5.烘山芋

5.今朝从超市里买来烘山芋，干干净净，卖相一流，还配了一只小调羹给我，要坐定下来挖了吃。动作虽然文雅，但是哪能也吃不出老早子额味道脱仔情趣了。烘山芋就是要用一小张扯得方方正正额旧报纸包勒嗨，两只手捧好，一路走一路吃，这样子才显示出对烘山芋额尊重！埃歇辰光，已经忘记脱了冷，忘记脱了烦恼，忘记脱了过往……我欢喜啃烘山芋皮浪向，经过高温从淀粉里分解出来额麦芽糖脱仔葡萄糖，这味道好吃到我“恨不得”要拿烘山芋皮一道吃下去。