粤语日常自由练习~拍拖难

粤语练习

出演声音：小七，小飞侠，沈生，西西

A：见你成日喺度笑口吟吟咁，又睇微信又复微信梗系同阿成哥烟韧紧啦，

咪揿烂手机先好喎，系咪约咗佢去撑台脚啊？

B：边有啫，好心你唔好四围唱生晒啦，我同佢手仔都未拖过噶。

A：老友鬼鬼，人少少，认左佢咪好咯，呃我做咩啫，个个都知你哋两个拍紧拖，得我未知噶咋，怕丑啊？

B：唔系我唔想认，系我阿妈嫌佢样衰又冇钱，唔多肯我同佢行。

A：阿成哥咁靓仔仲话样衰，衬港姐都有突啦，你同佢好倾又好夹几登对啊，两个人喺埋一齐开心就得啦，钱可以慢慢搵噶。

B：我都知样衰摆明系攞嚟讲嘅啫，问题系我阿妈讲，而家嘅世界冇钱，连间屋都买唔起，

点学人哋拉埋天窗啊？

A：你都咪话啊，你阿妈面懵心精讲得啱噃，我同以前嘅男朋友就系因为呢个原因，

成日嗌交掟咗煲，又箍翻好，卒之都斩缆甩拖。

B：咁你而家点啊？好似成日都好开心咁嘅。

A：我拍紧散拖咯，今晚同阿茂去晒下月光，听朝又同阿水去掹下草，

后日就同阿妈去同世伯嘅海龟仔相睇，都几唔得闲噶。

B：唔系啊嘛？咁都得？好似你咁样搵老公法，容乜易痴咗线噶。

A：经已黐黐哋啦。都系讲翻你好D啦，你哋千祈唔好对你阿妈有所不敬啊，

就下佢老人家，唔掂就氹到佢掂。

B：我都系咁谂，有情饮水饱，讲心唔讲金啱啊嘛，

我同阿成哥咁后生，大把机会搵钱啊，未搵够钱咪喺屋企黐饮黐食先咯。

A：租翻个细细哋，平平哋嘅屋住下都得嘅。和谐好似糖黐豆咁嘅二人世界生活啦。

B：我哋公司嘅阿英而家都系过紧二人世界嘅生活啫。佢为咗钱去做人嘅二奶，

又派糖又请饮，跟住就日日孭住个名牌手袋着到鬼火咁靓去行街，

后尾生咗个仔添。点知俾个大婆打咗上门，呢匀惨啦，

老公走咗佬，净翻两仔乸喺处捱世界。

A：冇咗老公泼扇一样系咁凄凉。该煨咯。

监製：瑞丽伊人 

文案：何美欣  

编辑製作：xinxin 

 出品：粤语博物馆

欢迎关注公众号~粤语博物馆，

微信~Ruilimeixin（瑞丽美欣拼音）