牛娘剧《三美奇缘》_冯三群组唱

牛娘剧《三美奇缘》
演唱：冯三群组唱
录制：昱江

演员表
田良缘………志好梦想
刘大年………福至心灵
曾氏………周萍
刘仲英………萍水相逢
李业成………幸福之家
家人甲………冯兰
秦表中………福至心灵
陈美德………周平
何巧贤………老杜
家人乙………冯兰
秦汉光………幸福之家
丫环………萍水相逄
卢医师………幸福之家
李秀玲………亚林
公差………亚林
陈福光………幸福之家



第一场
（外景，田良缘上）
良缘唱：家住湖广襄阳地，那头居住姓田人
田坤是我亲严父，陈氏结发我娘亲
姓田良缘就是我，仲英小姐订为婚
不幸行船打断桨，连连给斗赔本银
家里田塘尽消散，双亲气死落阴云
同窗结义三兄弟，胜如手足不能分
二哥叫做陈美德，大哥表中是姓秦
毕业老师报有话，八月十二佢寿辰
要求门生同祝寿，各带未妻去一云
今日已经十一了，身上又无半文银
白：小生田良缘，只为家穷，无钱娶亲，明日是老师寿辰，要求门生各带未妻一同前去祝寿，不知未妻仲英是否答应前往，待我登门一问。
（下场）


第二场
（家堂景，刘大年与曾氏上）
大年唱：春去夏来又到秋，光阴似箭如水流
日月如梭催人老，转眼不觉到白头
姓刘大年就是我，步出堂前心见愁
六十无男单一女，就是少只香炉煲
拧桶去库田湾水，好彩得条别咧骚
曾氏唱：个只老龟鬼咁牛，煎烂镬头去核油
大田是你撒谷种，嫌我生个是女流
女儿啱啱二十岁，唔中忧佢冇人眍
白：个只死老鬼，唔藤唔藤就出八字，将女配比个只田良缘，现在田良缘穷过鬼，鬼都冇咁穷，系我老娘出主意呀，就冇会配比佢！
大年白：唉！乜谁识得佢今日会咁穷，早知三日事，世上冇穷人咯！
曾氏白：我是识，就是你冇听我讲！
大年唱：老妻说话理冇通，乜谁识佢富会穷
侬个女儿定冇嫁，我睇及早要反风
曾氏唱：肯 定 要，及早反风出牢笼
咁个女婿冇中用，要来败坏我门风
大年白：好！等我叫女儿出来，叫女儿逼田良缘写退婚！
曾氏白：那就叫女儿出罗会！
大年白：里面阿女出来先啦！ （刘仲英上，在外）
仲英唱：奴奴名叫刘仲英，闻爹呼唤出中厅
未知叫我有何事，待我入去问分明 （入）
白：见礼双亲，不知叫女儿出来何事呀？
大年唱：女 儿 你，好难养得你成人
你是双亲心头肉，听爹点呅就点呅
良缘如今落泊了，我睇及早要退婚
仲英唱：爹亲讲话冇依遵，嫌贫爱富拆婚姻
见他落泊你反悔，处世如何来作人
白：好之难讲呀！（下）
大年白：阿女……阿女……你睇你睇，啱啱讲得两句，佢入入开房里添！好啦！等那田良缘到来，侬队就逼佢写退婚！
曾氏白：冇错咯！冇愿写都逼到佢写！
（田良缘上在门外）
良缘白：行行到了岳父家门，待我将身进入！（入）见礼岳父岳母 ！
二人白：冇使咁好礼！
大年唱：女婿咁早到我家，今朝忘记来烧茶
到我家中有乜事，不妨从头说说它
良缘白：岳父岳母呀，明日系我老师生日，要求门生带未妻一起前往祝寿，我想叫仲英小姐一起前往。
曾氏白：啊哟！你是想！
唱：冇藤见过你茶箩，想同我女去拍拖
热晒嘴唇冇咁爽，乜谁是你个老婆
大年白：冇错咯，办通礼物先啦！
良缘白：岳父岳母呀，要乜嘢礼物呀 ？
大年白：娶老婆你又识，要乜嘢礼物你就冇识！老婆子，你讲讲比佢听啦！
曾氏白：要讲你就讲，冇讲就算！
大年白：好啦！你冇讲我就讲，唔中会白白送只女比佢是乜！
唱：想带我女转家中，首先礼物要办通
礼金要你一百两，还要五十熟鸡公
猪肉又要你五担，百斤双酒还要浓
轿夫要你一百脚，五音八乐作陪从
白：如果办唔到个哋礼物，你就唔使谂我只女了！
曾氏白：冇错咯！
唱：想带我女转回归，首先礼物要办齐
若是三日办冇到，我女冇系你个妻
良缘白：岳父岳母呀，现在我家道贫穷，吃盐都冇钱买了，我边哋有钱办礼物呀？
曾氏白：冇钱就冇要老婆！又学人闹咁阔气！
大年白：冇钱你就写退婚，免使阻住我女冇得嫁！
良缘白：岳父岳母呀，那迟两三年得唔得？
大年白：哎哟！讲得咁好听，迟两三年，你估我只女冇会老呀？
良缘白：老老我都要。
大年白：你是想咧！就算得我只女肯，我两老都冇会肯啵！我冇同你讲咁多，你转去谂清楚，三日之内，办通礼物来娶我女儿，不然你就写退婚！
良缘白：这个吗？（另场）
唱：有口难言出厅堂，不欢而散转回庄 （入）
上前拜别岳父母，我今一别转家堂
大年白：唔使咁好礼咯！
（田良缘下场）
大年唱：老妻计较确是真，良缘已经出门邻
一同回入后堂去，透透你我个精神
（同下）


第三场
（外景，田良缘上）
良缘唱：万吨大船沉海底，只因今日我沉沦
八月十五无月亮，冇得团圆因有云
十字街头卖柑子，无钱引我口水吞
冇得仲英心冇足，去向舅爷来借银
因我家穷无法出，被世所逼同咁蚊
白：想我田良缘，无钱娶妻，等我去向舅爷借些银子，再作道理！（下场）


第四场
（家堂景，李业成上）
业成唱：老夫名叫李业成，有钱有粮家业兴
家里钱财我富有，四海传扬我有名
外甥借我钱不少，不知何日得还清
（田良缘上入门）
良缘白：拜上舅爷一礼！
业成白：啊！系外甥到来，有礼了！
唱：外甥到来为何因，莫非又是来借银
成日走来抓背脊，抓多经经起糠鳞
良缘唱：舅爷我讲你知闻，的确又是来借银
岳父限我三日久，要我办通这婚姻
只因家穷无法出，无钱不是我妻裙
万望舅爷借比我，千祈照顾我终身
业成唱：九月种薯十月挖，画只耳鬼在墙根
你今家穷如水洗，冇信你会有妻裙
良缘白：舅爷呀，如果你肯借钱比我，我就是有！
业成白：外甥呀！冇系舅爷冇愿借，我是怕你车大炮，如果你带得人来比我见见面，就冇讲借，比我都比得几百两！
良缘白：舅爷此话当真？
业成白：真个！你舅爷讲话算数！
良缘白：一言为定？
业成白：一言为定！
良缘唱：舅爷说出我听真，借钱定要见过人
就此堂前来一别，明日带来报你闻
业成白：好好！几时带来就几时比银子！
良缘白：就此一别舅爷！
（良缘下场）
业成唱：一见外甥出门前，我条计较高过天
量佢豆豉冇芽出，冇忧去核我金钱
笑：哈哈哈……（下场）


第五场
（外景，田良缘上）
良缘唱：舅爷借钱要见人，想条办法得脱身
冇得仲英心冇足，我今愁闷冇心神
老鼠上墙逼着势，借个未妻去借银
想我大哥情义好，大嫂是个好心人
白：唉！我舅爷讲，借银要先见过人就肯借，想我大哥秦表中情义咁好，等我借大嫂去向舅爷借银正得！
（下场）


第六场
（家堂景，秦表中上）
表中唱：小生步出在厅前，开言且表我青年
姓秦汉光是我父，娘亲早故不成言
姓秦表中就是我，未妻叫做何巧贤
同窗结义三兄弟，如今分别各一边
有祸同当福同享，只讲情义不讲钱
老师寿辰约定去，冇见三弟心挂牵
（田良缘上外）
良缘白：行行到了大哥家门，待我将身进入！（入门）拜见大哥一礼！
表中白：啊！系三弟到来，有礼了！
唱：望见三弟冇精神，愁眉苦脸为何因
老师寿诞冇见你，为哥挂扣在心神
良缘白：大哥呀，你有所不知，我岳父限我三日之内，要我过礼三百两银，如今我家贫如洗，特来向大哥借些银子，未知大哥意下如何？
表中唱：三弟说出这言词，可惜来得冇着时
银子我是有少数，我要完婚话你知
白：三弟呀！钱我系有哋，但我八月十五完婚要用，又点借得比你？望三弟多多见谅！
良缘白：唉……
表中白：三弟，如果冇系我完婚要用，比我都比得百把两你呀！
良缘白：大哥呀，那，除了钱粮之外，其它可以借比我吗？
表中白：这个……（另场）三弟讲除了钱粮不借，其它仲会向我借乜嘢？好，待我答应于他！（转回）三弟呀，除了钱粮不借，其它我通通答应你！
良缘白：大哥呀，我想……
表中白：三弟呀，想借乜嘢就讲，何必吞吞吐吐？
良缘白：大哥，我想借大嫂用一日呀！
表中白：啊！借我老婆？
良缘白：系呀系呀！
表中白：哎呀！点呅会得咯？我都是昨日啱啱带转，自己都未曾……未曾完婚在，唔得唔得呀！
唱：三弟讲话冇哋谱，乜西冇借借贤妻
老婆咁亲点借得，你个说话冇合围
良缘白：大哥呀，你啱先讲除了钱粮不借，其它通通都答应我，难道大哥讲话冇算数吗？
表中白：这个……（另场）唉！难了难了！我谂怕除了钱粮冇借，其它仲会借是乜？谁知佢要借我老婆哗！我忧佢借去冇带返转，我就抓手背咯！头先唔应又应了，好啦，等我问睇佢借我老婆做乜先。（转回）三弟呀，既然我唔应又应了，那我问你，要借我老婆去做乜嘢呀？
良缘白：唉！一言难尽。我向舅爷借银，佢要见过人就借， 所以我特向大哥借大嫂用一日呀！
表中唱：三 弟 你，借妻原来为借银
此件事情答应你，但要揾个担保人
良缘白：大哥呀，咁我叫二哥陈美德作担保你话好唔好呀！
表中白：有你二哥担保就可以，不过，我讲清楚先，只是借一日，今晚黄昏时分你一定要把我未妻交还比我啵！
良缘白：得啦！请大哥放心，保证把大嫂交还比你！
表中白：唉！我只心不止跳，我就是忧你……忧你……
良缘白：冇使忧个！好，就此一别大哥，我去揾二哥先！
（田良缘下场）
表中唱：一见三弟转回归，等我动员我未妻
伴同良缘一起去，得了银子就回归 （下场）


第七场
（外景，田良缘与陈美德上）
美德唱：三弟要求你哥兄，要我大哥家内行
要我今日作担保，叫我担保作调庭
老婆咁亲借比你，你要牢记这恩情
若是借得银子了，你要及早转回程
良缘唱：大哥佢今借妻裙，二哥亦是好心人
同窗结义三兄弟，胜如手足不能分
若是借得银子转，千年不忘你深恩
美德白：好，三弟，路上不必多言，我地快走吧！
（二人同下）


第八场
（家堂景，何巧贤上）
巧贤唱：奴奴二八是青年，我名叫做何巧贤
未夫表中动员我，伴同良缘去借钱
（表中，良缘，美德同上）
良缘白：拜见嫂嫂一礼！
巧贤白：自家人，不必客气，有礼了！
良缘唱：嫂嫂伴我去借银，世间难寻好心人
二哥你今作担保，大哥应承借妻裙
（秦表中拉何巧贤另场）
表中白：未妻呀，你去就去，不使同佢拍咁近，得了银子立即就要转啵！
巧贤白：我自然会了，请未夫放心。
表中白：我就是怕……唉，整我只心……
巧贤白：哎，放心啦！
美德唱：大哥你今借妻裙，要我作个担保人
佢个老婆借比你，你个内心要作得真
表中白：三弟呀！我讲明白先，只借一日啵，今晚日落黄昏之前，你一定要将我未妻交还比我！
良缘白：大哥放心啦！
表中白：二弟呀，如果有乜嘢事，我就揾你担保人啵！
美德白：三弟呀，你一定要对得住大哥啵！
良缘白：放心吧！就此一别大哥二哥，劳烦嫂嫂伴我一程！
巧贤白：自家人，何必客气！
表中白：三弟记得啵，我只借一日，你要早哋转，免我挂念呀！
良缘白：我记得啦大哥，就此一别！ （与巧贤下）
表中唱：一见三弟出门前，共你后堂饮酒先
有了二弟作担保，才能放落我心田
美德白：大哥请！（同下）


第九场
（外景，田良缘，何巧贤上）
良缘唱：嫂嫂伴我去借银，直往舅爷家里奔
路边好景无心赏，千祈不要误时辰
巧贤唱：修游去呀慢慢倾，山路崎岖慢慢行
表中千叮又万嘱，千祈不准过夜停
良缘白：是呀是呀，嫂嫂呀，我队唔使讲咁多，快赶路啦！ （圆场）
巧贤唱：弟弟伴我过田中，田中有个捉鱼翁
田鸡捉入大拧肚，估睇边只是蛤公
良缘白：嫂嫂呀，自古话，虾无乸，蛤无公，不用讲咁多咸咸淡淡，侬队快走吧。 （圆场过桥）
巧贤唱：弟弟伴我到桥头，江水茫茫白滔滔
你冇拉我冇敢过，出手拉拉冇抱哟
良缘白：嫂嫂呀，你我明知是一对假夫妻，我唔敢拉呀！
巧贤唱：你冇拉我转返屋，我睇你会眼泪流
白：你冇拉我我就转返屋，等你自己去！（欲下）
良缘白：哎——嫂嫂且慢！（另场）唉！事到如今，冇拉都着拉啦，自己要求佢！（回）嫂嫂，我拉你，小心呀！
（拉过桥，惊险动作）
巧贤白：真系吓死人了！
良缘白：唔使怕个，过了桥，我队要快哋赶路呀！
巧贤白：慢慢去，使乜咁急呀？
良缘白：你冇急我急呀！今晚会夜咖！
巧贤唱：弟弟催我赶路程，路边芥菜叶咁青
你睇前朝梁山伯，佢与英台几好情
良缘唱：芥菜有肥叶就青，夜漂雾水心就生
你睇前朝祝英姐，害死山伯佢年青
咁个贱人要何用，装得及早放返生
白：嫂嫂呀！路上不必多讲，快走吧！
巧贤白：走就走吧！
（二人同下）


第十场
（家堂景，李业成上）
业成唱：将身步出在中厅，头上乌鸦叫连声
如今眉飞眼又跳，凶吉祸福冇分明
（田良缘与何巧贤同上在外）
良缘白：行行到了我舅爷门前，侬队入去吧！（同进）
二人白：拜见舅爷一礼！
业成白：啊！外甥咁早到来，个位就是外甥嫂呀？啊！有礼咯，有礼咯 ！（另场）哎呀！我谂怕量外甥豆豉冇芽出哗，冇知经经带外甥嫂来啵！个铺冇借都着借咯！（转回）
唱：望见织女会牛郎，银钱要借鸡要劏
今晚仲要停一夜，明日慢着转回庄
白：家人出来！
（家人甲内应上）
家人白：老爷叫我出来何事？
业成白：我外甥同外甥嫂第一次到来，你快入去烧水劏鸡，备办酒菜！
家人甲：知道了！（下场）
良缘唱：舅爷何用同咁蚊，一心向你来借银
停阵我要转返屋，无须加意费心神
业成白：点呅咁快就要转去？吃晏先，夜就在舅爷哋停，有路睡个！外甥嫂你话系冇呀 ？
巧贤白：系呀！
业成白：啊！你睇外甥嫂几识咯！
巧贤唱：既然舅爷咁盛情，暂且吃开慢再停
良缘唱：熟鸡猪肉我难吃，只怕日落会黄昏
舅爷讲话冇算数，你今冇肯比钱银
业成白：比比比！你要几多？
良缘白：舅爷呀，我要五……
业成白：要五两呀，比你比你！
良缘白：唔系五两，系五百两呀！
业成白：啊！五百两啊？
唱：外甥一讲发沌因，一次要我咁多少银
你要咁多做何用，从头讲过我知闻
良缘白：系做礼金呀！
业成白：哦！做礼金呀，好啦！里面家人，同我拿三百两银子出来。
（家人甲内应拿银子上）
家人甲：老爷，银子拿到！
业成白：那，外甥收下吧，你得了银子，个铺放心啦！
良缘白：舅爷，我放心不下
业成白：外甥，唔中是嫌少？家人，同我再拿二百两银子出来！（家人拿银上）
家人甲：老爷，银子拿到。
业成白：外甥，个次又比二百，应该放心啦？
良缘白：舅爷，我还是想，还是想……
业成白：啊？还是想？（另场）唉！我外甥真是个冇督拧，装冇会蓬个，得了五百两还是想还是想，你话难冇！（想下）啊！肯定是后生人心急，忧冇有好日子。
（转回对良缘）
业成白：外甥呀，舅爷识得你后生人个心意，你梗系忧冇有好日子，今日十三明日十四，后日十五日子最好咯！你同外甥嫂就停到十五，在我家中完婚你话几爽咯！快哋同埋外甥嫂入去吃晏先！
（强推良缘下场，巧贤随下）
（响雷闪电，家人甲上）
家人甲：雷公乒乓响冇停，倾盆大雨落地坪
一时天昏地又暗，五雷六令吓心惊
朝间落水晏间停，晏间落水到鸡鸣
良缘两老要转屋，个铺冇停逼着停
白：好呀好呀！落大雨啦！落得越大越好，越久越啱，落多一日，田良缘就着停多日，我就劏多只鸡！好啦，等我之成劏鸡就冇错！
（下场，良缘巧贤急上）
良缘唱：可恨天公咁无情，倾盆大雨落冇停
临别大哥报有话，今晚冇转实冇灵
明日同哥点交账，观音咁清难申明
巧贤唱：使 乜 狂，有我在场作担当
今晚肯定冇转了，唔中佢敢捉来劏
白：你转你就转，天又黑路又滑，我冇转个。
良缘白：你冇转我转！如果冇转去，又点对得住我大哥，就算落几大，天几黑我都要转！
（欲下，业成急上拉住）
业成白：外甥，你去边度呀？
良缘白：我要转屋咯！
业成白：转返先，现在天又黑路又滑，又落大水，点呅转得咯？如果外甥你硬是要转去个话，上屋大脚三嫂就会搬死我咯！讲我外甥同外甥嫂第一次到来都冇留停。就算舅爷个度是勒斗根，你都要停晚先！外甥嫂你话系冇？
巧贤白：系呀，系呀！
业成白：啊！你睇外甥嫂几通情达理！
良缘白：我，我好难过呀！
业成白：难难是乜？入去先！
（强推田良缘下，巧贤同下）


第十一场
（家堂景，秦表中陈美德上）
表中唱：鸡儿入六叫愁愁，冇见未妻转回头
灯草架桥牛踩断，整我只心挂两头
白：论理讲一两堂路早就应该到屋了呀！现在日落沉西都未曾见转，家人出来！
（家人乙应声急上）
家人乙：少爷叫出何事？
表中白：你立即上屋背岭岗，望睇我未妻转未曾？
家人乙：知道了。（下复上）报知少爷，我上到屋背岭岗，望去好远鬼影都冇见只啵！
表中白：仲冇见？继续去打听。
家人乙：知道！（下场）
美德白：大哥唔使急，等番一阵就转咯！
表中唱：越等只心越沉重，唔中良缘耍计谋
坐亦不安睡冇着，有如大鳖落镬头
早知冇借好地地，越思越想见心嬲
事情不知同点样，吃着芋苗抓水喉
美德唱：叫声大哥不用忧，等阵就转你门楼
大家静心等一阵，着乜罗由火咁高
表中白：啊！冇系借着你个老婆我知你是欢喜咧！
美德白：大哥呀，三家二面讲过了，照睇好快就会转咯！
表中唱：天黑冇转定冇转，照睇冇会凭黑摸
良缘借妻借过夜，你作担保点如何
美德唱：三家二面来讲真，良缘经经冇系人
咁夜冇见转到屋，我亦冇识点处分
表中白：啊！你冇识处分呀？我话你听！
唱：棺材里面出双手，今晚死要你比人
美德白：乜话？问我比人呀？
表中白：你作担保人，我冇问你问边个？
美德唱：大哥此话冇是文，自己老婆借比人
冇转关我乜嘢事，敢来几大同你屯
表中唱：良缘借事你同埋，睇你都是标生柴
将我未妻来谋夺，睇你半点冇挂怀
白：你冇同我揾返转，我就冇同你讲咁多！
美德白：唔中我怕你呀！
（二人打，秦汉光急上拦）
汉光白：哎呀！你队又争是乜，又打是乜？
唱：你俩有事冇商量，你推我打咁紧张
你作大佬都冇识，打跤两边都会伤
表中唱：阿爹听我说明分，佢来谋夺我妻裙
枉为同窗来结义，如何立地来作人
汉光白：乜话？你竟敢谋夺我个新妇？真真可恼！
美德唱：大叔冇使咁发嬲，听我慢慢说来由
你儿将妻来出借，约期冇转将我嬲
汉光白：死呀咯！我谂怕是做是乜，你个只个傻仔，点呅你咁锐？老婆都借得比人！（对美德）咁冇关你事，你转屋先啦！
美德白： 是！ （下场）
汉光唱：冇人有你咁牛精，老婆出借作人情
问你点呅得番只，世间得你咁神经
表中白：我谂怕三弟只是借用一日儿个，谁知佢会冇转，我错了，我错了！
汉光白：个铺你会识错了呀！
唱：一心想去捉大鲩，计缯未抽跳过塘
个铺自己抓手背，含脓发恶屙生疮
明日十五日子到，问你同谁来拜堂
白：我越讲火越起，你等我扇两掌！（打一掌表中）
表中唱：阿爹打我不应该，唔中良缘吃得开
汉光白：冇吃得开，那个里人呢？
表中唱：冇信良缘咁甩骨，明朝叫佢送返来
汉光白：明朝送返来？蛋家佬洗头菜去了盐咯！
唱：畜牲听我说言词，要捉良缘来毡皮
明天一早你就去，老汉随后把步移
表中白：好啦！等我入去磨利小刀先，要将佢一刀两断！
（二人下场）


第十二场
（家堂景，李业成上）
业成唱：今朝步出在厅奔，真真使我见心欣
外甥娶得外甥嫂，经经乐得我心神
马上派人去备办，等佢欢喜来完婚 （家人甲上）
家人甲：报老爷，大事不好了！外面有几个人手拿刀棍，声声话要杀田良缘啵！
业成白：有这等事吗？家人，你出去叫佢头目入来见我，另外，立即通知我外甥从后门逃走！
家人甲：知道了！（下场）
（秦表中带家人乙上）
表中白：李员外！田良缘同何巧贤在边度，你快叫佢出来，等我将佢一刀两断！
业成白：喂！望见你气势凶凶，想做乜嘢呀？
表中白：做乜嘢？你个外甥田良缘借我个老婆，讲好一日回来，谁知昨晚冇见转，居然停过夜！
业成白：你讲是乜？我外甥嫂是借你个？真系笑话！
唱：古萨拧来煲水吃，问你识羞冇识羞
冇信外甥做哋事，拧人屎怫遮面眍
白：我冇会信，我外甥嫂是借你个！
表中唱：难怪昨晚冇回头，原来甥舅来合谋
将我未妻来谋夺，你要顾住你狗头
白：我冇同你讲咁多，你快叫佢出来！
业成白：里面家人，叫我外甥同外甥嫂出来啦！
（家人甲内应上）
家人甲：报知老爷，冇见田良缘，何巧贤一时就到！（下）
（何巧贤上）
巧贤白：见礼未夫，只因天公下大雨，不能及时赶回，请未夫见谅！
业成白：哎呀，外甥嫂，拜错咯，个只冇系未夫，系鲁夫！
表中唱：一见头眍我见嬲，为何冇转讲来由
你与良缘搞乜事，为乜当日冇回头
白：家人，拿绳索出来，将这贱人绑回去！
家人乙：知道！
（家人乙将何巧贤绑起推下）
（业成上前阻拦补表中推倒在地，表中下场）
业成白：哎哟……家人出来！
（家人甲上）
家人甲：老爷你做乜嘢呀？
业成白：哎哟！佢讲我外甥嫂是借佢个，我谂怕阻住佢，谁知比佢一推跌落个度，哎哟！你快扶我入去揸些药酒！
家人甲：知道！（扶业成下）


第十三场
（家堂景）
（家人乙推巧贤和表中随上）
表中唱：今日被我绑回身，为何冇转讲原因
我个家门你败坏，要你冇死头会晕
巧贤白：我一样都冇做有，要打就打！
表中白：呀！你只嘴仲咁硬，睇你会硬过我个条棍！
唱：石头一击会出火，湿米敢逆大对头
老婆冇打冇得熟，猫儿冇打会偷油
（拿棍打何巧贤）
白：家人，将这贱人关进柴房！
家人乙：知道！（推巧贤下）
表中唱：打了老婆唔足算，还要揾见田良缘
枉为同窗来结义，一刀杀佢落黄泉 （下场）


第十四场
（外景，丫环捧饭菜上）
丫环唱：我个名字叫梅香，自思自想见凄凉
可恨表中无道理，打得巧贤佢咁伤
等我送些茶饭去，放她逃走出外乡（下场）


第十五场
（外景，何巧贤上）
巧贤唱：我今逃走出柴房，趁着天色尚未光
可恨未夫全无理，打得周身痛难当
多得梅香打救我，深恩似海不能忘
咁个丈夫要何用，睇佢同谁来拜堂
白：可恨未夫将我毒打，多得丫环放我逃走，待我暂时去林师母家中躲避一下！
（下场）


第十六场
（外景，田良缘上）
良缘唱：姓田良缘就是我，借妻今日事发生
大哥几多愤恨我，未知何日得澄清
幸得舅爷比银子，我今逃走去上京
待等功名成就日，再来重整我家庭
白：好，话不多言，待我上京应试而去！（下场）


第十七场
（家堂景，秦表中上）
表中唱：人逢喜事精神爽，我逢喜事泪双流
未妻不知何处去，个铺正会抓水喉
早知冇打好过打，免使今日咁忧愁 （家人乙上）
家人乙：报过少爷知道，揾唔见何巧贤，老爷要揾你发火啵！
表中白：家人，你快去继续寻找！
家人乙：知道！（下复上）报少爷，池塘粪坑四处都揾匀，鬼影冇见啵！乜谁叫你死博命打咯，人地打老婆，打打又摸摸，谁知你打老婆，又打又拖！点得会冇扯咯！
表中白：错了，我错了！
唱：千错万错是我错，不应毒打我妻房
咁好未妻冇姑息，手背抓成角盏窝
家人乙：相公点得你咁牛，未曾到手大棍抽
冇知是生还是死，错了正知眼泪流
表中白：未妻呀！巧贤呀，我以后冇会打你了！
唱：未妻不知去边哋，问天冇应地冇知
保证以后冇打你，情愿帮你洗衫衣
请你见谅快回转，不然我会生相思
家人乙：你生相思就相思，个铺睇你会恨迟
我有老婆冇会打，服侍更加要周知
表中白：未妻呀！
唱：未妻冇转见悲伤，越思越想见凄凉
茶饭三餐冇想吃，忆起前情恨断肠
白：未妻，巧贤呀！哎呀……（晕倒，家人急扶）
家人乙：少爷，少爷你点呀？老爷，快来呀！（汉光上）
汉光白：啊！孩儿你点样啦？
表中白：未妻！（迷迷糊糊）未妻，巧贤未妻呀！（扑向汉光）未妻……
汉光白：仔呀仔，系老豆佢！难了难了，病成咁样，家人，快快出街请卢医生到来！
家人乙：知道！（下场）
（汉光入捧碗粥上）
汉光白：孩儿，你已经几日粒米未进，快吃碗粥先啦！
表中白：未妻，我未妻返来未呀？未妻呀……
汉光白：唉！你话会难冇。
唱：蜜蜂去蝼圆眼壳，一心是想吃餐糖
新妇走开冇得使，反累只仔睡病床
白：仔呀仔，吃两啖啦！
唱：我儿不使足咁蚊，粥饭捧来你要吞
唔中你是神仙肚，再饿几日会死人
表中唱：阿 爹 你，几多苦楚肚中藏
若是冇得成双对，你儿条命见阎王
汉光唱：孤独个粒香炉拧，绝亲厅屋冇香装
孩儿若是归阴去，谁人服侍你高堂
表中白：未妻，巧贤呀……
（卢医生上，外场）
医生唱：人人叫我卢医生，四海传扬我有名
开单落药定要好，华佗再世冇咁灵
秦府家人来报我，去睇表中个病情
行行到了秦家府，入去睇过得分明 （入）
汉光白：啊！卢医生到来，快睇睇我只仔先啦！
医生白：好，待我把下脉先！
（卢医生摸脉，一惊）
医生白：啊！弊家伙了啵！员外呀，你个仔冇脉行了！
汉光白：啊！（惊）又会咁个？（看看）哎呀，卢医生，你摸着手背了，又点呅会有脉行咯！
医生白：啊！真系啵！老了眼朦，再摸过先！（摸脉）
唱：脉博睇来好正常，冇寒冇热又冇凉
我睇你儿实冇病，使乜讲得咁紧张
汉光白：卢医生，你望睇佢！剩番半条气，几日都冇吃过米了，你仲话冇病？
医生白：又会咁个？等我再摸真先！（探脉）
表中白：未妻……巧贤呀……
医生唱：望见闭眼又沉眉，口中念念出言词
咁个大病我冇识，照睇仙丹都难医
汉光白：啊！哎呀，卢医生呀，照你咁讲，我个仔冇得救了吗？
医生唱：老实讲比员外知，你个宝仔生相思
如果得个靓小姐，冇使吃药冇使医
白：员外呀，你同佢揾个靓小姐，冇使吃药都会好咯，如果冇揾得靓小姐，得件妹仔个短裤儿，拧来焗碗水比佢吃就好咯！好啦！一别员外，我又要别处而去了。
汉光白：多蒙卢医生指点，大大是封包，小小是利是，真系辛苦你了！（交利是医生接）
医生白：啊！得了冇使咯！
（卢医生下场）
汉光白：里面家人听住，你立即出街请个媒婆，同我只仔揾个靓小姐，事成之后重重有赏！另外，到二弟陈美德家中，你讲佢大哥病好重，叫佢过来探望下！
内场白：知道！
汉光白：唉呀！仔呀仔，阿爹扶你入去睡睡啦！
（扶表中下场）


第十八场
（堂景，李秀玲上）
秀玲唱：奴奴二八是年青，名字叫做李秀玲
未夫叫做陈美德，尚未团圆把婚成
早日为拜师寿旦，暂且来到佢屋停
昨日夫去表中屋，探望大哥个病情
大哥为妻生大病，闻讲九死冇一生
（陈美德愁闷上入门）
秀玲白：未夫咁早回来，大哥病情如何？
美德唱：大哥病情好儿戏，差些就要下阴司
茶饭捧来冇想吃，照睇仙丹都难医
（家人乙上）
家人乙：啊哟！你两老仲咁好倾呀！你大哥在你转后不久就死开了！
美德白：哎呀！大哥呀！
唱：家人一报见心酸，大哥死得好沉冤
我作中人惹大祸，留落世间作古搬
秀玲唱：大哥一命落阴司，两行泪水落纷飞
为着良缘借妻事，不然冇有个盘棋
家人乙：你队仲哭是乜？人死不能复生，要就去送送佢上山！
美德白：未妻啊，我今手辞脚软，不能前往，你就代我去一周吧！
秀玲唱：未夫要求你娇容，为妻应当来顺从
你冇去时我代去，免使旁人耻笑侬
美德唱：去 就 去，送了上山就回身
千祈不要停过夜，免我挂扣在心神
秀玲白：未夫放心，为妻知道了！
家人乙：快走吧！
（家人与秀玲下）
美德唱：一见未妻出门邻，自思自想泪纷纷
我在厅前无别事，入去里面透精神 （下场）


第二十场
（堂景，秦汉光扶表中上，表中晕坐在椅上）
汉光唱：我今步出在中厅，为着孩儿心不宁
坐又不安睡不着，有如大鳖落热称
一日三餐冇想吃，只心忐忑跳冇停
孤独个粒香炉拧，整我成夜想天明
若有三长和两短，叫你阿爹点张成 （家人乙上）
家人乙：报老爷知道到，陈美德叫佢未妻来了！
汉光白：啊！来得正好，快请快请！
家人乙：知道！（下场）
（李秀玲上）
秀玲白：见礼大叔！
汉光白：啊！阿玲嫂到来免礼了！
秀玲白：大叔啊，你不是讲你儿已经死了吗？
汉光白：死了半碌，仲有半碌，你叫睇佢识应冇？
秀玲白：大哥，大哥，表中大哥……
表中白：未妻……巧贤啊……
汉光白：阿玲嫂，你应声啦！
秀玲白：应乜嘢啊？
汉光白：阿玲嫂，你听睇，佢直叫未妻啊，未妻啊，你就应声啦！
秀玲白：唔应得啊！旁人会耻笑啊！
汉光白：阿玲嫂啊，救人一命胜造七级浮屠，应声冇着力个，应啦！
秀玲白：唉！事到如今，应亦难，不应亦难，为救大哥一命，我唯有应下！
表中白：未妻……巧贤……
汉光白：应会，应会！
秀玲白：未夫啊！你未妻回来了！
表中白：未妻，未妻……
唱：一梦幽幽见阎王，听闻叫声是妻房
即时还魂转世上，上前作礼理应当（欲起身）
汉光白：孩儿呀！阿爹扶你入去吃碗粥先啦！
（扶表中下，汉光复上）
秀玲唱：我救大哥似仙丹，连叫几声把阳还
立即我要回家转，冇使大叔你麻烦
汉光白：阿玲嫂，吃开晏慢转呀！
秀玲白：冇吃了，一别大叔，我先回去了！
（正欲抽脚出门，头晕状）
汉光白：阿玲嫂，你见点样？
（扶秀玲回屋）
秀玲唱：一讲转屋头就晕，转返佢屋就精神
白：真是冇停都着停了！
汉光白：阿玲嫂，我同你入去先，找个医生睇睇，明日再转！
秀玲白：多谢大叔！（同下）


第二十一场
（堂景，秦表中上）
表中唱：大病好转见精神，想我未妻美貌人
昨日救我还阳转，正是二弟佢妻群
目下秀玲又起病，应该服侍用心神
光明正大男子汉，不学偷香失礼人 （秦汉光上）
汉光白：孩儿呀！你病情啱啱好转，就到花园游荡一番，赏下花，观下景，心情会好咯！
表中白：顺从爹亲主意！
（表中下场）
汉光白：阿玲嫂，出来先啦！
（李秀玲上）
秀玲白：见礼大叔，叫我出来有乜嘢事呀？
汉光白：阿玲嫂，你病情好些哋了吗？
秀玲白：好是好哋，就是心头有哋烦闷。
汉光白：你病情啱啱好转，心情肯定会有些烦闷，不若你去我后花园游荡游荡，观花赏景，就会好咯！
秀玲白：我自己唔想去呀。
汉光白：哦！阿玲嫂，我孩儿啱啱去了花园，你同埋一起有讲有笑，就唔会闷咯！
秀玲白：既然如此，一别大叔，花园而去！（下场）
汉光唱：如今得见喜欢欣，孩儿条命得还魂
如今两个花园去，花园游荡解心神
内场喊：秦员外，秀玲病情好些了吗？佢未夫叫佢转去啵！
汉光白：秀玲已经去了花园游荡，你转去回复，话讲明日明日就转咯！
内场白：啊！知道了！
汉光唱：老夫得见喜盈盈，好花自有蜂来迎
好彩我儿得番只，冇使老夫挂心宁
现在厅中冇乜事，回入里面听风声 （下场）


第二十二场
（堂景，陈福光上）
福光唱：秀玲个只羞人虫，佢来败坏我门风
咁个贱人要何用，转亲捉佢来生凶
为老不掌家堂事，家规不严会乱笼
内场喊：报老爷，你媳妇回来了！
福光白：啊，叫佢入来！（秀玲上）
秀玲白：见礼家爹，只因奴奴患病，不能及时回家，望家爹多多见谅！
福光白：谅谅谅！我话你听！
唱：我个门风你败坏，有辱家规冇识羞
屙屎放在鼎锅肚，边个冇识臭屎煲
口说莲花都是假，快快掘出我门楼
秀玲唱：家爹讲话冇理由，讲我败坏你门楼
行得正来坐得正，光明正大转回头
福光白：哎呀，讲得咁漂亮添，你这个羞人虫，快扯，快扯！
秀玲唱：声声逼我快快扯，宁愿死在你门楼
福光白：哎呀，你扯是冇扯？
秀玲白：冇扯！
福光白：你冇扯，打也要打到你扯！
秀玲白：打死我也冇扯。
福光白：哎呀，睇你只嘴有咁硬，你等住！（下取棍上）再问你扯是冇扯？
秀玲白：冇扯！
福光白：我真冇信你只嘴会硬得过个条木棍！（打介）贱人快扯！（推秀玲出门）
从今以后，冇准再入我个家门！（关门下场）
秀玲白：无可奈何，逼着离家而去！（下场）


第二十三场
（外景，李秀玲上）
秀玲唱：可恨家爹不是人，无辜毒打我中身
口吃黄莲心里苦，几多苦水肚里吞
想我上天又无路，入地无门在今云
卜碌批皮丢落水，冤沉海底冇人闻
一对鸳鸯分两路，两行泪水落纷纷
双膝跪落地坭上，禀上三光日月闻
非是奴奴学坏品，家爹逼害我中身
我要投江跳水死，免使世间人传人
白：想我李秀玲，含冤负屈，双亲在堂，养育之恩未报，真使奴奴自心难忍呀！
唱：双亲在上听明分，你女无颜见双亲
就此江边来别却，舍身条命投江奔
（此时公差引田良缘中状元上）
良缘白：今日告假还乡，行行到了江边之地，听闻有人悲啼苦切，人来，上前问过明白！
公差白：遵命！（对秀玲）这位小姐，因何在此悲啼苦切，请道其详。
秀玲（悲哭，不答话）
公差白：报知状元爷，问佢应都唔应啵！
良缘白：哦！可能佢有重大冤屈，待我上前问过！（近前）这位小姐，你为何在此悲啼苦切，请道其详。
秀玲白：奴奴是生是死，关你何事？
良缘白：关是唔关，我见你如此悲伤，想必定有重大冤屈，你若讲出来，或者我能帮你伸冤都未定咖！
秀玲白：你要我讲都可以，你要答应我个条件。
良缘白：哦！既然如此，你个条件我通通答应，你且讲来。
秀玲白：好，一言为定！
良缘白：一言为定！
秀玲唱：状 元 你，条条条件你依遵
我要拜你作夫主，你要娶我作妻裙
良缘白：这个……（另场）事到如今，自古话救人一命，胜造七级浮屠。待我暂时答应于她。（转回）人来，将这位小姐带回我家，再叙根由！
公差白：遵命！（三人同下）


第二十四场
（堂景，刘大年与曾氏上）
大年唱：夫妻步出在中厅，为着女儿挂心宁
人家个个都嫌约，讲侬只女会反生
再过几年冇成事，狂过大鳖落热称
曾氏唱：个只老龟死柴头，忧我只女扎排流
如今啱啱二十岁，唔中忧佢冇人眍
大年白：你冇忧，我忧呀！（家人上）
家人白：报员外，我今日出街，撞见个老伙记，佢讲帮田良缘备办货物，讲是田良缘高中状元，回乡要起大屋，又要娶老婆啵！
大年白：啊！系真嘅？
家人白：梗系真个啦！
曾氏白：我冇会信，田良缘咁穷，佢会中状元，家人，快入去做工。
家人白：是！（下场）
大年白：婆子，你冇信我就信，总是当初你讲这讲那，如今人家田良缘中了状元，如果得返佢做侬女婿你话几好！我就是状元个外老。为就为你！
曾氏白：啊！样样都赖我？
大年白：冇赖你赖边个？神楼屙屎赖鬼呀！
（刘仲英上）
仲英唱：双亲不用你来争，只怪爹娘冇眼睛
你来怨我我怨你，大家作事冇公平
人家短处要睇见，不能重富贫就轻
良缘的确高中了，双亲送女结和鸣
过去从来未表态，可能佢会念旧情
若是别人敢抢嫁，觅开面皮同佢争
大年白：阿女，要送你就叫你娘亲送，我实是冇面见人了 。
曾氏白：你送就送，冇送就罢！
大年白：好啦！你冇送我就送。好彩得返个状元外老做！
曾氏白：死老鬼，你送女儿到佢屋，佢冇愿要你要逼到佢要，闻冇？
大年白：你就是得把嘴！你在家料理家务，等我送阿女去，女儿，快走！
（大年与仲英同下）
曾氏唱：夫送女儿过田庄，强迫良缘佢成双
我在厅前无别事，听住女儿吃喜糖（下场）


第二十五场
（外景，大年与仲英上）
大年唱：我送女儿过田庄，心中有事心里狂
到了门口冇敢入，阿女自己去寻郎
白：女儿呀，到了良缘屋咯，你自己入去啦，我是冇敢入了，谂谂自己仲有乜面目见佢。
仲英唱：阿爹做事冇三思，重富嫌贫把人欺
总冇听听阿女讲，不然冇有个盘棋
你冇入去就转屋，只着摸厚我面皮
大年白：阿女呀！你入到屋，无论如何逼到佢要闻冇？
仲英白：女儿知道。（下场）
大年白：唉！谂谂真系衰咯。到了门口都冇敢入，茶都冇得饮杯。等我回家听候女儿风声就是！（下场）


第二十六场
（内景，田良缘，刘仲英，何巧贤，李秀玲同上）
三人白：拜上未夫一礼！
良缘唱：三位小姐请坐下，闻你讲出头皮麻
三个都是一样叫，叫我应得边一家
仲英唱：麻 乜 西，我是你个未婚妻
自小与你配婚约，八字合来十足齐
良缘唱：齐 乜 西，仲英你就不使提
想我落泊那时阵，限我三日娶你回归
白：刘仲英，想当初你爹逼我退婚，你沉默无言，半句冇出声。如今我状元高中，你又来兜我？休想！
巧贤，秀玲白：
丑丑丑，人家冇要仲来兜！
仲英唱：乜谁丑啊乜谁羞，你俩都是落漯牛
你有未夫你冇嫁，两边吃来两边偷
巧贤，秀玲合唱：
乜谁丑啊乜谁羞，仲英是只反骨牛
见夫落泊你反悔，见夫出头又来兜
巧贤唱：仲英是只长颈鹅，装得及早要放梭
见夫落泊你反悔，状元冇要反头婆
应我巧贤就冇错，我与状元好拍拖
良缘唱：巧贤不要讲咁多，你是大哥嗰老婆
小生如若应了你，如何对得我大哥
我是借你用一日，点呅讲得是老婆
秀玲唱：是 冇 错，你是大哥嗰妻裙
应我秀玲就冇错，三圩六市人知闻
良缘唱：冇 应 得，你是二哥个妻裙
二哥到处揾冇见，快哋回家就是真
秀玲唱：真 就 真，江边跳水乜谁人
我要投江你打救，应下条件同点呅
良缘唱：哥讲出来哥道理，嫂讲出来嫂文章
去请大哥二哥到，大家到来慢商量
巧贤，秀玲白：唔使去呀！
仲英白：快哋去呀！
（良缘下场）
三人合唱：
不止爽呀不止威，大家想作状元妻
三月鹧鸪鸡好打，点呅你冇落力啼
仲英唱：你俩听我讲端详，大家有事慢商量
多人指龟会成鳖，狗多就会咬死羊
不若大家逼佢要，婶母又兼状元娘
二人合：仲英头辫拖到地，你条计较确是长
侬队三人逼佢要，大家都是状元娘
仲英白：好啊，我自小出八字，我就为正室，你俩为偏房。
巧贤白：你是想！我年纪最大，我为正室。
秀玲白：等状元到来，我做拜先，我就为正室！
（良缘，表中，美德同上）
三人同拜：拜上未夫一礼！
（三人都是拜田良缘）
良缘白：拜错啦，拜错啦！你俩个未夫在个边来！
巧贤秀玲二人白：
我冇会拜佢啵！
良缘白：大哥二哥呀，佢冇拜，你地就拜啦！
表中美德白：啊？要我地拜佢呀？老公拜老婆，衰死啵！
二人合：勒竹表呀颠倒拖，哪有老公拜老婆
老婆若要老公拜，娶转一世受奔波
良缘白：拜啦！薛丁山三拜九叩樊梨花都是咁咯，拜啦！
二人白：冇会拜！
良缘唱：大哥不用谂咁多，好公自有好老婆
佢冇拜你你就拜，夫妻尊重又如何
美德白：大哥，你饿老婆你就拜啦！
表中白：事到如今，你冇拜我就拜，好彩拜拜得返个老婆。
（上到巧贤跟前跪下）
唱：上前跪拜我娇妻，知错后悔我恨迟
想我未妻恩和爱，难分难舍又难离
破镜重圆成美事，未妻莫执那前时
在你面前作保证，以后作事会三思
白：未妻，拉拉起身啦！
巧贤白：冇拉！
唱：早知我是你妇娘，为乜打得我咁伤
好得丫鬟放我出，得返条命转还阳
大婆打米细婆煮，凄凉过了又凄凉
无可奈何无哥奈，被逼逃走往他乡
今日面前来跪我，有手冇拉瘦狗强
如今知错后悔了，留你膝头跪出浆
表中白：为夫知错了，未妻拉拉起啦！
巧贤白：要我拉你，休想！
美德（另场）望见大哥都去拜了，迫于无奈着去拜啦！
（上到秀玲跟前跪下）
唱：上前跪拜我妻裙，望妻睇开两三分
我在芸窗来习读，我爹打你冇知根
总是我爹无道理，害得未妻咁沉沦
在妻面前作保证，以后作事我认真
夫妻互相来敬重，望妻把我拉起身
秀玲白：冇拉！
唱：大鹰落地拜鸡儿，纸扎观音假慈悲
你爹堂前来打我，装聋作哑诈冇知
几多苦楚说不尽，两行泪水落纷飞
脚踏拎来筑河水，冇人有我咁凄悲
多得状元来打救，才得见面在今时
要我拉你实冇有，留你膝头跪脱皮
美德白：未妻，拉拉起啦！
秀玲白：冇拉！
（仲英上到良缘跟前跪下）
仲英唱：双膝跪落地坭尘，深深拜上我夫君
总是我爹无道理，嫌贫爱富拆婚姻
非是奴奴嫌弃你，望夫睇开两三分
未夫莫执前时事，请把未妻拉起身
白：未夫，拉拉起啦！
良缘唱：仲英讲话是假精，你个内心不象形
你爹逼我退婚约，沉默半句冇出声
几多苦楚说不尽，两行泪水落冇停
今日状元高中了，在我面前假知成
今日思前又想后，原谅你今是年青
白：未妻，起来吧！（拉起仲英）
仲英白：多谢未夫！
良缘白：两位嫂嫂呀，以前仲英嫌弃我，我都原谅佢咯，过去之事就让它过去，望嫂嫂将大哥拉起吧！
巧贤（另场）白：
望见三弟已把佢未妻拉起，状元冇我份了，等我也把我未夫拉起，得返只老公！（转回拉表中）未夫起来！
表中白：多谢未妻！
秀玲（另场）白：
望见大嫂都将大哥拉起了，反正状元冇有我份，等我也把我未夫拉起，得返只老公。（转回拉美德）未夫起来吧！
美德白：多谢好未妻！
六人合唱：
同窗结义情谊长，有如前朝刘关张
结义有如亲骨肉，可惜就是冇同娘
蓝田种玉几恩爱，今晚结成好鸳鸯
（众造型）


剧终