20200810顶笑笑小王子沪语

辣盖我六岁个辰光，有一趟子我辣盖一本书里厢看到一副不得了的图片。搿本书是讲原始森林的，名字叫《真实的故事》。书里厢画个是一条蟒蛇辣盖吞一只野兽。

书里厢讲，蟒蛇是活轮吞拿伊个猎物吞下去个，是勿嚼个。随后，伊拉就勿再动了。伊拉会得花六个月个辰光用来消化食物。

之后，我想了交关关于森林冒险个事体，再拿了一只彩色铅笔，画了我人生个第一幅作品。我个作品一号。

我拿我的杰作拨大人看，问伊拉我的作品吓人伐？

伊拉回答我讲，为啥体伊拉要吓一顶帽子呢？

我画个勿是一顶帽子，是一条蟒蛇辣盖消化一头大象。接下来，我画了蟒蛇个内部结构图，为了让搿眼大人晓得我画个是啥。伊拉老是需要阿拉帮伊拉解释。搿是我个作品两号。

搿眼大人让我省省，勿要再画啥个蟒蛇个画了。伊拉让我拿心思放了地理、历史、算术告语法个学习高头。搿就是为啥，我辣盖六岁个辰光，放弃了我去当一个画家个梦想。我作品一号告作品两号个失败让我灰心丧气。搿眼大人自家啥侪不晓得，对阿拉小人来讲，帮伊拉解释是一桩蛮头大的事体。

我不得不重新选了另外一只职业，去开飞机。我世界各地多多少少侪有飞过。而地理辣盖搿个辰光确实帮了我大忙。我看一眼就晓得阿里搭是中国，阿里搭是亚利桑那。假使辣盖夜里厢迷路，地理真个老有用个。

辣盖我个人生过程当中，我帮昂硬昂字个人侪打过交道，我辣盖大人的圈子里厢生活了交关辰光。我对伊拉有老深入个观察。但是，搿个并没让我对伊拉个看法有啥个改观。

有辰光会得碰着有种大人看上去蛮拎得清的。搿辰光，我会得拿我囥辣盖的作品一号拿出来，测试一下伊是真个拎得清还是假个拎得清。但是每一趟个回答侪是“搿个是一顶帽子”。之后，我就勿会帮伊讲蟒蛇个事体，勿会帮伊讲原始森林个事体，还勿会帮伊讲星星个事体。我会得照顾伊，帮伊讲桥牌、高尔夫、政治告领带。辣盖搿个辰光，大人会得老开心认得像我搿能介懂道理个人。