搽多啲脂粉，搽多啲脂粉，插朵紅茶添風韻，我寂寞芳心，化作出墻杏，等待情郎嚟踐約，訴心悃，我日夜宛似監躉，更怨夫郎薄倖，獨眠實不慣，奴奴都尚幸有人。【花】何故紅日沉西，尚不見三郎來慰問。

（快雲雲倚門望介）（食住快雲雲上介板眼）

三郎：我做人叻到敏，最怕被人跟，偷偷去烏龍院內，安慰嗰個意中人，佢就彩鳳隨鴉，我就行正桃花大運，鬼叫亞師父佢唔識嘆，我就兜督将军，我不過弟子服其勞，呢啲乃係古人都有訓，我唔想陳倉暗渡，只為師父佢無能。（入介作鬼鼠叫狀）（白：噓，噓，噓，）

婆惜：（白：噓，噓，噓，噓乜鬼啫）

三郎：（白：師父返嚟未啊？）（一才）

婆惜：（白：冇返嚟啊）

三郎：（白：冇返嚟就好啦，阿師母啊）

婆惜：（嬌嗔白：又叫師母，我唔鬼啋你！你叫開乜嘢㗎？）

三郎：（悟白：啊，係，叫我叫心肝至啱，心肝，你個三郎嚟咗喇！）

婆閻：（怨白：我捨得躝嚟呢咩？）【西皮】我自覺愁莫禁，倚門望盼情人，怨郎負了枕和衾，儂被那相思困。

三郎：蒙姐恩情似海深，小張三，風流伴繡衾，有緣相親，偷安慰玉人，我情堅似金。

婆惜：我怕宋江起妒心，佢英雄又勇敢，為求相親，你快將計謀運，殺之也無憾。

三郎：我心里驚震，惟望靠昆，（攝白：好啦！）我實行把計運

婆惜：咁你趕快實行，效鳥同林。

三郎：（慰白：得喇，你放心啦！）【長花下句】我會扭六壬，而且心夠狠，老虎發威唔係人咁品，我係渾城嘅地膽亞過好多人，打交週時冇手震，不過念在師徒份上，凡事都讓師父佢三，如果佢將你難為，（介）我就一腳一拳，（介）我仲要將佢蝦餃擝。

婆惜：【滾花下句】為著我哋兩人嘅幸福，對佢必要辡手狠心，我忙把秋波送，一笑便投懷，你來來來

三郎：你叫我做乜嘢

婆惜：共入羅幃親近（士腔）

（內場打退堂鼓介）

宋江：（內白：列位大人請了！）

（小羅斷頭【四平調板面】宋江上介）

【京腔四平調】大老爺，打罷了退堂鼓，衙前來了宋公明，邁步兒來至在烏龍院。（收)

【撲燈蛾】（甲乙街坊上介）

甲：【白欖】真火滾，真火滾，可恨張三郎，成日咁勾脂粉，顛倒亂倫常，膽敢同個師母有輘輷，怪不得話前面有個張三郎，后面宋江追到緊，若果俾佢知，斬死佢都有份，斬死佢都有份。

乙：【白欖】開講話老人娶少妾，多數都係咁，難為宋公明，成日做老襯，我哋無謂理咁多，不若去賣酒飲，賣酒飲。（下介）

宋江：（起叫頭警介白：哎吔，方才這兩人言，前面走的是張三郎，后面趕的是我宋公明，莫非這個賤人，幹出那不端之事。（快仄才關目）且住，常言有道是非終須有，不聽自然無啊）【四平調下句】叫聲大姐你快開門。（收白：開門來，開門來，開門來）

三郎：（驚白：弊弊喇，師父返嚟添點算？死喇）

婆惜：（冷笑白：唉吔，睇你具衰樣使乜咁驚唧，頭先就揚威耀武，好心你睇下你個樣啊，慌到手騰腳震，快啲匿床底下啦衰人！）

（三郎長鑼鼓匿介）

宋江:（再拍門介白：大姐，開門！）

婆惜：（白：嚟緊喇）

宋江：（白：唓，乜咁耐㗎）

婆惜：（白：趕住去投胎咩，等人著返件衫至得㗎嘛，拍到地教震嗮，撞鬼你咩，開嗱，開嗱）

（開門介）

宋江：（白：大姐）

婆惜：（白：姐姐姐，我以為邊個添，原來你個死嘢躝返嚟，笑笑笑，笑乜嘢啊，嘻嘻嘻，鬼同你笑啊，仲唔躝入去）

宋江：（口古：哦，大姐，乜點解我往日歸來，你歡天喜地，何以今日大爺歸來，你乜嘢事幹會嬲成咁啊，嬲成咁。）

婆惜：（口古：乜我好嬲咩？）

宋江：（白：你好似食咗火藥咁）

婆惜：（白：或者個面口會木啲都唔定喇，開講話人各有志，士各有心。）

宋江：（白：咁然則亞大姐你有乜嘢心事，唔舒服又？）

婆惜：（白：心事？冇吖）

宋江：（白：有啩，我猜下你好嗎？）

婆惜：（白：好啊）

宋江：（白：大姐，你若無心里事，又何必怒生嗔啊）【四平調】宋公明，打坐在烏龍院，猜一猜大姐你腹里情，莫不是茶飯不合心？（白：係嘛？）

婆惜：（白：你估錯啦大爺，嗱，自從你買我返嚟之后，朝魚晚肉，又點會話唔滿意啊，之咁啵，如果個心唔安樂，就算食龍肝鳳膽都冇味嘅，宋大爺）

宋江：（白：咁啊，咁然則喇係呢樣嘢）

婆惜：（白：梗係唔係）

宋江：（作沉思白：啊啊啊）【四平調】莫不是衣衫，不對你的身。

婆惜：（奸笑白：好心你們囉，你又估錯喇大爺）

宋江：（白：又唔啱咩？）

婆惜：（白：嗱，我穿不盡綾羅錦繡，又點會話唔歡喜至得㗎，好多謝你添，我好多謝大爺你，時時造咁多衫俾過我著，可惜得物無所用啵，我好似咁坐監咁坐，我著俾邊個睇啊，著俾你個老鬼睇嘅唔係啊！衰嘢）

宋江：（白：哦，咁又唔係著唔啱身呢件事）

婆惜：（怒白：梗係唔係喇）

宋江：（白：啊啊啊）莫不是馬二娘，打罵了你？

婆惜：（白：真係笑話，我亞媽當我如珠如寶咁對我嘅，又點捨得打我，又點捨得鬧我）

宋江：（白：咁又唔係）

婆惜：（白：唔係囉）

宋江：（作沉思白：這不是那不是，呀呀呀！）【四平調】莫不是，大姐你，把我厭憎。

婆惜：（白：啱嗮啦，這猜咁耐而家至猜中哦！對嗱，冇錯嗱，你講得好啱嗱）

宋江：（白：啱呢咩）

婆惜：（滋油白：人生世上，除咗衣食住之外，要有精神寄托至得嘅，如果精神冇痛苦就好喇，精神有痛苦嘅否則就算住瓊樓，衣錦繡，食龍肝鳳膽，都不過如是咋宋大爺）

宋江：（白：咁唔使咁惡大姐）

婆惜：【木魚】你都算聰明絕頂，仲利害過諸葛先生，既然猜中，何妨坦白直陳，自從你賣我歸來，注定我終身抱憾，我嘅前程幸福，盡喪在你萬惡嘅黃金，剝奪我自由，仲慘過監躉，視我如玩品。【二王下句】開講話施恩勿望報，何況你是有婦使君。（序）你年紀不相登，（曲）你可謂誤己更誤人，顯見你係施恩存非分。

宋江：（冷笑白：哈哈，好一個牙尖嘴利嘅閻大姐！）

婆惜：（滋油白：過獎啫，有乜指教呢宋大爺）

宋江：（帶火白：閻惜嬌！）

婆惜：（火白：宋公明！）

宋江：（火白：閻婆惜！）

婆惜：（火白：宋江）

宋江：（火白：我把你個賤人）

婆惜：（火白：我把個老烏龜）

宋江：（重一才的的悲憤白：哼！估不到用不少金錢，只博得一句老烏龜王八，宋公明，你真是好人難做了！）【慢板下句】罵一聲閻惜嬌，你個無恥賤人，想當年你為歌女，淪落他鄉，你嚴親遭病困，可憐他死難成斂，你就葬父賣身。【古老中板】你跪在長街無人問，清晨賣到近黃昏，俺宋江上前將你問，贈銀百兩你葬嚴親，可憐你母女兩人無倚憑，我烏龍院內養釵裙，誰料你負義忘恩。【花】你反將某怨恨。

婆惜：（白：唉吔，使乜生蝦咁跳唧。）（滋油）【白欖】我尊聲亞宋大爺，何必要咁擝爭，須知買賣嘅愛情，多數都係咁，你自作多情假施恩，鬼叫你甘心愿做老襯，我與你名份竟全無，難怪我對你冇情感，不過話嗮都受過你恩，否則我趕你都有份，衰嘢

宋江：【白欖】人道青竹蛇兒口，黃蜂尾后針，兩般尤未毒，最毒婦人心。我不敢怨他人，只怨自己太過笨，我睇你一定有新歡，唔係你唔會恃成咁，居然攪到趕我扯，喂！問聲烏龍院內邊個係主人。

婆惜：（冷笑白：咁就真係笑話嘅）【長花下句】你咪沙塵，我勸你你咪沙塵，你無權干涉我權衡，我縱有新歡你亦難過問，雖則烏龍院內你係主人，之但係此屋今時冇你份，你記否當年個張屋契，分明寫住我係呢一間屋嘅主人，你被聰明誤，皆因你怕老婆，請你立即離開，免阻我與愛人嚟煙韌。（白：扯，扯嘛你）

宋江：【大花下句】你吞佔樓房尤可恕，何堪語語作逼人，罷罷罷，拂袖而行，從此以后我都不聞不問。（先鋒鈸欲下介）

婆惜：（食住攔介白：咪住，你咪行住，哦，咁就算了咯啵？）

宋江：（白：到呢個咁嘅時候，撞啱你啲咁只嘢，唔算都要算啦！）

婆惜：【三腳櫈下句】你口講無憑，須知口講實無憑

宋江：丈夫一諾便千金，試問如何方信任。

婆惜：除非你肯誓愿（一才）

宋江：（食一才白：呸！真係笑話，我宋江一不為非，二不作歹，你唔好逼人咄咄啵！要我誓愿）要我誓愿萬不能。

婆惜：（冷笑白：我識穿你櫳嘢嘅宋江）【花高句】你梗係捨不得華廈與佳人，（一才）所以我要你誓愿都唔敢。

宋江：（火白：呸！）【快點下句】連忙跪在地埃塵，倘若是公明將你恨，黃沙蓋面身首相分。【花】我拂袖而行（一才）我就高飛遠引。（頓足下忘帶公文袋介）

婆惜：（白：我，我就喂咁快就扯嗱，好行夾唔送囉啵。）

宋江：（怒白：我呸！）

婆惜：（白：我仲唔裝到你個宋江，激一激你就扯都扯唔切嘅，就連問屋都唔要喇，好！一安二樂，不單止用元寶臘燭送你個衰神扯，我仲要揾啲碌柚葉正下過嗮間屋至得㗎真係（向外介）三郎呢三郎！）

三郎：（快雲雲閃上介白：點啊？佢走咗嗱！）

婆惜：（白：走咗喇）（一才快仄才見袋介）咦咦，個衰留咗個公文袋係度添，我睇下係乜嘢先咋！原來有二兩黃金，一封書信，睇下封信講乜嘢至得。（一路看一路笑介）

三郎：（口古：唓，到底係乜嘢信啊，點解一路睇一路笑，究竟因何底蘊）

婆惜：（口古：哼！原來個死老坑不知生死，居然膽大私通梁山個班賊人。）

三郎：（一才白：嚇？真嘅？）

婆惜：白：唔信你拈去睇下吖）

三郎：（大喜）【花下句】好喇，呢回我揸住佢痛腳，可以同你日夜講心，佢通賊書（一才）在我掌中（一才）怕乜嘢打開個度房，公開同你煙韌。（開門介）

宋江：（邊花愴惶上）【大花下句】憶密函（一才）曾失落（一才）不覺暗里驚心，待我重返烏龍院中（一才）細細跟查（一才）驚怕事發東窗就會罹劫運。（入門一見作怒視介）

婆惜：（白：咦，又話唔返嚟，我睇死你唔捨得我嘅啦）

宋江：（重一才口古：呸！我之所以返嚟唔係因你啊，只因失落了多少東西，此物非常要緊。）

婆惜：（滋油口古：我知，你遺下個公文袋啫嘛，乜嘢咁緊要啫，里面只有二兩黃金，仲有一封書文）

宋江：（一才口古：弊喇，大姐你睇過就好嗱，我希望你交返那書函，至於個二兩黃金我就算俾過大姐你去買脂粉。）

婆惜：（白：你想買返封信咩，有條件嘅啵）

三郎：（口古：冇錯喇，實行要霽妥數口至好交俾佢啊，千祈唔好受昆）

宋江：（重一才）【大花下句】罵一句張三小輩（一才）你莫謂眼底無人，你嘅虧心事（一才）你仲敗倫常（一才）是否想試爺爺呢一把利刃。（重一才拔匕首插枱介）

三郎：（食住重一才突地驚白：唔~關我事，你同師母搞掂佢啦？）（閃出門介）煮鑊俾你嘆下至得！（下介）

宋江：（口古：我話俾你聽，你精精哋快啲俾返封信過我，唔係我殺死你都有份。）

婆惜：（口古：得啦！我有條件，我要你寫休書（一才）解除咗同居關係（一才）我方能交換那書文。）

宋江：（火口古：唉哋，乜你要我寫休書，混你個賬，想我宋江一生人，一不休妻，我二不棄妾，我逼寫休書，我都誓難答允。）

婆惜：（滋油白：好喇，使乜咁緊張唧，唔答允喇係罷囉，算啦，請啊）（欲下介）

宋江：（先鋒鈸攔介，白：你去邊度？）

婆惜：（白：我去休息瞓覺囉！）

宋江：（半句口古：瞓覺？咁你唔理我囉啵，我縱使我寫俾你都唔得啦，唯是堂前無筆墨。）

婆惜：（白：哦！你想揾筆之嘛，我經已準備好喇！）

宋江：（半句口古：哦！原來你個衰嘢早有此心）

婆惜：（白：你估！）【連環扣】你大我廿不相登，你以偽善欺人。我心生怒憤，就算我還恩同居求護蔭，你為乜要誤人？

宋江：你令我怒氣火燒心，悔我誤做好人，不該將你護蔭，施恩贏得你嘅良心全盡泯，你把丈夫當仇人！

婆惜：我啋！黃金存心佔得佳人，我與你同居無名份，幸福又靠誰人？

宋江：我望求尚記一點恩

婆惜：我實行另嫁三郎，快相分

宋江：【反線中板下句】切齒恨淫娃，今日一旦恩將仇報，竟改嫁文遠，嗰個小畜牲，顛倒亂倫常，我嘅面目嘆無光，今日枉種善，今日徒得恨，你逼我寫休書，哀莫大於心死，可嘆你一意孤行，今日我更恨你個賤人，你呢種潑辡心腸，你真正狼兇，太毒狠，我本把你一刀，身首雙分，可奈我昂藏七尺，不忍做出煮鶴焚琴。含怒火，寫休書（介）為換呢封密函，都要共你斬斷名和份。

（寫休書完交婆惜介）

婆惜：（接看介白：睇過，仲差一樣啵，未打手指模啵。）

宋江：（白：好啦，打埋比你）（口古：立即交換密函，呢笪地主不愿多留一陣。）

婆惜：（口古：真係對唔住喇宋大爺，你欲取回書信，請往衙中見大人）

宋江：（火介 先鋒鈸）【白欖】罵賤人，罵賤人，心太狠，你不交信要亡身，要亡身。（鑼鼓介）

婆惜：【白欖】罵聲宋公明，膽子大得很，竟將儂欺騙，你想死定想生，你想死定想生）

宋江：【快點下句】嬌花無信太欺人，怒舉鋼刀，【花】我將你來手刃

（快雁兒落殺婆惜，婆惜大叫幾聲死介）

宋江：（三笑介）【花下句】且到公堂來自首，正係丈夫做事我決不禍及他人。